სააკაშვილი უკვე ციხეშია და საჭიროებას ვერ ვხედავ, რომ მისი გადაყვანა მოხდეს, – ამის შესახებ „გირჩის“ წევრმა, ალექსანდრე რაქვიაშვილმა განაცხადა.

მისი თქმით, ეს არის ჩვეულებრივი პრიმიტიული პოზიციონირების ამბავი „ნაც-ქოცურ“ კოორდინატებში.

„მიხეილ სააკაშვილი ყველა ვარიანტში ციხეში ზის. ის, რომ ეს ტექნიკურად ორი ოთახისგან შედგება და არა ერთისგან, სიტუაციას საერთოდ არ ცვლის. რაც მთავარია, ამის გამო არავინ წუხს და პრობლემა არ არის, მათ შორის „ქართული ოცნებისთვის“. ხელისუფლებისთვის თუ არ არის პრობლემა, გახარიას რატომ დააინტერესა? – ეს არის ჩვეულებრივი პრიმიტიული პოზიციონირების ამბავი „ნაც-ქოცურ“ კოორდინატებში, რომ ახლა ცოტა „ნაცებისკენ“ გადავიხარე და მოდით, „ქოცებისკენ“ გადმოვიდეთო. ასეთი რამ ყველა პარტიას სჭირს, როცა არ აქვს მკაფიო პოზიცია გარკვეულ საკითხებზე. მათი მესმის, მაგრამ ჩვენ მოგვბაძონ და პოზიცია ჩამოაყალიბონ, მაშინ არ შეეშინდებათ არც „ნაცებთან“ და არც „ქოცებთან“ დაახლოების“, – განაცხადა რაქვიაშვილმა.

დარწმუნებული ვართ, გარანტირებულად შემიძლია ვთქვა, რომ უკრაინასა და მოლდოვაზე ადრე შევალთ ევროკავშირში, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

ამასთან, კობახიძე ვარაუდობს, რომ საქართველოსთან ევროკავშირში გაწევრიანების შესახებ მოლაპარაკებები 2024 წელს დაიწყება.

„მე ჩემი პოზიცია შემიძლია გითხრათ, არ იქნება 2024 წელს, იქნება 2025-ში, თუმცა ჩვენ ვფიქრობთ, რომ 2024 წელს უნდა იქნას ეს გადაწყვეტილება მიღებული. ჩვენ შარშანაც გვეკუთვნოდა მოლაპარაკების გახსნა, არათუ კანდიდატის სტატუსის მიღება, თუმცა პოლიტიკური საკითხია და ამაში ჩვენ ღრმად ვერ შევალთ. მიგვაჩნია, რომ შარშანაც გვეკუთვნოდა მოლაპარაკების გახსნა, მით უმეტეს გვეკუთვნის 2024 წლის დეკემბერში. იმედი გვაქვს, მიღებული იქნება სამართლიანი გადაწყვეტილება. ჩვენ დავამტკიცეთ, როგორი ტურბულენტური პოლიტიკური პროცესებიც არ უნდა გავიაროთ, საბოლო ჯამში, ვახერხებთ მიზნის მიღწევას და ეს კარგად გამოჩნდა კანდიდატის სტატუსის შემთხვევაში. იყო რთული პროცესი, მაგრამ ეს პროცესები მივიყვანეთ წარმატებამდე, კანდიდატის სტატუსის მიღებამდე და იგივე დაპირება შეგვიძლია, გავცეთ საზოგადოების მიმართ მოლაპარაკების გახსნასთან დაკავშირებით. როდის იქნება, ეს არის ცალკე საკითხი, მოლაპარაკებები აუცილებლად გაიხსნება, როცა იქნება და ჩვენ დარწმუნებული ვართ, გარანტირებულად შემიძლია გითხრათ, რომ უკრაინასა და მოლდოვაზე ადრე შევალთ ევროკავშირში.

