სააკაშვილი არის პოლიტიკური პატიმარი – მისი შეწყალება არის სამართლიანი და თუ ამ ნაბიჯს გადადგამს სალომე ზურაბიშვილი, ეს იქნება სწორი, – ამის შესახებ საქართველოს პარლამენტის “ევროოპტიმისტების” დეპუტატმა, რომან გოცირიძემ განაცხადა.

როგორც მან აღნიშნა, სააკაშვილის პატიმრობა არ არის მხოლოდ მისი პერსონალური საკითხი, არამედ ეს არის ერთ-ერთი ფაქტორი ქვეყნის მომავლისა და დეპოლარიზაციისთვისაც.

“მიხეილ სააკაშვილის განცხადება შეწყალებასთან დაკავშირებით, არ არის მხოლოდ მისი პერსონალური საკითხი. მიხეილ სააკაშვილი არის პოლიტიკური პატიმარი, ამ საქმეს აქვს მსოფლიო რეზონანსი, მის მიმართ ხორციელდება პოლიტიკური დევნა და მისი შეწყალება არის ქვეყნის მომავლის, ევროპაში ინტეგრაციის, ასევე, ქვეყანაში პოლარიზაციის შემცირების ერთ-ერთი ფაქტორი. რაც მთავარია, მისი შეწყალება არის სამართლიანი. თუ ამ ნაბიჯს გადადგამს სალომე ზურაბიშვილი, გადადგამს ძალიან სწორ ნაბიჯს, ის იქნება მართალი სააკაშვილთან, მის ოჯახთან, ასევე, მთლიანად საქართველოსთან. ამით კიდევ ერთ ნაბიჯს გადადგამს ქვეყანაში პოლარიზაციის თუნდაც მცირეოდენი განმუხტვისთვის”, – განაცხადა გოცირიძემ.

ინფორმაციისთვის, მიხეილ სააკაშვილის განცხადებით, „სალომე ზურაბიშვილს შეუძლია ერთი ხელის მოწერით დაუბრუნოს მის შვილებს მამა და რაც მთავარია, აღადგინოს საქართველოში პოლიტიკური ბალანსი“.

ყველას კარგად მოეხსენება, რომ ჩვენი ხელისუფლება არის ორიენტირებული ადამიანის ღირსებასა და მისგან მომდინარე ყველა უფლებაზე, შესაბამისად საკუთრების უფლების სრული მასშტაბით უზრუნველსაყოფად და ასევე უკანონო მშენებლობის რისკების სამუდამოდ აღმოსაფხვრელად, პრემიერ-მინისტრის ინიციატივით ჩვენ შევიმუშავეთ ამნისტიის პროექტი, – ამის შესახებ იუსტიციის მინისტრმა, რატი ბრეგაძემ განაცხადა.

ბრეგაძის თქმით, ყველასთვის კარგადაა ცნობილი, რომ საქართველოში მასიურადაა აშენებული ინდივიდუალური საცხოვრებელი სახლები, რომლებზეც არ გაცემულა მშენებლობის ნებართვა ან არ არსებობს სამშენებლო დოკუმენტაცია, სწორედ ამიტომ საჯარო რეესტრის ახალ ამონაწერებში მითითებულია, რომ მიწის ნაკვეთზე განთავსებულია შენობა-ნაგებობები სამშენებლო დოკუმენტაციის გარეშე, რაც იმას ნიშნავს, რომ ხარვეზიანია და ეს ობიექტები ვერ იქნება სრული მოცულობით ჩაშვებული ეკონომიკურ ბრუნვაში.

