„ქართული ოცნება“ გადასულია მოსწრებაზე, დროზე მიიტაცოს ქონება, იციან, რომ ბოლო დღეებს ითვლიან და ამას მოყვა ეს დაპირისპირება აქიფ ისმაილოვსა და „ქართული ოცნების“ გავეშებულ დეპუტატებს შორის , – ამის შესახებ „ნაციონალური მოძრაობის“ წევრმა, დავით კირკიტაძემ განაცხადა, რითაც გამოეხმაურა გარდაბნის საკრებულოში საკრებულოს უმრავლესობისა და „ნაციონალური მოძრაობის“ წარმომადგენლებს შორის მომხდარ ფიზიკურ დაპირისპირებას.

კირკიტაძის განმარტებით, გარდაბნის მუნიციპალიტეტის სოფელ ქესალოში, სკოლის შესასვლელთან, სადაც „ნაციონალური მოძრაობის“ ანტიკორუფციული სამსახურის, ასევე, „ნაციონალური მოძრაობის“ საკრებულოს წევრები იმყოფებოდნენ, დაპირისპირება მოხდა, ფაქტი კი საჯარო პარტიის საკრებულოს წევრებმა დღეს გახადეს საჯარო.

დავით კირკიტაძის განმარტებით, მხარეებს შორის დაპირისპირება სკოლის ტერიტორიის გასხვისების საკითხს მოჰყვა, რისი წინააღმდეგიც „ნაციონალური მოძრაობა“ იყო.

„უკვე დღეს, გარდაბნის მუნიციპალიტეტის საკრებულოზე მოუწიათ ამ სკოლის შესასვლელი ტერიტორიის ნუსხიდან ამოღება. ჩვენი საკრებულოს წევრები 24 საათიან რეჟიმში მზად არიან, იმუშაონ ხალხის ინტერესების დასაცავად, რადგან მსგავსი არ დაუშვან, „ქართული ოცნება“ გადასულია მოსწრებაზე, დროზე მიიტაცონ ქონება, იციან, რომ ბოლო დღეებს ითვლიან და ამას მოყვა დაპირისპირება აქიფ ისმაილოვსა და გავეშებულ „ქართული ოცნების“ დეპუტატებს შორის, მაგრამ ფაქტი არის ერთი, მართლა მისალოცია ქესალოელებისთვის და ნაზაროლელებისთვის, რომლებიც სარგებლობენ ამ სკოლით, რომ სკოლის შესასვლელი დარჩება ისეთივე როგორიც იყო და არა ისეთი, როგორიც უნდა „ქართულ ოცნებას“ – გადაქცეული სავაჭრო ცენტრად, რომელიც ხელს შეუშლიდნენ ბავშვებს სკოლაში შესვლა-გამოსვლაში“, – განაცხადა დავით კირკიტაძემ.

საქართველოს პარლამენტის პლენარულ სხდომაზე რამდენიმე წუთის წინ ხმაური და სიტყვიერი დაპირისპირება იყო.

„ქართული ოცნებისა“ და ოპოზიციის წარმომადგენლებს შორის ცხარე კამათი საპარლამენტო უმრავლესობის წევრის ირაკლი ბერაიას მიერ ოპოზიციონერ დეპუტატ თეონა აქუბარდიაზე გაკეთებულ განცხადებას მოჰყვა.

ხატია დეკანოიძემ განაცხადა, რომ ირაკლი ბერაიასა და ალუდა ღუდუშაურის მიერ ანა წითლიძისა და თეონა აქუბარდიას მიმართ გაკეთებული განცხადებები არის სექსისტური, ქალების მიმართ შეურაცხმყოფელი და ძალადობრივი, რაც რეაგირების გარეშე არ უნდა დარჩეს.

ხატია დეკანოიძის მსგავსად, კოლეგები დაიცვა იაგო ხვიჩიამ, მან მოითხოვა, რომ ირაკლი ბერაიამ სხდომათა დარბაზში ქალი დეპუტატის მიმართ ბოდიში მოიხადოს.

