რუსული ავიაკომპანია “აზიმუტი” და ქართული ავიაკომპანია Georgian Airways მოსკოვსა და თბილისს შორის ფრენების სიხშირეს ზრდიან.

გამოცემა „ეხო-კავკაზა“ “აზიმუტის” ვებგვერდზე გამოქვეყნებულ განცხადებაზე დაყრდნობით იუწყება, რომ კომპანია კვირაში შვიდი რეისის ნაცვლად 14 რეისს შეასრულებს.

„ამჟამად ფრენები ყოველ დილით სრულდება, ხოლო 5 ივლისიდან განრიგში გამოჩნდება საღამოს რეისიც“, – ნათქვამია კომპანიის განცხადებაში.

„ეხო-კავკაზას“ ინფორმაციით, „თბილისი-მოსკოვი-თბილისის“ მიმართულებით კვირაში სამ რეისს დაამატებს Georgian Airways-ი.

გამოცემა წერს, რომ მოსკოვსა და თბილისს შორის ფრენების სიხშირე, საერთო ჯამში, კვირაში 24 რეისამდე გაიზარდება.

ბოლო დღეების დისკომფორტი გამოწვეულია საქართველოს რკინიგზისგან დამოუკიდებელი მიზეზებით – დასავლეთ საქართველოში უამინდობის და უხვი ნალექის გამო, – ამის შესახებ საქართველოს რკინიგზის ფილიალ მგზავრთა გადაყვანის დირექტორის მოადგილემ, პაატა მუჯირმა განაცხადა.

„ბილეთების ღირებულების 100% უბრუნდებათ მგზავრებს. ექსპერტები, გეოლოგები, საქართველოს რკინიგზის თანამშრომლები აქტიურად მუშაობენ და ამ დროისთვის გზა გაწმენდილია. ველოდებით დასკვნას ექსპერტებისგან, როდესაც გვექნება ინფორმაცია, რომ გადაადგილება უსაფრთხო იქნება, მხოლოდ ამის შემდეგ მოხდება მატარებლები მოძრაობის განახლება“, – აღნიშნა პაატა მუჯირმა.

ხარაგაულში ჩამოწოლილმა მეწყერმა რკინიგზის ქსელი დააზიანა, რის გამოც სარკინიგზო მიმოსვლა შეფერხებულია. საქართველოს რკინიგზამ დღეს ყველა რეისი გააუქმა.

„ჯორჯიან ეარვეისის“ დირექტორი თამაზ გაიაშვილი განცხადებას ავრცელებს. როგორც გაიაშვილი აცხადებს, უკრაინის პრეზიდენტის გადაწყვეტილება სანქციებთან დაკავშირებით არ გაჰკვირვებია.

გაიაშვილის განცხადებით, „მსოფლიოს არცერთი ავიაკომპანიის კომპეტენციაში არ შედის ამა თუ იმ ქვეყანაში ფრენების დაწყებაზე ან შეწყვეტაზე ნებართვის გაცემა“.

„უკრაინის პრეზიდენტის გადაწყვეტილება არ გამკვირვებია. მე საქართველოში ოპოზიციურად განწყობილი ჯგუფების ის ორკესტრირებული ტაშ-ფანდურა მიკვირს, რომლითაც ისინი ქართული ეროვნული კომპანიებისთვის გარედან თითის ქნევას ეგებებიან. სამწუხაროდ, ხელისუფლებაში მოსასვლელად ბრძოლა უკიდურესად რადიკალურ ფორმებს იძენს. ყველაფერზე მიდიან, ოღონდ როგორმე დაამხონ ხელისუფლება და თვითონ აღმოჩნდნენ ქვეყნის სათავეში. თავიანთი ამ არაჯანსაღი მიზნისკენ სავალ გზაზე ისინი ახერხებენ უკრაინის პრეზიდენტის შეცდომაში შეყვანასაც. საყოველთაოდ ცნობილია, რომ მსოფლიოს არცერთი ავიაკომპანიის კომპეტენციაში არ შედის ამა თუ იმ ქვეყანაში ფრენების დაწყებაზე ან შეწყვეტაზე ნებართვის გაცემა. ყველაფერ ამას ორ ქვეყანას შორის საჰაერო მიმოსვლაზე სამთავრობო ხელშეკრულება არეგულირებს. ჩვენ, როგორც ყველა სხვა კომპანია, ვალდებული ვართ შევასრულოთ ის გადაწყვეტილებები, რომლებსაც საქართველოს მთავრობა იღებს“, – აცხადებს გაიაშვილი.

„ჯორჯიან ეარვეისის“ დირექტორის თქმით, უკრაინის მიერ სანქცირებულთა სიაში მისი ან ავიაკომპანია „ჯორჯიან ეარვეისის“ შეყვანა აბსურდი და უსამართლობაა.