„გარდა ამისა, ამ პრობლემას ასევე უკავშირდება დაჯარიმების ან დემონტაჟის რისკი, რაც მილიონზე მეტ ადამიანს ეხება. ყველას კარგად მოეხსენება, რომ ჩვენი ხელისუფლება არის ორიენტირებული ადამიანის ღირსებასა და მისგან მომდინარე ყველა უფლებაზე, შესაბამისად საკუთრების უფლების სრული მასშტაბით უზრუნველსაყოფად და ასევე უკანონო მშენებლობის რისკების სამუდამოდ აღმოსაფხვრელად, პრემიერ-მინისტრის ინიციატივით ჩვენ შევიმუშავეთ ამნისტიის პროექტი, რაც წარედგინება საქართველოს პარლამენტს, ის გავრცელდება 2024 წლის პირველ იანვრამდე ფიზიკური პირის საკუთრებაში არსებულ მიწის ნაკვეთზე, მიწის ნაკვეთზე არსებულ შენობა-ნაგებობაზე, რომელიც არის სამშენებლო დოკუმენტაციის გარეშე და ეს შენობა-ნაგებობები უნდა იყოს ინდივიდუალური საცხოვრებელი სახლები“, – განაცხადა ბრეგაძემ.

იუსტიციის მინისტრის ინფორმაციით, „ასეთ სახლებში მცხოვრებლებს აღარ დასჭირდებათ ლეგალიზების კომპლექსური პროცედურების გავლა, მათ აღარ ექნებათ დაჯარიმების ან დემონტაჟის რისკი, ისინი სრულად ისარგებლებენ საკუთრების უფლებით, რაც კონსტიტუციით გათვალისწინებული საკუთრების უფლების დაცვის კიდევ ერთი ნათელი დასტური იქნება“.

„ეს იქნება ნათელი მაგალითი იმისა, ხელისუფლება ადამიანებს როგორ უწყობს ხელს უფლებების რეალიზაციაში. ინიციატივა მილიონზე მეტ ადამიანს შეეხება და ეს ინიციატივა გავრცელდება იმ ინდივიდუალურ საცხოვრებლებზე, რომელიც 2024 წლის პირველ იანვრამდე იქნება აშენებული. ამ პერიოდის შემდგომ აშენებული საცხოვრებელი სახლები აღარ დარეგისტრირდება საჯარო რეესტრში, ისინი ვეღარ ჩაეშვება ეკონომიკურ ბრუნვაში და ინფორმაცია მუნიციპალიტეტს მიეწოდება. ეს არამხოლოდ ამნისტიაა, არამედ ეხმიანება უკანონო მშენებლობების პრობლემას. ამ პრობლემის აღმოფხვრის შემდგომ ერთხელ და სამუდამოდ დასრულდება ყველა ის სირთულე, რაც თან ახლავს უკანონო მშენებლობებს. 2024 წლის პირველი იანვრიდან ყველა ინდივიდუალური სახლი აშენდება კანონიერად, რაც გულისხმობს იმას, რომ წინასწარ უნდა იყოს ნებართვა აღებული, შეთანხმებული უნდა იყოს პროექტი და მხოლოდ ასეთ სახლებზე განხორციელდება რეგისტრაცია“, – განაცხადა ბრეგაძემ.

გარემოს დაცვისა და სოფლის მეურნეობის მინისტრმა, ოთარ შამუგიამ, მთავრობის სხდომის დასრულების შემდეგ მედიის წარმომადგენლებთან გამართულ შეხვედრაზე რაჭაში სამონადირეო მეურნეობის მოწყობის ლიცენზიის საკითხზე ისაუბრა.

ოთარ შამუგიას თქმით, ლიცენზიის გაცემისას გარემოს ეროვნულმა სააგენტომ კანონმდებლობის შესაბამისად, ყველა პროცედურა დაიცვა.

