მიხეილ სააკაშვილის განცხადებებს თუ გადავხედავთ, სრულიად ნათელია, რომ ეს არის ადამიანი, ვინც აშკარად გამოხატავს სურვილს, ზრახვას, რომ ქვეყანაში იყოს დესტაბილიზაცია, არეულობა და ამისთვის ყველაფერს აკეთებს, – ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა.

ღუდუშაურის თქმით, სწორედ სააკაშვილია ის, ვინც ამ მიზნისთვის დიდი ნაბიჯი გადადგა.

„სააკაშვილმა უნდა გასცეს პასუხი მთავარ კითხვას: რა მიზანს ემსახურებოდა ქვეყანაში იმ ფორმით შემოსვლა? მისი მიზანი იყო, არეულობა და დესტაბილიზაცია მოეწყო, უფრო მეტიც, ქართველი ხალხის სისხლისღვრა. მათი მთავარი ამოცანაა, ნებისმიერ ფასად ხელში ჩაიგდონ ხელისუფლება. ქვეყანაში დესტაბილიზაციის მოწყობის საშუალებას არავის მივცემთ. ქვეყანას არეულობა და დაპირისპირება არ სჭირდება, სჭირდება სტაბილურობა და მშვიდობა. თუ ფიქრობენ, რომ თავიანთი განცხადებებით თავს გადაიზღვევენ, ვერავინ დააღწევს თავს იმ მძიმე პასუხისმგებლობას, რასაც ქვეყანაში არეულობის მოწყობა ჰქვია. სააკაშვილი და მისი ბანდა დაინტერესებული არიან, რომ ქვეყანაში არეულობა და სისხლისღვრა იყოს. ეს ადამიანები ჩვენი გმირი პოლიციელების მიმართ „მოლოტოვის კოქტეილის“ სროლას და მათ ცოცხლად დაწვას ამართლებდნენ. ესენი არიან ამის წამახალისებელები“, – აღნიშნა ალუდა ღუდუშაურმა.

ღუდუშაურის განმარტებით, როგორც ჩანს, საქართველო სამართლიანად მიიღებს კანდიდატის სტატუსს, ამიტომ არის მცდელობა, ეს პროცესი გააუბრალოონ და ითხოვენ ხელისუფლების შეცვლას.

„კარგად გვახსოვს მათი ზრახვა, რომ სტატუსის არმოცემის შემთხვევაში აპოკალიფსს მოაწყობდნენ. ახლა ცდილობენ, რომ ეს პროცესი გააუბრალოონ. სააკაშვილი უღირსად და ამორალურად იქცევა. არ მგონია, რომ დედამიწაზე დარჩენილია ვინმე, ვინც მას ღირსებისა და მორალის მქონე პირად აღიქვამს. ეს არის ადამიანობისგან დაცლილი, ფარჩაკი და ბოროტი ადამიანი, რომელიც საქართველოს განვითარებას პირდაპირ ებრძვის. ეს გვაძლევს კიდევ მეტ მოტივაციას, რომ ქვეყანა წინ წავიდეს და განვითარდეს. ქვეყანას ნათელი მომავალი აქვს და არა ისეთი, როგორიც სააკაშვილს, ადეიშვილს უნდათ“, – განაცხადა ალუდა ღუდუშაურმა.

საქართველოს პრემიერ-მინისტრ ირაკლი ღარიბაშვილის ხელმძღვანელობით მთავრობის სხდომა გაიმართა.

მინისტრთა კაბინეტის წევრებმა დღის წესრიგით გათვალისწინებულ 15 საკითხზე იმსჯელეს.

სხდომაზე განიხილეს პროექტი, რომლის მიხედვითაც ონკოლოგიური ქირურგია როგორც გეგმური, ისე გადაუდებელი ოპერაციები, ქვეყნის მასშტაბით, ყველა ონკოპაციენტს (გარდა საბიუჯეტო სახსრებით დაზღვეული პირებისა) დაუფინანსდება. მათ შორის არიან დაზღვეული ვეტერანები და ის პაციენტებიც, რომელთა წლიური შემოსავალი 40 000 ლარზე მეტია.

მიმდინარე წლის აგვისტოდან გადაწყვეტილებით ჰორმონოთერაპია, ქიმიოთერაპია, სხივური თერაპია და მედიკამენტები, ქვეყნის მასშტაბით, ყველა ონკოლოგიურ პაციენტს უფინანსდებოდა. დღეს − საქართველოს მთავრობის მიერ დამტკიცებული ცვლილების მიხედვით − მოქალაქეებისთვის თანაბრად იქნება ხელმისაწვდომი როგორც ქიმიო/ჰორმონო/სხივური თერაპიებისა და მედიკამენტების, ისე ონკოლოგიური ქირურგიის დაფინანსება.

აღნიშნული გადაწყვეტილებით ონკოლოგიური დაავადებების მკურნალობა, საყოველთაო ჯანდაცვის პროგრამის ფარგლებში, თითოეული ბენეფიციარისთვის, მათი შემოსავლის მიუხედავად, თანაბრად ხელმისაწვდომი იქნება.

