როგორ შეიძლება „ნაცს“ წაჰყვე ოკუპაციასთან დაკავშირებულ რაიმე ნარატივში, როცა ისინი არიან ოკუპაციის თანაავტორები, – ასე ეხმიანება მამუკა მდინარაძე ოპოზიციის რეზოლუციას, რომელიც ოთხოზორია – ტატუნაშვილის სიის გაფართოებას და მასში თამაზ გინტურის მკვლელების შეყვანისკენ მოუწოდებს ხელისუფლებას.

მდინარაძე აცხადებს, რომ ოთხოზორია- ტატუნაშვილის სია იყო თანხმობის დოკუმენტი წლების წინ, რადგან კონკრეტული კრიტერიუმები გაიწერა და თუ ამ კრიტერიუმებში ჩაჯდება და საშუალება იქნება კონკრეტულ ადამიანს მტკიცებულებებზე დაყრდნობით ბრალი წარედგინოს, ეს ისედაც მოხდება და ამას არანაირი რეზოლუცია არ სჭირდება, თუმცა, მდინარაძე აცხადებს, რომ „ოკუპაციის პირობებში ხშირად ამის საშუალება არ არის ხოლმე“.

„ხალხო, ისე ნუ გამოიყვანთ, რომ მე ვიცავ ვიღაც ნაძირალას, რომელმაც კაცი მოკლა, თქვენ გინდათ ასე გამოიყვანთ. ერთი კრიტერიუმებია და თუ მოხდა ისე, რომ იდენტიფიცირება იმგვარად მოხდა, რომ მტკიცებულების სტანდარტი დააკმაყოფილოს, ავტომატურად შევა, თქვენი და ჩემი აღტყინება აღარ იქნება საჭირო და მეორე – ზოგადად, რაც შეეხება „ნაცმოძრაობის“ და მისი კლასტერის საერთაშორისო სამართლებრივ და მსგავს დოკუმენტებს, მათ შორის, ოკუპაციის თემებს, არ მივყვებით. როგორ შეიძლება „ნაცს“ წაჰყვე ოკუპაციასთან დაკავშირებულ რაიმე ნარატივში, როცა ისინი არიან თანაავტორები ოკუპაციის. ახლა ბრაზდებიან და სწყინთ, როცა მათგან გადმოყოლილ მძიმე მემკვიდრეობას ვახსენებთ. 2007 წელს მიხეილ სააკაშვილმა და „ნაციონალურმა მოძრაობამ“ თავად შემოუხაზა ოკუპანტებს ტერიტორია, დადგენილება გამოსცა მაშინდელმა პრეზიდენტმა, რომელმაც აღადგინა სამხრეთ ოსეთის ავტონომიური ოლქი სიტყვა „ყოფილის“ დაყოლებით და დაადგინა მისი საზღვრები, რაც იყო საბჭოთა პერიოდში, მეტი უარესი რა უნდა ექნათ? რატომ გვიწოდებთ თანაავტორებსო და მეტი რა უნდა ექნათ, ზემო აფხაზეთი დაარქვეს კოდორს, ახალგორიც ამ საზღვრებში მოაქციეს და ძალიან დიდი ტერიტორიები, რომელზეც პრეტენზია არ ჰქონდათ აქამდე, მოაქციეს ამ საზღვრებში და მათაც ეს ტერიტორიები უფრო ადვილად მიიტაცეს,“ – განაცხადა მდინარაძემ.

„ქართული ოცნების“ გენერალური მდივნის, კახა კალაძის ვარაუდით, „ქართული ოცნება-დემოკრატიული საქართველო“ 2024 წლის არჩევნებზე კონსტიტუციური უმრავლესობით მოვა ხელისუფლებაში.

მისივე თქმით, არანაირი კოალიციური მმართველობა არ იქნება.

„არანაირი კოალიციური მმართველობა. მტერმა, რაც არ უნდა იზრუნოს, არ გამოუვათ, ეს ყალბი კვლევებიც და საზოგადოებრივი აზრით მანიპულირება, რაც არ უნდა იწვალონ. მე გეტყვით და დაგამშვიდებთ, რომ „ქართული ოცნება-დემოკრატიული საქართველო“ 2024 წლის არჩევნებზე კონსტიტუციური უმრავლესობით მოვა ხელისუფლებაში. ჩემი სიტყვა დაიმახსოვრეთ!“ – განაცხადა კახა კალაძემ.

