რუსეთთან არის კონკრეტული კომუნიკაციის არხები, არის სპეციალური წარმომადგენელი, ეს არის ერთადერთი არხი, რაც გვაქვს კომუნიკაციის, – ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტის კითხვის საპასუხოდ განაცხადა, რომლის მიხედვითაც, რუსულ მედიაში ვრცელდება ინფორმაცია, რომ რუსეთი მზად არის, ჩადოს ინვესტიცია სატრანსპორტო კვანძის გახსნაში.

მისივე თქმით, ადრეც გავრცელდა ინფორმაცია, თითქოს სპეციალური წარმომადგენელი ჰყავდა საქართველოს რუსეთთან სავაჭრო-ეკონომიკურ ურთიერთობებში, რაც აღმოჩნდა ფარსი და ტყუილი.

„ჩვენ გვაქვს სავაჭრო-ეკონომიკური ურთიერთობები და ამ ფარგლებს მიღმა არ გავდივართ. არის კონკრეტული კომუნიკაციის არხები, არის სპეციალური წარმომადგენელი. ეს არის ერთადერთი არხი, რაც გვაქვს რუსეთთან კომუნიკაციის. საქმე ეხება სავაჭრო-ეკონომიკურ და ჰუმანიტარულ საკითხებს. ეს არის ის თემები, რაზეც არის კონცენტრირებული ურთიერთობები, მაგრამ არა ამის მიღმა“, – განაცხადა კობახიძემ.

თბილისის მერის, კახა კალაძის განცხადებით, ევროკავშირში ინტეგრაციის გზაზე ხელშესახები ცვლილებები და კონკრეტული გადადგმული ნაბიჯები 2012 წლის შემდეგ პერიოდთან ასოცირდება.

როგორც მან აღნიშნა, მიუხედავად იმისა, რომ საქართველოს 12 – პუნქტიანი გეგმა არ სჭირდებოდა და კანდიდატის სტატუსს მის გარეშეც იმსახურებდა, 12-ვე პუნქტი მაინც ივნისის ბოლომდე შესრულდება.

„არაერთხელ განვაცხადეთ, რომ საქართველოს ხელისუფლება ყველაფერს აკეთებს იმისთვის, რომ 12 რეკომენდაცია, რომელიც არის მოცემული, ივნისის ბოლომდე შესრულდეს. მიუხედავად იმისა, რომ ოპოზიცია ამ პროცესში მონაწილეობას არ იღებს, ჩვენ გასაკეთებელს გავაკეთებთ და საქართველო 12-ვე რეკომენდაციას შეასრულებს, მიუხედავად იმისა, რომ ჩვენ აღნიშნული 12 – პუნქტიანი გეგმა არ გვჭირდებოდა და სტატუსს ამის გარეშეც ვიმსახურებდით. ამას აჩვენებს ყველა საერთაშორისო ორგანიზაციის მიერ გამოქვეყნებული კვლევა, რომ ჩვენი ქვეყანა მანამდე მიღებულ ქვეყნებზე ბევრად წინ არის. ეს ჩვენი ქვეყნის დამსახურება იქნება. ამ რთულ გზაზე ხელშესახები ცვლილებები და კონკრეტული გადადგმული ნაბიჯები 2012 წლის შემდეგ პერიოდთან ასოცირდება.

რაც შეეხება გადაწყვეტილებას, ჩვენ ევროპელ პარტნიორებზე იქნება და მოკიდებული. ძალიან დიდი იმედი მაქვს, რომ სწორ გადაწყვეტილებას მიიღებენ და ჩვენი ქვეყანა აღნიშნულ სტატუსს მიიღებს”, – განაცხადა კახა კალაძემ.

გარდა ამისა, კითხვაზე, ხელს შეუშლის თუ არა „ქართული ოცნების“ „ძალადობრივი განცხადებები“ კანდიდატის სტატუსის მოპოვებას ხელს, კახა კალაძემ უპასუხა, რომ მთავრობა დემოკრატიულ ქვეყანას აშენებს და პასუხად ძალადობას არ უნდა იღებდნენ. მისი თქმით, ძალადობას ყველა ერთად უნდა ებრძოლოს.

„ვერ მომიყვანთ ვერცერთ ანტიდასავლურ განცხადებას „ქართული ოცნების“ მხრიდან. საერთოდ, რომელ ძალადობრივ ფაქტზე საუბრობთ? რომელ ძალადობრივ ფაქტს ახალისებს „ქართული ოცნება“? რაც არ უნდა განსხვავებული აზრის მოსმენა გვიწევდეს, ჩვენ დემოკრატიულ ქვეყანას ვაშენებთ და პასუხად ძალადობას არ უნდა ვიღებდეთ. არ უნდა წახალისდეს ძალადობა. ამის მაგალითია ისიც, რომ პოლიციელს მოლოტოვის კოქტეილს ესვრიან და ოპოზიციას ამ ადამიანის გმირად შერაცხვის მცდელობა აქვს. ძალადობას ყველამ ერთად უნდა ვებრძოლოთ“, – აღნიშნა კალაძემ.

