ვფიქრობ, სალომე ზურაბიშვილი არის კოჭლი ლეგიტიმაციის პრეზიდენტი, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.

მისივე თქმით, მიხეილ სააკაშვილის შეწყალებაზე სალომე ზურაბიშვილს ნამდვილად გადასადგმელი აქვს ნაბიჯი, თუ უნდა, რომ გაემიჯნოს „ქართულ ოცნებას.“

„მიხეილ სააკაშვილის შეწყალებაზე სალომე ზურაბიშვილს ნამდვილად გადასადგმელი აქვს ნაბიჯი, მას თუ უნდა, რომ გაემიჯნოს „ქართულ ოცნებას“, ასე უნდა გააკეთოს. ევროპულ რეზოლუციებშია ეს მიმართვები სალომე ზურაბიშვილთან მიმართებაში. „ალდეს“ რეზოლუციაშია შეტანილი ჩვენი ეს მიმართვა, რომ მან შეიწყალოს მიხეილ სააკაშვილი. პირადი საუბრის დროს, როცა სალომე ზურაბიშვილი შეხვდა მაკრონს, ზუსტად ვიცით, რომ ამ საკითხზე იყო საუბარი და სალომე ზურაბიშვილი როცა არ იწყალებს მიხეილ სააკაშვილს, ამით ასრულებს ვის დავალებას, ვის ინტერესებს ასრულებს, ბიძინა ივანიშვილის ინტერესებს. აგერ, ამერიკიდან ჩამოვედით და გეუბნებით, ჩვენი პარტნიორების პოზიცია არის, რომ მიხეილ სააკაშვილის ციხეში ყოფნა არის რუსეთის ინტერესებში. გეოპოლიტიკა შეიცვალა, ეს უნდა გავიგოთ. პირველივე დღიდან რაც ვთქვით „ნაციონალურმა მოძრაობამ“ და „სტრატეგია აღმაშენებელმა“, ის მოხდა იმპიჩმენტთან დაკავშირებით, როცა გეუბნებოდით რომ ამის საბოლოო შედეგი არის ფიასკო. ეს იყო მთავარი შეცდომა და ახლა ბოდიში მოუხადოს ყველამ ნაცმოძრაობას ამის გამო. სალომე ზურაბიშვილი, ვფიქრობ, რომ არის კოჭლი ლეგიტიმაციის პრეზიდენტი, პირდაპირ ვიტყვი, მაგრამ სალომე ზურაბიშვილის იმპიჩმენტი პირდაპირი არჩევნებით ახალი პრეზიდენტის არჩევნებს კი არ ნიშნავს, არამედ ნიშნავს იმას, რომ ხმოსნებით ქოცებმა უნდა აირჩიონ ვიღაცა სხვა. აბა, პირდაპირი არჩევნები იყოს, თუ წავიდოდა იმპიჩმენტზე ოცნება?! ვერც გაბედავდა, რადგან იცის, 2018 წელს ძლივს ძალადობით რომ წაიღეს არჩევნები, ახლა აღარ გამოუვათ, ამაშია რეალობა, სიმართლე თუ გაინტერესებ. ამიტომ, არ გაგვივლია იოტისოდენა აზრიც კი, რომ ამ თემაზე გვევაჭრა ან რამე გაგვეკეთებინა“, – განაცხადა ვაშაძემ.

ახლა აშშ-ში აღარავის ეპარება ეჭვი, რომ პროდასავლელ ქართველ ხალხს ჰყავს პრორუსული ხელისუფლება, რომელიც ყველაფერს აკეთებს იმისთვის, რომ საქართველოს წაართვას ევროატლანტიკური არჩევანის რეალიზების შესაძლებლობა, – ამის შესახებ ფრაქცია „ნაციონალური მოძრაობის“ თავმჯდომარემ, თინა ბოკუჩავამ დღეს გამართულ ბრიფინგზე განაცხადა, სადაც აშშ-ში ვიზიტზე ისაუბრა.

მისივე თქმით, ამერიკელებს ძალიან კარგად ესმით, რომ დღევანდელი ხელისუფლება კანდიდატის სტატუსის საბოტაჟირებისთვის ყველაფერს აკეთებს.

