ვერ გავიგე, ქალბატონო სალომე, რა ნაწილში იწუნებთ ჩემ სისხარტეს და რა ნაწილში ადარებთ იმ წლებს, როდესაც მე ბრიუსელში ვმუშაობდი, – ასე მიმართა შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა „ლელოს“ წევრს, სალომე სამადაშვილს, რომელმაც მინისტრთან დაკავშირებით თქვა, რომ გაუგებარია, რა შედეგებს დებს და რას ცვლის მინისტრის საქმიანობა შერიგებისა და სამოქალაქო თანასწორობის საკითხებში.

თეა ახვლედიანმა საპასუხოდ აღნიშნა, რომ სალომე სამადაშვილი ინფორმაციის სიმწირეს განიცდის.

„თქვენ თვითონ ბრძანეთ, რომ ვერ გაიგეთ და ამიტომ, ვფიქრობ, რომ აქ საქმე გვაქვს ექსპერტიზის ნაკლებობასთან, ასევე კომპეტენციასთან ნაწილობრივ, სავარაუდოდ, ასევე იმასთან, რომ თქვენ სრულყოფილად სავარაუდოდ, საერთოდ არ ბრძანდებით ჩართული ამ პოლიტიკის არსში იმიტომ, რომ ინფორმაციის სიმწირეს განიცდით, როდესაც ის არის ფართოდ ხელმისაწვდომი. ასევე, ყველა კარი არის ღია იმისათვის, რომ თქვენ დააზუსტოთ კითხვები. ქალბატონო სალომე, თქვენ გაქვთ გაჟღერებული ინფორმაციის მიმღებლობის ნაკლებობა, ეს არის ცოტა სხვა პრობლემა იმიტომ, რომ მე აქ რამდენჯერმე რომ ვილაპარაკო, თქვენ მაინც ბრძანებთ, რომ ვერ მოისმინეთ, ვერ გაიგეთ და მე აქ, ვერ გიშველით“, – განაცხადა ახვლედიანმა პარლამენტში „მინისტრის საათის“ ფორმატში ყოფნისას.

მომზადდა და ყველა საინფორმაციო-საკომუნიკაციო მექანიზმის გამოყენებით ინტენსიურად მიმდინარეობს ფართომასშტაბიანი და მრავალკომპონენტიანი კამპანია სახელწოდებით „ქართული ენა გვაერთიანებს“, – ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა, თეა ახვლედიანმა განაცხადა პარლამენტში, სადაც „მინისტრის საათის“ ფორმატში იმყოფება.

სახელმწიფო მინისტრის თქმით, გასული წელი მნიშვნელოვანი იყო, პოლიტიკის ფარგლებში დასახული ამოცანების გადასაჭრელად, სახელმწიფო სტრატეგიის შემდგომი ორწლიანი ციკლის კომპლექსური დაგეგმვის თვალსაზრისით.

„მოგახსენებთ, სამოქალაქო თანასწორობისა და ინტეგრაციის სახელმწიფო პოლიტიკის თაობაზე, რომელიც მიზნად ისახავს საქართველოს ყველა მოქალაქისთვის, განურჩევლად ეთნიკური წარმომავლობისა, განვითარების და საზოგადოებრივი ცხოვრების ყველა სფეროში სრულფასოვანი მონაწილეობისთვის თანაბარუფლებიანი გარემოს და შესაძლებლობების უზრუნველყოფას.