„გარემოს ეროვნულ სააგენტოს მიერ 2022 წლის მარტში საჯარო აუქციონის წესით იქნა გაცემული ლიცენზია, რომელშიც გაიმარჯვა კონკრეტულმა კომპანიამ – „ეიჩ ჯი კაპრა კაუკასიკამ“. პროცესს თან სდევდა გარკვეული კვლევები, შესაბამისი სამუშაოები. აუქციონის გამოცხადებამდე ერთი თვით ადრე პრესაში, ასევე გარემოს ეროვნული სააგენტოს ოფიციალურ გვერდზე და სხვა საშუალებებით გავრცელდა ინფორმაცია, პროცესი იყო აბსოლუტურად საჯარო და იმ კანონმდებლობის შესაბამისი, რომელიც საკითხს არეგულირებს ქვეყანაში. გარემოს ეროვნულმა სააგენტომ დაიცვა ყველა პროცედურა კანონმდებლობის შესაბამისად; აბსოლუტურად საჯაროდ გამოცხადდა აუქციონი და შესაბამისად გაიცა ლიცენზია“, – განაცხადა ოთარ შამუგიამ.

ოთარ შამუგიას განცხადებით, რაჭაში ტყე არ გაყიდულა და არსებული კანონმდებლობით ტყის გაყიდვა შესაძლებელი არ არის.

„მინდა, კიდევ ერთხელ ცალსახად და სრული პასუხისმგებლობით განვაცხადო, რომ ეს არის სიცრუე, ტყე ნამდვილად არ გაყიდულა. არსებული კანონმდებლობით ტყის გაყიდვა შესაძლებელი არ არის“, – აღნიშნა ოთარ შამუგიამ.

ამასთან, ლიცენზიით გათვალისწინებულ ვალდებულებებსა და უფლებამოსილებაზე საუბრისას, ოთარ შამუგიამ განაცხადა, რომ კომპანიას, რომელზეც ლიცენზია გაიცა, მიეცა უფლებამოსილება, ტერიტორიაზე სამონადირეო მეურნეობის მოწყობის დროს არანაკლებ ხუთი მილიონი ლარის ღირებულების ინვესტიცია განეხორციელებინა, მოეწყო შესაბამისი ეკოტურისტული ინფრასტრუქტურა.

მისივე თქმით, დასაქმებული ადამიანების 80%-ზე მეტი უნდა ყოფილიყო ადგილობრივი მოსახლეობა და ტერიტორიაზე გადაადგილების დროს ლიცენზიის მფლობელს ხელი არ უნდა შეეშალა მოსახლეობისთვის, ასევე, არამერქნული რესურსების მოპოვებისთვის.

„ლიცენზიაში კონკრეტულად არის გაწერილი, რომ სოციალური ჭრის ნაწილში, სატყეო სააგენტოსთვის ხელი არ შეეშალა საშეშე მერქნის მოპოვებაში. ლიცენზიანტს ჰქონდა ვალდებულება, მოსახლეობასთან, ადგილობრივ ხელისუფლებასთან ერთად და სამინისტროს შესაბამის სამსახურებთან ერთად შეედგინა მართვის გეგმა, განეხორციელებინა შესაბამისი კვლევები, მათ შორის, ზურმუხტის ქსელის ტერიტორიაზე. ინფრასტრუქტურული ნაწილის დაგეგმვის, შემდგომი საქმიანობის დაგეგმვის პროცესში ჩართული უნდა ყოფილიყო ადგილობრივი მოსახლეობა და მათი ინტერესები ყოფილიყო გათვალისწინებული“, – განაცხადა ოთარ შამუგიამ.

თქვენ ხართ ფარისევლები, რომლებიც თქვენს მიერ აწყობილ ჯარში საკუთარ შვილებსა და ოჯახის წევრებს არ უშვებთ – Let’s play, ვნახოთ ვინ მოიგებს! – ასე მიმართა ოპოზიციონერმა დეპუტატმა იაგო ხვიჩია უმრავლესობის წევრებს ბიუროს სხდომაზე, სადაც „თავდაცვის კოდექსში“ დაგეგმილი ცვლილებების პროექტი ინიცირება მოხდა.

