ხედავთ, რა მდგომარეობაა ოპოზიციის შიგნით: არის დაპირისპირება და კინკლაობა „ნაცმოძრაობის“ შიგნით, სხვა პარტიები პრაქტიკულად აღარც არსებობს. ასეთ ვითარებაში აბსოლუტურად გასაგებია, რომ „ნაცმოძრაობა“ ჩამოსულია 20%-მდე, სხვა პარტიებს არ აქვთ ბარიერის გადალახვის შანსი, – ამის შესახებ „ქართული ოცნების“ თავმჯდომარემ, საპარლამენტო უმრავლესობის ლიდერმა ირაკლი კობახიძემ ჟურნალისტებს განუცხადა.

„კვლევა ასახავს საზოგადოების განწყობას. ჩვენი რეიტინგი არის გაზრდილი წინა არჩევნებთან შედარებითაც კი, გახსოვთ ალბათ, წინა არჩევნებზე იყო 47%, მანამდე 48%. დღეს ეს რეიტინგი არის მომატებული, რასაც აქვს თავისი მიზეზები. რაც შეეხება ოპოზიციის შემცირებულ რეიტინგებს, ამასაც აქვს თავისი მიზეზები. ხედავთ, რა მდგომარეობაა ოპოზიციის შიგნით: არის დაპირისპირება და კინკლაობა „ნაცმოძრაობის“ შიგნით, სხვა პარტიები პრაქტიკულად აღარც არსებობს. ასეთ ვითარებაში აბსოლუტურად გასაგებია, რომ „ნაცმოძრაობა“ ჩამოსულია 20%-მდე, სხვა პარტიებს არ აქვთ ბარიერის გადალახვის შანსი. ეს ზუსტად ასახავს ქვეყანაში ჩამოყალიბებულ ვითარებას. მთელი ამ პერიოდის განმავლობაში ოპოზიციას აგებული ჰქონდა თავისი კამპანია კანდიდატის სტატუსზე. თქვენ იცით, რომ აქაც სერიოზული მარცხი განიცადეს. ეს კვლევაც არის ჩატარებული ევროკომისიის რეკომენდაციის გამოქვეყნებამდე. დარწმუნებულები ვართ, რომ ამ რეკომენდაციის შემდეგ ჩვენი რეიტინგი კიდევ უფრო მეტად, მნიშვნელოვნად გაიზრდება. თავის თავს უნდა დააბრალოს ყველაფერი ოპოზიციამ: დეზინფორმაციული კამპანიები, რევოლუციის მცდელობა და ა.შ. – ეს ყველაფერი საბოლოო ჯამში ნეგატიურად აისახება ოპოზიციის რეიტინგზე. ამ ქვეყანაში ხალხს უნდა სიმშვიდე და მშვიდობა და არა ის, რასაც საზოგადოებას სთავაზობს რადიკალური ოპოზიცია, ამიტომ ეს რეიტინგები აბსოლუტურად ლოგიკურია“, – აღნიშნა კობახიძემ.

„გორბის“ კვლევის თანახმად, დღეს რომ საპარლამენტო არჩევნები ტარდებოდეს, რესპონდენტთა 55% ხმას „ქართულ ოცნებას“ მისცემდა, მეორე ადგილზე კი 20%-ით „ნაცმოძრაობა“ და „სტრატეგია აღმაშენებელი“ გავიდოდნენ

ვფიქრობ, მამუკა ხაზარაძის განცხადებას სერიოზულად არ შეიძლება, მოვეკიდოთ, ეს არის ადამიანი, რომელსაც საქართველოს კანონმდებლობამ დაუდგინა, რომ თაღლითია, უბრალოდ ხანდაზმულობის გამო ვერ მოხდა მისი გასამართლება, – ამის შესახებ „ხალხის ძალის“ წევრმა, ეკა სეფაშვილმა მამუკა ხაზარაძის განცხადების კომენტირებისას აღნიშნა.

სეფაშვილის თქმით, „თაღლითისაგან ნებისმიერი განცხადების სერიოზულად განხილვა შეუძლებელია“.

ამასთან, სეფაშვილი სალომე ზურაბიშვილის განცხადებასაც გამოეხმაურა, მისი თქმით, ვერც სალომე ზურაბიშვილის განცხადებას განიხილავს სერიოზულად.