ოპოზიციონერი დეპუტატების მიერ გაკეთებულ განცხადებებს პარლამენტის თავმჯდომარე შალვა პაპუაშვილი გამოეხმაურა. მან იაგო ხვიჩიას მოუწოდა, მორალური პედესტალიდან ნუ ისაუბრებს. სპიკერმა ისიც თქვა, რომ პიროვნულ შეურაცხყოფაზე თავად იღებს შენიშვნას, ვინაიდან, დეპუტატისთვის გამოსვლა დროულად უნდა შეეწყვიტა.

ამ განცხადებების შემდეგ, სხდომათა დარბაზში სიტყვიერი დაპირისპირება იყო იაგო ხვიჩიას, ირაკლი ქადაგიშვილსა და მამუკა მდინარაძეს შორის.

ხაზგასმით ვამბობ, არ იყო მოსაწონი გარკვეული ფრაზები ჩვენი მეგობრების და თანაგუნდელების მხრიდან, მიუხედავად იმისა, რასაც მოჰყვა ეს ყველაფერი, – ამის შესახებ მამუკა მდინარაძემ პარლამენტის პლენარულ სხდომაზე განაცხადა, რითაც გამოეხმაურა დღევანდელ პლენარულ სხდომაზე უმრავლესობის წევრების მხრიდან ქალი დეპუტატების მისამართით გაკეთებულ რეპლიკებს და განცხადებებს.

მისივე თქმით, ყველას მოეთხოვება დაიცვას ეთიკა, კულტურა და მათ შორის, ტყუილებით და შეურაცხყოფებით არ გამოიწვიოს სხვა.

„მოდით, ვთქვათ სიმართლე და სიმართლეს ჩავხედოთ თვალებში – ნამდვილად არ იყო მოსაწონი ის რეაქციები, რაც მეორე მხრიდან სერიოზულ პროვოკაციებს მოჰყვა, თუმცა ეს შედარებით მეორეხარისხოვანი ხდება, როდესაც მართლაც შეიძლება ეთიკის რაღაც ნორმები ირღვევა და ცოტა ზედმეტი მოგვდის ხოლმე თითოეულ ჩვენგანს და ეს უნდა ვაღიაროთ. მგონია, რომ ჩვენი თანაგუნდელები ემოციური ფონი როცა ჩაცხრება, ამას გააკეთებენ, დარწმუნებული ვარ.

ნუ მიიღებთ ისეთ პოზიციად, რომ ვინმე ამართლებთ, პირიქით. ხაზგასმით ვამბობ, არ იყო მოსაწონი გარკვეული ფრაზები ჩვენი მეგობრების და თანაგუნდელების მხრიდან, მიუხედავად იმისა, რასაც მოჰყვა ეს ყველაფერი.

ყველას მოეთხოვება დაიცვას ეთიკა, კულტურა და მათ შორის ტყუილებით და შეურაცხყოფებით არ გამოიწვიოს სხვა, თუმცა გამართლება არაა“, – განაცხადა მდინარაძემ.

ცნობისთვის, პარლამენტის პლენარულ სხდომაზე საპარლამენტო უმრავლესობის დეპუტატმა ირაკლი ბერაიამ პარლამენტის დამოუკიდებელ დეპუტატ თეონა აქუბარდიას შეურაცხმყოფელი რეპლიკებით მიმართა. გარდა ამისა, სიტყვიერი დაპირისპირება იყო ალუდა ღუდუშაურსა და ანა წითლიძეს შორისაც. წითლიძემ ღუდუშაურს „დებილი”, “ქართული ოცნების” დეპუტატმა კი პარლამენტის ოპოზიციონერ წევრს “ბანძი” უწოდა: „შენ ხარ ბანძი ადამიანი, ჩვეულებრივი ბანძი ქალი ხარ”, – მიმართა ღუდუშაურმა წითლიძეს.