რაც შეეხება სააკაშვილის 600-დღიან ფარსს, მის 600-ჯერ გარდაცვალებას, დადასტურდა, რომ ეს არის მართლაც ფარსი და არავითარ სასწაულთან არ გვქონია საქმე, – ამის შესახებ ირაკლი კობახიძემ ჟურნალისტებთან საუბრისას განაცხადა. „ქართული ოცნების“ თავმჯდომარემ და საპარლამენტო უმრავლესობის ლიდერმა ექსპრეზიდენტის წინააღმდეგ აღძრულ საქმეებზეც ისაუბრა და აღნიშნა, რომ ორი დანაშაული, რომელზეც მას სასჯელი უკვე მისჯილი აქვს, სააკაშვილმა საზოგადოების თვალწინ ჩაიდინა.

„ეს იყო დეპუტატ ვალერი გელაშვილის წამება და ეს იყო გირგვლიანი საქმეზე მკვლელების შეწყალება. ორივე დანაშაული შესახებ საზოგადოება სრულად არის ინფორმირებული. არის კიდევ 2 თუ 3 საქმე, რაზეც გამოძიება არის დაწყებული და აქაც იცის ყველამ, რასთან გვაქვს შეხება, როდესაც ის უკანონოდ შემოვიდა საქართველოში, როდესაც ჯერ უკანონოდ დაარბია შეკრება 7 ნოემბერს სასტიკი მეთოდებით, მიიტაცა ტელეკომპანია „იმედი“. ამაზეც ყველას აქვს ინფორმაცია. რა თქმა უნდა, ამ ყველაფრის გადაფარვა რაღაც პიარული ნაბიჯებით არის შეუძლებელი.

დეტალებში არც მინდა შევიდე. მთავარი და საინტერესო ჩემთვის არის რა – რომ არის კონკრეტული სასჯელები შეფარდებული და ყველა ეს სასჯელი ეფუძნება ობიექტურ გარემოებებს და არის კონკრეტულ საქმეებზე დაწყებული გამოძიება, რაზეც ასევე საზოგადოებას აქვს სრული ინფორმაცია. დანარჩენი არის უკვე დეტალები“, – განაცხადა კობახიძემ.

ყველა ერთიანი თესლიდან აღმოცენებულები არიან – ოპოზიციას მოვუწოდებ გაერთიანდით, ბარიერს მაინც გადალახავთ, იყვნენ აქ პარლამენტში, ცოტა ხანი გავერთობით, – ასე ეხმიანება საპარლამენტო უმრავლესობის წევრი ირაკლი ზარქუა ჟურნალისტებთან ოპოზიციის გაერთიანებაზე “ნაციონალური მოძრაობის” თავმჯდომარის ლევან ხაბეიშვილის განცხადებას.

ზარქუას თქმით, წინასაარჩევნოდ პატარა პარტიების ლუსტრაცია ხდება.

„მე მომხრე ვარ, გაერთიანდნენ და სავარაუდოდ ვერ აცდებიან. არ მინდა, ჩემი “ხაბე” მარტო დარჩეს იმ ბრძოლაში და ახლა ეს “ჭიჭე” ვაშაძე გინდ იქით იყოს, გინდ აქეთ, რა მნიშვნელობა აქვს?! ხომ ვიცით, რომ ყველას ერთნაირი ხელწერა აქვთ?! ყველა ერთიანი თესლიდან აღმოცენებულები არიან. ატყუებენ თავის ამომრჩეველს? ვითომ “ნაცმოძრაობას” ემიჯნებიან? გახარია რომ მჭერმეტყველებს და მორალს კითხულობს, ახლა გახდა თურმე დემოკრატი და თურმე “ნაცები” არ მოსწონს, ისევე როგორც ხაზარაძეს. “ჭიჭე” ვაშაძე კი საერთოდ დუმს. ლუსტრაცია ხდება წინასაარჩევნოდ ყველა ამ პატარა პარტიის. მოვუწოდებ მათ, გაერთიანდით, ხალხი მაინც არ განსხვავებთ, ბარიერს მაინც გადალახავთ. იყვნენ აქ პარლამენტში, ცოტა ხანი გავერთობით,”- განაცხადა ზარქუამ.

მოძრაობა „ხალხის ძალის“ წევრის, გურამ მაჭარაშვილის განცხადებით, საქართველო იმსახურებს, მიიღოს კანდიდატის სტატუსი.

მისივე თქმით, ამას თავად ევროკავშირის ლიდერები ამბობენ.

რაც შეეხება ოპოზიციის საკითხისადმი დამოკიდებულებას, მაჭარაშვილი აცხადებს:

„თქვენ რომელ ოპოზიციას გულისხმობთ, დაშლილებში რომ არის და ნაწილ-ნაწილ გაერთიანება უნდათ? – ჩვენ ასეთი დაშლილი მანქანით ბრიუსელამდე ვერ ჩავალთ. ხალხი დაშლილებში არსებულ მანქანას ქვეყნის ევროინტეგრაციას ვერ ანდობს. რა თქმა უნდა, მოლოდინი გვაქვს და თავად ევროკავშირის ლიდერები ამბობენ, რომ საქართველო იმსახურებს კანდიდატის სტატუსს. ამის დასტურია თებერვალში გამოქვეყნებული ანგარიში, სადაც პირველ ადგილზე ვართ. ამას ვერავინ დამალავს. საქართველოს ის კითხვარები ჩაბარებული აქვს, რის გამოც ევროკავშირისგან შემოდგომაზე უნდა დაეწეროს ნიშანი. სამწუხაროდ, მოლოდინი 50/50-ზეა, რადგან ეს იქნება პოლიტიკური გადაწყვეტილება“, – განუცხადა გურამ მაჭარაშვილმა ჟურნალისტებს.