ცვლილებები, დაჩქარებული წესით, პარლამენტის მიერ სექტემბრის თვეში მიღებულ „თავდაცვის კოდექსში“ ხორციელდება. როგორც იაგო ხვიჩიამ განმარტა, კანონის პროექტის მიხედვით, სახელმწიფო ადმინისტრაციული ორგანო დაადგენს, ადამიანი ნამდვილად მორწმუნეა თუ – არა.

„ახალი „თავდაცვის კოდექსის“ ამოქმედების შემდეგ, რომელიმე თქვენგანის ოჯახის წევრი ჯარში წავიდა? მაგალითად, ისრაელში გასაჯაროებულია, სად მსახურობენ თანამდებობის პირების შვილები – ნახავთ, ამ წუთას რამდენი თანამდებობის პირის შვილია ჯარში და საბრძოლო მოქმედებაში ჩართული. თქვენი ოჯახის რომელიმე წევრი ამ პერიოდის განმავლობაში ამ კოჰორტას შეემატა?! – არავინ შემატებია! მინისტრების და მინისტრის მოადგილეების ოჯახის წევრები ამ კოჰორტას შეემატა?! – არ შემატებია! ბიბლიური თავისუფლების მღვდელთმსახურები წაიყვანეთ ჯარში? – ვერ წაიყვანეთ! ეს არა იმიტომ, რომ ჩვენ ვართ მაგრები, არამედ იმიტომ, რომ ხალხს ისეთ ჯარში წასვლა არ უნდა, რომელიც თქვენ ააწყვეთ, სადაც თქვენი ოჯახის წევრები გასაშვებად არ გემეტებათ და არავინ არ უშვებთ – კარგი რომ იყოს, თქვენი ოჯახის წევრები და თქვენი შვილები რიგში იქნებოდა!“ – მიმართა “ქართული ოცნების“ დეპუტატებს იაგო ხვიჩიამ.

ახლა რომ მოინდომა ოპოზიციური პარტიის ლიდერობა, მგონი ნამდვილად ავიწყდება მასაც და მის თანაპარტიელებსაც, რომ ის არ არის საქართველოს მოქალაქე და თავად თქვა უარი მოქალაქეობაზე – განუცხადა ჟურნალისტებს „ქართული ოცნების“ აღმასრულებელმა მდივანმა მამუკა მდინარაძემ სააკაშვილის განცხადებაზე იმის შესახებ, რომ თავის თავზე იღებს პოლიტიკური საბჭოს ხელმძღვანელობას.

როგორც მამუკა მდინარაძემ აღნიშნა, პოლიტიკურ პროცესებში სააკაშვილის ჩართვაც ქვეყნის უმაღლესი კანონის და ზოგადად კანონმდებლობის სერიოზული დარღვევაა.

მგონი ავიწყდება მას [სააკაშვილს], რომ საქართველოს მოქალაქეობაზე უარი აქვს ნათქვამი. ახლა რომ ერთვება პოლიტიკურ პროცესებში ესეც სერიოზული დარღვევაა ქვეყნის უმაღლესი კანონის და ზოგადად კანონმდებლობის. ახლა რომ მოინდომა ოპოზიციური პარტიის ლიდერობა, მე მგონი ნამდვილად ავიწყდება მასაც და მის თანაპარტიელებსაც, რომ ის არ არის საქართველოს მოქალაქე და თავად თქვა უარი ჩვენი ქვეყნის მოქალაქეობაზე“, – განაცხადა მამუკა მდინარაძემ.

სააკაშვილი ცდილობს, პარტიის ლიდერის ფუნქცია დაიბრუნოს. არ მგონია, ამით რაიმე კონკრეტული გამოუვიდეს, – ამის შესახებ პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა საქართველოს პირველ არხს განუცხადა.

ქადაგიშვილის თქმით, სააკაშვილის სახელი პარტიაში სიმბოლოდ სჭირდებათ, რეალური ბერკეტები კი სხვადასხვა ჯგუფს უნდა, რომ ჰქონდეს.