„თუ ამ დრომდე არსებობდა კითხვები ხელისუფლების საგარეო ორიენტაციასთან დაკავშირებით, ახლა ეს კითხვები პასუხგაცემულია და განსაკუთრებით პასუხგაცემულია რუსეთის მხრიდან უკრაინაში ფართომასშტაბიანი ომის დაწყების შემდეგ. ახლა აშშ-ში აღარავის ეპარება ეჭვი, რომ პროდასავლელ ქართველ ხალხს ჰყავს პრორუსული ხელისუფლება, რომელიც ყველაფერს აკეთებს იმისთვის, რომ საქართველოს წაართვას ევროატლანტიკური არჩევანის რეალიზების შესაძლებლობა. მოგეხსენებათ, აშშ ფორმალურად არ არის ევროკავშირში გაწევრიანების და შესაბამისად, კანდიდატის სტატუსის მიღების გადაწყვეტილების ნაწილი, ეს ევროკავშირის წევრი სახელმწიფოების გადაწყვეტილებაა, თუმცა აშშ არის ძალიან მნიშვნელოვანი ნაწილი იმ საუბრების და მოლაპარაკებების, რომელიც წინ უსწრებს ამ გადაწყვეტილებას. აქაც, რა თქმა უნდა, ამერიკელებს ძალიან კარგად ესმით, რომ დღევანდელი ხელისუფლება ყველაფერს აკეთებს იმისთვის, რომ არ შეასრულოს ეს რეკომენდაციები, არ განახორციელოს რეფორმები „რუსულმა ოცნებამ“ და შესაბამისად, კანდიდატის სტატუსის მიზანმიმართული საბოტაჟირება მოახდინონ. ჩვენ აშშ-ის დედაქალაქსა და ევროპულ დედაქალაქებშიც გავიმეორეთ ის გზავნილი, რომ ამ ისტორიულ მომენტში აღნიშნული საკითხი მნიშვნელოვანია და საქართველომ აუცილებლად უნდა მიიღოს კანდიდატის სტატუსი. ასევე, ჩვენ შეხვედრებზე ვისაუბრეთ იმაზე, რამდენად მნიშვნელოვანია არჩევნების წინ საქართველოში მაღალი დონის დელეგაციები, რეზოლუციები და მოსმენები.

ჩვენ ვისაუბრეთ იმ უმნიშვნელოვანეს არჩევნებზე და რამდენად მნიშვნელოვანია, რომ მას დააკვირდნენ გრძელვადიანი დამკვირვებლები. მივიღეთ პირობა, რომ არჩევნებზე უპრეცედენტო რაოდენობის გრძელვადიანი დამკვირვებელი იქნება საქართველოში“, – განაცხადა ბოკუჩავამ.

საქართველოს მოქალაქეობის მიღების პროცედურა მარტივდება – პარლამენტმა მესამე მოსმენით 84 ხმით ერთხმად, მიიღო „საქართველოს მოქალაქეობის შესახებ“ ორგანულ კანონში ცვლილება, რომელიც მიზნად ისახავს მოქალაქეობის პროცედურის დახვეწასა და გამარტივებას.

ამის შესახებ ინფორმაციას იუსტიციის სამინისტრო ავრცელებს.

მათივე ცნობით, იუსტიციის სამინისტროს მიერ მომზადებული კანონის მიზანია, ხელი შეუწყოს საზღვარგარეთ მცხოვრები თანამემამულეების სამშობლოსთან მჭიდრო კავშირის შენარჩუნებასა და განვითარებაზე ზრუნვას.