ამასთან, კალაძე ჟურნალისტებთან საარჩევნო ბარიერის საკითხს გამოეხმაურა და აღნიშნა, რომ „თუ 5%-იან ბარიერს ვერ ლახავ და საზოგადოების მხარდაჭერა არ გაქვს, რა გინდა საერთოდ პოლიტიკაში და რა პრეტენზია გაქვს“.

„ირაკლი კობახიძის განცხადება გახსოვთ, მაშინ, როდესაც მან ეს განცხადება გააკეთა, თუ დეკემბერში მივიღებდით კანდიდატის სტატუსს, (მაშინ ეს იყო უსამართლო გადაწყვეტილება, რომ არაფერი არ ჯდებოდა, არანაირი ლოგიკა არ არსებობდა პოლიტიკური მიზნებისთვის მიიღეს ეს არასამართლიანი გადაწყვეტილება, სანამ ეს გადაწყვეტილება იქნებოდა, მაშინ გაკეთდა განცხადება, რომ თუ მოგვცემდნენ კანდიდატის სტატუსს) შეიძლებოდა ამ თემაზე საუბარი, დღეს ამაზე საერთოდ საუბარი არ არის.

ხომ აქვთ პრეტენზია, ხომ ამბობენ მზარდი რეიტინგი აქვს ოპოზიციასო?! აგერ არის ბატონო, 5%-იანი ბარიერი და ვნახოთ, რამდენი პოლიტიკური პარტია გადალახავს ამ 5%-იან ბარიერს. როდესაც პოლიტიკოსობაზე გაქვს პრეტენზია, თუ 5%-იან ბარიერს ვერ ლახავ და საზოგადოების მხარდაჭერა არ გაქვს, რა გინდა საერთოდ პოლიტიკაში და რა პრეტენზია გაქვს“, – განაცხადა კალაძემ.

დეზინფორმაცია არის ერთ-ერთი მთავარი გამოწვევა, რომელიც აქვს ჩვენს ხელისუფლებას, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

როგორც ირაკლი კობახიძემ აღნიშნა, „დეზინფორმაციას ვებრძვით მთელი ეს ოცი თვეა, რაც შევიტანეთ განაცხადი ევროკავშირში კანდიდატის სტატუსის მისაღებად“.

