ხელთ მაქვს მტკიცებულებები, თუ როგორ არის დაკავშირებული ე.წ. ქოლცენტრების საქმე სწორედ „ქართულ ოცნებასთან“, რომელიც არა მხოლოდ ევროპელ პენსიონერებს, არამედ საქართველოს მოქალაქეებსაც ძარცვავს, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.

„6 მაისს აღმაშენებლის გამზირის 75 ნომერში სამართალდამცავმა ორგანოებმა სპეოპერაცია ჩაატარეს უსიტყვოდ, არაფერი განუცხადებიათ, მაგრამ „ქართული ოცნების“ პროპაგანდისტულმა მედიამ სცადა ჩემი და უკრაინელი პოლიტიკოსის გაშავება, თითქოს რაღაც ქოლცენტრებთან დაკავშირება. ეს იყო პირდაპირ სუს-ის მიერ დაგეგმილი ოპერატიული ლეგენდა, რომელსაც ყოველგვარი მტკიცებულების გარეშე პროპაგანდისტული მედიები აწარმოებდნენ. მაშინ საზოგადოების წინაშე დავდე პირობა, რომ საქმეს ასე არ დავტოვებდი და ყველა დეტალს მივყვებოდი. ხელთ მაქვს მტკიცებულებები, რომელსაც მედიასაც გადავცემ, როგორ არის დაკავშირებული სწორედ „ქართულ ოცნებასთან“ თუნდაც ეს კონკრეტული შემთხვევა, ქოლცენტრების სქემა, რომელიც არა მხოლოდ ევროპელ პენსიონერებს ძარცვავს, არამედ საქართველოს მოქალაქეებსაც, ამის არაერთი ფაქტი არსებობს.

13 აპრილს ვინმე მიხეილ არახამია არეგისტრირებს კომპანიას „ლაიონ 7“-ს, რომელიც იმ დღესვე ქირაობს ფართს აღმაშენებლის 75-ში, სადაც სხვა სართულზე ჩემი ძმა ფლობს 10-ნომრიან სასტუმროს. ჩნდება კითხვა, ვინ არის მიხეილ არახამია, რომელიც აორთქლდა და გაქრა საერთოდ საქართველოდან. მიხეილ არახამიას ცოლი, ქეთევან თევდორაძე გახლავთ მალხაზ ამოიანის კომპანია შპს „რუდსის“ დირექტორი. თავის მხრივ, მალხაზ ამოიანი, დასენების კლანთან ერთად, ჩაჩი დასენთან ერთად ფლობს „ბლექსი როქსს“, ქოლცენტრს, კომპანიას, რომელიც ძარცვავს როგორც საქართველოს მოქალაქეებს, ასევე ევროპელ პენსიონრებს. ჩაჩი დასენი არის კომპანია „ვიპ ტრეიდის“ დირექტორი, რომლის მეწილეები 2020 წლამდე იყვნენ ტიტალ დასენი და კნიაზ დასენი, ასევე არტურ არაბიანი. ეს ადამიანები გახლავთ „ქართული ოცნების“, პარლამენტის წევრის, ისკო დასენის ოჯახის წევრები.

ფულის გათეთრების გამო ჩაჩი დასენი აქაურმა პროკურატურამაც კი მისცა პასუხისგებაში, რადგან ვეღარ დაიმალა, იმდენი დანაშაული აქვს ჩადენილი. რაც ყველაზე მნიშვნელოვანია, ისკო დასენი და დასენების ოჯახი უარყოფს კავშირს, თითქოს 2020 წლის შემდეგ კავშირი არ აქვს ჩაჩი დასენთან. არადა, მათი სხვა კომპანიის, შპს „მისო ლიდერის“ სამეთვალყურეო საბჭოს წევრი, გიორგი გოგუაძე, ამ წლის 24 აპრილის ჩათვლით, გახლდათ „ვიპ ტრეიდის“ სამეთვალყურეო საბჭოს წევრი, დასენების კლანის მიერ შექმნილი თაღლითური სქემის კომპანიის მთავარი წევრი. შესაბამისად, მე ხელთ მაქვს მთელი ეს მტკიცებულებები, რომელსაც გადავცემ მედიასაც და კიდევ ერთხელ ნათლად ჩანს, რომ სწორედ „ქართული ოცნება“ დგას ქოლცენტრების უკან. ამიტომ აჭიანურებენ ქოლცენტრებთან დაკავშირებით საგამოძიებო კომისიის შექმნას. არ უნდათ, შექმნან. რა მტკიცებულებებსაც ახლა მე წარმოგიდგენთ, დასაბუთებულია შპს-ების სარეგისტრაციო მასალებით, ამ ადამიანების ურთიერთკავშირებით. ეს არის იმ დიდი თაღლითური სქემის მხოლოდ ზღვაში წვეთი, რომლითაც ფინანსდება „ქართული ოცნება“, როგორც პოლიტიკური პარტია, ფინანსდებიან და ზურგს უმაგრებენ ის სპეცსამსახურები, რომლებმაც ეს სპეცოპერაცია დაგეგმეს ჩემ წინააღმდეგ.