პირველ რიგში, აღსანიშნავია, რომ გასული წელი მნიშვნელოვანი იყო, პოლიტიკის ფარგლებში დასახული ამოცანების გადასაჭრელად, სახელმწიფო სტრატეგიის შემდგომი ორწლიანი ციკლის კომპლექსური დაგეგმვის თვალსაზრისით. 2023-24 წლების სამოქმედო გეგმით 200-მდე აქტივობა განისაზღვრა, რომლის შემუშავების ღია და ინკლუზიური პროცესი დადგენილი სტანდარტების შესაბამისად წარიმართა; მათ შორის, უზრუნველყოფილი იყო ეთნიკური უმცირესობების წარმომადგენლების მონაწილეობა, ისევე, როგორც სახელმწიფო მინისტრის აპარატის ოფიციალურ ვებგვერდზე განთავსებული გეგმის პროექტთან დაკავშირებით, ყველა დაინტერესებული პირის მხრიდან მოსაზრების გამოხატვისა და წვლილის შეტანის შესაძლებლობა. ამასთან, გათვალისწინებულ იქნა წინა, 2021-2022 წწ. სამოქმედო გეგმის შესრულების ყოვლისმომცველი შეფასების შედეგები და გამოცდილება, ასევე, საერთაშორისო მექანიზმების ფარგლებში მიღებული რეკომენდაციები.

გასული წელი გამოირჩეოდა საერთაშორისო ანგარიშვალდებულების მიმართულებითაც იმ თვალსაზრისით, რომ ევროპის საბჭოს „ეროვნულ უმცირესობათა დაცვის ჩარჩო კონვენციის“ მონიტორინგის ფარგლებში, საქართველოში განხორციელდა მრჩეველთა კომიტეტის დამოუკიდებელ ექსპერტთა დელეგაციის ვიზიტი, რომელიც ხუთ წელიწადში ერთხელ იმართება, დაინტერესებული მხარეების ჩართულობაზე დაფუძნებული ანგარიშის მომზადების მიზნით“, – განაცხადა ახვლედიანმა.

მისივე თქმით, ეთნიკურად და კულტურულად მრავალფეროვანი საზოგადოების სრულფასოვანი ინტეგრაციის ფუნდამენტს სწორედ სახელმწიფო ენის ცოდნა წარმოადგენს.

„პოლიტიკის ხუთი ურთიერთდაკავშირებული სტრატეგიული მიმართულების ფარგლებში მიღწეული შედეგების მიმოხილვას სახელმწიფო ენის პრიორიტეტით დავიწყებ, რამდენადაც, ჩვენი ეთნიკურად და კულტურულად მრავალფეროვანი საზოგადოების სრულფასოვანი ინტეგრაციის ფუნდამენტს სწორედ სახელმწიფო ენის ცოდნა წარმოადგენს. ამ მიმართულებით დღემდე არსებული გამოწვევების საპასუხოდ დაგეგმილი აქტივობების შესაბამისად, ქართული ენის სწავლების, ასევე, ხარისხიან განათლებაზე ხელმისაწვდომობის გაუმჯობესების მიზნით, განათლებისა და მეცნიერების სამინისტროსთან მჭიდრო თანამშრომლობით გატარებული ღონისძიებების შედეგად:

• მნიშვნელოვნად გაიზარდა სახელმწიფო ენის შესწავლის შესაძლებლობები სკოლამდელი და სასკოლო განათლების დონეზე: ეტაპობრივად გაფართოვდა ორენოვანი განათლების მოდელის გეოგრაფიული არეალი; ბილინგვური პროგრამა დღეს უკვე 36 საბავშვო ბაღსა და 170-მდე სკოლაში ხორციელდება და მომავალი წლის ბოლომდე, ყველა არაქართულენოვან ბაღსა და სკოლაში დაინერგება.
• ქართული ენის სწავლების და ხარისხიანი განათლების შესაძლებლობების განვითარების უზრუნველსაყოფად, წელს სხვადასხვა საგნის 4000-ზე მეტი ადგილობრივი პედაგოგი ჩაერთო სხვადასხვა პროფესიული გადამზადებისა და ქართული ენის შემსწავლელ პროგრამებში. ამასთან, ადგილზე კვალიფიციური პედაგოგიური კადრების დეფიციტის დასაძლევად, რეგიონებში მივლინებულ იქნა 146 ქართული ენის კონსულტანტ-მასწავლებელი.
• სახელმწიფო ენის სწავლების ძალისხმევასათან ერთად, ეთნიკური უმცირესობების მშობლიურ ენაზე განათლების უფლება რეალიზებულია როგორც სკოლამდელ დაწესებულებებში, ასევე ყველა არაქართულენოვან სკოლასა და სექტორზე. ამავდროულად, ადგილობრივი თემის მოთხოვნის საფუძველზე, მცირერიცხოვანი ეთნიკური ჯგუფების – ოსური, ასურული, ჩეჩნური, უდიური, ხუნძური ენების სწავლება 12 სკოლაში მიმდინარეობს.
• საქართველოს პრემიერ-მინისტრის ინიციატივის ფარგლებში, აქტიურად გრძელდება საგანმანათლებლო ინფრასტრუქტურის გაუმჯობესების მასშტაბური პროექტი. ქვემო ქართლის, სამცხე-ჯავახეთისა და კახეთის რეგიონებში წელს დასრულებული, მიმდინარე და დაგეგმილი პროექტების ფარგლებში, განხორციელდა არაქართულენოვანი 20 სკოლისა და 21 საბავშვო ბაღის საპროექტო-სამშენებლო-სარეაბილიტაციო სამუშაოები. პროექტი მომავალ წლებშიც გაგრძელდება, რაც გარდამტეხ როლს შეასრულებს ეთნიკური უმცირესობების განათლებაზე ხელმისაწვდომობის გაუმჯობესების კუთხით.
• პროფესიული განათლების ხელმისაწვდომობა, მათ შორის, ეთნიკური უმცირესობების შემდგომი დასაქმების თვალსაზრისით ერთ-ერთი პრიორიტეტული საკითხია. არაქართულენოვანი ახალგაზრდების საჭიროებების საპასუხოდ, სახელმწიფო ენის ინტეგრირებული კურსის დანერგვამ, ამ მიმართულებით ცალსახად გაზარდა მოტივაცია და წელს, ქართული ენის კურსში უკვე 289 სტუდენტი ჩაერთო. დამატებით, სხვადასხვა პროფესიის სპეციფიკის გაცნობის და ადგილზე დაუფლების შესაძლებლობას ზრდის პროფესიული უნარების საორიენტაციო და სასერთიფიკაციო კურსები, რომელიც 49 არაქართულენოვან სკოლაშია დანერგილი.
• უმაღლეს განათლებაზე გამარტივებული ხელმისაწვდომობის უზრუნველყოფის მიზნით მოქმედ „1+4 პროგრამაში“ წელს 1500-ზე მეტი სტუდენტი ჩაერთო. ბოლო წლებში გამოვლენილი მზარდი ინტერესისა და არსებული საჭიროებების გათვალისწინებით, პროგრამის შემდგომი განვითარების მიზნით 2024 წელს დაგეგმილი შეფასებისთვის მიმდინარეობს მეთოდოლოგიისა და კვლევის ინსტრუმენტების შემუშავება.
• ზრდასრული მოქალაქეების მხრიდან სახელმწიფო ენის შესწავლის მოთხოვნის საპასუხოდ, ზურაბ ჟვანიას სახელობის სახელმწიფო ადმინისტრირების სკოლის ძალისხმევა მიმართულია არსებული პროგრამების გაუმჯობესებაზე. 12 სასწავლო ცენტრში, ასევე, დისტანციური სწავლებისა და საცხოვრებელ ადგილზე 200-ზე მეტი მობილური ჯგუფის საშუალებით, ქართული ენის ცოდნის დონე 5500-მდე ბენეფიციარმა, მათ შორის საჯარო მოხელეებმა გაიუმჯობესეს.
• ქართული ენის პოპულარიზაციის, შესწავლის მოტივაციის გაზრდისა და არსებულ მრავალფეროვან შესაძლებლობებზე მოსახლეობის ინფორმირების მიზნით მომზადდა და ყველა საინფორმაციო-საკომუნიკაციო მექანიზმის გამოყენებით ინტენსიურად მიმდინარეობს ფართომასშტაბიანი და მრავალკომპონენტიანი კამპანია, სახელწოდებით – „ქართული ენა გვაერთიანებს“, – განაცხადა ახვლედიანმა

როგორც სახელმწიფო მინისტრმა აღნიშნა, ბოლო წლებში, ზემოაღნიშნული კომპლექსური და მრავალმხრივი ძალისხმევის, მათ შორის საშეღავათო პროგრამების განხორციელების შედეგებმა მნიშვნელოვნად გაზარდა ქართული ენის აქტუალობა ფაქტობრივად ყველა არაქართულენოვან დასახლებაში.