ცვლილებების ამოქმედების შემდეგ: საქართველოს მოქალაქეობის მოპოვების მსურველი პირი გამოცდას სახელმწიფო სერვისების განვითარების სააგენტოში მოქალაქეობის მინიჭებაზე განცხადების შეტანამდე ჩააბარებს; არადამაკმაყოფილებელი შედეგის შემთხვევაში, სააგენტო აღარ დაიწყებს მოქალაქეობის მინიჭების ფორმალურ პროცედურებს, რითაც დაიზოგება როგორც მოქალაქეების, ისე უწყების დრო და რესურსები; გამოცდაზე წარუმატებლობის შემთხვევაში, პირს უფლება ექნება, გადააბაროს გამოცდა შეუზღუდავად. გამოცდის ჩაბარებისას მისი შედეგები ძალაში იქნება 1 წლის განმავლობაში; საქართველოს მოქალაქეობის მოპოვების შესახებ განცხადებაზე საბოლოო უარყოფითი გადაწყვეტილების მიღების შემთხვევაში, მოქალაქეობის მინიჭების პროცედურის ხელმეორედ დაწყების ვადა 1 წლიდან 6 თვემდე შემცირდება; მოქალაქეობის არმქონე პირთა მიერ მოქალაქეობის მოპოვებისთვის დადგენილი საქართველოში ცხოვრების 10-წლიანი ცენზი 5 წლამდე შემცირდება, რითაც სრულად შესრულდება გაერო-ს ლტოლვილთა უმაღლესი კომისარიატის წინაშე აღებული ვალდებულება.

„მოქალაქეების“ ლიდერმა, ალეკო ელისაშვილმა ჟურნალისტებთან განცხადა, რომ ბრალი, რომელიც ჯერ არ დადასტურებულა და სასჯელი არ არის, მასზე პრეზიდენტი შეწყალებას ვერ გასცემს.

„მიხეილ სააკაშვილი სამი საქმიდან ერთ საქმეზეა მისჯილი, ორზე სასჯელი არ არის. როგორც კი ერთ საქმეზე შეიწყალებს პრეზიდენტი, მეორეზე შეაბრუნებენ ციხეში. მერე მესამეზე შეიწყალოს? ანუ, სალომე ზურაბიშვილი უნდა იჯდეს და კვირაში ორჯერ სააკაშვილი უნდა იწყალოს? ამას ნიკა გვარამია როგორ ამბობს, გაოგნებული ვარ, რადგან კვალიფიციური იურისტია. წინმსწრებად ხომ არ შეიწყალებს? შუა საუკუნეების კათოლიკური ეკლესია ხომ არ არის, ინდულგენციებს რომ გასცემდნენ? ეს ასე არ ხდება“, – განაცხადა ალეკო ელისაშვილმა.

რუსეთის საგარეო საქმეთა მინისტრი, გრიგორი კარასინი საქართველოს პრეზიდენტის, სალომე ზურაბიშვილის მიერ CBS NEWS-თან ინტერვიუში, რუსეთის მოქალაქეებზე გაკეთებულ განცხადებას „ბოდვას“ უწოდებს.

კარასინის თქმით, „ქალბატონს, რომელიც იმპიჩმენტს ძლივს გადაურჩა, საქართველოში მცხოვრები რუსები ანერვიულებს”.

„სალომე ზურაბიშვილი რუსული თემით პარაზიტირებს. ახლა ქალბატონს, რომელიც იმპიჩმენტს ძლივს გადაურჩა, საქართველოში მცხოვრები რუსები, რომლებიც „მტრის ენაზე ლაპარაკობენ“, ანერვიულებს. პრეზიდენტი ამაში წინაპირობას ხედავს, რომლითაც რუსეთი სრულფასოვანი ომის გამოცხადებას შეძლებს და იგი მხარს უჭერს რუსეთის მოქალაქეების ქვეყანაში შესვლის აკრძალვას. მსგავს საჯარო განცხადებას ბოდვის გარდა ვერაფერს ვუწოდებთ. დარწმუნებული ვარ, რომ ეს თბილისსაც ესმის“, – წერს გრიგორი კარასინი „ტელეგრამის“ არხზე.

შეგახსენებთ, რომ როგორც საქართველოს პრეზიდენტმა სალომე ზურაბიშვილმა CBS-თან ინტერვიუში განაცხადა, „ძალიან შემაშფოთებელია, როცა საკუთარ ქვეყანაში გყავს ადამიანები, რომლებიც მტრის ენაზე საუბრობენ და რომლებსაც სჯერათ, რომ ისინი საკუთარ სახლში არიან“. როგორც პრეზიდენტმა აღნიშნა, „არსებობს წვრილი ხაზი და ეს ხაზი უნდა შენარჩუნდეს, რათა მომავალში არ გვქონდეს ისეთი ინციდენტები, რომლებიც რუსეთს საშუალებას მისცემს გამოიყენოს თავისი საყვარელი დოქტრინა რუსულენოვანი მოქალაქეების დაცვის შესახებ“.

