საზოგადოებაში ყოველთვის არსებობს რევანშისტები და შურისძიების მოყვარული ხალხი, მაგრამ ჩვენი პოზიციაა კონფლიქტების მხოლოდ მშვიდობიანი გზით გადაწყვეტა, – ამის შესახებ „გირჩის“ ლიდერმა, იაგო ხვიჩიამ განაცხადა.

ხვიჩიას კითხვა დაუსვეს საქართველოს ყოფილი პრეზიდენტის, მიხეილ სააკაშვილის ბიძის – თემურ ალასანიას განცხადებაზე, სადაც მან აღნიშნა: „სად გინახავთ წართმეული ტერიტორიის მარტო მშვიდობიანი გზით დაბრუნება, დავიჭიროთ სანთელი, სამჯერ შემოვუაროთ აფხაზეთს, ვთქვათ „ფუი, ეშმაკს“ და დაგვიბრუნდება. ეს არ მოხდება“.

„ვერ გეტყვით, თემურ ალასანია რას რა მოტივით საუბრობს. მე ზუსტად ვიცი ის, რომ ჩვენი პარტია კონფლიქტის მხოლოდ მშვიდობიანი გზით მოგვარებას აღიარებს. ამასთან დაკავშირებით ჩვენი გეგმა და კონცეფციაც გვაქვს, თუმცა საზოგადოებაში ყოველთვის არსებობენ რევანშისტები და შურისძიების მოყვარული ხალხი. ის ხალხი, რომელიც ადამიანების ყურადღების მიქცევას სულ იარაღის ჟღარუნით ცდილობს და ამათ ვერ დაუშლი, მაგრამ ჩვენი პოზიციაა კონფლიქტების მხოლოდ მშვიდობიანი გზით გადაწყვეტა“, – განაცხადა იაგო ხვიჩიამ.

თემურ ალასანიას განცხადებასთან დაკავშირებულ შეკითხვაზე, ვისთვის და რისთვისაა მსგავსი გზავნილი გათვლილი, იაგო ხვიჩიამ აღნიშნა:

„ქვეყნის შიდა გზავნილია საქართველოს მოსახლეობის იმ ნაწილისთვის, რომელიც მხარს უჭერს, მათ შორის დაკარგული ტერიტორიების ძალით დაბრუნებას. ამ ამომრჩევლების კონსოლიდაცია რომ მოხდეს, არა მხოლოდ „ნაცები“, არამედ სხვა პარტიებიც მათ ხშირად კვებავენ ასეთი ტიპის ლაპარაკებით “, – აღნიშნა იაგო ხვიჩიამ.

საქართველოს მესამე პრეზიდენტის, მიხეილ სააკაშვილის განცხადებით, „ქართული ოცნება“ კულტურის მოქმედ მინისტრს, თეა წულუკიანს პრეზიდენტის პოსტისთვის ამზადებს, თბილისის მერს, კახა კალაძეს კი პრემიერ-მინისტრობისთვის. ამის შესახებ მან სასამართლო პროცესზე დისტანციურად ჩართვისას განაცხადა.

სააკაშვილმა საქართველოს მოქმედ პრეზიდენტს, სალომე ზურაბიშვილს მიმართა და აღნიშნა, რომ ხელისუფლებას ერთი სული აქვს, როცა ის პრეზიდენტი აღარ იქნება.

„მათ ერთი სული აქვთ, როცა თქვენ აღარ იქნებით პრეზიდენტი. მათ უკვე მომზადებული ჰყავთ წულუკიანი პრეზიდენტობაზე. წულუკიანი სჭირდებათ იმისათვის, რომ არასდროს, არავინ დაპატიმრებული არ გამოუშვას, ჩემი ჩათვლით, რა თქმა უნდა. თქვენც გემუქრებიან პატიმრობით. როდესაც გაუჭირდებათ არჩევნებამდე, უკვე ამზადებენ კალაძეს პრემიერად, იმიტომ, რომ სჭირდებათ პრაქტიკულად შიგნით გადაჯგუფება, მთავარია არაფერი პრობლემა არ შეექმნას ოლიგარქის ხელისუფლებას. კალაძეც ყურებით ჰყავს რუსეთს დაჭერილი, განსაკუთრებით „გაზპრომის“ კონტრაქტით და მთელი იმ კორუფციით, რომელმაც წალეკა თბილისის მერია, მანამდე ენერგეტიკის სამინისტრო და მთლიანად საქართველო,“ – განაცხადა სააკაშვილმა.

