ტაილანდმა მძევლების გათავისუფლების შესახებ „ჰამასთან“ მოლაპარაკებები გამართა, – ამის შესახებ ინფორმაციას ტაილანდის ადგილობრივი მედია ავრცელებს.

ტაილანდის მედიის მიერ გავრცელებული ინფორმაციის მიხედვით, გასულ კვირას ტაილანდის პარლამენტის სპიკერის მიერ შექმნილმა სამკაციანმა გუნდმა თეირანში მძევლების გათავისუფლების საკითხზე „ჰამასთან“ მოლაპარაკებები გამართა.

„მე მათ მძევლების გათავისუფლება ვთხოვე, რადგან ისინი უდანაშაულოები არიან. დამარწმუნეს, რომ მათზე კარგად ზრუნავენ, მაგრამ გათავისუფლების თარიღი ვერ მითხრეს, ისინი შესაფერის დროს ელოდებიან“, – განაცხადა დელეგაციის ხელმძღვანელმა, არიპენ უტარასინმა.

შეგახსენებთ, რომ „ჰამასის“ 7 ოქტომბრის თავდასხმის შედეგად ტაილანდის 32 მოქალაქე დაიღუპა და 19 დაიჭრა.

ყირიმში რუსმა სამხედროებმა 6 უპილოტო საფრენი აპარატი გაანადგურეს, – ინფორმაციას რუსეთის თავდაცვის სამინისტრო ავრცელებს.

„საჰაერო თავდაცვის სისტემებმა შავი ზღვის თავზე ერთი უკრაინული უპილოტო საფრენი აპარატი გაანადგურეს, ხუთი კი ყირიმის რესპუბლიკის ტერიტორიაზე ჩამოაგდეს“, – აცხადებენ თავდაცვის სამინისტროში.

უწყების ინფორმაციით, ობიექტებზე თავდასხმის მცდელობისას უკრაინამ თვითმფრინავის ტიპის დრონები გამოიყენა.

აშშ-ის პრეზიდენტი ჯო ბაიდენი აცხადებს, რომ ისრაელსა და „ჰამასს“ შორის ომი უნდა დაპაუზდეს, რათა მოხდეს მძევლების გათავისუფლება. ამის შესახებ ბაიდენმა მინესოტაში განაცხადა. მან ღონისძიებაზე აუდიტორიაში მყოფ ქალს უპასუხა, რომელმაც აშშ-ის პრეზიდენტს მიმართა, მოუწოდოს ისრაელსა და „ჰამასს“ ცეცხლის შეწყვეტისკენ.

„ვფიქრობ, ჩვენ გვჭირდება პაუზა. პაუზა ნიშნავს, რომ დრო დავუთმოთ მძევლების გამოყვანას“, – აღნიშნა ბაიდენმა.

მოგვიანებით თეთრმა სახლმა განმარტა, რომ პრეზიდენტი გულისხმობდა ჰუმანიტარულ დახმარებას და 240 მძევალის გათავისუფლებას, რომლებიც „ჰამასის“ ტყვეობაში არიან.

ბაიდენმა ასევე აღნიშნა, რომ სიტუაცია „წარმოუდგენლად რთულია“ როგორც ისრაელელებისთვის, ასევე მუსლიმური სამყაროსთვის.

„მე მხარი დავუჭირე ორი სახელმწიფოს პრინციპებზე დაყრდნობით გამოსავლის მოძებნას. საქმე ის არის, რომ „ჰამასი“ ტერორისტული ორგანიზაციაა“, – აღნიშნა აშშ-ის პრეზიდენტმა.

ევროკავშირი მიესალმება ევროკავშირისა და სხვა ქვეყნების მოქალაქეების, ასევე დაშავებულების ევაკუაციას ღაზასა და ეგვიპტეს შორის მდებარე რაფაჰის სასაზღვრო პუნქტის გავლით, – ამის შესახებ ევროკომისიის განცხადებაშია აღნიშნული.

ევროკომისიის პრეზიდენტი, ურსულა ფონ დერ ლაიენი ეგვიპტის ხელისუფლებას მადლობას უხდის ძალისხმევისთვის, რის შედეგადაც უცხო ქვეყნების მოქალაქეებს, მათ შორის ევროპელ მოქალაქეებს, საერთაშორისო ორგანიზაციების თანამშრომლებს და მათ ოჯახებს საშუალება ეძლევათ უსაფრთხოდ შევიდნენ თავიანთ ქვეყნებში.

„უნდა გავაგრძელოთ ერთად მუშაობა, რათა კიდევ უფრო გავაძლიეროთ ჩვენი ძალისხმევა ღაზაში ჰუმანიტარული კრიზისის დასაძლევად“, – აცხადებს ურსულა ფონ დერ ლაიენი.

რაფაჰის სასაზღვრო პუნქტის გახსნას ეხმაურება ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში, ჯოზეფ ბორელიც და აცხადებს, რომ ევროკავშირის პრიორიტეტს მშვიდობიანი მოსახლეობის დაცვა და მძიმე სიტუაციის შემსუბუქება წარმოადგენს.