„რაც შემეხება პირადად მე, 2003 წლიდან აღარც „ჯორჯიან ეარვეისის“ დამფუძნებელი ვარ და აღარც გენერალური დირექტორი, მე მხოლოდ საფრენოსნო სამსახურის უფროსის თანამდებობა მიკავია. ყოველივე ზემოთ თქმულიდან გამომდინარე, მიმაჩნია, რომ უკრაინის მიერ სანქცირებულთა სიაში ჩემი ან ავიაკომპანია „ჯორჯიან ეარვეისის“ შეყვანა აბსურდი და უსამართლობაა. აქვე მინდა გამოვხატო წუხილი იმის გამო, რომ ამ გადაწყვეტილებას პოლიტიკური სარჩული აქვს. რუსეთში ფრენებს ახორციელებენ თურქეთის, არაბული სახელმწიფოების, ისრაელის, სომხეთის, აზერბაიჯანის, მთელი აზიისა და შუა აზიის ავიაკომპანიებიც, რომლებიც ასობით რეისს ასრულებენ. მაგრამ მათ სანქციების დაწესებას ვერ კადრებენ. არც მე და არც „ჯორჯიან ეარვეისს“ პოლიტიკასთან შეხება არ გვაქვს. ჩვენ ოცდაათი წელიწადია კეთილსინდისიერად ვემსახურებით ქართველ ხალხსა და საქართველოს მთავრობას. დასასრულს, იმედს ვიტოვებ, რომ უკრაინის პრეზიდენტის ამ უსამართლო და უსაფუძვლო გადაწყვეტილებას საქართველოს მთავრობის მყისიერი და სარკისებური პასუხი მოჰყება“, – ნათქვამია თამაზ გაიაშვილის განცხადებაში.

ვოლოდიმირ ზელენსკიმ 190 პირსა და 290 კომპანიას სანქციები დაუწესა, მათ შორის მოხვდნენ „ჯორჯიან ეარვეისი“ და თამაზ გაიაშვილი.

ისრაელის მედიის ცნობით, მეკარე დანიელ პერეცს საქართველოს ახალგაზრდულ ნაკრებთან პენალტების სერიაში დაეხმარა წინასწარ მომზადებული ინფორმაცია, რომელიც სამწვრთნელო სტაფმა მიაწოდა – ინფორმაციას Sport5.co.il ავრცელებს.

„დინამო არენაზე“ გამართულ ევრო 2023-ის მეოთხედფინალში დანიშნული პენალტების სერიისას, ისრაელის ნაკრების მეკარე დარტყმამდე კარის უკან ფურცლებს ათვალიერებდა. მან გამოიცნო გიორგი გაგუას დარტყმის მიმართულება და ბურთი მოიგერია. მეხუთე პენალტზეც მიმართულებას მიხვდა, მაგრამ საბა ხვადაგიანმა ბურთი ძელს მოარტყა.

„მას ეს კიდევ ერთხელ გამოუვიდა – ნახეთ, რა დაეხმარა ისრაელის ნაკრების მეკარეს გადამწყვეტი პენალტის მოგერიებაში. დანიელ პერეცი პოპულარული გახდა მას შემდეგ, როდესაც ირლანდიასთან პენალტების სერია მოაგებინა ისრაელის ნაკრებს და ახალგაზრდულ ევროზე გაიყვანა. ამ თამაშის შემდეგ მან აჩვენა ჩანაწერი, სადაც მითითებული იყო, რომელი მიმართულებით უმიზნებდნენ მეტოქის პენალტების შემსრულებლები.

საქართველოს წინააღმდეგ ევრო 2023-ის მეოთხედფინალში, დანიელ პერეცმა ეს კიდევ ერთხელ გააკეთა და რამდენიმე წუთში ჩანაწერი ისევ გამოჩნდა. მესამე ქართველის (გიორგი გაგუას) პენალტზე პერეცი მარჯვენა მხარეს გადახტა. ფურცელზე ზუსტად ასე ეწერა“ – წერს ისრაელის გამოცემა Sport5.co.il.

სადგურ მარელისში, უხვმა ნალექმა და უამინდობამ გამოიწვია მეწყერის ჩამოწოლა. მეწყერმა მნიშვნელოვნად დააზიანა საკონტაქტო ქსელი და ლიანდაგები.

„მიუხედავად იმისა, რომ საქართველოს რკინიგზის ბრიგადები სრულად მობილიზებულნი არიან და მუშაობენ მოძრაობის აღდგენაზე, კომპანიისგან დამოუკიდებელი მიზეზების გამო, მოძრაობის აღდგენის ზუსტი დრო უცნობია, ამასთან უსაფრთხოების უზრუნველყოფის მიზნებიდან გამომდინარე, მოძრაობის აღდგენის მიუხედავად, მიზანშეწონილი არა არის მგზავრთა გადაადგილება აღნიშნულ მონაკვეთზე“ – ვკითხულობთ საქართველოს რკინიგზის მიერ გავრცელებულ განცხადებაში.