კიდევ ერთხელ დადასტურდა, რომ მე და ჩემი ოჯახი, ასევე დავით არახამიაც, ვართ ცამდე მართალი ამ საქმეში. ვინმე თუ არის დამნაშავე, არიან ის ადამიანები, რომლებიც ხელს აფარებენ ამ დიდ თაღლითურ სქემას საქართველოში. ამ საქმეს კიდევ გავაგრძელებ და ევროპელ სამართალდამცავებსაც ყველა მტკიცებულებას წარვუდგენ“, – განაცხადა გიორგი ვაშაძემ.

დედაქალაქის მერი კახა კალაძე რუსეთსა და საქართველოს შორის პირდაპირი ფრენების განახლების შესახებ რუსეთის მიერ მიღებულ გადაწყვეტილებას გამოეხმაურა და განაცხადა, რომ ქვეყანაში ვერცერთი სანქცირებული კომპანია ვერ შეძლებს ფრენებს.

„თქვენ იცით, როგორც ფრენები, ასევე უვიზო მიმოსვლა ცალმხრივად იყო სანქცირებული, რაც ძალიან ცუდი იყო. გადაწყვეტილება ფრენების აღდგენასთან და ასევე უვიზო მიმოსვლასთან დაკავშირებით, რამდენიმე დღის წინ გახდა ცნობილი. ხვალ დაიწყება პირდაპირი ფრენები, რაც მისცემს ადამიანებს იმის შესაძლებლობას, რომ სხვა ქვეყნის გავლით კი არა, პირდაპირ შეძლონ რუსეთის სხვადასხვა ქალაქში გამგზავრება“, – განაცხადა დედაქალაქის მერმა.

კახა კალაძე რუსულ ავიაკომპანია „აზიმუტზე“ გავრცელებულ ინფორმაციასაც გამოეხმაურა და განაცხადა, რომ აფხაზეთი დამოუკიდებელი ქვეყნების ჩამონათვალიდან ავიაკომპანიის მიერ უკვე ამოღებულია.

მისივე თქმით, ოკუპაცია საქართველოს უდიდესი გამოწვევაა და ქვეყნის ხელისუფლება ძალისხმევას არ დაიშურებს მშვიდობიანი გზით ტერიტორიების დეოკუპაციის მისაღწევად.

„სრული პასუხისმგებლობით ვაცხადებთ, რომ ვერცერთი სანქცირებული კომპანია ვერ განახორციელებს შესაბამის ფრენებს. ამას სწავლობენ შესაბამისი უწყებები. ის კონკრეტული ფაქტი, რაზეც თქვენ საუბრობთ, ძალიან ცუდია, თუმცა როგორც დამოუკიდებელი ქვეყნის სტატუსის მქონე ქვეყნებიდან, აფხაზეთი ამოღებულია. კიდევ ერთხელ ხაზს ვუსვამ იმას, რომ ვერცერთი სანქცირებული კომპანია ვერ შეძლებს ფრენებს. დიდი პრობლემა არის ის, რომ ჩვენი ქვეყნის ტერიტორიების გარკვეული ნაწილი ოკუპირებულია. ეს ერთ-ერთი უდიდესი გამოწვევაა ჩვენი ხალხისთვის, ქვეყნისთვის. რა თქმა უნდა, ჩვენი ხელისუფლება აღნიშნული პოლიტიკით, რომელსაც ატარებს, ყველაფერს გააკეთებს, რომ ტერიტორიების დეოკუპაცია, დაბრუნება მოვახერხოთ. ეს უნდა გავაკეთოთ მშვიდობით, ძლიერი ეკონომიკური განვითარებით, გონიერებით, წინსვლით, განათლებით“, – განაცხადა თბილისის მერმა.

მმართველ გუნდში აცხადებენ, რომ რუსეთის გადაწყვეტილება ცალმხრივია და ამასთან საქართველოს ხელისუფლებას არანაირი კავშირი არ აქვს. თუმცა მოსალოდნელ საფრთხეებზე საუბრობენ ოპოზიციაში და განმარტავენ , რომ მოსკოვმა საქართველოს ხელისუფლება საგარეო პოლიტიკური კურსის გამო დაასაჩუქრა.