ვახშამი პუტინთან ერთადო, ისე საუბრობენ, თითქოს დავითაშვილი და პუტინი ისხდნენ ერთი ერთზე და ვახშმობდნენ, საუბრობდნენ გემრიელად რაღაცაზე, როდესაც ათეულობით და ასეულობით ქვეყანა იღებს გარკვეულ ფორმატში მონაწილეობას, როგორც ჩანს, მოგვიწოდებენ, რომ ამ ფორმატებიდან გამოვიდეთ, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მდინარაძის თქმით, ლევან დავითაშვილის დაბარება თუ გადაწყდება პარლამენტში, ის კანონით დადგენილი წესით უპასუხებს დეპუტატების კითხვებს.

„სპეკულაციის დონეა, დავითაშვილი ბოლომდე იჯდა, ყურადღებით უსმენდაო. ყურადღებით უსმენდა თუ არაყურადღებით, გაფანტული ჰქონდა იმ დროს ადამიანს გონება თუ სხვა რამეზე ფიქრობდა, სპეკულაციაა. მანამდე იყო შეხვედრა, სადაც ბლინკენი და ლავროვი ერთად ისხდნენ. როგორ არის, ამერიკელებს და დასავლელებს ჩვენი არაფერი აინტერესებთ?! ჩინეთი რომ მხარდაჭერას უცხადებს საქართველოს, ნეტავ, ბევრი ქვეყანა უცხადებდეს ისე. დავითაშვილის დაბარებას რაც შეეხება პარლამენტში, სპეკულაციური დაბარებაა, მაგრამ რეგლამენტით დადგენილი წესით თუ იქნება, ბუნებრივია, მოსვლა მოუწევს ნებისმიერ მინისტრს. ჩვენ არ გვეშინია ამის, არც მინისტრებს ეშინიათ და არც ჩვენ გვეშინია, მაგრამ სპეკულაციას თავი უნდა დავანებოთ. მაგ ლოგიკით, უნდა გამოვიდეთ ყველა საერთაშორისო ფორმატიდან, სადაც შეიძლება მოხვდეს პუტინი, ლავროვი და ა.შ. გინდათ, რომ ფორმატებიდან გამოვიდეთ, სადაც არის რუსეთი, ეს არ გამოვა. სხვათა შორის, ჰააგაში ვართ თანამონაწილეები იმ საჩივრის, სადაც რუსეთი ომის დამნაშავედ უნდა გამოცხადდეს“, – განაცხადა მდინარაძემ.

მამუკა მდინარაძის თქმით, საქართველო არცერთ ორგანიზაციას არ დატოვებს იმის გამო, რომ იქ რუსეთიც იმყოფება.

„ჩვენ არცერთ ორგანიზაციას, იმის გამო, რომ იქ რუსეთია, არათუ დავტოვებთ, არამედ შევეცდებით, რომ ყველა ფორმატი გამოვიყენოთ საქართველოს ეროვნული ინტერესებისათვის, მათ შორის დეოკუპაციის და მათ შორის ზეწოლის“, – განაცხადა მდინარაძემ.

აზერბაიჯანსა და სომხეთს შორის ნდობის ხიდის აღდგენა გვინდაო, სამტრედია-გრიგოლეთის ხიდი აღადგინეთ, ის ჯობს, ხალხმა ისარგებლოს, გადავიდეს-გადმოვიდეს და მერე იფიქრეთ სომხეთსა და აზერბაიჯანს შორის ნდობის ხიდების აღდგენაზე, – ამ სიტყვებით „ერთიანი ნაციონალური მოძრაობის“ ერთ-ერთმა წევრმა, დავით კირკიტაძემ უმრავლესობის წევრებს პარლამენტში, პლენარულ სხდომაზე სიტყვით გამოსვლისას მიმართა.

კირკიტაძის თქმით, გასულ წელს, ქვეყანას კანდიდატის სტატუსი იმის გამო არ მისცეს, რომ პირობები არ შესრულდა.