მინისტრთა კაბინეტის წევრებმა ასევე განიხილეს პროექტი, რომლის მიხედვითაც სტომატოლოგიური მომსახურების მიმწოდებელთათვის ახალი სტანდარტები წესდება. ჯანდაცვის სამინისტროს ინიციატივით მკაცრდება როგორც საქმიანობის დაწყების, ისე – ოპერირების წესები. ცვლილებების მიზანი პაციენტის უსაფრთხოების დაცვა და თანამედროვე სტანდარტების შესაბამისი სერვისების უზრუნველყოფაა.

ცვლილების მიხედვით, სტომატოლოგიური დაწესებულებებისთვის განახლდა, დაზუსტდა და უფრო დეტალურად გაიწერა ინფექციის პრევენციის, კონტროლის, სტერილიზაცია-დეზინფექციისა და სამედიცინო ნარჩენების მართვის აუცილებელი კრიტერიუმები. პროცესის უკეთ სამართავად სავალდებულო გახდა დაწესებულებაში ინფექციების კონტროლზე პასუხისმგებელი პირის გამოყოფა.

სტომატოლოგიური დაწესებულება ვალდებული ხდება, უზრუნველყოს თანამშრომელთა პროფილაქტიკური იმუნიზაცია B ჰეპატიტზე და სკრინინგი C ჰეპატიტზე ექვს თვეში ერთხელ.

ცვლილებებით განსაზღვრული მოთხოვნები, არსებული სტომატოლოგიური კაბინეტებისა და კლინიკებისთვის, სავალდებულო 2024 წლის იანვრიდან იქნება. ახალი დაწესებულებები კი მხოლოდ ამ სტანდარტების დაკმაყოფილების შემთხვევაში შეძლებენ საქმიანობის დაწყებას.

საქართველოს მთავრობის სხდომაზე ასევე იმსჯელეს 75 დევნილი ოჯახისთვის (196 პირი) საერთო სარგებლობაში არსებული ფართების საკუთრებაში გადაცემის საკითხზე. გადასაცემი ქონება თბილისსა და დაბა წყნეთში მდებარეობს. საუბრისას პრემიერ-მინისტრმა ხაზი გაუსვა, რომ მთავრობისთვის ერთ-ერთი უპირველესია დევნილი ოჯახებისთვის ღირსეული საცხოვრებელი პირობების შექმნა, შესაბამისად, ეს პროცესი აქტიურად გაგრძელდება, რომ არცერთი დევნილი ოჯახი არ დარჩეს სახელმწიფოს ყურადღების გარეშე.

გარდა ამისა, სხდომაზე განიხილეს ხუთი ელექტროსადგურის განვითარებისა და ხელშეწყობის პროექტი, რომელთა განხორციელებისთვის ტექნიკურ-ეკონომიკური კვლევები უნდა ჩატარდეს. მთავრობის სხდომაზე წარდგენილი ჰიდროსადგურების ჯამური დადგმული სიმძლავრე 118 მგვ-ზე მეტია, ხოლო ჯამურად განსახორციელებელი ინვესტიცია 167 მილიონ აშშ დოლარს აჭარბებს.

ტექნიკურ-ეკონომიკური კვლევების წარმატებით დასრულების შემთხვევაში პროექტები შიდა ქართლის რეგიონში, კერძოდ − ქარელის, ხაშურისა და კასპის მუნიციპალიტეტებში განხორციელდება.

აშშ-ს მხრიდან საქართველოს მიმართ მხარდაჭერის უფრო მეტად საჯაროდ აღიარებაა საჭირო – თუ ევროკავშირი საქართველოს გაწევრიანების განაცხადზე უარის ეტყვის, ეს რუსეთისთვის დიდი გამარჯვება იქნება, – ამის შესახებ საქართველოს პრეზიდენტმა, სალომე ზურაბიშვილმა, CBS-თან ინტერვიუში განაცხადა.

ჟურნალისტის შენიშვნაზე, როგორც ჩანს, პრემიერ-მინისტრი არ არის დაინტერესებული ევროკავშირში გაწევრიანებით, პრეზიდენტმა ზურაბიშვილმა უპასუხა:

“ეს ის კითხვაა, რომელსაც მთელი მოსახლეობა სვამს, მართლა უნდა თუ მხოლოდ სიტყვიერად გამოხატავს მხარდაჭერას“, – აღნიშნა პრეზიდენტმა.

კითხვაზე, ფიქრობს თუ არა, რომ დასავლეთი, განსაკუთრებით აშშ, საკმარისად რეაგირებს და მხარს უჭერს საქართველოს, პრეზიდენტმა უპასუხა.