„ეს არის ადამიანი, რომელმაც ლეგიტიმაცია საზოგადოების უმრავლესობის მხრიდან დაკარგა. მისი მოსაზრებები არ ვიცი ვის აინტერესებს, რადგან ის არის ქალი, რომელიც მრავალგზის უტიფრად არღვევს კონსტიტუციას. ამიტომ, მისი აზრები ჩემთვის საინტერესო არ არის. სალომე ზურაბიშვილის განცხადებაც, რომ მომავალი პარლამენტი იქნება კოალიციური, ნაკლებად საინტერესოდ მიმაჩნია, რადგან ეს არის ადამიანი, რომელსაც ლეგიტიმაცია დაკარგული აქვს. ამიტომ მის განცხადებას არავითარი ფასი არ აქვს. ხოლო კოალიციური იქნება პარლამენტი თუ რა კონფიგურაციით წარდგება, ამას მომავალ არჩევნებში გადაწყვეტენ საქართველოს მოქალაქეები, ქართველი ხალხი“, – განაცხადა სეფაშვილმა.

დარწმუნებული ვარ, ბარიერის დაწევის, 5 პროცენტზე დატოვების თუ ნებისმიერ სხვა შემთხვევაში, შემდეგ საპარლამენტო არჩევნებზე რუსულ ხელისუფლებას დავასრულებთ, ამიტომ ჩემთვის და „ლელოსთვის“ ეს არ არის ძალიან მნიშვნელოვანი ან საყურადღებო საკითხი,- ამის შესახებ „ლელოს“ დეპუტატმა სალომე სამადაშვილმა ჟურნალისტებთან განაცხადა.

როგორც მან აღნიშნა, არ გაუკვირდება, რომ ბარიერის დაწევაზე დაპირება „ქართულმა ოცნებამ“ არ შეასრულოს.

„მე არ ვიცი, რა გადაწყვეტილებას მიიღებს „ქართული ოცნება”, ბარიერის დაწევა იყო შეთანხმება მათ შორის, მიშელის დოკუმენტით, რომლიდანაც „ქართული ოცნება” გავიდა და არ გამიკვირდება, არ ეს პირობა არ შეასრულოს. მთავარი არის არა ბარიერის დაწევის საკითხი, არამედ იმ პოლიტიკური ფორმულის მოძებნა, რომელიც შეცვლის არჩევნებზე „ქართულ ოცნებას”, რაც სასიცოცხლოდ მნიშვნელოვანია სახელმწიფოს გადარჩენისთვის. მე დარწმუნებული ვარ, იმ საზოგადოებრივი განწყობის ფონზე, რამდენი გაყალბებული შედეგიც არ უნდა გამოაქვეყნოს „ქართულმა ოცნებამ“ და თავის დამშვიდებას შეეცადოს, ჩვენ ვიცით, რომ მოქალაქეების 70 პროცენტი ითხოვს პოლიტიკურ ცვლილებებს. ამიტომ დარწმუნებული ვარ, ბარიერის დაწევის, 5 პროცენტზე დატოვების თუ ნებისმიერ სხვა შემთხვევაში, ჩვენ შემდეგ საპარლამენტო არჩევნებზე რუსულ ხელისუფლებას დავასრულებთ, ამიტომ ჩემთვის და “ლელოსთვის” ეს არ არის ძალიან მნიშვნელოვანი ან საყურადღებო საკითხი”, – განაცხადა სამადაშვილმა.

როგორც მან აღნიშნა, იმისთვის, რომ ქვეყანამ ევროკავშირში გაწევრიანებაზე მოლაპარაკებები დაიწყოს, მნიშვნელოვანია არჩევნებზე ხელისუფლება შეიცვალოს.

„ხელისუფლებამ, რომელმაც ჩააგდო ევროკავშირის მოთხოვნების შესრულება, მოლოდინი, რომ რაიმე ახალ პირობას ან ძველ შეუსრულებელ პირობებს ამ ჯერზე შეასრულებენ, ცხადია, არ გვაქვს. ხელისუფლების შეცვლის გარეშე არანაირი მოლაპარაკებები გაწევრიანებაზე ჩვენს ქვეყანაში არ გაიხსნება, გასაღები ევროკავშირში გაწევრიანებაზე მოლაპარაკებების დასაწყებად, არის რუსული რეჟიმის დასრულება ქვეყანაში”, – განაცხადა სამადაშვილმა.