„სამწუხაროდ, მიხეილ სააკაშვილი და მისი პარტია ისტორიაში არიან ჩარჩენილი. ჯერჯერობით ისეთი ელექტორალური რესურსი აქვთ, რაც მათ პოლიტიკურად აცოცხლებთ. ალბათ მიხეილ სააკაშვილის მხრიდან ასეთი შეძახილები მიმართულია იქითკენ, რომ ის ელექტორატი მაინც შეინარჩუნონ, რაც მათ ჯერ კიდევ აქვთ. მიხეილ სააკაშვილს პოლიტიკაში ახლის თქმის საშუალება არ აქვს, თუმცა პარტიის შიგნით ბრძოლის ნიუანსებს ფლობს. ხედავს, რომ პარტიაში მისი საჭიროება დიდად არ არის. მისი სახელი სიმბოლოდ სჭირდებათ, ხოლო მმართველობა და რეალური ბერკეტები სხვადასხვა ჯგუფს უნდა, რომ ჰქონდეს. სააკაშვილი ცდილობს, თავისი, როგორც პარტიის ლიდერის, ფუნქცია დაიბრუნოს. არ მგონია, ამით რაიმე კონკრეტული გამოუვიდეს.

როგორც ჩანს, ნიკა მელია მაინც ცალკე გავა და ელოდება, ეს მაშინ გააკეთოს, როცა მაქსიმალურად მეტი პარტიული შიდა რესურსის გატანა შეეძლება გარეთ. ის ნაწილი, რომელიც ხაბეიშვილს აცოცხლებს, ფიქრობს, რომ ეს პარტია და მისი ამომრჩეველი ერთი კუთხით იყოს დაკავშირებული სააკაშვილთან და ლოზუნგად ჰყავდეთ, ხოლო საარჩევნო სია და ფინანსები მათი ნება-სურვილით გადანაწილდეს. როგორც სააკაშვილის პერსონას იყენებს მისი პარტია, ისიც შეეცდება, თავი ადვილად არ გამოაყენებინოს. მისი განცხადებები ნიშნავს, რომ ამ პარტიაში თუ არ იქნება განმსაზღვრელი ძალა, ზურგს შეაქცევს და ეს „ნაციონალურ მოძრაობას“ ამომრჩევლის დიდ ნაწილს დააკარგვინებს, რადგან ვინც ხუთ ნომერს ხაზავს, მაინც სააკაშვილის ამომრჩეველია“, – განაცხადა ირაკლი ქადაგიშვილმა.

საქართველოს ყოფილმა პრეზიდენტმა, მიხეილ სააკაშვილმა დღევანდელ სასამართლო პროცესზე დისტანციურად ჩართვისას განაცხადა, რომ „ნაციონალურ მოძრაობაში“ საერთო ენის გამონახვა უნდა შეძლონ და სწრაფი ტემპით იარონ წინ. სააკაშვილმა ასევე ისაუბრა პარტიის პოლიტსაბჭოს შესახებ: „ჩემს თავზე ვიღებ პოლიტიკურ პასუხისმგებლობას, ყველა ჩვენი გამოცდილი მებრძოლი და ძალიან ბევრი დამსახურებული ადამიანი, რომელიც რატომღაც გარიყული აღმოჩნდა პოლიტიკური საბჭოდან, დაბრუნდეს. ჩემს თავზე ვიღებ პოლიტიკური საბჭოს კოორდინაციას. დღევანდელი პოლიტსაბჭო კიდევ უფრო ლეგიტიმური გახდება, თუ ადრე არჩეულ ხალხსაც დავაბრუნებთ“.