„განსაკუთრებით თვალსაჩინოა მოსწავლეებსა და ახალგაზრდებში ქართული ენის შესწავლის მზარდი ინტერესი და მოტივაცია, რაც იმ ათასობით ორენოვანი ახალგაზრდის წარმატებას უკავშირდება, რომლებსაც, სახელმწიფო ენის შესწავლის შესაძლებლობებმა პიროვნული რეალიზების, საზოგადოებრივი ცხოვრების სხვადასხვა სფეროში ჩართვისა და დასაქმების პერსპექტივები გაუფართოვა. არსებული საჭიროებების გათვალისწინებით, ჩვენ უწყვეტად გავაგრძელებთ კოორდინირებულ საქმიანობას, ბევრად მასშტაბური შედეგების მისაღწევად“, – განაცხადა ახვლედიანმა.

იზიარებთ ღარიბაშვილის პროპაგანდისტული ყალბი რუსული მშვიდობის იდეას და მშვიდობად აფასებთ უმძიმეს რეალობას, სადაც საქართველოს მოქალაქეებს რუსეთის საოკუპაციო ძალები კლავენ და იტაცებენ?! – ამ შეკითხვით მიმართა ფრაქცია „ნაციონალური მოძრაობის“ თავმჯდომარემ, თინა ბოკუჩავამ, შერიგებისა და სამოქალაქო თანასწორობის საკითხებში სახელმწიფო მინისტრ თეა ახვლედიანს, რომელიც პარლამენტში „მინისტრის საათის ფორმატში“იმყოფება.

ბოკუჩავას თქმით, „ქართული ოცნება“ მუდმივად ცდილობს, ხალხს მოახვიოს რუსული ყალბი მშვიდობის იდეა და თავს ამ ყალბი რუსული მშვიდობის გარანტად აცხადებს.

„ამ დროს, სწორედ „ოცნების“ ხელისუფლებაში ყოფნის პერიოდში, 2012 წლიდან დღემდე, ოკუპირებული აფხაზეთის მიმართულებით რუსეთის საოკუპაციო ძალებმა დააკავეს 1614 მოქალაქე და 40 სხვა ქვეყნის მოქალაქე. ოკუპირებული ცხინვალის რეგიონის მიმართულებით საოკუპაციო ძალებმა საქართველოს 1191 მოქალაქე და სხვა ქვეყნის 22 მოქალაქე. ამჟამად, უკანონო პატიმრობაში რჩება 11 პირი. ამ დრომდე არ დასჯილან ის პირები, რომლებიც პასუხისმგებლები არიან 2014 წელს დავით ბაშარულის, 2016 წელს გიგა ოთხოზორიას, 2018 წელს არჩილ ტატუნაშვილის, 2019 წელს ირაკლი კვარაცხელიას, 2023 წელს თამაზ გინტურის და თემურ კარბაიას მკვლელობაზე. გთხოვთ, მიპასუხოთ, ასე გამოიყურება თქვენთვის მშვიდობა? იზიარებთ ღარიბაშვილის პროპაგანდისტული ყალბი რუსული მშვიდობის იდეას და მშვიდობად აფასებთ უმძიმეს რეალობას, სადაც საქართველოს მოქალაქეებს რუსეთის საოკუპაციო ძალები კლავენ დაიტაცებენ?! თქვენ, როგორც შერიგების მინისტრს, როგორ გესმით, როგორც მხოლოდ ნეგატიური მშვიდობა, თუ ასევე, როგორც პოზიტიური მშვიდობა, რომელიც უპირველეს ყოვლისა, ომით დაზარალებული მოსახლეობის უსაფრთხოებას, განვითარებას და კეთილდღეობას გულისხმობს. და თუ ეს უკანასკნელია ის განმარტება, რომლითაც უნდა ხელმძღვანელობდეს ხელისუფლება და არა ივანიშვილის რუსული ყალბი მშვიდობის კონცეფცია, როგორ აფასებთ მშვიდობად იმ უმძიმეს მოცემულობას, სადაც ოკუპაციის ხაზის მიმდებარე დასახლებების მხოლოდ 33%-ს აქვს წყალგაყვანილობა და აქედან მხოლოდ 73%-ს აქვს სასმელი წყალგაყვანილობა, 38%-თვის საერთოდ არ არის ხელმისაწვდომი სამედიცინო მომსახურება“, – განაცხადა თინა ბოკუჩავამ.