23 ნოემბერს „ნაციონალური მოძრაობა“ აპირებს დიდ შეკრებას და ვლინდება ხელშეშლა სახელმწიფოს მხრიდან – ეს არის კიდევ ერთი დარღვევა და პარტნიორებს, საერთაშორისო ორგანიზაციებს მინდა ვაცნობო, რომ არჩევნების გაყალბება და ხელის შეშლა არ ხდება მხოლოდ არჩევნების დღეს და იწყება დიდი ხნით ადრე, – ამის შესახებ განცხადება „ნაციონალური მოძრაობის” წევრმა, დავით კირკიტაძემ განაცხადა.

კირკიტაძის თქმით, შეკრებაზე ასევე იგეგმება მანიფესტზე ხელმოწერაც.

„მოახლოვდა 23 ნოემბერი, ვარდების რევოლუციის 20 წლისთავი. „ერთიანი ნაციონალური მოძრაობა” აპირებს დიდ შეკრებას და მინდა მწუხარებით აღვნიშნო, რომ სახელმწიფოს მხრიდან ვლინდება ხელის შეშლა. ჩვენ მივმართეთ არაერთ სახელმწიფო დაქვემდებარებაში მყოფ დაწესებულებას, როგორიც არის ახალი სპორტის სასახლე, მივმართეთ ასევე ძველი სპორტის სასახლის იჯარით აღებისთვის მფლობელ კომპანიას და სამწუხაროდ, მათგან ჩვენ გვეთქვა უარი. მაშინ, როცა „ალტ ინფო“, რუსულ ძალებს არ აქვთ არანაირი შეფერხება საკუთარი შეკრებები ჩაატარონ, სახელმწიფოს მფლობელობაში მყოფ შენობებში, მაგალითისთვის, ეს იყო თელავის თეატრი, გააფთრებულ წინააღმდეგობას გვიწევენ პროდასავლურ ძალებს, მოვაწყოთ შეკრებები და ღირსეულად აღვნიშნოთ „ვარდების რევოლუციის” 20 წლის თავი. ასევე, ვნახეთ, როგორ იქნა შეფერხებული საზღვარზე ბრიტანელი კონსულტანტი მაშინ, როცა რუსეთის მოქალაქეებს, არაერთ ადამიანს, ვისაც დარღვეული აქვს ოკუპაციის შესახებ კანონი თავისუფლად ატარებს ჩვენს ტერიტორიაზე. ხოლო ბრიტანეთის მოქალაქე, რომელიც გახლდათ კემერონის და ჯინსონის მრჩეველი არ შემოუშვეს ქვეყანაში. ჩვენ გვესმის მათ ტრაბახს, რომ ძლიერები არიან, მეორე მხრივ, ეშინიათ შენობები დაუთმონ პროდასავლურ ძალებს და მეორე მხრივ, ეშინიათ შენობები იჯარით დაუთმონ პროდასავლურ ძალებს და კონსულტანტები, რომლებიც გვყავს შემოუშვან ქვეყანაში. ეს არის კიდევ ერთი დარღვევა და ჩვენს მეგობრებს, პარტნიორებს, საერთაშორისო ორგანიზაციებს მინდა ვაცნობო, რომ როცა აკეთებენ შუალედურ და საბოლოო შემაჯამებელ დასკვნებს, არჩევნების გაყალბება, ხელის შეშლა პოლიტიკური სუბიექტებისთვის, არ ხდება მხოლოდ არჩევნების დღეს, ეს იწყება დიდი ხნით ადრე”, -განაცხადა კირკიტაძემ.

კითხვაზე, „ვარდების რევოლუციის“ 20 წლის თავზე ხომ არ მოეწერება ხელი იმ მანიფესტსაც, რომელზეც მიხეილ სააკაშვილი საუბრობდა, კირკიტაძე აცხადებს, რომ „ერთ-ერთი იქნება ეს მანიფესტი, მანიფესტთან ერთად, ჩვენს შეკრებაზე იქნება მნიშვნელოვანი სიახლეები“.

