ანაკლიის ღრმაწყლოვანი პორტის ბედი, თქვენი ხელისუფლების პირობებში როგორი იქნება, არ ვიცით. არ ვიცით, იმიტომ, რომ 11 წლის განმავლობაში, თქვენ არათუ არაფერი ააშენეთ ანაკლიაში, ისიც ვერ შეძელით, რომ, რაც დაგიტოვეთ, ის შეგენარჩუნებინათ და იმისთვის მოგევლოთ, – ამის შესახებ „ნაციონალური მოძრაობის“ დეპუტატმა პლენარულ სხდომაზე განაცხადა, სადაც ეკონომიკის მინისტრს, ლევან დავითაშვილს, ინტერპელაციის წესით, ანაკლიის პორტთან დაკავშირებით უსმენენ.

მისივე თქმით, ანაკლიის გაპარტახებაზე, მიტოვებულ შენობებსა და განადგურებულ ინფრასტრუქტურაზე პასუხისმგებლობა „ქართულ ოცნებას“ მაშინ დაეკისრება, როცა ხელისუფლებაში არ იქნება.

„ბატონო მინისტრო, თქვენ და ზუგდიდის მაჟორიტარ დეპუტატსაც იგივე მინდა ვკითხო – ბოლოს ანაკლიაში როდის იყავით? ქვიშის გორები ნანახი გაქვთ? ნანახი გაქვთ, რა თქმა უნდა, ეს ქვიშის გორები, უბრალოდ არ იმჩნევთ. არ იმჩნევთ იმას, რომ უკვე ორი წელია ანაკლიელები იხრჩობიან ამ ქვიშის გორებში და თქვენ რომ „მინისტრის საათის“ ფორმატში აქ იყავით, ანაკლიელების თხოვნა გადმოგეცით, მაგრამ პრობლემა არის იგივე. ნიავზეც კი შეუძლებელია ანაკლიაში ადამიანმა ისუნთქოს და ეკოლოგიური კატასტროფის წინაშე დგას მთელი ანაკლია. სანამ თქვენ აქ ყველა ერთად გადაფარებული ხართ რუსეთის ჯაშუშს, ფარცხალაძეს, ანაკლიელები იწამლებიან. პრინციპში, ანაკლიელები რომ არ გაინტერესებთ და არც საქართველოს მოქალაქეები გაინტერესებთ, ეს არახალია. განსაკუთრებით ბოლო დროს განვითარებულმა მოვლენებმა ეს ძალიან კარგად აჩვენა, როდესაც სისტემა გადაეფარა რუსეთის ჯაშუშს, ფარცხალაძეს, რომელიც უშუალოდ მონაწილეობდა იმაში, რომ დღემდე ანაკლიის პორტი არ აშენდა. ირაკლი ჩიქოვანი ასაკით ჩემზე დიდია და წესით, უნდა ახსოვდეს ძალიან კარგად, როგორი იყო ანაკლია და როგორი წარმოუდგენელი იყო ანაკლიაში რაიმე გაკეთებულიყო. კონფორმისტი რომ არ იყოს ირაკლი ჩიქოვანი, ობიექტურობისთვის აუცილებლად აღნიშნავდა, რომ რომ არა საქართველოს მესამე პრეზიდენტი, რომელიც რუსეთის დავალებით ციხეში გიზით, ანაკლია უბრალოდ არ იქნებოდა. მაინტერესებს, სასტუმრო „ოქროს საწმისი“, რომელიც დაგიტოვეთ ანაკლიაში, ფუნქციონირებადი, რატომ არის მიტოვებული, რატომაა ბალახები ამოსული, რატომაა დაკეტილი? „ოქროს საწმისის“ გვერდით მშენებარე სასტუმრო, რომელიც დაგიტოვათ წინა ხელისუფლებამ და დასასრულებელი თანხაც დაგიტოვათ, რატომაა ეს სასტუმრო მიტოვებული? ანაკლიის სანაპიროზე როდის იყავით ბოლოს, როდის ჩაატარეთ ნაპირსამაგრი სამუშაოები და გაქვთ თუ არა ინფორმაცია, რომ ფაქტობრივად, ნახევარი სანაპირო წელს ზღვამ წაიღო?!

