რა რესურსია აქვს ოპოზიციას, საზოგადოებას კარგად მოეხსენება, რომელ ოპოზიციურ პარტიებს რა მხარდაჭერა აქვს, ესეც, ჩვენც ძალიან კარგად ვიცით მათი შესაძლებლობების შესახებ,, – ამის შესახებ „ქართული ოცნების“ წევრმა, ბექა ოდიშარიამ განაცხადა.

ოდიშარია თქმით, ოპოზიციის გარკვეული ნაწილი შეშინებულია ხუთპროცენტიანი ბარიერის გამო.

„სხვადასხვა დროს სხვადასხვა ოპოზიციური პარტიის ლიდერები და წარმომადგენლები, კონკრეტულად ყველა, ვინც ახლა ფიგურირებს პოლიტიკურ ველზე, იბრიქებოდა, რომ მათ არ აქვთ პრობლემა ბარიერის და ისინი უპირობოდ გადალახავენ ხუთპროცენტიან ბარიერს, ახლა რამ შეაშინა, რამ დააფრთხო, არ ვიცი. ალბათ შექმნილმა მდგომარეობამ და საზოგადოების ძალიან ძლიერმა მხარდაჭერამ „ქართული ოცნების“ მიმართ. მე მოვუწოდებდი მათ, ჭკუას წიხლი დააჭირონ და გაერთიანდნენ, მოძებნონ ერთმანეთთან საერთო ენა, მაინც ერთსა და იმავე საქმეს აკეთებენ, ჩვენთვის ისინი კოლექტიური „ნაციონალური მოძრაობა“ არიან, მათთვისაც პრაგმატული გადაწყვეტილება მიიღონ, როგორც ეს „სტრატეგია აღმაშენებელმა“ გააკეთა და შეუერთდა „ნაციონალურ მოძრაობას“ ვინაიდან და რადგანაც მათ არანაირი შანსი არ აქვთ, რომ გადალახონ ცალკე ყოფნის შემთხვევაში საარჩევნო ბარიერი. გახარიას პარტიას რომ უთანამშრომლია რაიონებში „ნაციონალურ მოძრაობასთან“, ეს ფაქტია, ამის შესახებ „ნაციონალური მოძრაობის“ წარმომადგენელმა ისაუბრა კიდეც, რომ მათ უკვე აქვთ გარკვეული ალიანსი სხვადასხვა რაიონში. შესაბამისად, არაფერი გაგვიკვირდება, რომ არჩევნების მოახლოებისას გარკვეულმა შიშმა იმისა, რომ ცალკე ყოფნის შემთხვევაში ისინი ვერ გადალახავენ ბარიერს, გაერთიანდებიან ის პოლიტიკური პარტიები, ვინც ახლა უარყოფენ ერთმანეთს ძალიან მკაფიოდ. რაც შეეხება ბარიერის დაწევის შინაარსს, ჩვენ ვნახეთ, რომ 2020 წლის არჩევნებში მიღებულმა ჩვენმა გადაწყვეტილებამ და იმან რომ, 12-ზე მეტი პარტია შემოვიდა თუ არ ვცდები პარლამენტში, არანაირი დეპოლარიზაცია არ მოიტანა, არანაირი სახალხო და პოლიტიკური კონსენსუსი არ მოიტანა, პირიქით გააღრმავა დაპირისპირება, სიძულვილის ენა და ჩემი აზრით, ამ მიზნით ბარიერის დაწევა მიზანშეწონილი არ არის“, – განაცხადა ოდიშარიამ.

ქართველი ხალხის ევროპული გზის ლიდერი ამჟამად არის ირაკლი ღარიბაშვილი, შალვა პაპუაშვილი, ირაკლი კობახიძე, ამ ტრიუმვირატმა და ზოგადად ჩვენი გუნდის ძალისხმევამ მოიტანა შედეგი და მე პრაქტიკულად გამოვრიცხავ რომ არ მოგვანიჭონ კანდიდატის სტატუსი, – ამის შესახებ „ქართული ოცნების“ წევრმა, ბექა ოდიშარიამ განაცხადა.

