თემატური თანამშრომლობა ყველასთან შეიძლება – ამის შესახებ გედევან ფოფხაძემ მედიასთან ვანო მერაბიშვილთან და დავით კეზერაშვილთან თანამშრომლობასთან დაკავშირებით საუბრისას განაცხადა.

„თემატური თანამშრომლობა მე „ქართულ ოცნებასთანაც“ წარმომიდგენია. თემატური თანამშრომლობა ყველასთან შეიძლება ყველასთან აბსოლუტურად, პუნტინთანაც შეიძლება თემატური თანამშრომლობა თუ ეს საჯარო ინტერესს ემსახურება…“ – განაცხადა გედევან ფოფხაძემ.

ბატონმა ირაკლიმ [ბერაია] ამ საკითხთან დაკავშირებით საკუთარი სინანული გამოთქვა და ვფიქრობ, დასაფასებელია, როდესაც ამაზე გვაქვს საუბარი, ვინაიდან არსებულ მოწვევის პარლამენტს აქვს გარკვეული გამოწვევა – ხშირად არის შეხლა-შემოხლა, მათ შორის ვერბალური, განსაკუთრებით, აქ გამოირჩევა ოპოზიცია, – ამის შესახებ პარლამენტის თავმჯდომარე შალვა პაპუაშვილმა „რუსთავი 2“-ის ეთერში განაცხადა.

მისი თქმით, ამ მოწვევის პარლამენტის ერთ-ერთი გამოწვევა სწორედ სიძულვილის ენის გამოყენება და დეპუტატებს შორის დაპირისპირებაა.

„დღესაც, მიკროფონების მიღმა, ისეთი ტერმინოლოგია ისმოდა ოპოზიციის მხრიდან, მათ შორის ქალი ოპოზიციონერების მხრიდან, რომელსაც მერე თვითონ აპროტესტებენ. ამიტომ, ეს არის გარკვეული გამოწვევა ჩვენს პარლამენტში და თუ გვინდა ეს გამოწვევა არ იყოს, 2 რამ არის მნიშვნელოვანი: პირველი – ყველა პასუხისმგებლობით მოეკიდოს თავის ქცევას და სიტყვებს; მეორე – არ განვასხვაოთ ჩვენიანი და სხვისიანი, თანაბარი საზომით მივუდგეთ ამ ყველაფერს. მნიშვნელოვანია, როდესაც სხვის თვალში ვხედავთ ბეწვს, საკუთარში დავინახოთ დირე.

რაც შეეხება [ირაკლი ბერაიას] თანამდებობიდან გადადგომას, აქ კი ნამდვილად ფარისევლები იყვნენ ოპოზიციის წარმომადგენლები. ვფიქრობ, ისინი სინამდვილეში პრობლემას ხედავენ იმაში, რომ ეთიკური სტანდარტი დაირღვა და ა.შ, არამედ მათ ადარდებთ ვიღაცების თანამდებობები და ასე შემდეგ.

კულტურის ნაწილი არის ის, რომ ინციდენტი შეიძლება მოხდეს და ის, რომ ადამიანმა ამაზე სინანული უნდა გამოხატოს და ბოდიშიც შეიძლება მოიხადოს. ამაზე არის საუბარი და მე სწორედ ამაზე მივუთითე ოპოზიციას და ასეთი ინციდენტები როდესაც ხდება ოპოზიციის მხარეს, მათ არანაირი სინანული არ აქვთ. არათუ სინანული, გუშინდელი შემთხვევის შემდეგ, დღეს, ამ პროტესტის ფონზე, თავად შეურაცხყოფას აყენებდნენ სხვა დეპუტატებს ისეთი სიტყვებით, რომელიც ეთერშიც არ გამეორდება. თითის გაშვერა ადვილია და თუ თითის გაშვერაზე წავალთ, უმრავლესობას უფრო მეტი აქვს თითი გასაშვერი ოპოზიციის მხარეს ასეთ დროს, ვიდრე მათ. არანაირი სინანული ოპოზიციაში არ არის, ვერც კი აცნობიერებენ, რა შეურაცხყოფას აყენებენ სხვას. რა სურათს დგამენ“, – აღნიშნა შალვა პაპუაშვილმა.