ზღვაში რომ დგას იაპონური რესტორანი გახსნილი დაგიტოვეთ, ფუნქციონირებდა, ახლა რატომ არის შიგნით ნაგავი, რატომ არის მთელი ანაკლია გაპარტახებული და მიტოვებული? წარმოუდგენელია იმას ხედავდეთ, რაც ანაკლიაში ხდება და გული არ შეგტკიოდეთ. ანაკლიელები ანაკლიიდან გარბიან და კარგად იცით თქვენც. გარბიან იმიტომ, რომ არაა სამუშაო ადგილები არც რეგიონში და არც ქვეყანაში. და ანაკლიის ღრმაწყლოვან პორტს გარდა იმისა, რომ დიდი რეგიონალური და გეოპოლიტიკური მნიშვნელობა აქვს, სამეგრელოსთვის განსაკუთრებული მნიშვნელობა ჰქონდა. ეს უნდა ყოფილიყო ათასობით სამუშაო ადგილი. არ მიკვირს, რომ დააანონსეთ ანაკლიის პორტი ვითომ აშენდებაო, 2016 წლიდან იმდენი განცხადება მოვისმინეთ ანაკლიის პორტის აშენებაზე, რომ არ გამიკვირდება კიდევ ბევრჯერ დააანონსოთ. მაგრამ გეტყვით რა იქნება, რაც არაერთხელ გვინახავს, მათ შორის ანაკლიელებს. ორ ტრაქტორს დააყენებთ, ორდღიან სამუშაოებს ჩაატარებთ, საარჩევნოდ ეცდებით, რომ მოატყუოთ საქართველოს მოქალაქეები. ამ ორი ტრაქტორის შემდეგ ანაკლიის ღრმაწყლოვანი პორტის ბედი, თქვენი ხელისუფლების პირობებში როგორი იქნება, არ ვიცით. არ ვიცით, იმიტომ, რომ 11 წლის განმავლობაში, თქვენ არათუ არაფერი ააშენეთ ანაკლიაში, ისიც ვერ შეძელით, რომ, რაც დაგიტოვეთ, ის შეგენარჩუნებინათ და იმისთვის მოგევლოთ. ამიტომაც აქციეთ ანაკლია მიტოვებულ და გაპარტახებულ ქალაქად, სადაც უბრალოდ რომ შეხვიდეთ, ნორმალურ ადამიანს, გული მოუკვდება“, – განაცხადა წითლიძემ.

მისივე თქმით, არავის სჯერა, რომ ანაკლიის პორტი „ქართული ოცნების“ ხელისუფლების პირობებში აშენდება.

„აქ იკითხეს, როდის შემოვა ანაკლიაში პირველი გემიო და როდის დასრულდება ან დაიწყება ანაკლიის პორტის მშენებლობაო – არ ვიცი კიდევ ვინმე თუ დარჩა, რომელსაც სჯერა, რომ თქვენი, რუსული ხელისუფლების პირობებში შეიძლება ანაკლიის პორტი აშენდეს. იმიტომ, რომ ანაკლიის პორტს არამხოლოდ ეკონომიკური მნიშვნელობა აქვს, არამედ არის მნიშვნელოვანი გეოპოლიტიკურადაც, განსაკუთრებით უკრაინაში რუსეთის სამხედრო აგრესიის შემდეგ. თქვენ ვინ გკითხავთ, ბატონო მინისტრო, ანაკლიის პორტი აშენდება თუ არა ან ირაკლი ჩიქოვანს ვინ კითხავს. ანაკლიის პორტთან დაკავშირებით ბიძინა ივანიშვილმა ძალიან მკაფიოდ თქვა და თქვენ რასაც აკეთებთ 11 წელია ანაკლიის პორტთან დაკავშირებით, არის ის, რომ მხოლოდ ასრულებთ მის ბრძანებას, მაგრამ ანაკლიის პორტი აუცილებლად აშენება, ანაკლიელები აუცილებლად აბრუნდებიან ანაკლიაში და საქართველოს მოქალაქეები აუცილებლად დაბრუნდებიან ამ ქვეყანაში! მანამდე თქვენც უნდა იცოდეთ, რომ ხართ პასუხისმგებელი იმაზე, რომ ანაკლია და ანაკლიის პორტი 11 წელია ამ მდგომარეობაშია, რა მდგომარეობაშიც ახლაა. ანაკლიის გაპარტახებაზე, მიტოვებულ შენობებსა და განადგურებულ ინფრასტრუქტურაზე პასუხისმგებლობა, როცა ხელისუფლებაზე არ იქნებით, აუცილებლად დაგეკისრებათ ყველას“, – განაცხადა წითლიძემ.