პატივცემულო პარლამენტის წევრებო, პირველ რიგში, მოგახსენებთ შერიგებისა და ჩართულობის პოლიტიკაზე, რაც უფრო ფართო – კონფლიქტის მშვიდობიანი მოგვარების ერთიანი სახელმწიფო პოლიტიკის განუყოფელი ნაწილი და მისი ერთ-ერთი მიმართულებაა, რომელიც დეოკუპაციის განზომილების პარალელურად, აფხაზეთისა და ცხინვალის რეგიონებთან მიმართებაში ხორციელდება იმისათვის, რომ დეოკუპაციის პერიოდისთვის აღმოფხვრილ იქნას კონფლიქტი ადამიანთა დონეზე, დაძლეულ იქნას გაუცხოება და მიზანმიმართულად შექმნილი ნეგატიური განწყობები.

აფხაზეთისა და ცხინვალის რეგიონების მიმდინარე უკანონო ოკუპაციის თანმდევი მძიმე შედეგების გათვალისწინებით, ხაზგასასმელია, ადგილზე შექმნილი ის გარემო და განვითარებული პროცესები, რომელთანაც ჩვენს ქვეყანას და ხალხს დღემდე უწევს გამკლავება, და რომელთა პირობებში ვაგრძელებთ მაქსიმალურ ძალისხმევას სამშვიდობო ინიციატივების განხორციელების გზით.

ამ თვალსაზრისით, ადგილზე უსაფრთხოების კუთხით არსებულ გამოწვევებთან ერთად,  ვგულისხმობთ: 

§ იმ უკანონო გადაწყვეტილებებს, რაც საოკუპაციო ძალის მიერ ორივე რეგიონში ფაქტობრივი ანექსიისკენ გადადგმულ ნაბიჯებს უკავშირდება და შესაბამისად, აფხაზეთისა და ცხინვალის რეგიონის დანარჩენი საქართველოსგან იზოლაციას ისახავს მიზნად.

§ ამავე მიზანს ემსახურება, ადგილზე, საერთაშორისო ორგანიზაციების საქმიანობაზე კონტროლის და შეზღუდვების გამკაცრება, ასევე ორივე რეგიონში უსაფრთხოების და ადამიანის უფლებათა მონიტორინგის საერთაშორისო მექანიზმების დაშვების აკრძალვა. გასათვალისწინებელია ისიც, რომ ევროკავშირის მონიტორინგის მისიას დღემდე არ ეძლევა საკუთარი მანდატის სრულად აღსრულების შესაძლებლობა აფხაზეთსა და ცხინვალის რეგიონში.

§ ასობით ათას იძულებით გადაადგილებულ პირსა და ლტოლვილს დღემდე შეზღუდული აქვს საკუთარ სახლებში უსაფრთხო და ღირსეული დაბრუნების უფლება.

§ კვლავ გრძელდება მოსახლეობის უფლებების და ფუნდამენტური თავისუფლებების უხეში და სისტემატური დარღვევები, ეთნიკური დისკრიმინაცია, აქტიური რუსიფიკაციის და ასიმილაციის პოლიტიკა, მათ შორის მშობლიურ ენაზე განათლების მიღების აკრძალვა, თავისუფალი გადაადგილების, საკუთრებაზე წვდომის თუ სხვა სოციალური და ეკონომიკური უფლებების შეზღუდვა. ამ კუთხით, ვითარება განსაკუთრებით მძიმე რჩება გალისა და ახალგორის რაიონებში.

