მივმართავთ საქართველოს ხელისუფლებას – დაუყოვნებლივ გადადგას ყველა საჭირო ნაბიჯი მოძმე უკრაინელ ერთან საქართველოს ოფიციალური ურთიერთობების ნორმალიზაციისთვის, ჯერ კიდევ არის დრო, დააბრუნონ ქვეყნის განვითარების ვექტორი ნატო-სა და ევროკავშირში გაწევრიანების გზაზე, დაუყოვნებლივ უნდა გათავისუფლდეს მიხეილ სააკაშვილი, – ამის შესახებ „ნაციონალური მოძრაობის“ წევრმა, გია ბარამიძემ  ბრიფინგზე განაცხადა.

მისივე თქმით, საქართველოს ხელისუფლებამ ნაბიჯები უნდა გადადგას საქართველოს ეროვნული ინტერესებიდან გამომდინარე.

„დღეს უკრაინის კონსტიტუციის დღეა. უკრაინა ჩვენთვის უმნიშვნელოვანესი მეგობარია, მოძმე ქვეყანა, რომელიც განიცდის პირდაპირ აგრესიას მტრის მიერ, რომელსაც ჩვენი 20% კვლავ ოკუპირებული აქვს. უკრაინის პარლამენტში პრეზიდენტმა უკრაინულ საზოგადოებას მოახსენა თავისი ხედვა და წარმოთქვა ისტორიული საპროგრამო სიტყვა, რომელიც გულისხმობს უკრაინის წინსვლას და განვითარებას, ურთიერთობებს მის მეგობრებთან, მოკავშირეებთან მას შემდეგ, რაც უკრაინა გაიმარჯვებს ამ ომში. გაიმარჯვებს უკრაინელი ხალხის თავდადებით, ჯარის ვაჟკაცობით, უკრაინელების ერთად დგომით, უკრაინის მიმართ მთელი ცივილიზებული სამყაროს დახმარებით, რადგან სიმართლე არის უკრაინელი ხალხის მხარეს, რადგან რუსეთი აგრესორია, ბარბაროსი დამპყრობელია, რომლის შეჩერება არ არის მხოლოდ საქართველოს ან უკრაინის საზრუნავი, არამედ მთელი ცივილიზებული სამყაროს საზრუნავი.

ამ ისტორიულ სიტყვაში ზელენსკიმ ისაუბრა, თუ როგორ წარმოუდგენია მას ომის შემდეგ მისი მეზობლების ბედი და ხაზგასმით აღნიშნა, რომ უკრაინის გამარჯვება ნიშნავს არა მარტო უკრაინის ტერიტორიული მთლიანობის აღდგენას, არამედ ეს ნიშნავს საქართველოს ტერიტორიული მთლიანობის აღდგენასაც. ეს არის ის, რაზეც მთელი ან ხნის განმავლობაში ვსაუბრობდით ჩვენ, საუბრობდა ყველა ის ადამიანი, ვისაც კარგად ესმის უკრაინის მნიშვნელობა და მისი გამარჯვების მნიშვნელობა.

მადლობა, გვინდა, გადავუხადოთ ზელენსკის, რადგან მას სწორედ ასე წარმოუდგენია უკრაინის გამარჯვება. აქედან გამომდინარე, გვინდა, მივმართოთ საქართველოს ხელისუფლებას:

1. დაუყოვნებლივ გადადგას ყველა საჭირო ნაბიჯი ჩვენს მოძმე უკრაინელ ერთან საქართველოს ოფიციალური ურთიერთობების ნორმალიზაციისთვის. დაუშვებელია, როცა საქართველო არის ზურგშებრუნებული უკრაინასთან, როცა საქართველოში არ არის უკრაინის ელჩი იმის გამო, რომ საქართველოს ხელისუფლება, პრაქტიკულად, მხარს უჭერს საქართველოსა და უკრაინის მტერს და მოვუწოდებთ მათ, გონს მოეგონ და სასწრაფოდ აღადგინონ ურთიერთობები უკრაინასთან;

2. ჯერ კიდევ არის დრო, დააბრუნონ საქართველოს განვითარების ვექტორი ნატო-სა და ევროკავშირში გაწევრიანების გზაზე. ეს არის ქვეყნის ისტორიული არჩევანი, ჩვენი ძმების, უკრაინელების არჩევანი. უკრაინა გაიმარჯვებს და საქართველოც გაიმარჯვებს უკრაინასთან ერთად და საქართველო, უკრაინა და მოლდოვა უნდა იყვნენ ნატო-სა და ევროკავშირის წევრები;