აშშ დიდ მნიშვნელობას ანიჭებს საქართველოში მომავალ, 2024 წლის საპარლამენტო არჩევნებს. ჩვენი პარტნიორები დააკვირდებიან არჩევნებს, წინასაარჩევნო გარემოს და მათი მხრიდან რეაგირება მცირე გაყალბებასაც მოჰყვება , – ამის შესახებ „სტრატეგია აღმაშენებლის“ საგარეო მდივანმა, სერგო ჩიხლაძემ განაცხადა, რითაც შეაფასა აშშ-ში გამართული უმაღლესი დონის შეხვედრები.

როგორც „სტრატეგია აღმაშენებლის“ მიერ გავრცელებულ ინფორმაციაშია აღნიშნული, „ერთიანი ნაციონალური მოძრაობისა“ და „სტრატეგია აღმაშენებლის“ კოალიციის ერთობლივმა დელეგაციამ აშშ-ში სამუშაო ვიზიტი დაასრულა. მათივე განმარტებით, ჩიხლაძემ ვიზიტი შეაფასა და აღნიშნა, რომ აშშ ყოველთვის მზადაა ქართველი ხალხის დასახმარებლად.

„ჩვენს დელეგაციას მაღალი დონის შეხვედრები ჰქონდა აშშ-ის სენატში, კონგრესში, სახელმწიფო დეპარტამენტში, საერთაშორისო სავალუტო ფონდში. ასევე, შევხვდით ექსპერტულ წრეებს და კვლევით ორგანიზაციებს, რომლებიც ამერიკის საგარეო და უსაფრთხოების პოლიტიკას განსაზღვრავენ. მთავარი რაც შეიძლება ითქვას დასკვნის სახით არის ის, რომ აშშ ყოველთვის იდგება ქართველი ხალხის გვერდით. აშშ დიდ მნიშვნელობას ანიჭებს საქართველოში მომავალ, 2024 წლის საპარლამენტო არჩევნებს. ჩვენი პარტნიორები დააკვირდებიან არჩევნებს, წინასაარჩევნო გარემოს და მცირე გაყალბებასაც მოყვება რეაგირება მათი მხრიდან.

მათი მთავარი გზავნილია რეფორმები, რეფორმები და კიდევ ერთხელ რეფორმები. 12 რეკომენდაცია შესასრულებელია, ანტიდასავლური, ანტიამერიკული და ანტიუკრაინული პროპაგანდა მიუღებელია და ეს უნდა შეიგნოს ხელისუფლებამ. ჩვენი ამერიკელი მეგობრები წუხან და არ მალავენ უკმაყოფილებას „ქართული ოცნების“ ხელისუფლების მიერ USAID-ზე და ამერიკულ ორგანიზაციებზე მიტანილი იერიშის გამო. აღსანიშნავია, რომ ჩინეთთან დადებული სტრატეგიული პარტნიორობის ხელშეკრულება და მასში ასახული პოლიტიკური გზავნილები გარკვეულ შეშფოთებას იწვევს პარტნიორებში.

რაც მთავარია, აშშ მზადაა, რომ საქართველოს ყველა სახის დახმარება აღმოუჩინოს და უფრო მეტიც, ორმხრივი ურთიერთობების გაღრმავებისკენ მოგვიწოდებენ, რის სურვილსაც არ ამჟღავნებს საქართველოს ხელისუფლება. დღეს რომ საქართველოს პატრიოტი და ქვეყნის ინტერესებზე მზრუნველი ხელისუფლება ჰყავდეს, წარმოუდგენელი წინსვლა იქნებოდა აშშ-თან თავისუფალი ვაჭრობის, ვიზების გამარტივების, პირდაპირი ფრენების, სასწავლო და სხვა პროგრამების გაღრმავების მიმართულებებით, ასევე უსაფრთხოებისა და თავდაცვისუნარიანობის კუთხით.

აშშ-თან თავისუფალი ვაჭრობა, ვიზების გამარტივება და პირდაპირი ფრენები სრულად რეალურია პატრიოტი და ეროვნული ხელისუფლების პირობებში“. – განაცხადა ჩიხლაძემ.

