საქართველოს პრემიერ-მინისტრს ირაკლი ღარიბაშვილს Emaar Properties დამფუძნებელმა და მმართველმა დირექტორმა მოჰამედ ალი რაშედ ალაბარმა უმასპინძლა. დუბაიში, მოჰამედ ალი რაშედ ალაბარის რეზიდენციაში გამართულ შეხვედრაზე იმ პროექტებზე იმსჯელეს, რომელთა განხორციელებაზეც Emaar Properties-ი აქტიურად მუშაობს. მუჰამედ ალი რაშედ ალაბარი მსოფლიოში ყველაზე მაღალი შენობის- ბურჯ-ხალიფას მფლობელია. Emaar Properties მრავალეროვნული უძრავი ქონების განვითარების კომპანიაა, რომელიც არაბთა გაერთიანებულ საამიროებში მდებარეობს. კომპანია 30 მილიარდზე მეტ აქტივებს ფლობს მსოფლიოს მასშტაბით. Emaar Properties აზიის, ევროპის და ჩრდილოეთ ამერიკის არაერთ ქვეყანაში ოპერირებს.

​„ნაციონალური მოძრაობა“ რა მდგომარეობაშიც არის, ამას მგონი, ყველა ვხედავთ, ეს არ იმალება, სააშკარაოზეა გამოტანილი, – ამის შესახებ ფრაქცია „ქართული ოცნების“ თავმჯდომარის მოადგილემ, გიორგი ცაგარეიშვილმა განაცხადა.

გიორგი ცაგარეიშვილმა, „ნაციონალური მოძრაობის“ წარმომადგენლების, გიორგი ვაშაძის, პეტრე ცისკარიშვილის და გიორგი ჩალაძის დავით კეზერაშვილთან, ლონდონში ვიზიტი შეაფასა.

„ნაციონალური მოძრაობა“ რა მდგომარეობაშიც არის, ამას მგონი, ყველა ვხედავთ, ეს არ იმალება, სააშკარაოზეა გამოტანილი. თავზარდამცემი სისწრაფით იშლება პარტია და ეს ყველაფერი ხდება მოახლოებული არჩევნების წინ, რაც ერთი ასად ამძიმებს „ნაციონალური მოძრაობის“, მისი პოლიტიკური ლიდერების მდგომარეობას. ვფიქრობ, სწორედ ამიტომ დაიბარა თავისთან ეს ადამიანები მათმა მთავარმა სპონსორმა. ჩაიბარებს მათგან ანგარიშს, დარწმუნებული ვარ, არ იქნება გახარებული მდგომარეობით, რასაც ეს ბატონები თავიანთ პატრონს ჩაუტანენ ლონდონში. კალეიდოსკოპური სისწრაფით ვითარდება მოვლენები ამ ე.წ. პარტიაში, რაც ვფიქრობ, ლოგიკური დასასრულია იმისი, რასაც ესენი ორი ათწლეულის მანძილზე აკეთებდნენ თავიანთ ქვეყანაში თუ მის ფარგლებს გარეთ. ზოგადად, ნათქვამია რასაც დასთეს იმას მოიმკიო, თესავდნენ ბოროტებას და საბოლოო ჯამში, მიიღეს ბოროტება. ნამდვილად არ დამწყდება გული, თუ ეს ავაზაკთა გაერთიანება, რომელსაც თავის დროზე ვიღაცამ პარტია დაარქვა, ამ ფორმით, ტანჯვით დაიშლება. დარწმუნებული ვარ, რაც უფრო მალე დაიშლება „ნაციონალური მოძრაობა“, მით უფრო მალე გათავისუფლდება დანარჩენი ოპოზიციური სპექტრი იმ მარწუხებისგან, რომელიც სააკაშვილმა თავის ავაზაკებთან ერთად დაადო სრულიად ქართულ ოპოზიციას,“ – განაცხადა ცაგარეიშვილმა.

ჩვენთვის კანდიდატის სტატუსი არ არის მწვერვალი, ჩვენთვის მწვერვალი იქნება ევროკავშირის სრულფასოვანი წევრობა და შესაბამისად, ძალიან მნიშვნელოვანია ინკლუზიური პროცესის წარმოება, – ამის შესახებ საპარლამენტო უმრავლესობის წევრმა, ბექა ოდიშარიამ ჟურნალისტებს განუცხადა.

მისი თქმით, მისასალმებელია კონსტრუქციული ოპოზიციის მზაობა, ჩაერთოს ევროკომისიის ცხრა დათქმის შესრულების პროცესში.

როგორც ოდიშარიამ აღნიშნა, „ნაციონალური მოძრაობის“ ინტერესებში საქართველოს ევროკავშირში გაწევრიანება არ შედის, შესაბამისად, აღნიშნული პარტია, დათქმების შესრულებაში მონაწილეობას არ მიიღებს.

