სააკაშვილი გამოცოცხლდა, ქართულ პოლიტიკაში მოვიდა და საზღვარგარეთ რა უნდა? ეს კითხვა მაქვს ევროპარლამენტარებთანაც, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

გურამ მაჭარაშვილი გამოეხმაურა 44 ევროდეპუტატის განცხადებას, რითიც საქართველოს ხელისუფლებას მოუწოდებენ, მხარი დაუჭიროს მიხეილ სააკაშვილის გადაყვანას ევროკავშირის ერთ-ერთ წევრ ქვეყანაში, სადაც მას შეუძლია, მიიღოს შესაბამისი სამედიცინო დახმარება.

„ევროპარლამენტარი, რომელიც სტრასბურგის სასამართლოს განცხადების შემდეგ სააკაშვილის ციხიდან გამოშვებას მაინც ითხოვს, იმას ემსახურება, რომ გლობალური „ომის პარტია“ „ლოკალური ომის“ პარტიის საშუალებით ქვეყანაში ცდილობს არეულობას და მეორე ფრონტს. სამწუხაროდ, რადიკალურ ოპოზიციას სურს ქვეყანაში ომი მეორე ფრონტი. სააკაშვილი გამოცოცხლდა, ქართულ პოლიტიკაში მოვიდა და როცა ამბობს, რომ უკვე ქართულ პოლიტიკაშია, მაშინ საზღვარგარეთ რა უნდა? უცხოეთში წასვლა რატომ უნდა? ეს კითხვა მაქვს ევროპარლამენტარებთანაც.

სტრასბურგის გადაწყვეტილებაა, რომ ამ ადამიანმა უნდა იკვებოს, სასჯელი მოიხადოს. ამ გადაწყვეტილებას როცა თავზე გადაახევ ყველა მოსამართლეს, რომელმაც თქვა, რომ პატიმარი სააკაშვილი საქართველოდან არ უნდა წავიდეს, ციხიდან არ უნდა გავიდეს და მაინც ითხოვ, ციხიდან გავიდეს, ეს ნიშნავს, რომ მათი მიზანია არა სააკაშვილის ჯანმრთელობაზე ზრუნვა, არამედ როგორმე გამოაცოცხლონ პოლარიზება. ამას ემსახურებოდა გვარამიას გათავისუფლებაც“, – განაცხადა გურამ მაჭარაშვილმა.

უკრაინის უმაღლეს რადაში დარეგისტრირდა პროექტი საქართველოს ყოფილი პრეზიდენტის, მიხეილ სააკაშვილის შეწყალებასთან დაკავშირებით საქართველოს პრეზიდენტ სალომე ზურაბიშვილისა და ევროკავშირის წევრი ქვეყნების პარლამენტებისადმი მიმართვის შესახებ.

პროექტის თანახმად, უკრაინის უმაღლესი რადა მოუწოდებს საქართველოს პრეზიდენტს, სალომე ზურაბიშვილს უზრუნველყოს უკრაინის უმაღლესი რადას ადამიანის უფლებათა კომისრის დმიტრო ლუბინეცის სააკაშვილთან დაშვება. ასევე, თხოვნით მიმართავს მას, სააკაშვილის მძიმე ფიზიკური მდგომარეობის გათვალისწინებით განახორციელოს ჰუმანიტარული აქტი და შეიწყალოს უკრაინის მოქალაქე მიხეილ სააკაშვილი.

დოკუმენტის თანახმად, რადა მიმართავს ევროკავშირის წევრი ქვეყნების პარლამენტებს, მიიღონ შესაბამისი გადაწყვეტილებები და რეზოლუციები საქართველოს პრეზიდენტის მიერ ჰუმანიტარული აქტის განხორციელებისა და უკრაინის მოქალაქის მიხეილ სააკაშვილის შეწყალების აუცილებლობის შესახებ.

ვაპირებთ, შეიქმნას ახალი, თავისუფალი პლატფორმა. პარტიულ ჩარჩოებში კი არ უნდა ჩავიკეტოთ, ეს უნდა მოვხსნათ. ვისაც არ მოსწონს, თავის ნომერს, სახელს მიხედოს და სხვას თავი დაანებოს, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მისივე თქმით, ახლა მთავარი პარტიული იდენტობა არ არის.