ცნობისთვის, „ერთიანი ნაციონალური მოძრაობისა“ და „სტრატეგია აღმაშენებლის“ კოალიციის ლიდერები გიორგი ვაშაძე, თინა ბოკუჩავა, პეტრე ცისკარიშვილი, სერგო ჩიხლაძე და ალექსანდრე კრევო-ასათიანი 23-28 ოქტომბერს სამუშაო ვიზიტით აშშ-ში იმყოფებოდნენ.

ბოლო დროს დავიწყე ზოგიერთი ტელევიზიის ყურება და სიმართლე გითხრათ, შეუძლებელი იყო იმ ბოღმის, აგრესიის და შურის მოსმენა, რომელიც ჩვენი ოპოზიციონერი კოლეგების მხრიდან მოდიოდა. იმდენად, რომ ოპოზიციური არხების ჟურნალისტებიც კი გადარიეს რიგ შემთხვევაში, იმდენად დიდი ღვარძლი მოდიოდა მათი მხრიდან იმასთან დაკავშირებით, რომ „ქართული ოცნების“ ხელისუფლების დროს არ სრულდება „ქართული ოცნების“ დაპირება ევროკავშირში წევრობის კანდიდატის სტატუსის მინიჭებასთან დაკავშირებით, – განაცხადა საპარლამენტო უმრავლესობის წევრმა, გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ პლენარულ სხდომაზე.

მან ასევე ოპოზიციონერ კოლეგებს მოუწოდა, რომ იმ არხებს უყურონ, რომლებიც აშუქებენ ყველაფერს, რასაც მთავრობა და საქართველოს პარლამენტი ახორციელებს.

„თქვენ მუდმივად დაკავებულები ხართ ადამიანების ბულინგით, ქმნით რაღაც ახალ ფორმატებს რაც მახსენებს 37 წელს, „პლაშიანი“ კომუნისტები რომ დადიოდნენ და ხალხის მტრების სიას ადგენდნენ. ოჯახებს აბულინგებთ და უფრო მეტიც, ბევრი სახელმწიფოს კრიტიკა მოვისმინეთ თქვენგან იმიტომ, რომ თქვენ ვიღაცები არ მოგწონთ. თქვენ არაფერი არ მოგწონთ და გწყინთ, რომ „ქართულმა ოცნებამ“ მოახერხა და ჩვენ მივიღეთ ვიზალიბერალიზაცია, ჩვენ მოვახდინეთ ასოცირების ხელშეკრულების რატიფიცირება, სწორედ ჩვენი ხელისუფლების დროს გავხდით ენერგეტიკული გაერთიანების წევრები, ვაჭრობა დავიწყეთ ევროკავშირთან და ახლა მივიღებთ კანდიდატის სტატუსს, მე ამაში ღრმად ვარ დარწმუნებული“, – განაცხადა მაია ბითაძემ.

მისივე შეფასებით, ოპოზიციონერ კოლეგები კანონშემოქმედებით პროცესში არ მონაწილეობენ და ისიც კი არ იციან, რომ მხოლოდ გარემოს დაცვის სფეროში 200-მდე სამართლებრივი აქტი და 11 სრულიად ახალი კანონია მიღებული.

„ქართველი ხალხი ხედავს იმას, რომ ოპოზიციას არც მშვიდობა უნდა, არც ამ ქვეყნის ეკონომიკური წინსვლა ახარებს, მარტო იმით არის დაკავებული, რომ სამშობლოს დისკრედიტაციას ახორციელებს“, – განაცხადა მაია ბითაძემ და ოპოზიციას მიმართა, რომ როდესაც კანდიდატის სტატუსს მივიღებთ, შეეცადონ პატრიოტული გრძნობა აამოქმედონ და ერთად იზეიმონ „ეს ძალიან დიდი და მნიშვნელოვანი ნაბიჯი.“

კანდიდატის სტატუსთან დაკავშირებით გვაქვს ოპტიმიზმის მყარი საფუძველი, ვიდრე შეიძლება გვქონოდა თვეების წინ, ძალიან დიდი იმედი გვაქვს, რომ ეს საკითხი დადებითად გადაწყდება და ქვეყანა მიიღებს კანდიდატის სტატუსს,- ამის შესახებ ჟურნალისტებთან პარტია „ქართული ოცნების“ თავმჯდომარე ირაკლი კობახიძემ განაცხადა.