„მადლობას ვუხდით ეგვიპტეს ჰუმანიტარული ძალისხმევისთვის, რათა ადამიანებს, მათ შორის დაშავებულებს, ღაზას დატოვების საშუალება მიეცეთ. ასევე მადლობას ვუხდით აშშ-სა და კატარს, რომ შუამავლობდნენ ამ ჰუმანიტარულ შეთანხმებას. ჩვენი მხრიდან, სრულად მობილიზებული ვართ და ვთავაზობთ მხარდაჭერას ღაზაში ტანჯვის შესამსუბუქებლად. მოვუწოდებთ ჰუმანიტარული დერეფნების შექმნისა და პაუზების გამოცხადებისკენ, გადაუდებელი საჭიროებების დასაკმაყოფილებლად. მშვიდობიანი მოსახლეობის დაცვა და მზარდი მძიმე სიტუაციის შემსუბუქება ჩვენი პრიორიტეტია“, – აცხადებს ბორელი.

BBC-ის ინფორმაციით, ღაზას დატოვება და ეგვიპტეში გადასვლა გუშინ 400-ზე მეტმა ადამიანმა შეძლო. რაფაჰის სასაზღვრო პუნქტის გავლით ღაზის სექტორიდან გასვლის საშუალება დღეს, დაახლოებით, 500 ადამიანს მიეცემა.

მოსკოვს ილუზიები არ უნდა ჰქონდეს: სხვა კონფლიქტები უკრაინიდან ჩვენს ყურადღებას არ გადაიტანს, – ამის შესახებ ევროკავშირის უმაღლესი წარმომადგენელი ჯოზეფ ბორელი „ტვიტერის“ პირად გვერდზე წერს.

„უკრაინის წინააღმდეგ რუსეთის აგრესიამ დაუნდობლობის ახალ მწვერვალს მიაღწია იმის ფონზე, რომ 24 საათის განმავლობაში 100-ზე მეტი ქალაქი და სოფელი დაიბომბა.

მოსკოვს ილუზიები არ უნდა ჰქონდეს: სხვა კონფლიქტები უკრაინიდან ჩვენს ყურადღებას არ გადაიტანს.

ჩვენი დახმარება გრძელდება, იმდენ ხანს, რამდენიც საჭიროა”, – წერს ბორელი.

რომის პაპმა ფრანცისკემ ისრაელსა და „ჰამასს“ შორის კონფლიქტზე ისაუბრა და კიდევ ერთხელ დაადასტურა, რომ მხარს უჭერს კონფლიქტის ორი სახელმწიფოს პრინციპზე დაფუძნებით გადაწყვეტას.

“ორი ხალხი, რომლებმაც ერთად უნდა იცხოვრონ. ბრძნული გამოსავალი არსებობს: ორი ხალხი, ორი სახელმწიფო, ოსლოს შეთანხმების თანახმად: ორი ძალიან შეზღუდული სახელმწიფო და იერუსალიმი განსაკუთრებული სტატუსით”, – აღნიშნა რომის პაპმა ფრანცისკემ.

ისრაელი-პალესტინის კონფლიქტის ორი სახელმწიფოს პრინციპზე დაფუძნებით გადაწყვეტა ათწლეულებია საერთაშორისო თანამეგობრობის მიზანს წარმოადგენს. ბევრი ქვეყანა ამბობს, რომ ეს კონფლიქტის ერთადერთი გამოსავალია.

ხვალ, 3 ნოემბერს, ისრაელსა და იორდანიაში შეერთებული შტატების სახელმწიფო მდივანი ჩავა. ამის შესახებ შტატების საგარეო უწყების ოფიციალურმა წარმომადგენელმა განაცხადა და აღნიშნა, რომ ენტონი ბლინკენი, ორივე ქვეყნის ლიდერებს შეხვდება და რეგიონში განვითარებულ მოვლენებს, პირველწყაროდან გაეცნობა.

„სახელმწიფო მდივანი პარასკევს ისრაელსა და იორდანიაში მიემგზავრება. შეხვდება ისრაელის პრემიერ მინისტრს, ნეთანიაჰუს და ქვეყნის ხელისუფლების სხვა წარმომადგენლებს, რათა განახლებული ინფორმაცია მიიღოს მათი სამხედრო მიზნებისა და ოპერაციის შესახებ. ის კიდევ ერთხელ დაადასტურებს ისრაელის მხარდაჭერას და ქვეყნის უფლებას, დაიცვას თავი საერთაშორისო ჰუმანიტარული ნორმების გათვალისწინებით. ასევე იმსჯელებს სამოქალაქო პირებს შორის მსხვერპლის მინიმუმამდე შემცირებისა და მათთვის ჰუმანიტარული დახმარების მიწოდებისთვის აუცილებელი ზომების შესახებ. სამოქალაქო პირების დაცვა და ახლო აღმოსავლეთის რეგიონში მშვიდობის დამყარების პერსპექტივა იქნება იორდანიაში დაგეგმილი შეხვედრების დღის წესრიგშიც. იმსჯელებენ მძევლების გათავისუფლების საკითხზეც“, – განაცხადა აშშ-ის სახელმწიფო დეპარტამენტის წარმომადგენელმა მეთიუ მილერმა.