ოპოზიცია პრეზიდენტს ეუბნებოდა, რომ ეროვნული ბანკის საბჭოს წევრობიდან პარლამენტში წარდგენილი კანდიდატები უკან გაეწვია, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

მისივე თქმით, ასე რომ ვერ მოხდა, შემდეგ შტურმი სწორედ ამ კანდიდატებზე მიიტანეს.

„პრეზიდენტს არაფერს ეკითხებიან. ეს კანდიდატები თუ არ უნდოდათ, პრეზიდენტმა რატომ წარმოადგინა? რატომ არ ეკითხებიან? იმიტომ, რომ, სამწუხაროდ, პრეზიდენტი გადაბარგდა ოპოზიციის ბანაკში. მამუკა ხაზარაძემ პირდაპირ თქვა, სალომე ზურაბიშვილი ჩვენს ბანაკშიაო. სამწუხაროდ, პრეზიდენტსა და ოპოზიციას განვიხილავთ ერთ ბანაკში, რომელიც საქართველოს სახელმწიფოს წინააღმდეგ იბრძვის“, – განაცხადა მაჭარაშვილმა.

ტრაგედიით სარგებლობა ყველაზე დიდი ამორალური რამ არის, რაც კი შეიძლება, ადამიანმა მოიფიქრო და ამას ახერხებენ რადიკალური ოპოზიციის წარმომადგენლები, – ამის შესახებ ფრაქცია „ქართული ოცნების“ თავმჯდომარე მამუკა მდინარაძემ შოვის ტრაგედიასთან დაკავშირებით დასმულ კითხვაზე პასუხად განაცხადა.

„მე არ მიადვილდება ამ თემაზე საუბარი, მაგრამ როდესაც მათ ინფორმაციაც აქვთ და ალბათ დღეს კიდევ ერთხელ მოისმენენ ამ ინფორმაციას, რა მდგომარეობაში ამოჰყავდათ მაშველებს გარდაცვლილი ადამიანები, რამდენად მყისიერი იყო თუ არა ადამიანების გარდაცვალება იმ უდიდესი ტრაგედიის დროს, ამის შემდეგ რომ კიდევ საუბარს აგრძელებენ, ამაზე დიდი ამორალურობის წარმოდგენა შეუძლებელია“, – განაცხადა მდინარაძემ.

მდინარაძის თქმით, პარლამენტის სხდომათა დარბაზში ოპოზიციის წარმომადგენლებს „რაღაც ფუსფუსი აქვთ და რაღაცისთვის ემზადებიან“.

