ევრო 2023-ზე დასრულდა მესამე მეოთხედფინალური შეხვედრა. ქუთაისის „რამაზ შენგელია არენაზე“ ინგლისის ნაკრებმა პორტუგალია ენტონი გორდონის გოლით დაამარცხა – 1:0.

მატჩი დრამატული გამოვიდა. პირველი ტაიმი ინგლისელთა უპირატესობით მიმდინარეობდა და გორდონმა ანგარიში 34-ე წუთზე მორგან გიბს-უაითის პასის შემდეგ გახსნა. მეორე ნახევარში პორტუგალია ძალიან გააქტიურდა და მეტოქის კართან არაერთი რეალური მომენტი შექმნა, თუმცა უშედეგოდ.

ევროპის ახალგაზრდული ჩემპიონატის ნახევარფინალში ინგლისის ნაკრები ბათუმში ისრაელს შეხვდება, რომელმაც ტურნირიდან საქართველოს ნაკრები გამოთიშა.

ინგლისის გამარჯვება ზრდის საქართველოს შანსს, ითამაშოს 2024 წლის პარიზის ოლიმპიადის საგზურისთვის. თუ დღეს, ბოლო მეოთხედფინალურ შეხვედრაში საფრანგეთი უკრაინას დაამარცხებს, 7 ივლისს ბუქარესტში ოლიმპიადაზე მოხვედრისთვის რამაზ სვანაძის გუნდი უკრაინას შეხვდება.

წყარო: საზოგადოებრივი მაუწყებელი

საქართველოს რკინიგზის ინფორმაციით, დასავლეთ საქართველოში ჩამოწოლილი მეწყერის გამო, 3 ივლისს რეისების ნაწილი გაუქმდა.

„ძვირფასო მგზავრებო! სადგურ მარელისთან ჩამოწოლილი მეწყერის გამო, უსაფრთხოების უზრუნველყოფის მიზნებისათვის, 3 ივლისს გაუქმდა შემდეგი რეისები:

მაგისტრალური მიმართულებით მოძრავი მატარებლები:

#806 თბილისი-ბათუმი 06:30
#805 ბათუმი-თბილისი 14:30
#802 თბილისი-ბათუმი 08:00
#803 ბათუმი-თბილისი 08:10
#808 თბილისი-ბათუმი 10:35
#870 თბილისი-ზუგდიდი 08:40
#12 თბილისი-ოზურგეთი 08:50
#18 თბილისი-ქუთაისი 08:50
#873 ფოთი-თბილისი 07:20
#11 ოზურგეთი-თბილისი 09:00
#17 ქუთაისი-თბილისი 12:25

საგარეუბნო მატარებლები:

#6446 ხაშური-ზესტაფონი 06:50
#6417 ზესტაფონი-ხაშური  06:50

სხვა რეისებთან დაკავშირებით, ინფორმაციას დამატებით მოგაწვდით, – წერს საქართველოს რკინიგზა.

„იმედის კვირა“ დაინტერესდა როგორ მოწმდება წყლის ხარისხი შავ ზღვაში. აჭარის გარემოს დაცვის სამმართველო ზღვის წყლის ხარისხს ყოველ 10 დღეში ერთხელ ამოწმებს. ნაპირიდან 50 მეტრის რადიუსში, ანუ იქ, სადაც დამსვენებლები ცურავენ, იღებენ წყლის სინჯებს. შერჩეულია 7 ლოკაცია, იმისთვის რომ საერთო სურათი მთელ სანაპირო ზოლზე გამოჩნდეს.

წყლიდან აღებული სინჯები მაქსიმუმ 2 საათის განმავლობაში აჭარის სოფლის მეურნეობის სამინისტროს აისო სტანდარტის მქონე ლაბორატორიაში მიაქვთ. საბანაო წყალს 4 მთავარი სპეციალისტი ამოწმებს. ზღვის წყლის ხარისხის სანიტარულ-მიკრობიულოგიურ კვლევას 4 დღე სჭირდება. ამის შემდეგ უკვე ცნობილია შედეგები – რამდენად შეესაბამება დადგენილ ნორმებს ზღვის წყლის ხარისხი – ანუ ვარგისია თუ არა საბანაოდ.

საკითხი განსაკუთრებით აქტუალური კახოვკის ჰიდროელექტროსადგურზე მომხდარი აფეთქების შემდეგ გახდა, თუმცა გარემოს ეროვნული სააგენტოს მეთევზეობის და აკვაკულტურის სამმართველოს უფროსი რამაზ მიქელაძე ამბობს, რომ კახოვკის ეკოკატასტროფის გავლენა საქართველოზე ნაკლებად სავარაუდოა.