მისი თქმით, „შანსები არის „თვისობრივად გაუმჯობესებული“ და ეს დაეტყო ოპოზიციის რიტორიკასაც.

„ისინი საუბრობენ სტატუსის მეორეხარისხოვან მნიშვნელობაზე, ხოლო თავის დროზე ამბობდნენ, რომ ეს იყო ისტორიული გადაწყვეტილება და ახლა საპირისპიროს ამბობენ, რომ აღარაფერს ნიშნავს. ეს რიტორიკაც იმაზე მიანიშნებს, რიმ მწიფდება გადაწყვეტილება სტატუსის მინიჭებასთან დაკავშირებით.

ისინი მთელი ამ დროის განმავლობაში აწარმოებდნენ საპირისპირო აგიტაციას, ცდილობდნენ დაერწმუნებინათ გადაწყვეტილების მიმღებნი, რომ არ მოენიჭებინათ ჩვენთვის სტატუსი, ამაში ამხილა კოლეგები ხათუნა სამნიძემ, სხვებმაც დაიწყეს ამაზე საუბარი, რასაც ვამტკიცებდით მთელი წელიწადნახევრის განმავლობაში, იმაზე ალაპარაკდა ახლა ოპოზიციის ნაწილი, რომ მიდიოდა პირდაპირ აგიტაცია სტატუსის წინააღმდეგ. ამის მიუხედავად დეკემბერში, მაღალი ალბათობით, მოგვენიჭება სტატუსი. ჩვენ ყველაფერი გავაკეთეთ ამისთვის და იმედი გვაქვს საბოლოო გადაწყვეტილება იქნება დადებითი,“ – განაცხადა კობახიძემ.

შალვა პაპუაშვილი განსაკუთრებული მონური მორჩილებით გამოირჩევა – არ ღელავს საკუთარ პოლიტიკურ რეპუტაციაზე, რადგან კარგად ხვდება, რომ ივანიშვილის რუსული მმართველობის შემდეგ მისი პოლიტიკური კარიერაც დასრულდება,- ამის შესახებ ჟურნალისტებთან “ნაციონალური მოძრაობის” ფრაქციის თავმჯდომარე თინა ბოკუჩავამ განაცხადა.

ბოკუჩავა აცხადებს, რომ პაპუაშვილი საკუთარი გადაწყვეტილებით, რომ არ შეუშვას დეპუტატები მიხეილ სააკაშვილთან, არღვევს რეგლამენტს და კონსტიტუციას.

“ოცნების” მმართველობის დროსაც კი, ასეთ უკანონო და დრაკონულ გადაწყვეტილებებს ერიდებოდა ყველა პარლამენტის თავმჯდომარე, მაგრამ განსაკუთრებული მონური მორჩილებით გამოირჩევა შალვა პაპუაშვილი, რომელიც არ ღელავს საკუთარ პოლიტიკურ რეპუტაციაზე, რადგან კარგად ხვდება, რომ ივანიშვილის რუსული მმართველობის შემდეგ მისი პოლიტიკური კარიერაც დასრულდება. ის არის პირველი თავმჯდომარე, მათ შორის “ოცნების” მმართველობის პირობებში, რომელმაც ყველა დეპუტატს, მიუხედავად მათი პარტიული კუთვნილებისა, აუკრძალა შესვლის უფლება სააკაშვილთან და ამით დაარღვია პარლამენტის რეგლამენტი და კონსტიტუცია,”- განაცხადა ბოკუჩავამ.