„არა მგონია და ერთ კონკრეტულ მაგალითს მოვიყვან. მე უკვე ხუთი წელია პრეზიდენტი ვარ და ვერ მოვახერხე ჩემს დონეზე, პრეზიდენტის, ან ვიცე-პრეზიდენტის დონეზე შეხვედრის რაიმე ფორმა, თუნდაც სატელეფონო ზარის საშუალებით. მესმის, რომ უფრო გადაუდებელი საკითხები არსებობს, მაგრამ ვფიქრობ, რომ უფრო მეტი საჯარო აღიარებაა საჭირო.“

კითხვაზე, თუ რა აღიარებას გულისხმობდა, პრეზიდენტმა უპასუხა:

„იმის შესახებ, რომ შეერთებული შტატები მხარს უჭერს ჩვენს კანდიდატის სტატუსს ევროკავშირში. მე ვიცი, რომ აშშ ჩვენს ევროპელ პარტნიორებს ასე ესაუბრება, მაგრამ უმაღლეს დონეზე გამეორება მნიშვნელოვანი იქნება საქართველოს მოსახლეობისთვის“, – აღნიშნა პრეზიდენტმა.

კითხვაზე, რა ბედი ეწევა საქართველოს, თუ ევროკავშირი უარს ეტყვის საქართველოს გაწევრიანებაზე, პრეზიდენტმა უპასუხა, რომ ეს იქნება დიდი გამარჯვება რუსეთისთვის.

პრეზიდენტს ინტერვიუს დროს რუსეთ-უკრაინის ომის შესახებაც დაუსვეს შეკითხვა, კერძოდ, თუ როგორ აისახება უკრაინის ომი საქართველოს ცხოვრებაზე.

„ეს, რა თქმა უნდა, არის ყველაფერ იმის შეხსენება, რაც საქართველომ გამოიარა და ის ფაქტი, რომ რუსეთი ყოველთვის არის უშუალო საფრთხე. რეალობის ნაწილია, რომ რუსეთი ამოწმებს ნიადაგს საქართველოში. აქ მათი გზა, მათი მარტივი გზა, არის ჰიბრიდული ომი“, – აღნიშნა პრეზიდენტმა.

ძალიან შემაშფოთებელია, როცა საკუთარ ქვეყანაში გყავს ადამიანები, რომლებიც მტრის ენაზე საუბრობენ და რომლებსაც სჯერათ, რომ ისინი საკუთარ სახლში არიან, – ამის შესახებ საქართველოს პრეზიდენტმა, სალომე ზურაბიშვილმა, CBS-თან ინტერვიუში განაცხადა.

როგორც პრეზიდენტმა აღნიშნა, „არსებობს წვრილი ხაზი და ეს ხაზი უნდა შენარჩუნდეს, რათა მომავალში არ გვქონდეს ისეთი ინციდენტები, რომლებიც რუსეთს საშუალებას მისცემს გამოიყენოს თავისი საყვარელი დოქტრინა რუსულენოვანი მოქალაქეების დაცვის შესახებ“.

კითხვაზე, რატომ არ ამბობს საქართველო უარს ქვეყნის ტერიტორიაზე რუსეთის მოქალაქეების შემოსვლაზე, პრეზიდენტმა ზურაბიშვილმა უპასუხა, რომ ეს შეკითხვა ხელისუფლებას უნდა დაუსვან.

„სამწუხაროდ, მე აღმასრულებელ ხელისუფლებას არ წარმოვადგენ“, – აღნიშნა პრეზიდენტმა.

საპარლამენტო უმრავლესობის წევრის, გურამ მაჭარაშვილის განცხადებით, რაც უფრო ახლოვდება საქართველოსთვის ევროკავშირის კანდიდატის სტატუსის მიღების ალბათობა, მით უფრო დაბალია რადიკალური პროცესების ტემპერატურა ქვეყანაში.

„ფაქტია, რომ რაც უფრო ახლოვდება კანდიდატის სტატუსის მიღების ალბათობა, მით უფრო დაბალია რადიკალური პროცესების ტემპერატურა. პარტნიორებს სწორედ ამას ვეუბნებოდით, რომ სტატუსის მიღება დეპოლარიზაციას შეუწყობდა ხელს“, – განაცხადა გურამ მაჭარაშვილმა.

ამასთან, ჟურნალისტებთან საუბრისას გურამ მაჭარაშვილი პრეზიდენტის მიერ „შეკრებებისა და მანიფესტაციების შესახებ“ კანონზე ვეტოს დადებას გამოეხმაურა და აღნიშნა, რომ უმრავლესობამ ვეტო უნდა დაძლიოს. დეპუტატის თქმით, მას შემდეგ, რაც „პრეზიდენტმა საკონსტიტუციო მოწყობაზე უარი თქვა და ამ სივრციდან საერთოდ გავიდა, ხელისუფლებას მოუწია, სამართლებრივი და პოლიტიკური პასუხისმგებლობა პრეზიდენტის ნაცვლად აიღოს“.

„პრეზიდენტი საკუთარ ქვეყანაში უსაფრთხოების უზრუნველყოფაზე როცა უარს ამბობს და ხელს არ აწერს კანონს, ბუნებრივია, ჩვენ ვეტოს დაძლევა გვიწევს. ვეტოს ყველა შემთხვევაში დავძლევთ.“, – განაცხადა მაჭარაშვილმა.