„ქართული ოცნების“ თავმჯდომარის, ირაკლი კობახიძის განცხადებით, თუ პარლამენტში ვინმეს ზრდილობა ეშლება, ეს სწორედ ოპოზიციონერი ქალი დეპუტატები არიან.

როგორც მან ჟურნალისტებს განუცხადა, „ბოდიში“ თეონა აქუბარდიას, ირაკლი ბერაიასგან განსხვავებით, კაცი დეპუტატებისთვის არასდროს მოუხდია.

მისივე თქმით, ირაკლი ბერაიას ბოდიშის მოხდა არ გასჭირვებია, რადგან ის არის ღირსეული ადამიანი.

„ირაკლი ბერაიას მიერ თანამდებობის დატოვება არასერიოზული მოთხოვნაა. როდესაც ეს ადამიანები, მათ შორის, კონკრეტული დეპუტატი ქალბატონები საუბრობენ ზრდილობაზე და ასეთ მაღალ მატერიებზე, მათ ამის არანაირი მორალური უფლება არ აქვთ. თუ ვინმეს ეშლება ზრდილობა ამ პარლამენტში, ესენი სწორედ ეს ოპოზიციონერი ქალი დეპუტატები არიან. ისინი მუდმივად გამოირჩევიან ზრდილობის ნორმების დარღვევით, არაეთიკური ქცევით. მათ მორალური უფლება არ აქვთ, რომ ვიღაცის გადადგომაზე ისაუბრონ. პირველ რიგში, საკუთარ ზრდილობასა და ეთიკას მიხედონ, სადაც სერიოზული პრობლემები და ხარვეზები აქვთ. ქალი დეპუტატი რომ გამოდის და კაც დეპუტატს „პატარა კაცებს“ რომ ეძახის, ეს არ არის გენდერულად მოტივირებული უზრდელობა? თქვენ „ბოდიში“ თეონა აქუბარდიასგან გახსოვთ, რომელიმე კაცი დეპუტატის მიმართ? სად არის აქ გენდერი, ზრდილობა, ეთიკა? ამიტომ ორმაგი სტანდარტები არ ვარგა. ჩვენ გვაქვს ერთმაგი სტანდარტი – სადაც არის გადახვევა, არასწორი განცხადება, იქ არ გვიჭირს ხოლმე და არც ირაკლი ბერაიას გაუჭირდა სინანულის გამოხატვა.

ჩვენ „ბოდიშიც“ კი არ მოგვისმენია ამ კონკრეტული დეპუტატებისგან, როცა ისინი უზრდელობდნენ, არღვევდნენ ეთიკის სტანდარტებს. ეს არ გაუჭირდა ირაკლი ბერაიას, იმიტომ, რომ ის არის ღირსეული ადამიანი. როგორ შეიძლება ქალი დეპუტატი იქცეოდეს ისე, როგორც ესენი იქცევიან?! ისინი ახდენენ, მათ შორის, გენდერული კვოტების დისკრედიტაციას, რაც ჩვენ შემოვიღეთ. როცა ამ დეპუტატებს ვუყურებ, აშკარად ხდება ამ კვოტების დისკრედიტაცია. თუკი ვინმე ამ პარლამენტში ახდენს პოლარიზაციას ხელოვნურად, ესენი არიან სწორედ ოპოზიციონერი ქალი დეპუტატები. მინდა მანდ მოვუწოდო, პატივი სცენ საკუთარ საპარლამენტო სტატუსს, იმას, რომ არიან ქალი დეპუტატები და მოიქცნენ სხვანაირად! მათ აქვთ ორმაგი, შვიდმაგი სტანდარტი, ჩვენ გვაქვს ერთი სტანდარტი, რომ უნდა იყოს ეთიკური წესები დაცული“, – განაცხადა კობახიძემ.