რამდენიმე ძალიან წარმატებული, ძალიან მნიშვნელოვანი მმართველი გვყოლია, მაგრამ ზედიზედ 9 წელიწადი წარმატებული მმართველობის პერიოდი მხოლოდ „ვარდების რევოლუციის“ შემდეგ იყო – „ვარდების რევოლუციამ“ შეძლო შეუძლებელი და ის იყო ძალიან მნიშვნელოვანი მოვლენა, – ამის შესახებ საქართველოს მესამე პრეზიდენტმა მიხეილ სააკაშვილმა თბილისის საქალაქო სასამართლოში 7 ნოემბრის საქმეზე მის სასამართლო პროცესზე სიტყვით გამოსვლისას განაცხადა.

სააკაშვილმა „ვარდების რევოლუციის“ მნიშვნელობაზე ისაუბრა და დაასახელა მოვლენები, რომელიც, მისი თქმით, „ვარდების რევოლუციასთან“ ბრძოლას ემსახურებოდა.

„ვარდების რევოლუციის“ შემდგომი 9 წელი იყო ყველაზე წარმატებული 9 წელი საქართველოს მთელი ისტორიის განმავლობაში. დედაჩემი კარგი ისტორიკოსია და ხშირად ვსაუბრობთ ხოლმე ამაზე. რამდენიმე ძალიან წარმატებული, ძალიან მნიშვნელოვანი მმართველი გვყოლია, მაგრამ ზედიზედ 9 წელიწადი წარმატებული მმართველობის პერიოდი მოხდა მხოლოდ „ვარდების რევოლუციის“ შემდეგ. ამავე დროს, უნდა გვესმოდეს, რომ როდესაც „ვარდების რევოლუციაზე“ ვსაუბრობთ, „ვარდების რევოლუციას“ შეხვდა წარმოუდგენელი წინააღმდეგობა. შეხვდებოდა, როდესაც ამხელა ზრდა იყო ეკონომიკაში, ბრძოლა იყო კორუფციის წინააღმდეგ. ქვეყნის შიგნით და ქვეყნის გარეთ ვებრძოდით კორუფციონერებს, კრიმინალებს, გვებრძოდნენ კორუფციონერები და გვებრძოდნენ კრიმინალები; ვებრძოდით რუსეთის არაფორმალურ გავლენებს, რუსეთი გვებრძოდა მთელი ძალით. მინდა, გავიხსენო, რამდენი ეტაპი გავიარეთ და როგორ გვებრძოდნენ წარმატებული „ვარდების რევოლუციის“ შემდეგ, რომელმაც ჩაბნელებული საქართველო გაანათა. კორუფცირებული საქართველო გაიწმინდა კორუფციისგან და ყველას დავანახეთ, რომ არ ვიყავით განწირულები და ქრთამის აღება ჩვენი დნმ-ის ნაწილი არ იყო, როგორც რუსები გვარწმუნებდნენ, რომ მეხინკლე ხალხი ვართ, რომელსაც სახელმწიფოს შენება არ შეუძლია – მხოლოდ მაგიდაზე უნდა ვუცეკვოთ, ელარჯი ვუწელოთ და ქრთამი აგვეღო და მიგვეცა. ნურას უკაცრავად!“,- განაცხადა სააკაშვილმა.

საქართველოში უნდათ იმ უბედურების გამეორება, რაც 2008 წელს ვიხილეთ ჩვენ ქვეყანაში. რა თქმა უნდა, ამას ვერ ეღირსება ვერც თემურ ალასანია, ვერც მისი დის შვილი, – ასე გამოეხმაურა „ქართული ოცნების“ თავმჯდომარე ირაკლი კობახიძე თემურ ალასანიას განცხადებას, რომლის თანახმად, ვის უნახავს, „წართმეული ტერიტორიის მარტო მშვიდობიანი გზით დაბრუნება“.

კობახიძე ამბობს, რომ ყოფილი ხელისუფლების გამოცდილებისგან განსხვავებით, საქართველოს უნდა ჰქონდეს მშვიდობა და დემოკრატია და „ქართული ოცნების“ სულისკვეთებაც ეს არის.