„ევროპა გვინდაო, რამდენჯერმე გაიმეორეთ და დადიხართ ჩინეთში, ესწრებით სამიტებს, სადაც ჰააგის სასამართლოს მიერ ბრალდებული ადამიანია, ჩვენი ქვეყნის მთავარი მტერი და ამაზე რეაქცია არ გაქვთ, ხოლო, ვინც ევროპულ დედაქალაქებში დადის, იმ ადამიანს იმპიჩმენტს უცხადებთ. კომიტეტის თავმჯდომარემ რამდენიმე საინტერესო რაღაც თქვა, ახალ ფორმატებს იგონებთო და მართლა მაინტერესებს, ეს 3+3 რა ფორმატია, რატომ უნდა ვიყოთ იქ, ირანთან ან რუსებთან ერთად? ეს საკითხავია. თუ ასეთი წარმატებულები ხართ, შარშან, როცა მოლდოვას და უკრაინას მისცეს კანდიდატის სტატუსი, ჩვენ ქვეყანას რატომ არ მისცეს, შემთხვევით იმიტომ ხომ არა, რომ წარმატებული კი არა, ძალიან სამწუხაროდ, ჩვენ და ჩვენი ხალხისთვის, ის პირობები ვერ შეასრულეთ, რაც გვქონდა. კიდევ ერთი საინტერესო რაღაც გავიგეთ, რომ აზერბაიჯანს და სომხეთს შორის, ნდობის ხიდის აღდგენა გვინდაო, სამტრედია-გრიგოლეთის ხიდი აღადგინეთ, ის ჯობს, ხალხმა ისარგებლოს, გადავიდეს-გადმოვიდეს და მერე იფიქრეთ სომხეთსა და აზერბაიჯანს შორის, ნდობის ხიდების აღდგენაზე“, – განაცხადა კირკიტაძემ.

მან ასევე ისაუბრა დედაქალაქში შექმნილ საცობებზე და აღნიშნა, რომ ხელისუფლებას არ აქვს ხედვა, თუ როგორ უნდა განვითარდეს ქვეყანა.

„ის საცობები და ის გაუსაძლისი ყოფა, რაც ჩვენს დედაქალაქში და მთლიანად ქვეყანაში ხდება, სწორედ იმის დამსახურებაა, რომ თქვენ არ გაქვთ ხედვა, როგორ უნდა განვითარდეს ქვეყანა ჰარმონიულად და როგორ არ უნდა ხარჯავდნენ ადამიანები ყველაზე ძვირფას დროს იმ საცობებში, რომელიც დიახ, იმის გამოა შექმნილი, რომ ხშირ შემთხვევაში, არასწორად მოხდა ჩარევა და ხშირ შემთხვევაში, რაც უნდა გაგეკეთებინათ, რა პროექტებიც იყო, ის არ განახორციელეთ, დააკონსერვეთ. მართლა დანევროზდა ხალხი ამ საცობებში, რომელიც ხელოვნურად შექმენით, არ იაზრებთ, არ გაინტერესებთ და არ გადარდებთ, რადგან თქვენ „ბასლაინებში“ დადიხართ, არ დადიხართ? მთელმა საქართველომ იხილა რარიტეტული მანქანით როგორ გადაადგილდებოდა ჩვენი ერთ-ერთი კოლეგა „ბასლაინში“, – განაცხადა კირკიტაძემ.

„როდესაც, ნებისმიერი ორგანიზაცია იქნება თუ ადამიანი, ეუბნება პოტენციური დამნაშავეს ან სამართალდამრღვევს, რომ შენ თუ რამეს ჩაიდენ და ამას მოჰყვება პასუხისმგებლობა, რომელსაც მე ავიღებ ჩემს თავზე, ეს იქნება ფინანსური თუ სხვა – ეს არის სახელმწიფოს ჩამოშლის პირდაპირი და არა ირიბი მცდელობა, ამას აკეთებენ ორგანიზაციები, რომლებიც ფულს უხდიან სამართალდამრღვევს“, – ამის შესახებ ფრაქცია „ქართული ოცნების“ თავმჯდომარემ მამუკა მდინარაძემ განაცხადა.

მისი თქმით, არსებობს ინფორმაცია იმის შესახებ, რომ USAID-ის ადგილობრივ წარმომადგენლებს, ცენტრალური ოფისიდან არ აქვთ მითითება საქართველოში რევოლუციური პროცესების დაფინანსების შესახებ.

„სასჯელის, გარკვეული სახდელის, ნებისმიერი სანქციის პრევენციული მხარე თუ იმაში მდგომარეობს, რომ ადამიანმა პირადად არ უნდა იფიქროს სამართალდარღვევაზე და დანაშაულზე, იმიტომ, რომ დაეკისრება გარკვეული სანქცია, ამ სანქციის მოხსნა, ამ შემთხვევაში კი, ჯარიმის გადახდა, კანონების და სახელმწიფოს კონსტიტუციური წესრიგის უგულებელყოფას და პირდაპირ მტრობას ნიშნავს. ამიტომაც არის, რომ უკვე რამდენი დღე გავიდა, კიდევ არ ვიცით, ვისი ფულია ზუსტად, ხან USAID –ს დააბრალეს. USAID-შიც ერთი რაღაც უნდა ვიცოდეთ, რომ როგორც ჩანს და იკვეთება ამის ბევრი ნიშანი, ამას შემთხვევით არ ვამბობ, ადგილობრივი ორგანიზაციის წარმომადგენლები ძალიან ბევრს სცოდავენ, იმიტომ, რომ გარკვეული ლოგიკაც და ინფორმაციაც არის იმასთან დაკავშირებით, რომ ცენტრალური ოფისიდან მათ არ აქვთ ისეთი მითითებები, რომ აქ ძალადობრივი რევოლუციის ხელშეწყობაზე იფიქრონ – კარგია, რომ ეს ნელ-ნელა ირკვევა.