ამასთან, ოდიშარიას თქმით, „სალომე ზურაბიშვილმა დაიწყო ცალკე პოლიტიკური ცურვა“.

„სალომე ზურაბიშვილმა დაიწყო ცალკე პოლიტიკური ცურვა, ეს რას ემსახურება? ბუნებრივია არ ემსახურება პირად და საოჯახო ინტერესებს, ეს ემსახურება გარკვეულ პოლიტიკურ სამომავლო გეგმებს, თუმცა მე არ ვუწყი ამის შესახებ, არ მაქვს ინფორმაცია. ჩვენთვის ეს ტრაგედია არ იქნება, ვისთან ერთადაც არ უნდა დადგეს, მაინც დამარცხდება „ქართულ ოცნებასთან“ და „ქართული ოცნება“ გააგრძელებს იმ გზას სტატუსის მინიჭების შემდეგ, რომელიც ძალიან მალე მიგვიყვანს ევროკავშირის სრულფასოვან წევრობამდე“, – განაცხადა ოდიშარიამ.

“ჩვენ ვიწყებთ მზადებას გადამწყვეტი ბრძოლისთვის” – ამის შესახებ პარტია “ლელოს” წევრმა, საბა ბუაძემ განაცხადა და აღნიშნა, რომ დღეს თბილისის ორგანიზაციას დააფუძნებენ.

ასევე, აირჩევენ მის თავმჯდომარესა და საბჭოს წევრებს. მისი თქმით, პარტიას მმართველი საბჭოს წევრობის 20 კანდიდატი ჰყავს, თავმჯდომარეობის კანდიდატი კი თავადაა. “ჩვენ გვყავს ხელისუფლება, რომელიც ემსახურება რუსეთის ინტერესებს საქართველოში და, აი, ამ სიავის შედეგი ყველაზე მეტად საკუთარ თავზე სწორედ თბილისმა იწვნია. თბილისი, ფაქტობრივად, თავდაყირა დადგა.

რამდენიმე ათეული ათასი რუსის მუდმივად აქ ცხოვრებით და შემოსევით გაძვირდა ქირის ფასები, გაძვირდა პროდუქტებზე ფასები, მომსახურების ფასები… ამ ყველაფრის საპასუხოდ ჩვენ ვიწყებთ მზადებას გადამწყვეტი ბრძოლისთვის. ვაფუძნებთ თბილისის ორგანიზაციას და თბილისის ორგანიზაციის დაფუძნებით, ვაპირებთ დავუპირისპირდეთ როგორც ამ პრობლემას, ასევე სხვა ყველა პრობლემას, რომელიც გამოწვეულია ხალხის სამსახურში არმყოფი ხელისუფლებით. ჩვენ ვაპირებთ, რომ ვიმუშაოთ ურბანულ გენოციდზე, რომელიც ისევ და ისევ რუსული ფულით კეთდება. ვაპირებთ, რომ დავუპირისპირდეთ მწვანე სივრცეების განადგურებას…ვაპირებთ ვიმუშაოთ სატრანსპორტო პრობლემებზე, შშმ პირების პრობლემებზე, ქალაქის ეკონომიკის გაძლიერებაზე და გაჯანსაღებაზე,” – ამბობს ბუაძე.

საქართველოს პარლამენტის დელეგაცია ერევანში, ეუთო-ს საპარლამენტო ასამბლეის 21-ე საშემოდგომო შეხვედრაში მონაწილეობს. სიტყვით გამოსვლისას საგარეო ურთიერთობათა კომიტეტის თავმჯდომარემ და ეუთო-ს საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელმა, ნიკოლოზ სამხარაძემ, საქართველოში ეუთო-ს პრეზიდენტის პია კაუმას და დელეგაციის ვიზიტზე და ასევე, ჩვენი ქვეყნის რეგიონულ როლზე ისაუბრა.