„მისმა დისშვილმა ერთხელ სცადა ომის გზით ტერიტორიების დაბრუნება და მოგეხსენებათ, რაც მოიტანა ამ ყველაფერმა ჩვენი ქვეყნისთვის, ეს იყო ჩვენი ქვეყნის ტერიტორიების 20%-ის ოკუპაცია, აფხაზეთის ოკუპაცია, სამაჩაბლოს ოკუპაცია. რა თქმა უნდა, ჩვენ არ გვინდა ალსანიას და მისი დის შვილის გამოცდილების გამეორება, ეს წარმოუდგენელია, ბუნებრივია, ჩვენ გვაქვს სხვა პოლიტიკა და რა თქმა უნდა, ეს ადამიანები ამით არიან გაღიზიანებული. ერთი, რომ საკუთარი ცოდვები აწუხებთ და მეორე, საქართველოში უნდათ იმ უბედურების გამეორება, რაც 2008 წელს ვიხილეთ ჩვენ ქვეყანაში. რა თქმა უნდა, ამას ვერ ეღირსება ვერც თემურ ალასანია, ვერც მისი დის შვილი და გარდა ამისა, როდესაც საუბარია დემოკრატიაზე, ესეც ენატრებათ ამ ადამიანებს, ენატრებათ ის დრო, როდესაც სააკაშვილი ავტორიტარული მეთოდებით მართავდა ამ ქვეყანას, როდესაც ის იყო დიქტატორი ამ ქვეყანაში. აქედან გამომდინარე, ამ ნოსტალგიის გამოძახილია ის განცხადებები, როლებიც კეთდება ალასანიას მხრიდან, მიხეილ სააკაშვილის ბიძის მხრიდან. მათი გამოცდილებისგან განსხვავებით საქართველოს უნდა ჰქონდეს მშვიდობა და დემოკრატია, ეს არის ჩვენი სულისკვეთებაა, ჩვენი პოლიტიკა განსხვავებით ამ რეჟიმის ლიდერების პოლიტიკისგან.

პერიოდულად მათ აქვთ ხოლმე წამოცდენები და საზოგადოებას აღიარებით ჩვენებას აძლევენ და ეს იყო მორიგი წამოცდენა, რაც თემურ ალასანიას ჰქონდა. რა თქმა უნდა, მათი სურვილი, მიზანი არის რადიკალიზმის, პოლარიზაციის გაღვივება ადამიანების ერთმანეთთან დაპირისპირება, ეს უბრალოდ წამოსცდათ. ისინი ამას ხომ აკეთებენ მთელი ამ წლების განმავლობაში. რასაც მთელი ეს წლები აკეთებენ ამ რეჟიმის და ამ პოლიტიკური ძალის წარმომადგენლები ის, უბრალოდ, კიდევ ერთხელ წამოსცდა თემურ ალასანიას“,-აცხადებს კობახიძე.

შეგახსენებთ, რომ საქართველოს ყოფილი პრეზიდენტის, მიხეილ სააკაშვილის ბიძამ თემურ ალასანიამ აშშ-ში, ემიგრანტებთან შეხვედრაზე წართმეული ტერიტორიების დაბრუნების თაობაზე ისაუბრა.

„სად გინახავთ ისტორიაში ძალით წართმეული ტერიტორიის მარტო მშვიდობიანი შელოცვების გზით დაბრუნება? მოდით, შევულოცოთ ახლა, ერთად ჩამოვიკიდოთ ხატი კისერზე, დავიჭიროთ დიდი სანთელი, სამჯერ შემოუაროთ აფხაზეთს, ვთქვათ „ფუი, ეშმაკს“ და დაგვიბრუნდება. არ მოხდება.

გაყოფილი, გახლეჩილი, ერთმანეთს დატაკებული საქართველო მირჩევნია, იმიტომ, რომ ეს არის პლურალიზმი, დემოკრატია, თავისუფლების საზომები“, – განაცხადა თემურ ალასანიამ, რომლის კომენტარს „საზოგადოებრივი მაუწყებელი“ ავრცელებს.