3. თუ კი რაიმე ნატამალი არსებობს ამ ქვეყანაზე სიმართლისა და სამართლის, დაუყოვნებლივ უნდა გათავისუფლდეს საპყრობილედან საქართველოს მესამე პრეზიდენტი მიხეილ სააკაშვილი. სასამართლოს პრინციპის ოდნავ მაინც ზეიმისთვის, საქართველოში სამოქალაქო მშვიდობის დამყარებისათვის. ეს არის აუცილებელი საქართველო უკრაინის კავშირების განმტკიცებისათვის, რომელსაც სასიცოცხლო მნიშვნელობა აქვს საქართველოსთვის, რადგან საქართველო უნდა იყოს უკრაინის გვერდით და საქართველო უნდა იყოს უკრაინის სწორს მხარეს. ჯერ კიდევ არის ამის დრო და მოვუწოდებთ საქართველოს ხელისუფლებას, გადადგას ნაბიჯი დაუყოვნებლივ საქართველოს ეროვნული ინტერესებიდან გამომდინარე“, – განაცხადა გია ბარამიძემ.

არ მგონია, რუსეთს ჰქონდეს ან რესურსი, ან სურვილი, ახალი ფრონტი გამოსცადოს დასავლეთის წინააღმდეგ საქართველოში, რაც შეიძლება, მოხდეს, არის ის, რომ რუსეთი ცდის „რბილი ძალის“ ფრონტს, – ამის შესახებ საქართველოს პრეზიდენტმა, სალომე ზურაბიშვილმა „სიენენთან“ ინტერვიუში რუსეთთან დაკავშირებით დასმული კითხვის პასუხად განაცხადა.

ზურაბიშვილს ჟურნალისტმა ჰკითხა: „გრძნობთ თუ არა საქართველოში ნაკლებ ან მეტ საფრთხეს. როგორც ვიცით, ასობით ათასი ომის მოწინააღმდეგე რუსი საქართველოში გამორბის ან საქართველოს გავლით სხვა ქვეყანაში მიდის. თქვენ გქონდათ შემოჭრა 2008 წელს და, ვფიქრობ, თქვენ ისევ ღელავთ პუტინის განზრახვებზე. რას ფიქრობთ დღეს ამის შესახებ?“

„რა თქმა უნდა, ვერ იქნები შეშფოთების გარეშე, განსაკუთრებით მაშინ, როდესაც პუტინის რეჟიმი შედის ბოლო ფაზაში და, აშკარად, პუტინი არ მართავს დღეს ყველაფერს, და, რა თქმა უნდა, ვერ მართავს ომს უკრაინაში. თქვენ ყოველთვის შეგიძლიათ, ინერვიულოთ იმაზე, რა შეიძლება, მოჰყვეს ექსცენტრიულ გადაწყვეტილებას. ჩვენს შემთხვევაში, ამ ეტაპზე მე ვერ ვხედავ, რომ არსებობს სამხედრო ზეწოლა, რადგან, პირველ რიგში, ჩვენთან არის სამხედრო ოკუპაცია, რაც მიმდინარეობს 2008 წლიდან და მანამდეც, სხვადასხვა ფორმით, 1991 წლიდან მოყოლებული. ორი რეგიონი ოკუპირებულია რუსეთის სამხედრო ბაზებით. ასე რომ, იმის თქმა, რომ გვეშინია სამხედრო ოკუპაციის, ეს ბევრს არ ნიშნავს. მე ვფიქრობ, რაც შეიძლება, მოხდეს, არის ის, რომ რუსეთი დღეს ცდის „რბილი ძალის“ ფრონტს, რაც არის პროპაგანდა. ყველა რუსი, რომელიც შემოდის საქართველოში, გავიმეორებ, საჭიროა, ეს კონტროლდებოდეს. იმ ადამიანთა უმრავლესობა, რომელიც გაურბის დღევანდელ რუსეთს, ნამდვილად არ არის პუტინის მომხრე, მაგრამ როდესაც ჩვენ ვიცით საფრთხეები, რომლებსაც რუსეთი იყენებს, არის ის, რომ რუსულენოვანი ხალხი თუ არ იქნება ნორმალურად დაცული, ეს გახდება რუსეთის შემოჭრის საბაბი. ასე რომ, ეს ყველაფერი შეიძლება, კვლავ გამოიყენოს რუსეთმა. მე არ მგონია, რუსეთს ჰქონდეს ან რესურსი, ან სურვილი, ახალი ფრონტი გამოსცადოს დასავლეთის წინააღმდეგ საქართველოში“, – განაცხადა სალომე ზურაბიშვილმა.