„გახსოვთ, რამხელა დეზინფორმაცია მოჰყვა ამ ყველაფერს ჩვენი პოლიტიკური ოპონენტებისგან, ტელევიზიებისგან. პირდაპირ ხალხს ატყუებდნენ, თითქოს 14 მილიარდი ევრო მოყვებოდა კანდიდატის სტატუსს. ასეთ ტყუილებთან გვიწევდა გამკლავება. რა თქმა უნდა, დეზინფორმაცია არის ერთ-ერთი მთავარი გამოწვევა, რომელიც აქვს ჩვენს ხელისუფლებას. ჩვენ იგივე ავიღოთ კანდიდატის სტატუსი. ჩვენ არც მაშინ ვატყუებდით საზოგადოებას, როდესაც უარყოფითი გადაწყვეტილება იქნა მიღებული და არც ახლა ვატყუებთ, როდესაც დადებითი გადაწყვეტილებაა მიღებული ევროპული კომისიის მხრიდან. მაშინაც სიმართლეს ვეუბნებოდით საზოგადოებას, რომ კანდიდატის სტატუსთან არ იყო დაკავშირებული ფინანსური, ეკონომიკური სარგებელი და ასე შემდეგ, ეს იყო პოლიტიკური განაცხადი არც მეტი, არც ნაკლები. სიმართლეს ვამბობდით. ვიღაცეებმა იმიტომ დაბლოკეს კანდიდატის სტატუსის მინიჭება ჩვენი ქვეყნისთვის. კონკრეტულმა ძალებმა, გლობალურმა ომის პარტიამ, ამაში სპეციალურად არ შევდივართ, რომ უხერხულებები არ შევქმნათ, ძალიან გარკვეული ძალები იგულისხმებიან. სანქციების გვერდის ავლას არ ვუშვებთ და ამასთან დაკავშირებით მისია იყო ჩამოსული საქართველოში, რომელმაც დაადასტურა, რომ ჩვენი ქვეყნის ტერიტორია არ გამოიყენება სანქციების გვერდის ავლისთვის, უფრო მეტიც,დადგინდა უმარავი შემთხვევა, როდესაც იყო გვერდის ავლის მცდელობა, როდესაც სახელმწიფო სტრუქტურებმა აღკვეთეს სანქციების გვერდის ავლა ჩვენს ქვეყანაში. როგორ შეიძლება სანქციებს შევუერთდეთ, ეს არის ოცნება „ნაცმოძრაობის“. როგორ შეიძლება ევროკავშირმა შენ მოგთხოვოს რომ შენი ქვეყნის ეკონომიკა პირველივე წელს შემცირდეს მინიმუმ 10%-ით. როგორ შეიძლება ეს ევროკავშირმა შენგან მოითხოვოს. მარტივი ლოგიკაა. სანქციების გვერდის ავლაზეა საუბარი. რაც შეეხება სანქციებთან მიერთებას, ევროკავშირი ვერავითარ შემთხვევაში ვერ მოითხოვს იმას, რომ ჩვენ ვერანაირად ვერ დავაზიანოთ რუსეთი ეკონომიკურად, მაგრამ დავაზიანოთ საკუთარი ხალხი და საკუთარი ქვეყანა. ამას როგორ მოითხოვს ევროკავშირი, რომ საკუთარი ხელით მინიმუმ 10% შევამციროთ საკუთარი ეკონომიკა. ამას ითხოვს ევროკავშირი? რა თქმა უნდა, ამას არ ითხოვს. შეიძლება ვიღაცეების მიზანია, რომ ჩვენი ქვეყნის ეკონომიკა მინიმუმ 10%-ით შემცირდეს ეკონომიკა, მაგრამ ევროკავშირი ამას ვერ მოითხოვს. რაც შეეხება სანქციების გვერდის ავლას, თუ ეს არის შინაარსი, რა თქმა უნა, არც აქამდე არ გამოიყენეობდა ჩვენი ქვეყნის ტერიტორია ჩვენი ქვეყნის გვერდის ავლისთვის და არც მომავალში იქნება გამოყენებული. ჩვენ კონსულტაციებს უკვე ვიწყებთ ამ თემებთან დაკავშირებით. გვაქვს კიდევ ერთი საპარალმენტო სესია, საკმაოდ დიდი დროა, 5 თვეა, რომ გავაგრძელოთ მუშაობა ყველა თემაზე, რასთან დაკავშირებითაც გაიმართება კონსულტაციები ევროკომისიის წარმომადგენლებთან, შეაბამისად, დრო არის საკმარისი და გაგრძელდება ბუნებრივია მუშაობა“, – განაცხადა კობახიძემ.

დავით სერგეენკო მეათე მოწვევის პარლამენტს ტოვებს.

როგორც საქართველოს პირველ არხს საპროცედურო საკითხთა კომიტეტში განუცხადეს, მანდატის დატოვების თაობაზე დავით სერგეენკოს განცხადება კომიტეტში უკვე შევიდა.

მათი ინფორმაციით, დავით სერგეენკოს მიმართვის განხილვა 16 ნოემბრის კომიტეტის სხდომაზე მოხდება, რის შემდეგაც ამავე დღეს საკითხი პლენარულ სხდომაზე გავა და მას უფლებამოსილება შეუწყდება.

დავით სერგეენკო მეათე მოწვევის პარლამენტში ვიცე-სპიკერის თანამდებობას იკავებდა.

საქართველოს პრეზიდენტის ადმინისტრაციის უფროსი ნათია სულავა დღეს საქართველოში ჩინეთის სახალხო რესპუბლიკის საგანგებო და სრულუფლებიან ელჩს, ჭოუ ციენს შეხვდა.

ორბელიანების სასახლეში გამართულ შეხვედრაზე, პრეზიდენტის ადმინისტრაციის უფროსმა განაცხადა, რომ ტელეკომპანია LCI-ისთვის მიცემულ ინტერვიუში, საქართველოს პრეზიდენტის, სალომე ზურაბიშვილის პასუხში არანაირი ფორმით არ ყოფილა მინიშნება საქართველო-ჩინეთის ურთიერთობებზე ან კონკრეტულად, ჩინეთის სახალხო რესპუბლიკის პრეზიდენტზე.

მისივე თქმით, მთლიანი ინტერვიუ მიმართული იყო საქართველო-ევროკავშირის ურთიერთობებზე, საქართველოზე და რუსეთზე. შესაბამისად, პრეზიდენტის პასუხი შეეხებოდა მხოლოდ იმ ქვეყნის პრეზიდენტს, რომელსაც ოკუპირებული აქვს საქართველოს ტერიტორიები.

