საქართველოს პარლამენტის თავმჯდომარე შალვა პაპუაშვილი სოციალურ ქსელში რუმინეთისა და სლოვენიის პარლამენტების სპიკერებს მადლობას უხდის, ბერლინში მიმდინარე კონფერენციის ფარგლებში, მათი ქვეყნების ოფიციალური პირების მხრიდან საჯაროდ გაკეთებულ განცხადებაზე, რომ სლოვენია და რუმინეთი დეკემბერში საქართველოსადმი ევროკავშირის კანდიდატი ქვეყნის სტატუსის მინიჭებას, მხარს დაუჭერენ.

„ძალიან იმედისმომცემია, ამ გადამწყვეტ მომენტში, რუმინეთისა და სლოვენიის მხრიდან საქართველოსადმი ევროკავშირის კანდიდატის სტატუსის ასეთი სერიოზული მხარდაჭერა. ნამდვილი მეგობრობა ასეთი უნდა იყოს.

ბატონო ნიკოლაე ჩუკა და ქალბატონო ურშკა კლაკოჩარ ზუპანჩიჩ, ვაფასებთ თქვენს თანადგომას,” – წერს შალვა პაპუაშვილი სოციალურ ქსელ „X“-ში.

„ნორჩი ნაციონალები“ სიმართლეს გთხოვდნენ. იმაზე, რაც ხდებოდა 2012 წელს, საერთოდ სალაპარაკო არ აქვთ,  სიმართლე ის არის, რომ ამ პერიოდზე საუბრისას, მათ უბრალოდ მოკაკულებმა უნდა იარონ, საარჩევნო პერიოდს რომ იხსენებენ, უნდა გაიხსენონ ის პირობები და ის ვითარება, რა პირობებში გვიწევდა „ქართულ ოცნებას“ საარჩევნო კამპანიის ჩატარება და საერთოდ რა ხდებოდა ამ ქვეყანაში, –  განაცხადა ფრაქცია „ქართული ოცნების“ თავმჯდომარის მოადგილემ, ირაკლი ჩიქოვანმა პლენარულ სხდომაზე რეგიონული განვითარებისა და ინფრასტრუქტურის მინისტრის, ირაკლი ქარსელაძის მოსმენის შემდეგ.

„ინფრასტრუქტურის მიმართულებით კი არა, აბსოლუტურად ყველა მიმართულებით როგორი ყაჩაღობა იყო და სახელმწიფო ბიუჯეტის მახრებად როგორ იყვნენ გადაქცეული „ნაციონალური მოძრაობის“ პოლიტიკური ლიდერები“,- აღნიშნა ჩიქოვანმა.

მისვე თქმით, პლენარულ სხდომაზე ოპოზიციონერი დეპუტატების გამოსვლები პოპულისტური იყო.
დეპუტატმა ყურადღება დასავლეთ საქართველოში, კერძოდ, სამეგრელოში მიმდინარე ინფრასტრუქტურულ პროექტებზე გაამახვილა და აღნიშნა, რომ  ზუგდიდში აუცილებლად აშენდება სტადიონი.

ირაკლი ჩიქოვანის განცხადებით, რეგიონებში ინფრასტრუქტურული გამოწვევები არსებობს, თუმცა ამავე დროს შესამჩნევია პროგრესიც.

„მე შორს ვარ იმ აზრისგან და დარწმუნებული ვარ თქვენც, რომ ჩვენ ინფრასტრუქტურული თვალსაზრისით ყველაფერი გვაქვს მოგვარებული. შორს ვარ იმ აზრისგან, რომ რეგიონული განვითარების თვალსაზრისით, ჩვენ ყველა ნაბიჯი გვაქვს გადადგმული, არა. ჩვენ კარგად გვესმის, რომ დიდი ამოცანები დგას ჩვენს წინაშე, მაგრამ ამავდროულად ყველა ადამიანი, ვინც ვერ ამჩნევს და ვერ აფასებს იმ პროგრესს და იმ პროგრესის ტემპს, რომელიც ამ მიმართულებით ჩვენ გაგვაჩნია, არის უბრალოდ უტიფარი“, – განაცხადა ირაკლი ჩიქოვანმა.