გარდა ამისა, ბოკუჩავა გამოეხმაურა დღევანდელ პლენარულ სხდომაზე უმრავლესობის წევრების მხრიდან ქალი დეპუტატების მისამართით გაკეთებულ რეპლიკებს და განცხადებებს და აღნიშნა, რომ მას შემდეგ, რაც შალვა პაპუაშვილმა პარლამენტის თავმჯდომარის თანამდებობა დაიკავა, ეს გასაკვირი არ არის.

“საგულისხმოა, რომ “რუსული ოცნების” კაცი დეპუტატები განსაკუთრებულ ტარგეტირებას უკეთებენ ოპოზიციონერ ქალ დეპუტატებს, რადგან ხედავენ, რომ უკომპრომისოდ ვიბრძვით ჩვენი ქვეყნის უკეთესი მომავლისთვის, ევროპული მომავლისთვის და ამას გავაგრძელებთ მიუხედავად მათი მცდელობისა. ბუნებრივია, ეს გასაკვირი არ არის “ოცნების” მხრიდან, რომელმაც ქალის წინააღმდეგ მოძალადე, არამცთუ დაასანქცირა, არამედ დააწინაურა, როცა პარლამენტის რიგითი წევრი პაპუაშვილი პარლამენტის თავმჯდომარის მოვალეობის შემსრულებლად აქცია, როგორც ირაკლი კობახიძის ხელქვეითი პარლამენტში,”- განაცხადა ბოკუჩავამ.

პრეზიდენტი კონსტიტუციის დარღვევას თუ განაგრძობს, ამაზე შესაბამისი რეაგირება გვექნება, გავაკეთებთ შესაბამის განცხადებებს, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

კობახიძის თქმით, ინფორმაცია აქვთ, რომ სალომე ზურაბიშვილის, ლომჯარიას და გახარიას ერთობლივი პარტიის ჩამოყალიბება იგეგმება.

„სალომე ზურაბიშვილის შესაძლო პოლიტიკური გააქტიურების საკითხს რაც შეეხება, ჩვენ გვაქვს ინფორმაცია, რომ საპარლამენტო არჩევნებისთვის მისი, ლომჯარიას და გახარიას ერთობლივი პარტიის ჩამოყალიბება იგეგმება. ესეც მათი საქმეა, საბოლოო ჯამში, ამ პარტიასაც არავითარი წარმატების შანსი არ აქვს. რა თქმა უნდა, ისინი ხუთპროცენტიან საარჩევნო ბარიერს ვერ გადალახავენ“, – განაცხადა ირაკლი კობახიძემ.

საპარლამენტო პოლიტიკური ჯგუფი „გირჩის“ წევრის იაგო ხვიჩიას განცხადებით, მისი, როგორც პარლამენტის წევრის უფლებები ირღვევა, რადგან მას კლინიკა „ვივამედში“ ექსპრეზიდენტ მიხეილ სააკაშვილთან შეხვედრის უფლება არ ეძლევა.

„საშუალება არ გვეძლევა პოლიტიკურ წელს, როდესაც არჩევნები უნდა ჩატარდეს, შევხვდეთ მიხეილ სააკაშვილს და რამე გავიგოთ რა უნდა „ნაცმოძრაობას“, იმიტომ, რომ თუ მასთან ამას არ გაარკვევ, სხვანაირად შეუძლებელია სრულყოფილად იცოდე და ადამიანებს გადასცე რა უნდა მიხეილ სააკაშვილს და „ნაცმოძრაობას.

მსურდა გადამეცა მისთვის, რომ თქვენ მას წაართვით მედიასაშუალებები, წაართვით პოლიტიკური პარტიის უდიდესი ნაწილი, დარწმუნებული ვარ, მისი პარტიის ზოგიერთი წევრი გულწრფელია მასთან დამოკიდებულებაში, მაგრამ ის, რომ მისი პარტიის წევრები ეგუებიან, რომ მასთან შეხვედრის საშუალება არ აქვთ, უბრალოდ მაფიქრებინებს, რომ შეუძლებელია თქვენ მათთან არ შეთანხმებულიყავით“, – მიმართა იაგო ხვიჩიამ უმრავლესობას.