თუ მოგვცეს სტატუსი, ეს დაფუძნებული იქნება იმაზე, რაც ხელისუფლებას უკეთებია – საგანგებო მნიშვნელობის საკითხები, როგორიცაა სასამართლოს თემა, საარჩევნო კოდექსის თემა 100 პროცენტიანად შესრულებულად გვეთვლება, – ამის შესახებ პარლამენტის პირველმა ვიცე- სპიკერმა გია ვოლსკიმ განაცხადა.

ვოლსკის თქმით, გარდა ამისა, სტატუსს იმსახურებს საზოგადოება, რომელიც ხელისუფლებისგან არავინ არ უნდა გამოყოს.

„თუ მოგვცეს სტატუსი და ვფიქრობ, სწორედ ასე გადაწყდება, ეს გადაწყვეტილება დაფუძნებული იქნება იმაზე, რაც უკეთებია ხელისუფლებას და ამის გარდა, რასაკვირველია, საზოგადოებას ეკუთვნის – არასდროს არ უნდა გამოვყოთ საზოგადოება ხელისუფლებისგან, რა პოლიტიკური გემოვნებისაც არ უნდა იყოს.

არის გარკვეული საკითხები, საგანგებო მნიშვნელობის, ეს არის სასამართლოს თემა, საარჩევნო კოდექსის თემა, ის, რაც 100-პროცენტიანად შესრულებულად გვეთვლება და გარკვეულწილად მიმდინარეობს კიდევ მუშაობა მთელ რიგ საკითხებზე. შესრულდა რეკომენდაციები – იუსტიციის უმაღლესი საბჭოც დაკომპლექტდა და ბევრი თემაა, რომელიც ვთვლით, რომ მაღალპროფესიონალურ დონეზეა შესრულებული, მაგრამ არავინ თქვას, რომ საზოგადოებას გარკვეული ავტორიტეტი ამ გადაწყვეტილების მიღებაში არ აქვს. რასაკვირველია, საზოგადოებაა მთავარი და მთავრობაც საზოგადოების ნაწილია, ჩვენ ერთნი ვართ. ამ ერთობის დარღვევაზე მიდის მუშაობა, რომ როგორმე არ მისცენ „ქართული ოცნების“ ხელისუფლების პირობებში სტატუსი, როგორმე ვითომ საზოგადოება სხვაა და ხელისუფლება სხვა. ესაა პირდაპირი მოწოდება, რომ სტატუსი არ მისცენ ქვეყანას და საზოგადოებას უთხრან, რომ მთავრობაა მიზეზი იმის, რომ სტატუსი არ გვეძლევა და საჭიროა, რომ საზოგადოებამ ხელისუფლება მოიცილოს. ეს არის დესტაბილიზაციისკენ მოწოდება, რომელიც არის მთავარი გეგმა. საერთოდ არ აინტერესებთ სტატუსი გვექნება თუ არა,“ – განაცხადა ვოლსკიმ.

პარტიებთან შექმნილია სატელიტური ორგანიზაციები, სატელიტური ფონდები და გაუმჭვირვალეა, რას აკეთებენ ისინი და რა მიზანს ემსახურება რეალურად ეს ყველაფერი, – ამის შესახებ  პარლამენტის ვიცე-სპიკერმა არჩილ თალაკვაძემ USAID-ის და სოროსის ფონდის მიერ კანონდამრღვევთა დაფინანსებასთან დაკავშირებით განაცხადა.

„ „მაშინ ეს გამოხატვის თავისუფლებად მონათლეს, ეს კამპანია გრძელდება.სწორედ ამაზე ვსაუბრობდით თვეების წინ, რომ პარტიებთან შექმნილია სატელიტური ორგანიზაციები, სატელიტური ფონდები და გაუმჭვირვალეა თუ რას აკეთებენ ისინი და რა მიზანს ემსახურება რეალურად ეს ყველაფერი. ვნახეთ, რომ იყო კოორდინირებული კამპანია იმ აგრესიული და ძალადობაში ჩართული ადამიანების დასაცავად, მათ წარმოსაჩენად გმირებად, ვინც საკუთარი თანამოქალაქეების, პოლიციელების დაწვა სცადა, ცეცხლი წაუკიდა ადამიანებს, ეს მაშინ გამოხატვის თავისუფლებად მონათლეს. ეს კამპანია არ შეწყვეტილა, გრძელდება.