თუ ჩვენი რომელიმე თანამემამულე, ქართველი ადამიანი ფიქრობს, რომ ამერიკელი ხალხის, ამერიკელი გადამხდელის, ევროპელი გადამხდელის, ევროპელი ხალხის ფული გამოიყენოს საქართველოში არეულობაში, ქაოსში, ძალადობაში და ა.შ. – ეს არის ყველაზე ანტიევროპული, ანტიამერიკული და ზოგადად, ანტიდასავლური ქმედება რასაც, როგორც ჩანს, დიდი სიამოვნებით ახორციელებენ ამ ორგანიზაციების ადგილობრივი წარმომადგენლები,“ – განაცხადა მამუკა მდინარაძემ.

„საქართველოს ისტორიული არჩევანი არის ევროპა და ჩვენი ისტორიული თვითმიზანი არის გავხდეთ ევროპული ოჯახის წევრი, მივიღოთ კანდიდატის სტატუსი, რომელიც იქნება გარანტი საქართველოს უსაფრთხოების, ტერიტორიული მთლიანობის თავისუფლების და საქართველოს მოქალაქეების ეკონომიკური კეთილდღეობის“, – ამის შესახებ ფრაქცია „ერთიანი ნაციონალური მოძრაობა“ – გაერთიანებული ოპოზიცია „ძალა ერთობაშიას“ წევრმა ანა წითლიძემ პარლამენტის პლენარულ სხდომაზე განაცხადა.

მისი თქმით, საქართველოს მოსახლეობის 90% მხარს უჭერს ქვეყნის ევროკავშირში გაწევრიანებას.

„კანდიდატის სტატუსის მიღება არის სასიცოცხლოდ მნიშვნელოვანი ქვეყნისთვის და ჩვენ არაერთხელ გვითქვამს, როგორი ცუდი ხელისუფლებაც არ უნდა ჰყავდეს ამ ქვეყანას, როგორიც არ უნდა იყოს რუსული ოცნების მცდელობა, რომ ეს გეოპოლიტიკური შესაძლებლობა, რომელიც უკრაინელების თავგანწირულმა ბრძოლამ მოიტანა, ქვეყანამ და საქართველოს მოქალაქეებმა ეს შესაძლებლობა არ უნდა დაკარგონ. ჩემი პარტია, როგორც ყველაზე დიდი პროდასავლური პარტია, არის მთავარი ლობისტი საერთაშორისო პარტნიორებთან, რომ ქვეყანამ მიიღოს კანდიდატის სტატუსი“, – განაცხადა ანა წითლიძემ.

მისივე თქმით, საქართველოს ევროპულ ოჯახში წევრობა არის რეგიონში უსაფრთხოების გარანტი.

„ევროპას და აშშ-ს სამხრეთ კავკასიის რეგიონში სჭირდებათ ძლიერი საქართველო, თავისუფალი, ეკონომიკურად განვითარებული ქვეყანა, რომელიც იქნება მისი თანაბარი და სრულფასოვანი პარტნიორი“, – განაცხადა ანა წითლიძემ.

იუსტიციის მინისტრის, რატი ბრეგაძის განცხადებით, პატიმრობის პერიოდში ექსპრეზიდენტი მიხეილ სააკაშვილი მოინახულა დაახლოებით 2 700-მდე ვიზიტორმა.

ამასთან, ბრაგაძემ უპასუხა ჟურნალისტის კითხვას, რომ წელიწადზე მეტია, დეპუტატებს არ ეძლევათ სააკაშვილის მონახულების უფლება და არის თუ არა ეს კანონდარღვევა.

საქართველოს იუსტიციის მინისტრის თქმით, ალბათ მსოფლიოში რთულად თუ მოიძებნება პატიმარი, რომლის უფლებებიც ასე ზედმიწევნით იყოს დაცული, როგორც მიხეილ სააკაშვილის.