„მივესალმები კონსტრუქციულ ოპოზიციას, რომელიც როგორც 12 რეკომენდაციის შემუშავების პროცესში იყო აქტიურად ჩართული, ახლაც დააანონსა, რომ შეუერთდება ამ ძალიან მნიშვნელოვან პროცესს, რომელიც არა მხოლოდ მიმდინარე წელს მოიცავს, არამედ გაწერილია 2024 წლის განმავლობაში. რაც შეეხება მავნებელ საქართველოს კომუნისტურ პარტიას, „ნაციონალურ მოძრაობად“ წოდებულს, რომელიც ბოლშევიკებად და მენშევიკებად დაიშალა და ეს ეპითეტებიც მათთვის ზედმეტია, იმიტომ, რომ ფრჩხილადაც არ ღირან იმ ბოროტი გენიების, რომლებიც წარმოადგენენ ბოლშევიკებს და მენშევიკებს. რა თქმა უნდა არ ჩაერთვებიან (9 დათქმის შესრულების პროცესში), დაიჯერეთ, ადამიანებო, მეტი როგორ გითხრათ, არ სურთ, რომ თქვენ იყოთ ევროკავშირის სრულფასოვანი წევრი, არ სურდათ ვიზალიბერალიზაცია მოგვნიჭებოდა. მათ საერთოდ არაფერი სურთ, ძალაუფლების, სისხლის და ფულის გარდა – ამაზე იდგენენ და ამ ზნეს და ამ ჩვეულებას ისინი ვერ მოიშლიან. შესაბამისად, იქნება ეს 9 დათქმა, 12 რეკომენდაცია თუ სხვა ნებისმიერი მნიშვნელოვანი საკითხი, რომელზეც საქართველოს ხელისუფლება ქართველ ხალხთან ერთად გულწრფელად მუშაობს იმისთვის, რომ მიზანი იქნას მიღწეული, ამ ხალხს მორიელსაც ვერ შეადარებ, კუს რომ გადაჰყავს მეორე ნაპირზე. ეს ხალხი არიან მავნებელი სამშობლოს მტრები“, – განაცხადა ბექა ოდიშარიამ.

ჩემი მთავრობა მხარს უჭერს იდეას, რომლის თანახმადაც ევროპა გახდება პირველი კონტინენტი ატმოსფერული ემისიების ნულოვანი ნაშთით. ყოველივე ამის გათვალისწინებით, გრძელვადიანი სტრატეგია დავამტკიცეთ ქვეყანაში მცირე ემისიების უზრუნველსაყოფად, ხოლო „ნახშირბადისადმი ნეიტრალიტეტი“ 2050 წლის მნიშვნელოვან სამიზნე ორიენტირად გამოვაცხადეთ, – ამის შესახებ საქართველოს პრემიერ-მინისტრმა ირაკლი ღარიბაშვილმა არაბთა გაერთიანებულ საამიროებში, დუბაიში გაერთიანებული ერების ორგანიზაციის კლიმატის ცვლილების 28-ე კონფერენციის მსოფლიო ლიდერთა სამიტზე სიტყვით გამოსვლისას განაცხადა.

მთავრობის მეთაურის თქმით, საქართველო ასევე კისრულობს ვალდებულებას გლობალურ ძალისხმევაში წვლილის შესატანად 2025 წელს წარმოადგინოს ახალი და უფრო ამბიციური ეროვნული გეგმა.

„ასევე, სიამოვნებით აღვნიშნავ, რომ საქართველოში მოხმარებული ელექტროენერგიის თითქმის 85% განახლებადი წყაროებიდან მოდის. თუმცა, მისი წილის შემდგომი გაზრდა ჩვენს სტრატეგიულ პრიორიტეტად რჩება და მოხარული ვარ განვაცხადო, რომ საქართველო უერთდება გაერთიანებული ერების კლიმატის ცვლილებებთან გამკლავების 28-ე კონფერენციის გლობალურ დაპირებას განახლებადი რესურსებისა და ენერგოეფექტიანობის შესახებ.

ძვირფასო კოლეგებო, მტკიცედ ვუჭერ მხარს გაერთიანებული ერების კლიმატის ცვლილებებთან გამკლავების 28-ე კონფერენციის თავმჯდომარე ქვეყნის ხედვას განახლებადი ენერგორესურსების გაზრდის შესახებ, რათა ეტაპობრივად მოხდეს წიაღისეული საწვავის ჩანაცვლება. მიმაჩნია, რომ ოფიციალურმა მოლაპარაკებამ შედეგად უნდა მოიტანოს 2030 წლისთვის განახლებადი ენერგორესურსების გასამმაგებისა და ენერგოეფექტიანობის გაორმაგების ვალდებულება, წიაღისეული საწვავის ჩანაცვლების უწყვეტ პროცესთან ერთად

დაბოლოს, იმედი მაქვს, რომ გაერთიანებული ერების კლიმატის ცვლილებებთან გამკლავების 28-ე კონფერენციის ფარგლებში ჩვენ შევძლებთ მოვემზადოთ უნიკალური მომენტისთვის და შევასრულოთ ჩვენი დანაპირები – უფრო ნათელი, ჯანმრთელი და მწვანე მომავალი შევუქმნათ მომდევნო თაობებს. დიდი მადლობა!“ – განაცხადა ირაკლი ღარიბაშვილმა.