„საკითხი ისე არ დგას, პარტიული იდენტობა შევინარჩუნოთ თუ არა, რომელი პარტიით გამოვიდეთ, რომელი ნომრით. საკითხი დგას, რომ საქართველოს, რომელსაც ისტორიული შანსი აქვს, ამ შანსის დაკარგვა არ მოხდეს. ამისთვის ვაპირებთ, რომ რაღაცნაირად ახალი პლატფორმა შეიქმნას. ეს ვისაც არ მოსწონს და მისთვის მნიშვნელოვანი ნომერი, სახელია, თავის ნომერს, სახელს მიხედონ და სხვას თავი დაანებონ. ბევრი ყელმოღერებული ადამიანი მინახავს, მთას გადავდგამო და ვნახოთ, აგერ, შემოდგომაზე ვინ რას გადადგამს. საქართველოს გადარჩენის ამოცანა დგას და ვიღაცები ყელმოღერებული, ჭკვიანი სახეებით ლაპარაკობენ, იდენტობა არ დავკარგოთო. ქვეყანას ვკარგავთ და თურმე პარტიული იდენტობა ყოფილა მთავარი. გიორგი ვაშაძე და „ნაცმოძრაობის“ ახალი ხელმძღვანელობა ფიქრობენ, რომ რაღაც საკითხებზე იყოს კოორდინაცია, მათ შორის ევროპაზე, ძალადობის წინააღმდეგ, არჩევნების გაყალბების წინააღმდეგ. სიმართლე ვთქვათ, პარტიებში დიდი არჩევანიც არ არის. ამიტომ, პარტიულ ჩარჩოებში კი არ უნდა ჩავიკეტოთ, პარტიული ჩარჩო უნდა მოვხსნათ და თავისუფალი პლატფორმა იყოს, სადაც ყველა ახალი თაობის ლიდერს თავის დამკვიდრების შესაძლებლობა ექნება. გადარჩენის ამოცანის დროს პარტიული კლიშეები არ გვეხმარება და შემდეგ, როცა დემოკრატია იქნება, ვიდავოთ გემოვნებაზე. დემოკრატიამდე გადარჩენა გვჭირდება, რომ კონკურენტული გარემოება მოვიპოვოთ“, – განაცხადა პაატა მანჯგალაძემ.

როდესაც მტკიცებულების გარეშე გისანქცირებენ მოსამართლეებს, ეს არის სასამართლოს დამოუკიდებლობის პრინციპის და საქართველოს კონსტიტუციის უხეში ხელყოფა. ამის უფლებას საკუთარ თავს არავინ უნდა აძლევდეს. ჩვენ არ ვაძლევთ საკუთარ თავს ამის უფლებას, – ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა, რითაც შეაფასა აშშ-ს ელჩის, კელი დეგნანის მიერ გაკეთებული განცხადება სანქცირებულ მოსამართლეებთან დაკავშირებით.

კობახიძის თქმით, მოსამართლეების სანქცირების შესახებ მტკიცებულებები წარმოდგენილი არ არის.

„რა თქმა უნდა, ეს არის უდანაშაულობის პრეზუმფციის დადგენა. ვერც ერთი მტკიცებულება ვერ წარმოადგინეს და საბოლოო ჯამში, ითქვა, რომ რაღაც ინფორმაცია გაზეთებში ამოიკითხეს, რაც გახდა სანქცირების საფუძველი, რაც წარმოუდგენელი რამ არის. იცით, რომ მაგალითად, ჩვენ გვაქვს ძალიან მკაცრი „ორგანული კანონი“, რომელიც მათ შორის, დისციპლინურ დევნას აწესრიგებს და უმკაცრესი სტანდარტია დადგენილი იმისთვის, რომ რაიმე დისციპლინური სანქცია შეეფარდოს მოსამართლეს. როდესაც უცხო ქვეყნიდან ასანქცირებენ ქართველ მოსამართლეებს ყოველგვარი მტკიცებულების გარეშე, რა თქმა უნდა, ეს ნიშნავს პირდაპირ სასამართლოს დამოუკიდებლობის პრინციპში ჩარევას. ეს არის ძალიან უხეში ქმედება, ამაზე ჩვენ გვქონდა რეაქცია და მომავალშიც აუცილებლად გვექნება. როდესაც მტკიცებულების გარეშე გისანქცირებენ მოსამართლეებს, ეს არის სასამართლოს დამოუკიდებლობის პრინციპის უხეში ხელყოფა, საქართველოს კონსტიტუციის უხეში ხელყოფა. ამის უფლებას საკუთარ თავს არავინ უნდა აძლევდეს. ჩვენ არ ვაძლევთ საკუთარ თავს ამის უფლებას და ნუ დაგვიბრუნებენ საქართველოში იმას, რაც 2012-წლამდე იყო, ახლა, უკვე ქვეყნის გარედან. ეს არ არის სწორი. 2012-წლამდე „ნაცმოძრაობა“ იყენებდა ასეთ მეთოდებს, მტკიცებულებების გარეშე სჯიდა მოსამართლეებს და ახლა, იგივე ხდება ქვეყნის გარედა. ეს არის კატეგორიულად მიუღებელი, პრინციპულად მიუღებელი. ამაზე მომავალშიც გვექნება ძალიან მკაცრი რეაქცია“, – განაცხადა კობახიძემ.