რა თქმა უნდა, არსებობენ ქვეყანაში ძალები, რომლებიც ყველა ადამიანს, მათ შორის მათ, ვისაც გულწრფელი პროტესტი შეიძლება ჰქონდეს, მაქსიმალურად გამოიყენებენ დესტაბილიზაციისთვის, არეულობისთვის, ამიტომ საჭიროა და მოველით მეტ გამჭვირვალობას, მოველით თანამშრომლობასთან ერთად ანგარიშვალდებულებასაც და მოველით, რომ რა დამოკიდებულებაც ჩვენ გვაქვს ამ თანამშრომლობის ფარგლებში, იგივე პრინციპებს სცეს პატივი ყველა მხარემ. ეს არის საქართველოს ინტერესებში, ეს არის ჩვენი საზოგადოების ინტერესებში“, – განაცხადა თალაკვაძემ.

არ მესმის, 1%-იანი გახარია რატომ უნდა იყოს საინტერესო. არ არის საინტერესო 1%-იან პარტიაზე გავაკეთო კომენტარი – ყველაფერი იდეალურად იქნება, 2024 წელსაც გავიმარჯვებთ და 2028 წელსაც, – ამის შესახებ „ქართული ოცნების“ გენერალურმა მდივანმა, კახა კალაძემ განაცხადა.

აღნიშნულით მან ჟურნალისტის კითხვას უპასუხა, როგორც შეაფასებს პარტია „საქართველოსთვის“ წევრების განცხადებას, რომ საარჩევნოდ თანამშრომლობის საკითხზე მათი პარტიის ლიდერებს მოლაპარაკებები აქვთ ყოფილ მინისტრებსა და დეპუტატებთან, რომელთა შორისაც არიან „ქართული ოცნების“ ყოფილი მაღალჩინოსნებიც.

„არ მესმის, 1%-იანი გახარია, რატომ უნდა იყოს საინტერესო. არ არის საინტერესო 1%-იან პარტიაზე გავაკეთო კომენტარი. ყველაფერი იდეალურად იქნება, „ქართული ოცნება“ 2024 წელს აუცილებლად გაიმარჯვებს, კონსტიტუციური უმრავლესობით მოვა ხელისუფლებაში. დაიმახსოვრეთ დღევანდელი დღე და ჩემი სიტყვები. ასეთი მხარდაჭერა “ქართულ ოცნებას” 2012 წლის შემდეგ არ ჰქონია. 2024 წელსაც გავიმარჯვებთ და 2028 წელსაც”, – აღნიშნა კალაძემ.

ჩვენ საქართველოსა და მოლდოვას უსაფრთხო წარმოშობის ქვეყნების კატეგორიას მივაკუთვნებთ. ორივეს სურს გახდეს ევროკავშირის წევრი, ამიტომ არ არის მიზანშეწონილი ვივარაუდოთ, რომ ამ ქვეყნებში სისტემური შევიწროება ხდება, – ამის შესახებ გერმანიის კანცლერმა, ოლაფ შოლცმა განაცხადა.

მისი თქმით, გერმანიამ საზღვრებზე კონტროლი გაამკაცრა და სურს, ქვეყანაში წესების დარღვევით დარჩენის ფაქტები შეამციროს.

“გვსურს, შევამციროთ აქ წესების დარღვევით დარჩენის სტიმული. თუ გერმანიის ფედერალური მიწები განაცხადებენ, რომ მათ სურთ თანხის სანაცვლოდ სოციალური დახმარების ნატურალური ფორმით გაწევა, ჩვენ ამას მხარს დავუჭერთ. თუ მათ სურთ სადებეტო ბარათების შემოღება თავშესაფრის მაძიებლებისთვის (ნაღდი ფულის ნაცვლად, რომელსაც სახლში რიცხავენ ან კონტრაბანდისტებს უხდიან), ჩვენ ამასაც მხარს დავუჭერთ. მეტიც, სწორად მივიჩნევთ თავშესაფრის მაძიებლებისთვის საზოგადოებრივი მომსახურების სერვისების გახსნას”, – განაცხადა ოლაფ შოლცმა.