„უკრაინიდან წამოსული წყალი დიდნაწილად ისევ ციკლურ დინებაში გადადის იქვე, დასავლეთ ნაწილში და წყლის ძალიან მცირე რაოდენობა მოდის აქეთ“, – განმარტავს ის.

ერთიანი ეროვნული გამოცდები 3 ივლისს იწყება. გამოცდები ქართული ენისა და ლიტერატურის გამოცდით დაიწყება, 26 ივლისს კი ფიზიკის გამოცდით დასრულდება.

გამოცდების ეროვნული ცენტრის ინფორმაციით, ერთიანი ეროვნული გამოცდებისათვის რეგისტრირებულია გამოსაცდელთა რეკორდული რაოდენობა – 45 000-ზე მეტი აბიტურიენტი.

2023 წელს მთელი საქართველოს მასშტაბით სულ 24 საგამოცდო ცენტრია გახსნილი. ცენტრები იფუნქციონირებს თბილისში, ბათუმში, ზუგდიდში, ქუთაისში, ფოთში, ახალციხეში, გორში, ოზურგეთში, რუსთავში, თელავსა და ხულოში. წელს პირველად საგამოცდო ცენტრი გაიხსნება ამბროლაურშიც.

შეფასებისა და გამოცდების ეროვნული ცენტრი აცნობებს გამოსაცდელებს, რომ წელს აღარ მოქმედებს გამოცდებთან დაკავშირებული კოვიდ რეგულაციები. სხვა ინფექციური დაავადებების მქონე პირების მსგავსად, კოვიდინფიცირებული გამოსაცდელები უნდა დაუკავშირდნენ ცენტრის ცხელ ხაზს ნომერზე (995 32) 2 47 33 33 და გამოცდის დაწყებამდე წარადგინონ შესაბამისი სამედიცინო დოკუმენტაცია შეფასებისა და გამოცდების ეროვნულ ცენტრში (მის.: ე. მინდელის N 9), რათა იმავე სესიაზე ჩაუტარდეთ გამოცდა სპეციალურად მოწყობილ საგამოცდო სექტორში.

წელს, სტუდენტთა საგრანტო კონკურსში მონაწილეობის სურვილი 3 000-ზე მეტმა სტუდენტმა გამოთქვა; საერთო სამაგისტრო გამოცდისათვის რეგისტრაცია 10 000-ზე მეტმა მაგისტრანტობის კანდიდატმა გაიარა; მასწავლებლის საგნის გამოცდაზე 16 000-ზე მეტი აპლიკანტი დარეგისტრირდა; სპეციალური მასწავლებლის გამოცდაზე 2 500-მდე პირია დარეგისტრირებული. 2023 წლის არჩევითი საგნების სტატისტიკა აბიტურიენტთა არჩევანის მიხედვით ასე გამოიყურება: ისტორია აირჩია 22 200-მდე აბიტურიენტმა; მათემატიკა – 15 700-ზე მეტმა აბიტურიენტმა; ბიოლოგია – 3 600-ზე მეტმა აბიტურიენტმა; ქიმია – 2 600-ზე მეტმა აბიტურიენტმა; გეოგრაფია – 2 200-ზე მეტმა აბიტურიენტმა; ფიზიკა – 700-მდე აბიტურიენტმა; ლიტერატურა – 1 300-მდე აბიტურიენტმა; სამოქალაქო განათლება – 2 000-ზე მეტმა აბიტურიენტმა; სახვითი და გამოყენებითი ხელოვნება კი 300-ზე მეტმა აბიტურიენტმა აირჩია.

რუსული ავიაკომპანია “აზიმუტი” და ქართული ავიაკომპანია Georgian Airways მოსკოვსა და თბილისს შორის ფრენების სიხშირეს ზრდიან.

გამოცემა „ეხო-კავკაზა“ “აზიმუტის” ვებგვერდზე გამოქვეყნებულ განცხადებაზე დაყრდნობით იუწყება, რომ კომპანია კვირაში შვიდი რეისის ნაცვლად 14 რეისს შეასრულებს.

„ამჟამად ფრენები ყოველ დილით სრულდება, ხოლო 5 ივლისიდან განრიგში გამოჩნდება საღამოს რეისიც“, – ნათქვამია კომპანიის განცხადებაში.

„ეხო-კავკაზას“ ინფორმაციით, „თბილისი-მოსკოვი-თბილისის“ მიმართულებით კვირაში სამ რეისს დაამატებს Georgian Airways-ი.

გამოცემა წერს, რომ მოსკოვსა და თბილისს შორის ფრენების სიხშირე, საერთო ჯამში, კვირაში 24 რეისამდე გაიზარდება.