ნიკა გვარამიას გათავისუფლების შემდეგ დიდია საფრთხე ახალი იერიში მიიტანონ ოპოზიციის ლიდერებზე, – ამის შესახებ „სტრატეგია აღმაშენებლის“ ერთ-ერთმა ლიდერმა პაატა მანჯგალაძემ განაცხადა.

მისი თქმით, ნიკა გვარამიას გათავისუფლება არის არა ვინმეს დამარცხება, არამედ საქართველოს წარმატება ევროპული ინტეგრაციის გზაზე.

„ნიკა გვარამიას გათავისუფლების შემდეგ დიდია საფრთხე ახალი იერიში მიიტანონ ოპოზიციის ლიდერებზე. რადგან ქვეყანაში „ქართული ოცნების“ სახით კვლავ გვყავს ძალა და ხელისუფლება, რომელიც ეწინააღმდეგება საქართველოს ევროკავშირში ინტეგრაციას და პირად მარცხად აღიქვამს პროგრესს ამ გზაზე, დიდია რისკი ახალი იერიში განახორციელონ საქართველოს წინააღმდეგ და მათთვის მთავარი ცოცხალი სამიზნე იქნება ყველა ჭეშმარიტი ოპოზიციონერი ლიდერი. ნიკა გვარამიას გათავისუფლება არის არა ვინმეს დამარცხება, არამედ საქართველოს წარმატება ევროპული ინტეგრაციის გზაზე. მე მიკვირს, როგორ შეიძლება ევროპული ინტეგრაციის გზაზე პროგრესის გამო რომელიმე საქართველოს ნამდვილი პატრიოტი იყოს გაბრაზებული და გავეშებული. მაგრამ რადგან ქვეყანაში „ქართული ოცნების“ სახით კვლავ გვყავს ძალა და ხელისუფლება, რომელიც ეწინააღმდეგება საქართველოს ევროკავშირში ინტეგრაციას და პირად მარცხად აღიქვამს პროგრესს ამ გზაზე, დიდია რისკი ახალი იერიში განახორციელონ საქართველოს წინააღმდეგ და მათთვის მთავარი ცოცხალი სამიზნე იქნება ყველა ჭეშმარიტი ოპოზიციონერი ლიდერი რათა მომავალში დასავლეთთან სავაჭროდ ახალი ტყვეები აიყვანონ. აქვე უნდა ვთქვათ, რომ ამ ფონზე განსაკუთრებული საფრთხის ქვეშ არის მიხეილ სააკაშვილი, მისი ჯანმრთელობა და სიცოცხლე. ამას არათუ ვვარაუდობ, არამედ ეს ჩანაფიქრი და გეგმა უკვე აქვს ხელისუფლებას და დღეიდანვე დაიწყება მისი ეტაპობრივი განხორციელება. ახლა მკითხავთ, რა არის გამოსავალი. გამოსავალია კოორდინაციაში, საერთო ძალისხმევაში და ამის მაგალითი არა მხოლოდ 7-8 მარტი, არამედ თუნდაც გუშინდელი ნიკა გვარამიას გათავისუფლებაა, როცა ყველამ ერთად საერთო ძალისხმევით შევძელით ეს. ძალა ერთობაშია და არა ურთიერთდაპირისპირებასა და კინკლაობაში!“ – განაცხადა პაატა მანჯგალაძემ, რომლის კომენტარსაც „სტრატეგიაა აღმაშენებელი“ ავრცელებს.

პრეზიდენტის გადაწყვეტილება სამართლიანი იყო – მასაც ალბათ, „გლობალური ომის პარტიის” წარმომადგენლად გამოაცხადებენ, – ამის შესახებ „გირჩის“ დეპუტატმა ვახტანგ მეგრელიშვილმა განაცხადა, რითაც პრეზიდენტის მიერ “მთავარი არხის” დამფუძნებლის, ნიკა გვარამიას შეწყალებას გამოეხმაურა.

მისი თქმით, კონკრეტული მუხლით ადამიანის პატიმრობა დაუშვებელია და ეს საქართველოს რეპუტაციაზე ცუდად აისახებოდა.