კითხვაზე, ფიქრობს თუ არა, რომ ეს საკმარისი იქნება გერმანიაში ჩასული ადამიანების რაოდენობის საგრძნობლად შესამცირებლად, ოლაფ შოლცმა უპასუხა:

“როგორც ვთქვი, ეს შეიძლება გაკეთდეს მხოლოდ ზომების პაკეტით და მე ჯერ კიდევ არ მიხსენებია ერთი მნიშვნელოვანი რამ: ჩვენ საბოლოოდ უნდა მოვახდინოთ მათი დეპორტაცია, ვისაც გერმანიაში დარჩენის უფლება არ აქვს. ისინი, ვინც სავარაუდოდ ვერ მიიღებენ გერმანიაში დარჩენის ნებართვას, რადგან მათ არ შეუძლიათ დაადასტურონ დაცვის საჭიროება, უნდა დაბრუნდნენ. პროცედურები უნდა დაჩქარდეს, თავშესაფრის განცხადებები და პირველადი გასაუბრება უნდა ჩატარდეს თავდაპირველ მიმღებ დაწესებულებაში. სასამართლო პროცესიც უნდა დაჩქარდეს. ზოგიერთ მიწაზე, დეპორტაციის საქმეებზე თავდაპირველი გადაწყვეტილებების მიღება ხდება ოთხი თვის შემდეგ, ხოლო ზოგში ამას 39 თვე სჭირდება. ეს მიუღებელია. ჩვენ უნდა განვახორციელოთ დეპორტაცია უფრო ხშირად და უფრო სწრაფად“.

კანდიდატის სტატუსს რომ მივიღებთ, ეს იქნება საქართველოში რადიკალური ოპოზიციის უმძიმესი მარცხი და ქართული სახელმწიფოს, „ქართული ოცნების“ ხელისუფლების და ქართველი ხალხის დიდი გამარჯვება, – აცხადებს საპარლამენტო უმრავლესობის წევრი, დავით მათიკაშვილი.

მისი თქმით, შარშანდელი გადაწყვეტილებით, რომლითაც სტატუსი არ მიენიჭა ქვეყანას, ევროკავშირმა გეოპოლიტიკური შეცდომა დაუშვა.

„რადიკალური ოპოზიციის მიზნები არ არის კანდიდატის სტატუსის მიღება. მათი მიზანია ხელისუფლების უკანონოდ შეცვლა, რისთვისაც უნდა გამოიყენონ ის ფაქტი, რომ არ მოგვცენ სტატუსი. იმიტომ იყო, რომ წელიწადზე მეტია ყველა ნაბიჯს დგამენ, ევროპის დედაქალაქების მოვლის ჩათვლით, ანტიქართულ პროპაგანდას აწარმოებენ მთელს მსოფლიოში, რომ სტატუსი არ მიიღოს ქვეყანამ და არჩევნებამდე მოახდინონ არალეგალურად, არაკონსტიტუციურად ხელისუფლების შეცვლა.

რა თქმა უნდა, საბოლოოდ, ეს არის პოლიტიკური გადაწყვეტილება. ჩვენ ველოდებით ევროკავშირისგან სწორ პოლიტიკურ გადაწყვეტილებას. იმედით ვუყურებთ მომავალს. გვჯერა, ევროკავშირი ამ კუთხით მეტ შეცდომას აღარ დაუშვებს – გეოპოლიტიკურ შეცდომას. სწორედ ასეთი იყო ერთი წლის წინ სტატუსის არმინიჭება საქართველოსთვის. დღეს იქნება სწორი, სამართლიანი გადაწყვეტილება. ჩვენი ქვეყანა მიიღებს სტატუსს და ამით მწარედ დამარცხდება რადიკალური ოპოზიცია,“ – განაცხადა მათიკაშვილმა.