საქართველომ ამ პერიოდში მოახდინა ინფრასტრუქტურული გარღვევა და საუბარს ამ ინფრასტრუქტურულ გარღვევაზე დავიწყებ სოფლიდან. სოფელში აღარ რჩება გზა, რომლის მოასფალტებაც არ ხდება. ყველა სოფელში მისასვლელი გზა არის ასფალტირებული და მიმდინარეობს შიდა მნიშვნელოვან გზებზე ასფალტის საფარის დაგება. ამავდროულად, ყველა დასახლებულ სოფელში, ძალიან პატარა და ძალიან მოშორებულ სოფლებზე თუ არ ვისაუბრებთ, გაზიფიცირება უკვე დასრულებულია ან ეს პროექტი ბოლო ეტაპამდეა მისული. აღარაფერს ვიტყვი ელექტროენერგიით მომარაგებაზე, იმიტომ, რომ შეიძლება სადღაც მთაში ერთეული, მარტო დარჩენილი მოსახლის გარშემო არსებობდეს ასეთი პრობლემა, თუმცა ესეც მოსაგვარებელია, – ამის შესახებ საპარლამენტო უმრავლესობის წევრმა ირაკლი ქადაგიშვილმა პლენარულ სხდომაზე განაცხადა,სადაც „მინისტრის საათის” ფორმატში, რეგიონული განვითარებისა და ინფრასტრუქტურის მინისტრის ირაკლი ქარსელაძის მოსმენის შემდეგ.

როგორც საპარლამენტო უმრავლესობის წევრმა აღნიშნა, ახლა მიმდინარეობს უკვე ის პროექტები, რომლითაც წყალმომარაგება გახდება მუდმივი, ხარისხიანი და შესაბამისი სტანდარტის მქონე. მისივე თქმით, ყველა სოფელში მიმდინარეობს ან ახალი საბავშვო ბაღის მშენებლობა, ან საბავშვო ბაღების რემონტი და კაპიტალური მოწესრიგება.

„რეალურად ჩვენ ვხედავთ, რომ 90-იანი წლებიდან რა სამუშაოებიც არ ჩატარებულა, დაახლოებით 25 წლის განმავლობაში, ყველა ამ სამუშაოს ჩატარება ახლა გვიწევს”, – აღნიშნა ირაკლი ქადაგიშვილმა, რომლის კომენტარსაც პარლამენტის პრესსამსახური ავრცელებს.

სტატუსთან დაკავშირებით ძალიან მნიშვნელოვან ფაზაში შევდივართ. მომავალი კვირისთვის უკვე ველოდებით ევროკომისიის დასკვნას, რომელიც იქნება ბილეთი მომავალში, დეკემბერში ევროპული საბჭოს გადაწყვეტილებისთვის, – ამის შესახებ საქართველოს საგარეო საქმეთა მინისტრმა, ილია დარჩიაშვილმა განაცხადა.

დარჩიაშვილის განცხადებით, ოპტიმისტურად არის განწყობილი, რადგან, მინისტრის თქმით, საქართველოს ამისთვის კონკრეტული ხელშესახები შედეგები აქვს.

„ოპტიმიზმის წყარო არის ჩვენ მიერ გაწეული ძალისხმევა – კონკრეტული ხელშესახები შედეგები, რომლებიც კიდევ ერთხელ იქნა განხილული ბორელის საქართველოში ვიზიტის დროს, დამატებითი, შიდა ტექნიკური საკითხები, რომლებზეც ვიზიტის დროს ვისაუბრეთ. კონკრეტული ვიზიტის შემდეგ რა ნაბიჯებიც გადავდგით, ძალიან ძლიერ სიგნალებს გვაძლევს ბრიუსელიდან. შესაბამისად, ოპტიმისტურად ვართ განწყობილი და იმედი გვაქვს, ევროკავშირი მიიღებს ერთადერთ სწორ გადაწყვეტილებას. დღევანდელ განხილვებშიც ძალიან ბევრს საუბრობენ პარტნიორები, რომ ევროკავშირის მხრიდან გეოპოლიტიკური გადაწყვეტილებაც იქნება ერთ-ერთი მთავარი ფაქტორი და, რა თქმა უნდა, დამსახურებაზე დამყარებული გადაწყვეტილებები. ოპტიმიზმის საფუძველი გვაქვს და იმედით ველოდებით დასკვნას, რომელსაც სულ მალე ყველა ერთად ვიხილავთ“, – განაცხადა ილია დარჩიაშვილმა.