ვულოცავ ჩვენს ქვეყანას კიდევ ერთ მნიშვნელოვან წარმატებას. ევროკავშირმა, პრაქტიკულად, მწვანე შუქი აუნთო საქართველოს კანდიდატი სტატუსის მისაღებად. მინდა, მადლობა გადავუხადოთ ჩვენს თანამოქალაქეებს, საზოგადოებას, საჯარო მოხელეებს, ვინც ამ წლების განმავლობაში მტკიცედ გვიჭერდა მხარს რეფორმებში და იმ პოლიტიკაში, რომელიც ჩვენმა ხელისუფლებამ გაატარა, – ამის შესახებ პარლამენტის თავმჯდომარის მოადგილე არჩილ თალაკვაძემ პლენარულ სხდომაზე განაცხადა.

როგორც მან აღნიშნა, სწორედ „ქართული ოცნების“ ხელისუფლების მიერ გატარებულმა ამ პოლიტიკამ დააბრუნა საქართველოში ევროპული პერსპექტივა და ამ პოლიტიკის შედეგია, რომ ფუნდამენტური მიმართულებებით საქართველოს აქვს არსებით პროგრესი.

„ეს არის მშვიდობა და უსაფრთხოება მაშინ, როდესაც ჩვენს ნომერ პირველ ამოცანად რჩება ტერიტორიული მთლიანობის აღდგენა და დეოკუპაცია, ეს არის დემოკრატიის გაძლიერება ქვეყანაში, ადამიანის უფლებების დაცვა, უფრო ძლიერი და გაზრდილ ეკონომიკა და ევროინტეგრაციის მიმართულებით არსებითი პროგრესი, ასოცირების ხელშეკრულება, უვიზო მიმოსვლა, თავისუფალი ვაჭრობა, ევროპული პერსპექტივა და ახლა უკვე კანდიდატის სტატუსი. ეს შედეგები ადასტურებს, რომ საქართველო სწორი მიმართულებით ვითარდება და დღეს ჩვენი ქვეყანა არის უფრო ევროპული, უფრო თავისუფალი, უფრო ძლიერი და წარმატებული სახელმწიფო, ვიდრე იყო ათი წლის წინ. სწორედ ეს შედეგები ადასტურებს, რომ ჩვენმა ხელისუფლებამ სწორი პოლიტიკა გაატარა“, – განაცხადა არჩილ თალაკვაძემ.

გთავაზობთ, რომ შეიქმნას თუნდაც მცირე ჯგუფი, რომელიც ჩამოაყალიბებს კონკრეტულ სამოქმედო გეგმას არჩევნების ნორმალურად, სამართლიანად ჩატარებასთან დაკავშირებით და დაწესდეს ამაზე მონიტორინგი არა მხოლოდ საპარლამენტო ძალები მხრიდან, – ამის შესახებ დეპუტატმა არმაზ ახვლედიანმა პარლამენტის პლენარულ სხდომაზე განაცხადა.

მისი თქმით, სტატუსის მინიჭებასთან დაკავშირებით პოზიტიური რეკომენდაციის გაცემის შემდეგ ყველაზე კარგი დროა უმრავლესობისა და ოპოზიციის თანამშრომლობისთვის.

„სწორედ მმართველმა ძალამ უნდა გადადგას პირველი ნაბიჯები. მიუხედავად იმისა, რამდენად მიუღებელია მისთვის ოპოზიცია, ან მისი ცალკეული ნაწილები, უნდა მოახერხოს და სახელმწიფოებრივი ინტერესებიდან და ამოცანებიდან გამომდინარე დაიწყოს კონკრეტული გეგმის რეალიზება, რომელიც მიგვიყვანს სამართლიან არჩევნებამდე. არაერთი თამაზ გინტური ჰყოლია საქართველოს და რეალურად, საუკუნეების თუ ათწლეულების მანძილზე მიზეზი ესაა ჩვენი ევროპული არჩევანისა და აგრეთვე იმის, რომ ჩვენკენ იმზირება დასავლეთი. მაგრამ დღეს, ჩვენ წარსულის დამსახურებების გამო არავინ არ გაგვიღებს ამ კარს თუ არ აღდგა ნდობა საზოგადოებას და ხელისუფლებას შორის, ყველაფერი წყალში ჩაიყრება“, – განაცხადა არმაზ ახვლედიანმა.