„დაჩის ზღაპრები“ ჰქვია ამას, კვლევა კი არა. ჩვენ ასეთი ვნახეთ 2018 წელს, როცა კობახიძემ გამოაცხადა სალომე ზურაბიშვილმა 52 პროცენტი მიიღოო და მერე 40 პროცენტი ძლივს დაუწერეს, ასეთივე „დაჩის ზღაპარია“ ის, რომ „ქართულ ოცნებას“ 55 პროცენტი აქვს, – ამის შესახებ „სტრატეგია აღმაშენებლის“ დეპუტატმა პაატა მანჯგალაძემ „გორბის“ კვლევის კომენტირებისას განაცხადა, რომლის თანახმად, გამოკითხულთა 55 პროცენტი „ქართული ოცნებას“ უჭერს მხარს.

მანჯგალაძის თქმით, „ქართული ოცნება“ სინამდვილეში შიშს აჩვენებს და ეს ჩანს იმ ფაქტიდანაც, რომ ბრიტანელი კონსულტანტი ბენ მალეტი ქვეყანაში არ შემოუშვეს.

„[კვლევა ამბობს, რომ] 55 პროცენტს, რა სიღარიბეშიც ცხოვრობს ქვეყანა, მოსწონს, მექსიკიდან ამერიკაში რომ მიდიან მისი ოჯახის წევრები, საჯარო სამსახურში რომ ხელფასები იზრდება და პენსია – არა, ეს მოსწონს, ყოველი მესამე ბავშვი რომ შიმშილობს სკოლაში, ეს მოსწონთ. მე არ მგონია, ასე ვფიქრობდეთ ქართველები. „დაჩის ზღაპრები“ ჰქვია ამას, კვლევა კი არა. ჩვენ ასეთი ვნახეთ 2018 წელს, როცა კობახიძემ გამოაცხადა სალომე ზურაბიშვილმა 52 პროცენტი მიიღოო და მერე 40 პროცენტი ძლივს დაუწერეს, ასეთივე „დაჩის ზღაპარია“ ის, რომ „ქართულ ოცნებას“ 55 პროცენტი აქვს. ჩვენს რეიტინგს რაც შეეხება, ბევრი კვლევაა, ხან 20 პროცენტია, ხან – 25. ძირითადი კვლევა არის არჩევნები და ჩვენ ვემზადებით არჩევნებისთვის. ხელისუფლებას ეშინია „ნაციონალური მოძრაობის“ და „სტრატეგია აღმაშენებლის“ ერთობის და ვნახეთ კიდეც, კონსულტანტი, რომელიც ინგლისის პრემიერის მრჩეველი იყო არ შემოუშვეს ქვეყანაში. კითხეთ „ქართულ ოცნებას,” ინგლისის მოქალაქემ, რომელიც ბორის ჯონსონის მრჩეველი იყო, რა დააშავა და რატომ არ შემოუშვეს საქართველოში, როცა ათასი ჯურის რუსი აგენტი და მაიმუნი შემოდის საქართველოში უპრობლემოდ. არ ვიცი, ამ კვლევებით რა დაგვიწერეს. ჩვენი ამოცანაა, რომ 2024 წელს „ნაციონალური მოძრაობის“ და „სტრატეგია აღმაშენებლის” ერთობა გავიდეს პირველ ადგილზე, გპირდებით, ეს იქნება ასე და ხელისუფლება შეიცვლება“, – განაცხადა მანჯგალაძემ.

ევროპარლამენტში ყველა ხაზს უსვამს იმას, რომ დადებითი გადაწყვეტილება ევროკომისიის მხრიდან ქართველი ხალხის მონაპოვარია, რომ ეს არის ქართველი ხალხის დამსახურება, რადგან საქართველოს მოქალაქეთა აბსოლუტური უმრავლესობა ევროკავშირში გაწევრიანებას უჭერს მხარს, – ამის შესახებ საპარლამენტო ფრაქციის „ერთიანი ნაციონალური მოძრაობის“ თავმჯდომარემ, თინა ბოკუჩავამ ევრონესტის საპარლამენტო ასამბლეაზე განაცხადა.

