პრეზიდენტმა ნიკა გვარამიას გათავისუფლებით სწორი გადაწყვეტილება მიიღო და გარკვეულწილად – დაგვიანებულიც, – ამის შესახებ ოპოზიციონერმა დეპუტატმა, სანდრო რაქვიაშვილმა საქართველოს პირველ არხს განუცხადა.

როგორც სანდრო რაქვიაშვილმა აღნიშნა, პრეზიდენტი თუ მიიჩნევდა, რომ გვარამია ციხეში უსამართლოდ იჯდა, მისი გამოშვება ნებისმიერ დროს შეეძლო.

„მგონი, ეს გადაწყვეტილება ევროინტეგრაციას უფრო უკავშირდება, ვიდრე უზენაეს სასამართლოს, მაგრამ კარგია, რომ პრეზიდენტმა ეს გადაწყვეტილება მიიღო და ეს ევროინტეგრაციაში ცალსახად დაგვეხმარება. შიდა პოლიტიკურ პროცესებსაც უფრო პროგნოზირებადს გახდის. ველოდები, რომ შემოდგომაზე ბევრი პოლიტიკური ცვლილება მოხდება, მათ შორის გვარამია ჩაერთვება პოლიტიკაში. არ ვიცი, ეს როგორ მოხდება, მაგრამ მისი პოლიტიკური ამბიციები ბევრად აღემატება წამყვანის როლს და ეს ცხადია. ვიდრე ნაბიჯები არ გადაუდგამს, ზუსტი პროგნოზი რთულია, მაგრამ სექტემბერში ახალ ამბებს ველოდები ახალ გაერთიანებებზე“, – განაცხადა რაქვიაშვილმა.

საქართველოს პრეზიდენტის გადაწყვეტილება ნიშნავს იმას, რომ მასზე იმუშავეს და ჩანს, რომ, პრაქტიკულად, მასზე უცხოური გავლენა არსებობს, – ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა საქართველოს პირველ არხს განუცხადა.

მაჭარაშვილს კითხვა დაუსვეს საქართველოს პრეზიდენტის მიერ ნიკა გვარამიას შეწყალების გადაწყვეტილებასთან დაკავშირებით.

მისი თქმით, სალომე ზურაბიშვილმა თქვა, რომ გვარამიას სამომავლო ქმედებებზე პასუხისმგებლობას იღებს.

„საქართველოს პრეზიდენტს არაადეკვატური ხასიათი ახასიათებს და, ზოგადად, კომპლექსიანი ადამიანია. თქვა, რომ არ დამსვეს იქ, სადაც უნდა დავმჯდარიყავიო; არ გამოვედი, სადაც უნდა გამოვსულიყავიო. მისი გადაწყვეტილება იმას ნიშნავს, რომ მასზე იმუშავეს და ჩანს, რომ, პრაქტიკულად, მასზე უცხოური გავლენა არსებობს. პრაქტიკულად, თავისი გადაწყვეტილებით მან პასუხისმგებლობა აიღო ნიკა გვარამიას წარსულსა და მომავალზე. მის მიმართ შეურაცხყოფაზე არ ვსაუბრობ, ეს მისი მორალის ამბავია, მაგრამ ნიკა გვარამიას მიმართ ქვეყანაში ნეგატიური ამომრჩეველი არსებობს და ზურაბიშვილის ამომრჩეველი არ ყოფილა გვარამიას ამომრჩეველი. მან თქვა, რომ გვარამიას სამომავლო ქმედებებზე პასუხისმგებლობას იღებს და ვნახოთ, ამ ტვირთს როგორ გაუძლებს. ეს მის მიმართ უფრო მძიმეა, ვიდრე გვარამიას მიმართ. ყველამ კარგად ვიცით, რომ ნიკა გვარამია მშვიდობის მტრედი არ იქნება და ამ ტვირთს როგორ აიღებს, ვნახავთ“, – განაცხადა მაჭარაშვილმა.

საქართველო უამრავი მაჩვენებლით წინ უსწრებს არა მარტო ტრიოს ქვეყნებს, არამედ ევროკავშირისა და ნატო-ს წევრ ქვეყნებს ბევრი მიმართულებით და ეს არის მისასალმებელი, – ამის შესახებ საქართველოს პარლამენტის ვიცე-სპიკერმა, გია ვოლსკიმ განაცხადა.

გია ვოლსკი გამოეხმაურა საქართველოსთან დაკავშირებით ევროკომისიის ზეპირ ანგარიშს, რომელიც გუშინ ევროკომისარმა, ოლივერ ვარჰეიმ წარადგინა.

როგორც გია ვოლსკიმ აღნიშნა, ყველა პუნქტის შესრულებასთან დაკავშირებით საქართველო არის მოწოდების სიმაღლეზე.

„საკმაო დრო არის, რათა პუნქტობრივად გავიაროთ შექმნილი ვითარება და ნებისმიერ რეკომენდაციასთან დაკავშირებით გვაქვს გარკვეული პოზიცია, ვფიქრობ, კომპეტენტური პოზიცია, და იგი გათვალისწინებული იქნება საბოლოო განხილვისას. რაც შეეხება მოსაზრებებს ამ საკითხებთან დაკავშირებით, არის თუ არა ამ ტრიოში საქართველო ჩამორჩენილი, ნამდვილად ვერ დავეთანხმები ჩვენს ოპონენტებს, ვინაიდან ყველა ინდიკატორით საქართველო მოწინავეთა რიგებში დგას არა მარტო ამ რეკომენდაციებთან მიმართებაში, არამედ არსებობს კიდევ კომპეტენტური ორგანიზაციები, სადაც რეიტინგები მუშავდება ცალკეული ქვეყნების და საქართველო უამრავი მაჩვენებლით წინ უსწრებს არა მარტო ტრიოს ქვეყნებს, არამედ ევროკავშირისა და ნატო-ს წევრ ქვეყნებს ბევრი მიმართულებით, ეს არის მისასალმებელი. სამი ჩაუთვალეს მოლდავასაც, ორი ჩაუთვალეს უკრაინას და მასთან დაკავშირებით ჩვენ არ ვედავებით. დიახ, ზედმიწევნით ბოლომდე იქნება შესრულებული და მე გეუბნებით, რომ რეალურად ყველა საკითხთან დაკავშირებით გვექნება ამომწურავი ინფორმაცია, როდესაც საბოლოო გადაწყვეტილების მიღების დრო იქნება. თუ არ იქნება კონიუნქტურული გადაწყვეტილება მიღებული, ვფიქრობ, ყველა მუხლში საქართველო არის მოწოდების სიმაღლეზე და გაცილებით უფრო მაღალ დონეზე, ვიდრე არა მარტო ტრიოს ქვეყნები, არამედ ევროკავშირის წევრი ქვეყნები. ოპოზიციის მხრიდან მიმდინარეობს ყოველდღიური მუშაობა, რათა არ მიიღოს საქართველომ კანდიდატის სტატუსი, ეს არის სხვა საკითხი და ამ საკითხზე ჩვენ გვმართებს დეტალური მსჯელობა იმ სტუქტურებში, სადაც გადაწყვეტილება უნდა მიიღონ ოქტომბერში“, – განაცხადა ვოლსკიმ.