„ხალხის ძალის“ წევრი ეკა სეფაშვილი რადიო „ფორტუნას“ ეთერში ნიკა გვარამიას პრეზიდენტისადმი მოწოდებას გამოეხმაურა, სადაც გვარამია პრეზიდენტს მიხეილ სააკაშვილის შეწყალებას სთხოვს.

როგორც სეფაშვილი აღნიშნავს, სალომე ზურაბიშვილისგან ყველაფერია მოსალოდნელი და მას არ გაუკვირდება ის თუ მიხეილ სააკაშვილს შეიწყალებს.

„პრეზიდენტ სალომე ზურაბიშვილისგან არაფერი გასაკვირი არ არის იმიტომ, რომ იგი ჩვეულებრივად დავალების შემსრულებელია. როგორ დავალებასაც მიიღებს, ისე გაკეთებს. მისგან არ გამიკვირდება ასეთი საქციელი, თუმცა საზოგადოებას შევახსენებ, იმ უშვერ და უხამს გამონათქვამებს, რითაც ნიკა გვარამია პირდაპირ ეთერში ამკობდა პრეზიდენტს. ჩემი აზრით, ეს ასევე დაუშვებელია. ამ ყველაფრის შემდეგ პრეზიდენტმა შეიწყალა ნიკა გვარამია და დღეს რაღაც ერთ გუნდადაც მოიაზრებენ თავიანთ თავს, ერთ პლატფორმაზე დგანან, ერთი და იგივე ნარატივსაც აჟღერებენ. ასე რომ, მე არ გამიკვირდება ესეც რომ თამაშის ნაწილი იყოს, რომ პრეზიდენტმა შეიწყალოს სააკაშვილიც. თუმცა, ამით ის გახდება თანამონაწილე იმ დანაშაულებისა, რასაც მიხეილ სააკაშვილი ჩადიოდა თავისი მმართველობის პერიოდში, რომლისთვისაც სტრასბურგის ადამიანის უფლებების დაცვის სასამართლომ გამოიტანა გადაწყვეტილება, რომელიც მთლიანად ეთანხმებოდა საქართველოს სასამართლოს გადაწყვეტილებას“, – განაცხადა სეფაშვილმა.

ირაკლი ბერაიასთან დაკავშირებით თუ იქნება მსჯელობა გენდერულ საბჭოში, მაშინ ჯერ ის საკითხები უნდა განვიხილოთ, რომელიც მანამდე მოხდა, – ამის შესახებ მედიასთან „ხალხის ძალის“ წევრმა, დეპუტატმა ეკა სეფაშვილმა განაცხადა.

მისი თქმით, რადიკალური ოპოზიცია ორმაგ სტანდარტებს იყენებს და მათ მიერ გაჟღერებულ შეურაცხყოფებზე პასუხისმგებლობას არ იღებს.