ჩვენი კავშირი ნატო-სთან ძალიან მჭიდროა, მაგრამ დღეს ალბათ ევროკავშირის გზა უფრო ახლოს ჩანს, – ამის შესახებ საქართველოს პრეზიდენტმა, სალომე ზურაბიშვილმა „სიენენთან“ ინტერვიუში განაცხადა.

ზურაბიშვილს ჟურნალისტმა ჰკითხა: „როგორ ფიქრობთ, რა არის თქვენი ქვეყნის რეალისტური მომავალი, რომ შეინარჩუნოს თავი უსაფრთხო და დამოუკიდებელი, როგორ ფიქრობთ, გაქვთ რაიმე შანსები ნატო-ში გაწევრიანების და ასევე ევროკავშირში?“

„ვფიქრობ, რომ ჩვენ გვაქვს უფრო მეტი შანსი ევროკავშირში მოხვედრის და ვიცით, რომ ევროკავშირისა და ნატო-სკენ მიმავალი გზა პარალელურია. საქართველო ძალიან აქტიური იყო ნატო-სთან ურთიერთობაში და მონაწილეობდა ნატო-ს მისიების ნაწილში ერაყსა და ავღანეთში. ნატო-ს წვრთნები მთელი ამ წლების განმავლობაში ტარდებოდა, მიუხედავად იმისა, რომ ჩვენ გვაქვს ოკუპირებული ტერიტორიები. ასე რომ, ჩვენი კავშირი ნატო-სთან ძალიან მჭიდროა, მაგრამ დღეს ალბათ ევროკავშირის გზა უფრო ახლოს ჩანს.

ნატო-ს თვალსაზრისით შემდეგი სამიტი იქნება უკრაინაზე, ეს ყველამ ვიცით და ეს იქნება უსაფრთხოების გარანტიები უკრაინისთვის და ეს ნორმალურია. სწორედ ამას იმსახურებს უკრაინა დღეს. ჩვენ შორის არ არსებობს კონკურენცია რაიმე ფორმით. უკრაინის წინსვლა საქართველოს სარგებელს მოუტანს, მაგრამ საქართველომ უნდა მიიღოს კანდიდატის სტატუსი წლის ბოლოს. ჩვენ მივიღეთ პერსპექტივა, რომელიც საქართველოსთვის იყო ძალიან მნიშვნელოვანი, რაც იმას ნიშნავდა, რომ გეოგრაფიული ადგილმდებარეობა აღარაა ჩვენთვის უარის თქმის მიზეზი, რაც იყო მრავალი წლის განმავლობაში. შემდეგი ეტაპი არის კანდიდატის სტატუსის მოპოვება. ამ „რბილ ომში“, რომელიც ჩვენ გვაქვს რუსეთთან, „რბილი“ პოლიტიკა, „რბილი“ ძალა, ვფიქრობ, ევროკავშირს არ შეუძლია, რაიმე სტრატეგიული გადაწყვეტილების მიღება, რომ დაკარგოს საქართველო. საქართველოს მოსახლეობა ისევ იმედგაცრუებული დარჩება და ეს არ უნდა იყოს ნიშანი რუსეთისთვის, რომ მისთვის მარტივად „სათამაშო“ ადგილი ვართ.

ეს არის ძალიან სტრატეგიული გადაწყვეტილება, რომელიც, რა თქმა უნდა, ითვალისწინებს დემოკრატიულ რეფორმებს და პროცესებს, რომლებიც, შესაძლოა, ბოლო ეტაპზე არ არის ისეთი დამაკმაყოფილებელი, როგორც უნდა იყოს. მაგრამ ეს პირობები შეიძლება დარჩეს, შეიძლება, რამე დაემატოს, რომელთაგანაც ევროკავშირი იპოვის სწორ სიტყვათა შეთანხმებას და ფორმატს, მაგრამ ეს ჯერ კიდევ არის სტრატეგიული გადაწყვეტილება“, – განაცხადა სალომე ზურაბიშვილმა.