„ახლა ლევან დავითაშვილს პრაქტიკულად არ უსმენს ოპოზიცია. რამდენიმე ადამიანია დარბაზში და რაღაც გეგმებს ალაგებენ. იქვე იგრძნობა, ისე გოიმურად აკეთებენ ამ ყველაფერს, რომ რაღაც მითითებებს აძლევენ ერთმანეთს, დიდი ფუსფუსი აქვთ გაჩაღებული. როგორც ჩანს, რაღაცას მოაწყობენ, მაგრამ ეს არ ვიცი. რაღაც ფუსფუსი აქვთ და რაღაცისთვის ემზადებიან, ისე გოიმურად და ისე რაღაცნაირად, არ ვიცი, რა დავარქვა. არ აინტერესებს ამ ხალხს არცერთი თემა. ანაკლიაზე ვლაპარაკობთ და რომან გოცირიძე ლაპარაკობს, იქ ნატო-ს წყალქვეშა ნავები უნდა განვათავსოთო. არასერიოზული ხალხია, მაგრამ ამ ყველაფერსაც თავი რომ დავანებოთ, კიდევ ერთხელ გავიმეორებ, მეათედი ინფორმაციაც რომ გქონდეს, რაც მოხდა შოვში და შემდეგ ამასთან დაკავშირებით რაღაც პოლიტიკურ დღის წესრიგს აგებ, ამაზე დიდი ამორალურობა არ არსებობს. ეს სპექტაკლი, რაც მათ დღეს უნდა მოაწყონ, ამ ამორალურობის ხარისხის პიკს აღწევს, რომ ამასთან დაკავშირებითაც კი შეუძლიათ, თავისი პოლიტიკური დივიდენდებისთვის იზრუნონ“, – განაცხადა მდინარაძემ.

საქართველოს ხელისუფლებამ დაარღვია სანქცია – ერთი ძალიან დიდი იაღლიში მოუვიდათ, რაც ფარცხალაძემ ვერ გათვალა, – ამის შესახებ ოპოზიციონერმა დეპუტატმა რომან გოცირიძემ ჟურნალისტებთან განაცხადა.

მისი თქმით, ეროვნულო ბანკის ბრძანება სანქციის მხოლოდ საფინანსო ნაწილს ეხება, თუმცა, სანქციები მოიცავს ასევე ქონებრივ ნაწილსაც, სადაც პირის მიმართ განსხვავებულ მიდგომას კანონმდებლობა არ ითვალისწინებს.

„საქართველოს ხელისუფლებამ დაარღვია სანქცია, დიდი იურისტები და ექსპერტები რომ ჰგონიათ თავი, ვერ გაითვალისწინეს ის, რომ ამერიკული სანქციები ორ მხარეს მოიცავს, ერთია საფინანსო, მეორე ქონებრივი. ეროვნული ბანკის ამოცანა იყო გაეყინა ფარცხალაძის ანგარიშები. ეს გააკეთა, შემდეგ იმავე დღეს გადაწყვეტილება შეცვალა. „ქართულ ოცნებას“ ჰგონია, ბრძანება რომ საქართველოს მოქალაქეს სანქცია არ უნდა შეეხოს თუ ბრალი არ დამტკიცდება, სანქციის მეორე მხარეზეც ვრცელდება. ნურას უკაცრავად, სანქციის მეორე მხარე ითვალისწინებს ქონების, ყველა სახის აქტივის, წილების, აქციების დაყადაღებას და ერთი ძალიან დიდი იაღლიში მოუვიდათ, ეს თავად ფარცხალაძემ ვერ გათვალა, როცა თავის შვილს გარდა ქონებისა, ერთ – ერთი კომპანიის 100 პროცენტიანი წილი. ამერიკული სანქცია ითვალისწინებს, რომ თუ კომპანიაში 50 პროცენტზე მეტი წილი აქვს, ამ კომპანიის ანგარიშები უნდა დაყადაღდეს, ასევე ქონება და აქციები. ეროვნული ბანკის განცხადება ამას აბსოლუტურად არ ეხება, კანონმდებლობა არ ითვალისწინებს ამ ნაწილში პირის მიმართ განსხვავებულ მიდგომას, ამიტომ დღეს ამ მდგომარეობაში ფარცხალაძის ქონებრივ ნაწილში საქართველოს ხელისუფლებამ დაარღვია სანქციები და ამაზე, ალბათ, რეაგირება ექნებათ,”- განაცხადა გოცირიძემ.