„მუხლი, რომელლითაც გვარამია გასამართლდა არის მენეჯერის მიერ კომპანიის ქონების არამიზნობრივად გამოყენება. ამაზე არ შეიძლება სახელმწიფო ედავებოდეს, ეს შეიძლება იყოს კერძო დავა. მსგავსი რამ არსად არსებობს, ამ მუხლით ნიკა გვარამიას და არც სხვა ადამიანის ციხეში ჯდომა არ შეიძლება. აქედან გამომდინარე ძალიან ადეკვატური იყო გვარამიას გამოშვება. მეორე საკითხია, ეს დეპოლარიზაციას შეუწყობს თუ არა ხელს. მე გუშინ როგორც დავაკვირდი, მათ შორის, რა შეფასებაც გააკეთა თავის წარსული ქმედების, საინტერესო იქნება, დღეს რა ჭკუაზეა, რა მოიფიქრა იმ პერიოდის განმავლობაში, როცა ციხეში იყო. აქედან გამომდინარე, შეიძლება ეს იყოს კარგი. შეიძლება ისევ იმ ბრძოლაში ჩაერთოს, რომელშიც იყო როგორც „ნაციონალურო მოძრაობის“ მთავარი პარტიული მედიასაშუალების დირექტორი და ჩემი აზრით, „ნაციონალური მოძრაობის” ერთ-ერთი ყველაზე გავლენიანი ლიდერი. აქედან გამომდინარე ეს საკითხი დამოკიდებულია გვარამიას ქმედებებსა და გადაწყვეტილებებზე, რაზეც ის არის ჩამოყალიბებული. პრეზიდენტის ქმედების ლოგიკა არ ვიცი. სამართლიანობის თვალსაზრისით, ჩვენ მოვუწოდებდით მას, ეს ნაბიჯი გადაედგა. თუმცა, მე არანაირი გარანტია არ მაქვს, ეს პოლარიზაციას შეამცირებს თუ არა. თუმცა, ეს ადამიანი იყო გამოსაშვები და ეს მოქმედებდა საქართველოს რეპუტაციაზე ძალიან ცუდად, ეს ფაქტია. ამიტომ, რა მოტივაციაც არ უნდა ყოფილიყო პრეზიდენტის გადაწყვეტილების უკან, ეს გადაწყვეტილება იყო სამართლიანი. რაც შეეხება “ქართული ოცნების დამოკიდებულებას ამ საკითხზე, იცით ჩემი პოზიცია, რომ “ქართული ოცნება” სინამდვილეში დგას “ნაციონალურ მოძრაობასთან” დაპირისპირებაზე, ზიზღის კამპანიაზე, პრეზიდენტი ჩართეს ფაქტობრივად ამ საქმეში, ალბათ, ისიც გლობალური ომის პარტიის წარმომადგენლად იქნება გამოცხადებული”, – განაცხადა მეგრელიშვილმა.

საქართველოში აშშ-ის ელჩი კელი დეგნანი აცხადებს, რომ აშშ მიესალმება საქართველოს პრეზიდენტ სალომე ზურაბიშვილის გადაწყვეტილებას ნიკა გვარამიას შეწყალების თაობაზე.

მისივე თქმით, სალომე ზურაბიშვილის გადაწყვეტილებამ წინ წასწია ღრმა პოლარიზაციის დაძლევის საკითხი.

„ეს საქმე თავიდანვე პრობლემური იყო და ემატებოდა იმ ღრმა პოლარიზებას, რომელსაც საქართველოში მრავალი წლის განმავლობაში ვხედავთ. პრეზიდენტის გადაწყვეტილება მნიშვნელოვანი კონტრიბუციაა პოლარიზაციის შესამცირებლად საქართველოში, რომელმაც დაყო საზოგადოება, მიიყვანა გაურკვევლობამდე და რომლითაც ხანგრძლივ მოქმედ პერსპექტივაში მხოლოდ რუსეთი სარგებლობს. ახლა ქართველებს დაყოფის დრო არ აქვთ, ახლა გაერთიანების დროა. პრეზიდენტ ზურაბიშვილის გადაწყვეტილებამ წინ წასწია ღრმა პოლარიზაციის დაძლევის საკითხი.

პრეზიდენტ ზურაბიშვილს აქვს შეწყალების პრეროგატივა. მან ძალიან მკაფიოდ განაცხადა, რომ ეს მისი გადაწყვეტილებაა. აშშ, ევროკავშირი და სხვები ძალიან მკაფიოდ გამოთქვამდნენ თავიდანვე შეშფოთებას ამ საქმესთან დაკავშირებით. მეგობრები გამოთქვამენ შეშფოთებას და ეს არ არის ჩარევა. დარწმუნებული ვარ, პრეზიდენტი ზურაბიშვილი შეწყალების უფლებას ძალიან სერიოზულად აღიქვამს“, – განაცხადა კელი დეგნანმა.

ყველა, ვინც მოუწოდებდა პრეზიდენტს, დეპოლარიზაციისთვის შეეწყალებინა ნიკა გვარამია და ამით არასწორ კავშირს აკეთებდა ევროკავშირთან ინტეგრაციის საკითხზე, დღეს პასუხისმგებლობას იღებს, რომ ამ ნაბიჯის შემდეგ, უნდა მოხდეს დეპოლარიზაცია, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

მისი თქმით, თავად სალომე ზურაბიშვილი საუბრობდა იმაზე, რომ მასზე იყო გარედან ზეწოლა.