§ აფხაზეთისა და ცხინვალის რეგიონებზე ეფექტური კონტროლის პირობებში, ადგილობრივი მოსახლეობა იმყოფება საოკუპაციო ძალის გავლენისა და წნეხის ქვეშ, რაც მათ შორის გულისხმობს შერიგების პოლიტიკითა და სამშვიდობო ინიციატივებით დანერგილი შესაძლებლობებით სარგებლობის სურვილის მქონე ადამიანების დევნას.

§ სამშვიდობო პროცესის წინააღმდეგ არის მიმართული გააქტიურებული დეზინფორმაციული კამპანიები და ანტიქართული პროპაგანდა.

§ სწორედ ამ კონტექსტშია განსახილველი ის მიზანმიმართული ნაბიჯები და განცხადებები, რაც გამიზნულია უკანონო ოკუპაციის ლეგიტიმაციისკენ და შესაბამისად, საოკუპაციო ხაზით გაყოფილ ადამიანებს შორის შერიგების, ნდობისა და ურთიერთობების აღდგენის წინააღმდეგ.

მაქვს პატივი, მინისტრის საათის ფორმატში წარვდგე საქართველოს პარლამენტის წინაშე და მოგახსენოთ სახელმწიფო მინისტრის აპარატის მიერ 2023 წლის მანძილზე განხორციელებული საქმიანობის და მიღწეული შედეგების შესახებ, როგორც შერიგებისა და ჩართულობის სახელმწიფო პოლიტიკის, ასევე სამოქალაქო თანასწორობის და ინტეგრაციის სახელმწიფო პოლიტიკის მიმართულებით;

წარმოგიდგინოთ გასული წლის მნიშვნელოვანი პროცესები, არსებულ რეალობასა და საჭიროებებზე მორგებული მუშაობის დღის წესრიგი, რომელიც თანმხლები გამოწვევების მიუხედავად, გახლდათ მდგრადი და პოზიტიური დინამიკის მატარებელი, შედეგზე ორიენტირებული და პროდუქტიული. თითოეული თემატური მიმართულებით მიღწეული შედეგებისა და პროგრესის ძირითადი ტენდენციების თაობაზე მოგახსენებთ სახელმწიფო მინისტრის აპარატის მანდატით განსაზღვრული საქმიანობის სპეციფიკის გათვალისწინებით. გასული წლის განმავლობაში ვახორციელებდით მრავალგანზომილებიანი საქმიანობის კოორდინაციას ყველა დარგობრივ სახელმწიფო უწყებასთან მჭიდრო თანამშრომლობით, როგორც ინდივიდუალურად, ასევე სპეციალურად შექმნილი სხვადასხვა ფორმატის ფარგლებში: შედეგად, არსებული პოლიტიკური ხედვისა და განსაზღვრული სტრატეგიული ამოცანების შესაბამისად, ინიცირებულ იქნა, დაინერგა და ამოქმედდა სათანადო ინსტრუმენტები და მექანიზმები, გადაიდგა ქმედითი ნაბიჯები შედეგზე ორიენტირებული სახელმწიფო პროგრამების ეფექტიანობის გაზრდის მიზნით, მონაცემების შეგროვებისა და ანალიზის საფუძველზე შეფასებულ იქნა მიღწეული პროგრესი, ისევე როგორც დაისახა სამომავლო გეგმები და განსახორციელებელი ქმედებები. აღნიშნული პროცესი იყო ინკლუზიური და მიმდინარეობდა ყველა პარტნიორი ორგანიზაციის, სამოქალაქო საზოგადოების, თემით დაინტერესებული აქტორების, ექსპერტებისა და აკადემიური წრეების, მოსახლეობის აქტიური ჩართულობით.