12 რეკომენდაცია იქნება, ცხრა დათქმა თუ სამი ძირითადი ამოცანა, ამას მნიშვნელობა არ აქვს, ევროპას პოლიტიკური გადაწყვეტილება მიღებული აქვს, რომ საქართველოს პროქართული ხელისუფლება ჰყავს, ევროპულად მოაზროვნე, რომელმაც სტატუსისთვის რეალური ნაბიჯები გადადგა, – ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა საქართველოს პირველ არხს განუცხადა.

„პრაქტიკულად, ქვეყანაში წინასაარჩევნო კამპანია დაწყებულია და რადიკალურ ოპოზიციას არჩევნები წაგებული აქვს, რასაც პირდაპირ ამბობენ, რადგან გვთხოვენ, ოპოზიციაში მაინც მოგვიშვითო. რაც ყველაზე მთავარია, მათი უცხოელი პატრონებიც კი ხელჩაქნეული არიან და მათი იმედი არ აქვთ. 12 რეკომენდაცია იქნება, ცხრა დათქმა თუ სამი ძირითადი ამოცანა, ამას მნიშვნელობა არ აქვს – ევროპას პოლიტიკური გადაწყვეტილება მიღებული აქვს, რომ ქართულ სახელმწიფოს პროქართული ხელისუფლება ჰყავს, ევროპულად მოაზროვნე, რომელმაც სტატუსისთვის რეალური ნაბიჯები გადადგა. ასევე ჰყავს რადიკალური ოპოზიცია, რომელმაც სტატუსის საწინააღმდეგოდ იმოქმედა. სერგი კაპანაძის ის წინადადება რად ღირს, რომელიც ევროკავშირს პირდაპირ მოუწოდებდა, რომ გადაეტანა სტატუსის საკითხი 2024 წლის არჩევნების შემდგომ.

ჩვენს პარტნიორებთან თანამშრომლობის კარგი გამოცდილება გვაქვს, რეკომენდაციები შესრულდა და შემდეგ რაც იქნება, გავაკეთებთ. ევროპამ დაინახა, რეალურად ვინ არის ევროინტეგრაციის ხელისშემოწყობი და ვინ უშლის ხელს“,- განაცხადა გურამ მაჭარაშვილმა.

წინა სასამართლო სხდომაზე პრეზიდენტ სააკაშვილის მიერ საჯაროდ გაკეთებული განცხადება, ცხადია, ნიკა მელიას ეხებოდა – 23 ნოემბერს კონკრეტულ ადამიანებთან დაკავშირებითაც იქნება გადაწყვეტილებები მიღებული, – ამის შესახებ „ნაციონალური მოძრაობის“ თავმჯდომარე ლევან ხაბეიშვილმა ჟურნალისტებს თბილისის საქალაქო სასამართლოში განუცხადა, სადაც დიდი ოდენობით საბიუჯეტო თანხების ჯგუფურად გაფლანგვის საქმეზე მიხეილ სააკაშვილის სასამართლო პროცესი მიმდინარეობს.

კითხვაზე, მიწვეული იქნება თუ არა 23 ნოემბერს დაგეგმილ ღონისძიებაზე პარტიის ყოფილი თავმჯდომარე ნიკა მელია, ხაბეიშვილმა თქვა, რომ „მოსაწვევი საჭირო არ იქნება, 23 ნოემბერი საქართველოს მოქალაქის გამარჯვების დღეა და ყველას შეუძლია მისვლა, ვისაც გაუხარდება“.

„წინა სასამართლო სხდომაზე პრეზიდენტ სააკაშვილის მიერ საჯაროდ გაკეთებული განცხადება, ცხადია, ნიკა მელიას ეხებოდა. მანიფესტი, რაზეც პრეზიდენტმა სააკაშვილმა თქვა, მისი ინიციატივაა. „ნაციონალური მოძრაობა“ ვუერთდებით და მივესალმებით ყველა იმ მანიფესტს, რომელიც მოწოდებული იქნება ერთობისკენ. ამიტომ, დაველოდოთ 23 ნოემბერს. მნიშვნელოვანი თარიღია და მნიშვნელოვანი გადაწყვეტილებებიც იქნება“,- განაცხადა ლევან ხაბეიშვილმა.