„უპირველეს ყოვლისა, თავად პრეზიდენტი საუბრობდა ამაზე, რომ გარედან იყო მასზე ზეწოლა. მეორე – საჯაროდ ვხედავდით მოწოდებებს, რომლებიც იყო პრეზიდენტის მიმართ. ზეწოლაა, როდესაც დამოუკიდებელი ქვეყნის პრეზიდენტს აძლევ რჩევებს და მისთვის სპეციფიკურ უფლებამოსილებაში ზედმეტად ერევი, ამ შემთხვევაში, რომ პრეზიდენტს მიეღო ესა თუ ის გადაწყვეტილება. რეაქციებითაც ვხედავთ, ვინ იყვნენ ის სუბიექტები, რომლებიც პრეზიდენტს მოუწოდებდნენ. ყველა, ვინც მოუწოდებდა პრეზიდენტს, რომ დეპოლარიზაციისთვის შეეწყალებინა ნიკა გვარამია, ვინაიდან ეს იყო დეპოლარიზაციისკენ გადადგმული ნაბიჯი და ამით არასწორ კავშირს აკეთებდა ევროკავშირთან ინტეგრაციის საკითხზე, ყველა ეს ადამიანი დღეს პასუხისმგებლობას იღებს, რომ ამ ნაბიჯის შემდეგ, უნდა მოხდეს დეპოლარიზაცია.

ვნახოთ, თუკი ეს იყო ოპოზიციის მხრიდან პოლარიზაციის საფუძველი, ვინაიდან მათ შესაძლოა, მიაჩნდათ, რომ უსამართლო იყო ეს გადაწყვეტილება. ახლა, ვინაიდან ნიკა გვარამია შეწყალებულია, გამოდის, რომ ბურთი არის ოპოზიციის მხარეს. ამაში ჩართული იყვნენ, მათ შორის, უცხოეთიდან ადამიანები, რომლებიც მოუწოდებდნენ პრეზიდენტს შეწყალებისკენ, ახლა აიღონ პასუხისმგებლობა და დავაკვირდეთ ოპოზიცია რამდენად შეცვლის საკუთარ რადიკალურ დღის წესრიგს“, – განაცხადა პაპუაშვილმა.

“პრეზიდენტმა თავის თავმოყვარეობა გადადო გვერდზე, პრეზიდენტის ინსტიტუტი შეურაცხყო, მისთვის მთავარია, რა დავალებას მიიღებს, არ გამიკვირდება, თუ საზოგადოების რეაქცია მწვავე იქნება”, – ასე გამოეხმაურა საპარლამენტო უმრავლესობის წევრი, გივი მიქანაძე „მთავარი არხის“ დამფუძნებლის, ნიკა გვარამიას გათავისუფლებას.

„თქვენ ფიქრობთ, ამ შეწყალებით რეკომენდაცია შესრულდა?! ერთი წელია, ვმუშაობთ ოპოზიციის ნაწილთან ერთად, რომ 12 პუნქტი შესრულდეს. ეს საკითხი ამ პუნქტებთან არაფერ შუაშია, რადგან ნიკა გვარამია არის ადამიანი, რომელიც პოლარიზაციას აღრმავებს. გაიხსენეთ, პრეზიდენტის ინსტიტუტს როგორ შეურაცხყოფდა, არ ვიცი მე რა გადააფასა, არადამაჯერებელია, რომ ასე უცებ რაღაცები გადააფასა. ყველამ იცის, რომ ეს ადამიანი რადიკალიზმით გამოირჩევა და მისი შეწყალება არის პოლარიზაციის გაღრმავებისკენ გადადგმული ნაბიჯი”, – განაცხადა მიქანაძემ.

ის ასევე გამოეხმაურა გვარამიას გათავისუფლების შემდეგ პრეზიდენტის ადმინისტრაციასთან მომხდარ ინციდენტს, რა დროსაც ევროკავშირის დროშა დაწვეს.

„არავის არავინ მიუგზავნია, ამის არანაირი მტკიცებულება არ გაქვთ. ეს არის საზოგადოების რეაქცია და არ გამიკვირდება თუ უფრო მწვავე იქნება საზოგადოების რეაქცია. გახსოვთ 26-27 მაისს გაკეთებულ განცხადებებს რა რეაქცია მოჰყვა საზოგადოების მხრიდან და როგორ გახდა იძულებული რიტორიკა შეეცვალა, როცა ევროპარლამენტში გამოვიდა და უფრო მეტად ზომიერი და ორიენტირებული ყოფილიყო ქვეყნის ინტერესებზე. გუშინდელი გადაწყვეტილება აბსოლუტურად ამოვარდნილია ამ კონტექსტიდან. ზოგადად, ევროკავშირი ჩვენი პოლიტიკური მიზანია და ნებისმიერი ქმედება ევროკავშირის საწინააღმდეგოდ ჩვენი მხრიდან ვერ იქნება მხარდაჭერილი და მოწონებული, მაგრამ კონკრეტულმა ადამიანმა რა პოზიცია გამოთქვა და ამის დაკავშირება „ქართულ ოცნებასთან“ არის აბსოლუტურად მიუღებელი”, – განაცხადა მიქანაძემ.