„წინა საკითხებში ვგულისხმობ, პირველ რიგში, ქალბატონი თეა წულუკიანის მიმართ განხორციელებულ გაუგონარ უხამსობებსა და უზრდელობებს, რომელზეც არავითარი გამოხმაურება არ ყოფილა; იგივე, როცა პრეზიდენტი გამოვიდა და სულისშემძვრელი განცხადება გააკეთა თეონა აქუბარდიას დაცვის მიზნით, თეა წულუკიანი არ იყო ქალი და პოლიტიკოსი? მაშინ რატომ არ გამოვიდა და არ დაიცვა ქალი პოლიტიკოსის უფლებები? ასევე, უნდა განვიხილოთ ის უხამსი სიტყვები, რითაც ანი წითლიძე მიმართავდა კამერების წინ ბატონ ვიქტორ ჯაფარიძეს; ასევე, გავიხსენოთ სალომე სამადაშვილის შეურაცხმყოფელი ქმედება, ერთ-ერთ კომიტეტზე, განხილვის დროს; ასევე, გავიხსენოთ ხათუნა სამნიძისა და აქუბარდიას უხამსი და შეურაცხმყოფელი გამონათქვამები, არა მარტო ქალი პოლიტიკოსების მიმართ, არამედ – მთელი ოპოზიციის მიმართ. მაშინ, ჯერ ესენი განვიხილოთ და ამ ყველაფერს რომ შევაფასებთ, მერე, კი ბატონო, ირაკლი ბერაიას საქციელიც განვიხილოთ. თუ მანამდე სხვა საქციელებსა და ოპოზიციონერების მხრიდან გაჟღერებულ შეურაცხყოფებს არ განვიხილავთ, მაშინ, ირაკლი ბერაიაზე რატომ უნდა გვქონდეს რეაგირება? თან, იმ ფაქტის გათვალისწინებით, რომ ბატონმა ირაკლიმ ბოდიში მოიხადა ამ საკითხთან დაკავშირებით, ჩვენ კი არც ერთი ქალი პოლიტიკოსის მხრიდან ბოდიში არ გაგვიგონია“, – განაცხადა ეკა სეფაშვილმა.

„ნაციონალური მოძრაობის“ გენერალური მდივანი პეტრე ცისკარიშვილი ადასტურებს იმას, რასაც ჯერ „ქართული ოცნება“, ბოლო დროს კი ხათუნა სამნიძე და ხატია დეკანოიძე ამბობდნენ.

„სტატუსი რომ ყველას გვინდა, გასაგებია. სტატუსის მონიჭების პირობებზე არის ახლა საუბარი. როგორ იქნება – არჩევნებამდე, არჩევნების შემდეგ“, – თქვა ცისკარიშვილმა.

„რესპუბლიკური პარტიის“ თავმჯდომარის, ხათუნა სამნიძის განცხადებით, ოპოზიციის რიგებში არიან პოლიტიკოსები, რომლებიც კანდიდატის სტატუსის მინიჭების პროცესს ხელს უშლიან.

გამორიცხული არაფერი არ არის, იმიტომ, რომ ისეთ ტალღაზეა ქალბატონი სალომე, რომ ნებისმიერი რამის გაკეთება შეუძლია, – ასე შეაფასა „ქართული ოცნების“ გენერალურმა მდივანმა, თბილისის მერმა, კახა კალაძემ “მთავარი არხის” დამფუძნებლის, ნიკა გვარამიას თხოვნა პრეზიდენტ სალომე ზურაბიშვილისადმი, რომ მესამე პრეზიდენტ მიხეილ სააკაშვილთან დაკავშირებით, მიიღოს შეწყალების გადაწყვეტილება.

კალაძის თქმით, პრეზიდენტის შეწყალებას არანაირი მნიშვნელობა არ ექნება, რადგან მიხეილ სააკაშვილის წინააღმდეგ კიდევ რამდენიმე საქმეა აღძრული.

„არ ვიცი რა გადაწყვეტილებას მიიღებს სალომე ზურაბიშვილი. გამორიცხული არაფერი არ არის, იმიტომ, რომ ისეთ ტალღაზეა ქალბატონი სალომე, ნებისმიერი რამის გაკეთება შეუძლია ამ ადამიანს. თუ გავითვალისწინებთ კონსტიტუციის დარღვევას, იმ ხაზს რა ხაზსაც ატარებს, პირდაპირ რადიკალური ოპოზიციის „მესიჯებზეა“ და შეიძლება ითქვას, რომ ერთი დღის წესრიგი აქვთ.

ვერ გეტყვით რა გადაწყვეტილება იქნება მიღებული, თუმცა ამას არანაირი მნიშვნელობა აქვს, იმიტომ რომ სხვა კონკრეტული საკითხებია რაზეც გამოძიება მიმდინარეობს“,- განაცხადა კალაძემ.