როგორც პარტია „ნაციონალური მოძრაობის“ პრესსამსახურის მიერ გავრცელებულ ინფორმაციაშია აღნიშნული, თინა ბოკუჩავა ბრიუსელში ევრონესტის საპარლამენტო ასამბლეის სესიაში მონაწილეობს.

მათივე ცნობით, პოლიტიკური და ენერგოუსაფრთხოების კომიტეტების გაერთიანებულ სხდომაზე გამოსვლისას, მან ხაზი გაუსვა აღმოსავლეთ პარტნიორობის ქვეყნების უსაფრთხოების კომპონენტის გაძლიერების აუცილებლობას და ოჩამჩირეში რუსეთის სამხედრო-საზღვაო ფლოტის გახსნის საფრთხე აღნიშნა. ასევე ევროკომისიის მიმართ საქართველოსთვის ევროკავშირის წევრობის კანდიდატის სტატუსის მინიჭების თაობაზე პოზიტიური რეკომენდაციისთვის მადლიერება გამოხატა და ხაზი გაუსვა იმ 9 დათქმის შესრულების აუცილებლობას, რომელიც ევროკომისიის ანგარიშშია აღნიშნული.

„ერთი მხრივ, ყველა ევროპარლამენტში ხაზს უსვამს იმას, რომ დადებითი გადაწყვეტილება ევროკომისიის მხრიდან, ქართველი ხალხის მონაპოვარია, რომ ეს არის ქართველი ხალხის დამსახურება, რადგან საქართველოს მოქალაქეთა აბსოლუტური უმრავლესობა ევროკავშირში გაწევრიანებას მხარს უჭერს. მეორე მხრივ, ხაზს უსვამენ იმის, რომ საქართველო მოლდოვასა და უკრაინას დაეწიოს, გაიხსნას მოლაპარაკებები გაწევრიანებისთვის. მაშინ, როდესაც საქართველო ასოცირების ტრიოში მოწინავე ქვეყანა იყო, მაგრამ ახლა პრაქტიკულად, ერთწლიანი ჩამორჩენაა უკრაინასთან და მოლდოვასთან მიმართებით. აუცილებელია რეფორმების გატარება, თუმცა ილუზია იმასთან დაკავშირებით, რომ „რუსული ოცნება“ ამ რეფორმებს გაატარებს, დიდად არ არის. ერთი პირობის შესრულება, რომლის შესრულებაც ივანიშვილის რეჟიმს აუცილებლად მოუწევს, ეს არის თავისუფალი და სამართლიანი არჩევნების ჩატარება. კანდიდატის სტატუსის დადებითი გადაწყვეტილება, ერთგვარად, სამართლიანი არჩევნების გარანტად იქცევა, რის შედეგადაც, ხელისუფლება უცილებლად შეიცვლება და შემდეგ დემოკრატიული, დასავლური, ევროპული, კოალიციური ხელისუფლება განახორციელებს რეფორმებს, რათა საქართველოსთვისაც გაიხსნას მოლაპარაკებები გაწევრიანებაზე ევროკავშირთან“,- განაცხადა თინა ბოკუჩავამ.

„ქართული ოცნება“ კარგ ჟესტს გააკეთებს თუ ოპოზიციასთან ერთად მხარს დაუჭერს მეორე და მესამე მოსმენით საარჩევნო ბარიერის ცვლილებებს, – ამის შესახებ, პარტია „გირჩის“ წევრმა ჰერმან საბომ განაცხადა.

„მგონია „ქართული ოცნება“ კარგ ჟესტს გააკეთებს თუ ოპოზიციასთან ერთად, მხარს დაუჭერს მეორე და მესამე მოსმენით ამ [საარჩევნო ბარიერის] ცვლილებებს. ამით ევროპელებს დავანახებთ, რომ პოლარიზაცია ცოტა შემცირდა, ერთად შეგვიძლია მუშაობა და მართლა უკეთესი საარჩევნო გარემოსკენ გადავდგამთ ნაბიჯს“, – აღნიშნა საბომ.

მოქმედი კონსტიტუციით, 2024 წლის საპარლამენტო არჩევნები პროპორციული სისტემითა და 5%-იანი ბარიერით ჩატარდება.