ცნობისთვის, აშშ-ს ელჩმა საქართველოში, კელი დეგნმა სანქცირებულ ქართველ მოსამართლეებზე განაცხადა, რომ სანქციები მნიშვნელოვანი ინსტრუმენტია და როგორც კი იღებენ საკმარის სანდო ინფორმაციას კორუფციის ან სხვა უკანონო საქმიანობის შესახებ, იმოქმედებენ.

რა განსხვავებაა ხაბეიშვილსა და ვაშაძეს შორის?! მათ შორის არავითარი განსხვავება არ არის, ეს არის ერთიანი კოლექტიური „ნაცმოძრაობა“, რომელიც ერთი რამით არის გაერთიანებული და ეს არის აგენტურა, ისინი არიან უცხოური გავლენის აგენტები, ეს არის მთავარი, რაც მათ აერთიანებთ, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მისივე თქმით, „ნაციონალურ მოძრაობაში“ საკადრო შიმშილია.

„ზოგადად, ამ ყველაფრიდან ჩანს, რომ სინამდვილეში ეს ადამიანები არიან ერთი პოლიტიკური ძალა, ჩვენ ამიტომ მათ ვუწოდებთ კოლექტიურ „ნაცმოძრაობას“. რა განსხვავებაა ხაბეიშვილსა და ვაშაძეს შორის?! მათ შორის არავითარი განსხვავება არ არის, ეს არის ერთიანი კოლექტიური „ნაცმოძრაობა“, რომელიც ერთი რამით არის გაერთიანებული და ეს არის აგენტურა, ისინი არიან უცხოური გავლენის აგენტები, ეს არის მთავარი, რაც მათ აერთიანებთ. აქედან გამომდინარე, სხვაობა მათ შორის არის მხოლოდ პირობითი. ვაშაძე იქნება, გვარამია, ხაბეიშვილი, ნებისმიერი სხვა, მათ ერთიანობას გამოხატავს, ერთი კოლექტიური „ნაცმოძრაობა“, არავითარი განსხვავება მათ შორის არ არის. მეორე, ეს აჩვენებს იმას, რომ სრული დეფიციტი აქვთ, არც ერთი ლიდერი კოლექტიურ „ნაცმოძრაობაში“ არ არის. საუბარია, როგორ ხალხზე, როცა მეტი არჩევანი უკვე არა გაქვს – ხაბეიშვილი, ვაშაძე, გვარამია და ა.შ. აქედან ჩანს როგორი საკადრო შიმშილია “ნაცმოძრაობაში“, არც ინტელექტი, არც კეთილსინდისიერება, არაფერი არ მოსდგამთ იმ ადამიანებს, რომლებიც დღეს „ნაცმოძრაობის“ ხელმძღვანელობას წარმოადგენს. არავითარი შანსი არ აქვთ, ერთადერთი შანსი აქვთ, რომ არჩევნებს წააგებენ“, – განაცხადა კობახიძემ.

ასევე, ჟურნალისტებთან საუბრისას ირაკლი კობახიძე, „ნაციონალური მოძრაობის“ თავმჯდომარის, ლევან ხაბეიშვილის მარტვილში ვიზიტს გამოეხმაურა და აღნიშნა, რომ „რაც მეტს ივლის ხაბეიშვილი რეგიონებში, მით უკეთესი, იმიტომ, რომ კარგად გამოჩნდება კოლექტიური „ნაცმოძრაობის“ აგენტურის სახე“.

„ასე ვთქვათ, ხაბეიშვილის გამარჯვება საოცრებაა, ეს ერთგვარი ოქსიმორონია, რაც შეეხება ჩემს დამოკიდებულებას წინა შემთხვევის დროსაც, როდესაც ხაბეიშვილს დაუპირისპირდნენ სამოქალაქო აქტივისტები, მე ვთქვი, რომ ეს არ არის სწორი, ეს არ არის მიზანშეწონილი, არ შეიძლება ხაბეიშვილი ხელოვნურად აქციო მნიშვნელოვან ფიგურად. რაც მეტს ივლის ხაბეიშვილი რეგიონებში, მით უკეთესი, არა თუ ხელი უნდა შეუშალოს ამას ვინმემ, პირიქით მეტად უნდა შევუწყოთ ხელი ხაბეიშვილის სიარულს რეგიონებში. იმიტომ, რომ კარგად გამოჩნდება ამ აგენტურის სახე, კოლექტიური „ნაცმოძრაობის“ აგენტურის სახე. აქედან გამომდინარე, კიდევ ერთხელ მოვუწოდებ ნებისმიერ ადამიანს, სამოქალაქო აქტივისტს, ჩვენს მხარდამჭერებს და ა.შ. პირიქით, რაც შეიძლება მეტი გასაქანი მისცენ ხაბეიშვილს, რომ მეტი იაროს რეგიონებში, მეტად წარმოაჩინოს „ნაცმოძრაობის“ ნამდვილი სახე“, – განაცხადა კობახიძემ.