„სამართლებრივად, ნებისმიერ დავაში – სააკაშვილი საქართველოს წინააღმდეგ, გამართლდა საქართველო. მე თქვენგან პირადადაც, ასევე თქვენი ტელევიზიისა და სხვა ტელევიზიის წარმომადგენლებისგანაც, ოპოზიციის წარმომადგენლებისგანაც ბევრჯერ გამიგია, რომ ირღვეოდა მსჯავრდებულ სააკაშვილის უფლებები, ხდებოდა კანონდარღვევა, მაგრამ ეს არასოდეს დასტურდება. ეს არის სუბიექტური აღქმები, სამართალი კი ამ შემთხვევაში საუბრობს აბსოლუტურად სხვა რამეზე და სააკაშვილის უფლება რომ არის დაცული. ალბათ, რთულად თუ მოიძებნება პატიმარი ნებისმიერ ქვეყანაში, რომლის უფლებებიც ასე ზედმიწევნით იყოს დაცული“, – განაცხადა რატი ბრეგაძემ.

საქართველოს ევროპულ პერსპექტივასთან ერთად უკვე აქვს ახალი შესაძლებლობა, რომ შეასრულოს მნიშვნელოვანი გეოპოლიტიკური ფუნქცია. ეს არის რეგიონში მშვიდობის ხელშეწყობა და განმტკიცება და უდავოდ, ეს ახალი გეოპოლიტიკური ფუნქცია, როლი და ინიციატივა, რომელიც ამ შემთხვევაში ჩვენი ქვეყნის სახელით პრემიერ-მინისტრმა, ირაკლი ღარიბაშვილმა გაახმოვანა, არის ძალიან მნიშვნელოვანი ჩვენი ქვეყნის საერთაშორისო პოზიციონირებისთვის, – განაცხადა პარლამენტის თავმჯდომარის მოადგილემ, არჩილ თალაკვაძემ პარლამენტის პლენარულ სხდომაზე სიტყვით გამოსვლისას.

მისი თქმით, მსოფლიოში მიმდინარე პროცესებმა კიდევ ერთხელ ცხადად დაგვანახა, თუ რამდენად მნიშვნელოვანია მშვიდობა და სწორედ ხელისუფლებამ, საზოგადოების ძლიერი მხარდაჭერით, შეძლო თერთმეტწლიანი უწყვეტი მშვიდობის უზრუნველყოფა, ეკონომიკის გაორმაგება და ევროინტეგრაციის გზაზე არსებითი პროგრესის მიღწევა.

როგორც არჩილ თალაკვაძემ აღნიშნა, ამან კიდევ უფრო დაგვაახლოვა უმთავრეს ეროვნულ მიზანს – მშვიდობიანი გზით აღვადგინოთ საქართველოს ტერიტორიული მთლიანობა.

„საქართველო დღეს მზად არის თავისი წვლილი შეიტანოს რეგიონში გრძელვადიანი მშვიდობის და უსაფრთხოების უზრუნველსაყოფად, რადგან სტაბილური რეგიონი მნიშვნელოვანია ევროატლანტიკური ინტეგრაციისა და ახალი ტრანსნაციონალური ეკონომიკური პროექტების განხორციელებისთვის. ამისათვის საქართველო, ცხადია, გახდა საიმედო და თანასწორი პარტნიორი ჩვენი რეგიონის ორი მნიშვნელოვანი წევრის – სომხეთისა და აზერბაიჯანისთვის. საქართველოს პრემიერ-მინისტრის თაოსნობით, საქართველომ აშშ-თან ერთად უკვე აჩვენა მსოფლიოს წარმატებული მედიაციის მაგალითი 2022 წელს, როცა ჩვენი მედიაციით მიღწეული შეთანხმებით, შესაძლებელი გახდა პატიმრების გადაცემა და დანაღმული ტერიტორიების შესახებ ინფორმაციის გაცვლა. წელს პრემიერ-მინისტრმა, ირაკლი ღარიბაშვილმა კვლავ აიღო ჩვენი ხელისუფლების სახელით პოლიტიკური ინიციატივა და სომხეთსა და აზერბაიჯანს შესთავაზა მოლაპარაკებების საქართველოში გამართვა. პროცესი დაიწყო და იმედი გვაქვს, წარმატებით დასრულდება. სტაბილური რეგიონი მნიშვნელოვანია ევროატლანტიკური ინტეგრაციისა და ახალი ტრანსნაციონალური ეკონომიკური პროექტების განხორციელებისთვის. ის ფაქტი, რომ საქართველო იძენს მნიშვნელოვან გეოპოლიტიკურ ფუნქციას – რეგიონში მშვიდობის ხელშეწყობისა და განმტკიცების ფუნქციას, ჩვენს პოზიციებს საერთაშორისო ასპარეზზე კიდევ უფრო აძლიერებს“, – განაცხადა არჩილ თალაკვაძემ.