„ვფიქრობ, ეს იყო ძალიან დროული ვიზიტი არსებული მდგომარეობის შესაფასებლად და სამხრეთ კავკასიაში ხანგრძლივი მშვიდობის დამყარების შესაძლებლობების შესასწავლად. ასევე, ძალიან მნიშვნელოვანი იყო დელეგაციის მიერ საოკუპაციო ხაზის და იძულებით გადაადგილებულ პირთა დასახლებების მონახულება. იმ პირების, რომლებიც რუსული ოკუპაციის გამო უკვე 15 წელზე მეტია (ზოგიერთი – 30 წელია) ვერ ახერხებენ თავიანთ სახლებში დაბრუნებას. აქვე, მინდა აღვნიშნო, რომ საქართველო მზადაა სომხეთსა და აზერბაიჯანს შორის სამშვიდობო დიალოგს ხელი შეუწყოს. ჩვენ მზად ვართ შემოგთავაზოთ თბილისი, როგორც მოლაპარაკებების ადგილი და ვიმედოვნებთ, რომ იმ ვალდებულებით, რომელიც ორივე მხარემ საჯაროდ გამოთქვა და აიღო, ჩვენ შევძლებთ უახლოეს თვეებში აღვნიშნოთ გრძელვადიანი მშვიდობა ჩვენს ორ მოძმე მეზობელ ქვეყანას შორის. ჩვენი მხრიდან, საქართველო მზადაა ხელი შეუწყოს დიალოგს“, – განაცხადა ნიკოლოზ სამხარაძემ.
საქართველოს საპარლამენტო დელეგაციის ხელმძღვანელს ეუთოს საპარლამენტო ასამბლეის პრეზიდენტი, პია კაუმა გამოეხმაურა.

„ძალიან სასიამოვნო იყო საქართველოში სტუმრობა. ახლა, საქართველოსთვის ძალიან მნიშვნელოვანი მომენტია, რადგან ყველამ ვიცით, რომ თქვენ ევროკავშირის კანდიდატის სტატუსი მოგენიჭათ, რომელიც ოფიციალურად რამდენიმე კვირაში, დეკემბერში გამოცხადდება“, – განაცხადა პია კაუმამ და აღნიშნა, რომ ეუთო სრულ მხარდაჭერას უცხადებს საქართველოს როგორც ტერიტორიული მთლიანობის, ისე სომხეთსა და აზერბაიჯანს შორის სამშვიდობო დიალოგის ხელშეწყობის კუთხით.

„ჩვენ ვიმყოფებოდით საოკუპაციო ხაზთან და ადგილზე, გავეცანით არსებულ ვითარებას. ვნახეთ როგორია, როდესაც სხვა ქვეყანა უკანონოდ ახდენს მეორე ქვეყნის ტერიტორიის ოკუპაციას, ვესაუბრეთ მოსახლეობას. იქ საკუთარი თვალით ვნახეთ ვითარება, რომელიც არავითარ შემთხვევაში არ შეიძლება იყოს მისაღები. ჩვენ სრულ მხარდაჭერას გიცხადებთ. ასევე, სრულად გიჭერთ მხარს რეგიონში სამშვიდობო შეთანხმების ფასილიტაციის პროცესში. თქვენ მნიშვნელოვანი როლი გაქვთ სომხეთსა და აზერბაიჯანს შორის მოლაპარაკებების მხარდაჭერის კუთხით“, – განაცხადა ეუთოს საპარლამენტო ასამბლეის პრეზიდენტმა.

შეხვედრაში ნიკოლოზ სამხარაძესთან ერთად, ევროპასთან ინტეგრაციის კომიტეტის თავმჯდომარე, ეუთო-ს საპარლამენტო ასამბლეაში საქართველოს პარლამენტის მუდმივმოქმედი დელეგაციის წევრი, მაკა ბოჭორიშვილი მონაწილეობდა.