საძაგლობაა ქალთან მიმართებით ასე მოქცევა, – ამის შესახებ “მთავარი არხის” გენერალურმა დირექტორმა ნიკა გვარამიამ ციხის დატოვების შემდეგ განაცხადა და სალომე ზურაბიშვილს ბოდიში მოუხადა იმ ვიდეოების გამო, რომელშიც ის საქართველოს პრეზიდენტს შეურაცხმყოფელი სიტყვებით მიმართავდა.

მისი თქმით, “შეცდომაში გაჯიუტებას” არ აპირებს და არც სალომე ზურაბიშვილი “უნდა გაჯიუტდეს” და უნდა გაათავისუფლოს მესამე პრეზიდენტი, მიხეილ სააკაშვილი.

„ველოდი ამ კითხვას. მე არ ვაპირებ ჩემს შეცდომაში გაჯიუტებული ვიყო. ვიდეოებში, რომელსაც დიდი ეჭვი მაქვს, რომ ამ დღეების განმავლობაში გამოიყენებენ მის წინააღმდეგ, მე არ მომწონს ჩემი თავი ამ ვიდეოებში. საძაგლობაა ქალთან მიმართებით ასე მოქცევა. მე ვწუხვარ ამის გამო და ბოდიშს ვუხდი მას, ამის გამო. არც ის [სალომე ზურაბიშვილი] უნდა გაჯიუტდეს თავის შეცდომაში, როგორც ამ ქვეყნის პრეზიდენტი და მან უნდა გაათავისუფლოს მიხეილ სააკაშვილი“,- განაცხადა გვარამიამ.

გვარამიას თქმით, მას შეწყალება არ უთხოვია, რადგან თავს დამნაშავედ არ ცნობს.

“მე არ ვთვლიდი და დღემდე არ ვთვლი, რომ შეწყალება უნდა მეთხოვა, რადგან ჩემი თავი უდანაშაულო მგონია. ამაში დარწმუნებული ვარ და ასევე დარწმუნებული ვარ, რომ ამას აუცილებლად დავამტკიცებ”, – განაცხადა გვარამიამ.

ნიკა გვარამიამ გეგმებთან დაკავშირებულ კითხვაზე განაცხადა, რომ არ აპირებს “მთავარ არხს” უხელმძღვანელოს.

“მთავარი, რასაც მე გავაკეთებ, ეს იქნება იმ სირთულეებიდან „მთავარი არხის“ გამოყვანა, რომლშიც ის იმყოფება, თუმცა მე არ ვაპირებ, რომ „მთავარ არხს“ ვუხელმძღვანელო. მე ვიქნები მისი დამფუძნებელი, როგორც ვარ ახლა, მაგრამ „მთავარი არხი“ გადარჩა, მან აჩვენა, რომ ჩემს გარეშე, თავისუფალ ცურვაში მშვენივრად გრძნობს თავს, მე ვიტყოდი უკეთესად, ვიდრე ჩემს პირობებში, ამიტომ მე გავაკეთებ იმას „მთავარი არხისთვის“, რაც შეიძლება სხვას არ შეეძლოს, არც „მთავარ არხზე“ და არც სხვაგან. ეს, პირველ რიგში, ეხება მის გამოყვანას ფინანსური კრიზისიდან, მაგრამ „მთავარ არხს“ უხელმძღვანელებს ის, ვინც ახლაც ხელმძღვანელობს, ეს გიორგი გაბუნიაა, მისი დირექტორი. მე ამ წინადადებით მივმართავ სამეთვალყურეო საბჭოს. პირველ რიგში, ეს იქნება რასაც გავაკეთებ. არ ვიცი მე ჯერჯერობით ჩემი ურთიერთობა ტელევიზიასთან როგორც ჟურნალისტის, უბრალოდ მინდა გითხრათ, რომ არანაირი გადაწყვეტილება არ მაქვს მიღებული. რაც შეეხება იმას, საერთოდ რას გავაკეთებ, გულწრფელად გეტყვით, ციხეში მე ამასთან დაკავშირებით არანაირი გადაწყვეტილება, ზოგადად არაფერთან დაკავშირებით არ მიმიღია, იმიტომ, რომ ჩემთვის მნიშვნელოვანია კონტექსტი, იმის შეგრძნება რა ხდება სინამდვილეში გარეთ”, – განაცხადა მან.