ის ასევე გამოეხმაურა ეროვნულ ბანკში თეიმურაზ ხომერიკისა და ნანა ყეინიშვილის დანიშვნას და აღნიშნა, რომ ყველა პირი, მათ შორის ნათია თურნავა, რომელმაც „ეროვნულ ბანკში კლანური გადატრიალება მოახდინა“, სალომე ზურაბიშვილის წარდგენილია.

„სალომე ზურაბიშვილი არ არის კომპეტენტური იმ ადგილებზე საკუთარი წარმომადგენლობის დანიშვნაში, რომელიც მისი კონსტიტუციური უფლებაა. მან ბევრჯერ წარმოადგინა ეროვნული ბანკის საბჭოს წევრობის კანდიდატად საკმაოდ საეჭვო კვალიფიკაციის მქონე ადამიანები, ყველა პიროვნება, ვინც კი დღეს მოახდინა კლანური გადატრიალება ეროვნულ ბანკში, არის სალომე ზურაბიშვილის წარდგენილი, ნათია თურნავაც და ყველა ის ადამიანიც, ვინც ეროვნულო ბანკის საბჭოშია და სალომე ზურაბიშვილი დაემორჩილა ივანიშვილისა და მთავრობის ზეწოლას. ახლა გაიბრძოლა და წარმოადგინა კანდიდატები, მათგან ერთი (ნანა ყეინიშვილი) ოდიოზურზე ოდიოზური, რადგან მისი კვალიფიკაცია არ შეესაბამება საბჭოს წევრს, მევენახე-მებოსტნეობის სპეციალისტია, მეორეს (თენგიზ ხომერიკს) კვალიფიკაცია არ დაეწუნება, ჩემთან მუშაობდა საბიუჯეტო ოფისის უფროსი როცა ვიყავი, თუმცა, მედიით როგორც გავიგეთ სახელისუფლებო კლანთან და კობახიძეს ახლოსაა. როგორც იტყვიან, სალომე ზურაბიშვილს „ჩაუდეს“ სახელისუფლო კანდიდატი. მან გვიან გააცნობიერა, რომ შეცდომა დაუშვა, მოითხოვა გამოწვევა და ისიც არ იცის, რომ კანდიდატების გამოწვევა არ ხდება”,- განაცხადა გოცირიძემ.

პარლამენტის ადამიანის უფლებათა დაცვის კომიტეტის თავმჯდომარის, მიხეილ სარჯველაძის განცხადებით, ოპოზიციას შოვის სტიქიასთან დაკავშირებით ჭეშმარიტების დადგენის მიზანი არ ამოძრავებს.

სარჯველაძის თქმით, მათი მიზანია, „ისტორიები შეთხზან“, რასაც უსაფუძვლო ბრალდებების მიზეზად გამოიყენებენ.

„„ნაციონალური მოძრაობის“ მცდელობა მიმართულია, რომ შოვის დიდი ტრაგედია რაღაც ფორმით საკუთარი პარტიული მიზნებისთვის გამოიყენონ, ხელისუფლება დააზიანონ და რაღაც უპირატესობა მოიპოვონ. ყველა კარგად ხვდება, რომ არავითარი მიზეზი არ არსებობს და მხოლოდ ჭარბი ემოციებით ხდება იმის გადაფარვა, რა მანკიერი ზრახვებიც ამოძრავებთ. ინსინუაციები იყო ჯერ ვერტმფრენებზე, შემდეგ არანორმალური ბრალდებები კალაძის ოჯახზე. არავის უნდა ჰქონდეს მოლოდინი, რომ ოპოზიციას ჭეშმარიტების დადგენის მიზანი ამოძრავებს. მათი ერთადერთი მიზანია, ისტორიები შეთხზან, რასაც ახალი უსაფუძვლო ბრალდებების მიზეზად გამოიყენებენ“, – განაცხადა მიხეილ სარჯველაძემ.

შოვის სტიქიასთან დაკავშირებით დღეს, 22 სექტემბერს ვახტანგ გომელაურს ინტერპელაციის ფორმატში პარლამენტში მოუსმენენ.