კითხვას, ხომ არ მიიღებენ 23 ნოემბერს ყოფილი თავმჯდომარის, ნიკა მელიას პარტიიდან გარიცხვის გადაწყვეტილებას, ხაბეიშვილი შემდეგნაირად პასუხობს: „მგონია, რომ 23 ნოემბერს სხვა პოლიტიკური გადაწყვეტილებები უფრო მნიშვნელოვანია, ვიდრე ერთი კონკრეტული ადამიანის ჭირ-ვარამი“.

„23 ნოემბერს ძალიან მნიშვნელოვანი პოლიტიკური გადაწყვეტილებები იქნება მიღებული, კოალიციურად ვაპირებთ ყველა გადაწყვეტილების მიღებას. შესაბამისად, საზოგადოებას ეცოდინება გამარჯვების კოალიციის სტრატეგია. კონკრეტულ ადამიანებთან დაკავშირებითაც იქნება გადაწყვეტილებები“,- განაცხადა ლევან ხაბეიშვილმა.

საქართველო გახდა რუსეთის პროვინცია – მინდა სწორედ „ვარდების რევოლუციის“ 20 წლისთავის წინ გითხრათ, რომ საქართველოს სჭირდება ძალიან დიდი ცვლილებები, – ამის შესახებ საქართველოს მესამე პრეზიდენტმა, მიხეილ სააკაშვილმა სასამართლო პროცესზე დისტანციურად ჩართვისას განაცხადა.

მისივე თქმით, საქართველოსთვის ევროკავშირის კანდიდატი ქვეყნის სტატუსის მინიჭებასთან დაკავშირებით, ევროკომისიისაგან დადებითი რეკომენდაციის მიიღება ხალხმა შეძლო და არა მთავრობამ.

„ის, რაც დღეს ხდება გორის მერთან დაკავშირებით, როდესაც თამაზ გინტურის, ჩვენი ნამდვილი ქართველი გმირი გასვენების დღეს რუსეთში საქეიფოდ წავიდა, უკვე აღარაფერი გვიკვირს. საქართველო გახდა რუსეთის პროვინცია და ამას წყალი არ გაუვა. მე მინდა გითხრათ, რომ ეს არ არის უიმედო სიტუაცია, ჩვენ ეს შევძელით – ჩვენ მივიღეთ ევროკომისიის დადებითი რეკომენდაცია სტატუსზე და ეს შევძელით ეს ჩვენ და არა მთავრობამ.

ახლა ვარდების რევოლუციის 20 წელი სრულდება. მინდა სწორედ ვარდების რევოლუციის 20 წლისთავის წინ გითხრათ, რომ საქართველოს სჭირდება ძალიან დიდი ცვლილებები. ქართველ ხალხს აქვს მიღებული გადაწყვეტილება, რომ არ სურს რუსი ოლიგარქის და რუსეთის ჩექმის ქვეშ ცხოვრება, არ სურს იყო ვიღაცის საკუთრება… რა თქმა უნდა, ჩვენ უნდა ვირწმუნოთ ჩვენი ძალა, რომ აუცილებლად შევძლებთ ამათ გაშვებას, მიუხედავად, იმისა რომ, რა თქმა უნდა, ისინი არსად წასვლას არ აპირებენ,“ – განაცხადა სააკაშვილმა.

აფხაზეთსა და ოსეთზე როცა ვსაუბრობთ, იმდენად სენსიტიური თემაა, ყველამ უნდა დააძალოს საკუთარ თავს, მეტი იფიქროს, ვიდრე მკვახე, მძიმე განცხადებებს გააკეთებს, – ამის შესახებ საპარლამენტო უმრავლესობის წევრმა, ბექა დავითულიანმა განაცხადა.

დავითულიანი გამოეხმაურა საქართველოს ყოფილი პრეზიდენტის, მიხეილ სააკაშვილის ბიძის, თემურ ალასანიას განცხადებას, სადაც მან აღნიშნა: „სად გინახავთ წართმეული ტერიტორიის მარტო მშვიდობიანი გზით დაბრუნება, დავიჭიროთ სანთელი, სამჯერ შემოვუაროთ აფხაზეთს, ვთქვათ „ფუი, ეშმაკს“ და დაგვიბრუნდება. ეს არ მოხდება“.