ამ კონტექსტში, მინდა ხაზგასმით აღვნიშნო, საპარლამენტო ზედამხედველობის ფარგლებში, უაღრესად მნიშვნელოვანი თანამშრომლობა საქართველოს პარლამენტთან. ჩვენთვის განსაკუთრებული დატვირთვის მატარებელია დეოკუპაციის საკითხებთან დაკავშირებულ დროებით საპარლამენტო კომისიასთან, ისევე როგორც ადამიანის უფლებათა დაცვის და სამოქალაქო ინტეგრაციის და სხვა დარგობრივ კომიტეტებთან მუშაობა. ორივე პოლიტიკის ფარგლებში დასახული ამოცანების გადასაჭრელად, ასევე, უაღრესად დიდ მნიშვნელობას ვანიჭებთ ინტენსიურ თანამშრომლობას სტრატეგიულ პარტნიორებთან და საერთაშორისო ორგანიზაციებთან. სახელმწიფო მინისტრის აპარატი, ქვეყნის მიერ საერთაშორისო ხელშეკრულებებით აღებული ვალდებულებების შესაბამისად, ჩართული იყო სხვადასხვა ფორმატებში – გაეროს, ეუთოს, ევროპის საბჭოს, ევროკავშირის, ამერიკის შეერთებული შტატების და სხვა პარტნიორი ქვეყნების ყველა იმ ინსტრუმენტის ფარგლებში, რომელიც უკავშირდება ჩვენი პოლიტიკის პრიორიტეტებს, დემოკრატიული განვითარებისა და ადამიანის უფლებათა დაცვის, ასევე, კონფლიქტის მშვიდობიანი გზით მოგვარების საკითხებს. ვაგრძელებთ მჭიდრო და ნაყოფიერ თანამშრომლობას საქართველოში აკრედიტებული დიპლომატიური კორპუსის წარმომადგნელებთან, ჟენევის საერთაშორისო მოლაპარაკებების თანათავმჯდომარეებთან, ევროკავშირის მონიტორინგის მისიასთან, ასევე, პარტნიორი-სახელმწიფოების აღმასრულებელი და საკანონმდებლო ხელისუფლების დელეგაციებთან.

წელს ბრიუსელში ჩემი სამუშაო ვიზიტის, ასევე საქართველო-ევროკავშირის სტრატეგიული და სხვა არაერთი თემატური დიალოგის ფარგლებში, პარტნიორებთან ერთად ვიმსჯელეთ შერიგებისა და ჩართულობის პოლიტიკის შემდგომ განვითარებაზე, ასევე, ოკუპირებულ რეგიონებში შექმნილ ვითარებაზე, არსებულ გამოწვევებზე და მათ დასაძლევად, ჩვენი ერთობლივი ძალისხმევისა და კოორდინირებული ქმედებების შემდგომი გაძლიერების გზებზე. ჩემი უშუალო მოწვევით, წელს ვუმასპინძლეთ რეინტეგრაციის საკითხებში მოლდოვის რესპუბლიკის ვიცე-პრემიერს და ქალების, მშვიდობისა და უსაფრთხოების საკითხებში ნატო-ს გენერალური მდივნის სპეციალურ წარმომადგენელს, რომლებიც საკანონმდებლო თუ აღმასრულებელი ხელისუფლების და სამოქალაქო საზოგადოების წევრებთან შეხვედრების კვალდაკვალ, საოკუპაციო ხაზთან ვიზიტის ფარგლებში ადგილზე გაეცნენ ოკუპირებულ რეგიონებში უსაფრთხოებისა და ადამიანის უფლებების კუთხით არსებულ ვითარებას. მსურს ვისარგებლო შემთხვევით და მადლიერება გამოვხატო საერთაშორისო საზოგადოების მიმართ, საერთაშორისოდ აღიარებულ საზღვრებში საქართველოს ტერიტორიული მთლიანობის, აგრეთვე, დონორი სახელმწიფოების მხრიდან ჩვენი ორივე პოლიტიკის პრიორიტეტებისა და ამოცანების შესაბამისად გაწეული ძალისხმევის ურყევი მხარდაჭერისთვის.