„თემურ ალასანიას ალბათ ვერ მოვთხოვთ, მაღალი პასუხისმგებლობა გამოიჩინოს. რამის გამომჩენი თუ იყო, აქამდე გამოიჩენდა, მაგრამ როდესაც აფხაზეთსა და ოსეთზე ვსაუბრობთ, ეს იმდენად სენსიტიური თემაა, რომ ყველამ უნდა დააძალოს საკუთარ თავს, მეტი იფიქროს, ვიდრე ასეთ მკვახე, მძიმე განცხადებებს გააკეთებს. ერთი მხრივ, ამტკიცებდნენ, რომ რა სისულელეა, ომი ვის უნდოდა, მეორე მხრივ, ამბობენ, ომის გარეშე ვერ დავიბრუნებთო. იქით მხარეს ხალხი გვისმენს და ვიღაცის მხრიდან უპასუხისმგებლოდ გაკეთებული ყოველი ასეთი სულელური განცხადება ძალიან მწვავედ არის აღქმული. თვალს ვადევნებ ხოლმე მათ მედიებს და ასეთ სისულელეზე ძალიან დიდი ვნებათა ღელვაა. იქ არავინ იცის, რომ, საბედნიეროდ, ამ ქვეყანაში თემურ ალასანიას არავინ არაფერს ეკითხება“, – განაცხადა ბექა დავითულიანმა.

კრემაციის სერვისი კანონმდებლობით არ რეგულირდება, გადავწყვიტე, რომ კანონში ცვლილებით დარეგულირებულიყო ეს საკითხი და ქვეყანაში ვისაც სურს, გარდაცვალების შემდეგ კრემაციის სერვისს მიმართოს, ამის შესაძლებლობა ჰქონდეს, იყოს არჩევანის თავისუფლება, – ამის შესახებ ოპოზიციონერმა დეპუტატმა, ხათუნა სამნიძემ განაცხადა.

მისივე თქმით, აღნიშნული საკითხით ბევრი ადამიანია დაინტერესებული და ელოდება, რომ ამის შესაძლებლობა ქვეყანაში იყოს.

„ჩვენს ქვეყანაში არსებობს ეკონომიკური საქმიანობის ჩამონათვალში კრემაცია, როგორც ეკონომიკური საქმიანობა, მაგრამ მიუხედავად ამისა, სამწუხაროდ, თუ ვინმე დაინტერესდება, მიიღოს კრემაციის სერვისი, ამის შესაძლებლობა არ არის, რადგან არ არის დარეგულირებული კანონმდებლობა. საკითხის შესწავლის შემდეგ გადავწყვიტე, რომ ლიცენზიებისა და ნებართვების შესახებ კანონში ცვლილებით დარეგულირებულიყო ეს საკითხი და ქვეყანაში ვისაც სურს, რომ გარდაცვალების შემდეგ კრემაციის სერვისს მიმართოს, ამის შესაძლებლობა ჰქონდეს და იყოს არჩევანის თავისუფლება. ეს საკითხი ეხება არჩევანის თავისუფლებას, განვკარგოთ საკუთარი სხეული გარდაცვალების შემდეგ. არიან ადამიანები და ცოტა არა, ვისაც ეს საკითხი აინტერესებს და ელოდება, რომ ამის შესაძლებლობა ამ ქვეყანაში იყოს.

ეს არ არის დღევანდელი საკითხი, ან ხვალ გადასაწყვეტი საკითხი, კანონმდებლობით დარეგულირების შემდეგ ეს უკვე აღმასრულებელი ხელისუფლების გადასაწყვეტი იქნება, როდის შეიმუშაოს ლიცენზირებასთან დაკავშირბეული საკითხები. რა თქმა უნდა, ეს დაკავშირებული იქნება იმასთან, რამდენად იქნება მოთხოვნა ქვეყანაში, რომ ბიზნესი დაინტერესდეს ამ საკითხში ინვესტირებით“,- განაცხადა ხათუნა სამნიძემ.