კანდიდატის სტატუსი არ მოგვენიჭა შარშან, მაგრამ მოგვენიჭა წელს. არაფერი შეცვლილა პრაქტიკაში. გაწევრიანებას რაც შეეხება, გაწევრიანების თარიღზე ეს ყველაფერი არავითარ შემთხვევაში არ მოქმედებს. ყოველ ჯერზე ჩვენ უფრო გვიან ვიღებდით კონკრეტული პროცესების დაწყებას ევროკავშირისგან, ვიდრე უკრაინა და მოლდოვა. მაგალითად, ჩვენ შემთხვევაში, უფრო გვიან დაიწყო მოლაპარაკებები ასოცირების შეთანხმების გაფორმების თაობაზე, DCFTA-ს გაფორმების, ვიზალიბერალიზაციის თაობაზე, მაგრამ სამივე შემთხვევაში, დავასწარით უკრაინას და მოლდოვას. რატომ? ერთია პოლიტიკური გადაწყვეტილებები, მაგრამ საბოლო ჯამში, ყველა ხედავს, რომ საქართველო ბევრად უსწრებს როგორც უკრაინას, ისე მოლდოვას, მით უმეტეს, ამ მძიმე პროცესების შემდეგ, რაც წარიმართა უკრაინაში და რაც ასევე გავრცელდა დიდწილად მოლდოვაზე ეკონომიკური კუთხით. ჩვენ ვართ ბევრად წინ ყველა თვალსაზრისით – დემოკრატიის, ადამიანის უფლებების, ეკონომიკის. ყველა მიმართულებით ვართ ბევრად წინ, ათჯერ უფრო წინ, ვიდრე უკრაინა და მოლდოვა. ასეთ პირობებში, მართალია, მათზე გვიან მოგვენიჭა კანდიდატის სტატუსი, მაგრამ დარწმუნებული ვართ, მათზე ბევრად ადრე შევალთ ევროკავშირში“, – განაცხადა კობახიძემ.

სააკაშვილი დროდადრო ცდილობს, გაითამაშოს დემენცია, რაც სინამდვილეში არ სჭირს, მაგრამ პერიოდულად ცდილობს, გაითამაშოს. არასერიოზულია ეს ყველაფერი, – ამის შესახებ პარტიაში გამართულ ბრიფინგზე პარტიის თავმჯდომარე ირაკლი კობახიძემ განაცხადა.

„სუპერ პაკ-ს რაც შეეხება, მათი პარტია „ნაციონალური მოძრაობა“ ჩამოსულია 20 პროცენტს ქვემოთ, სადღაც 15% არიან. ეს არის მათი სუპერ პაკ-ი. ხაბე, კეზერას, სააკაშვილის სუპერ პაკ-ი“, – აღნიშნა კობახიძემ.

ამასთან, ჟურნალისტებმა კობახიძეს ჰკითხეს პარტია „საქართველოსთვის“ განცხადებაზე, სადაც ხელისუფლებას მოუწოდებს, მიხეილ სააკაშვილი საპატიმროში გადაიყვანოს.

„მე ვერ გაგცემთ პასუხს. ეს არის შესაბამისი უწყებების საქმე. მგონია, რომ სააკაშვილს აქვს ჭარბი კომფორტი, რადგან მას არ ეკუთვნის ობიექტურად საავადმყოფოში ყოფნა. ასე მგონია, გამომდინარე იქიდან, რომ მას არავითარი დაავადება არ აქვს. აქედან გამომდინარე, ეს არის ჩემი შეფასება, თუმცა შესაბამისი უწყებები იღებენ ამასთან დაკავშირებით გადაწყვეტილებებს. შესაბამისად, მე არ მაქვს კომპეტენცია, ამ კითხვაზე პასუხი გაგცეთ“, – განაცხადა ირაკლი კობახიძემ.

რადიკალური ოპოზიცია მძიმედ წააგებს არჩევნებს. მათ არავითარი რესურსი არ აქვთ, ძალაუფლება დაიბრუნონ არჩევნებით ან ქუჩით, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

კობახიძის თქმით, ოპოზიციის მცდელობა წარუმატებლობისთვის იქნება განწირული.

„დღეს ყველა ხვდება, რომ რადიკალური ოპოზიცია, ზოგადად, ოპოზიცია მძიმედ წააგებს არჩევნებს. აქედან გამომდინარე, აბსოლუტურად ლოგიკურია საუბარი იმაზე, რომ ისინი კიდევ ერთხელ ეცდებიან იმავე სცენარის განვითარებას, რაც განავითარეს 2020 წლის საპარლამენტო არჩევნების შემდეგ. მათ სხვა გზა, სხვა არჩევანი არც აქვთ. სინამდვილეში, ესეც არ არის მათი არჩევანი. მათ არავითარი რესურსი არ აქვთ, ან არჩევნებით დაიბრუნონ ძალაუფლება, ან ქუჩით. საბოლოო ჯამში, არჩევნებსაც და ქუჩასაც სჭირდება ერთი და იგივე რესურსი, ხალხის მხარდაჭერა. როცა ხალხი მხარს არ გიჭერს, ბუნებრივია, ვერც არჩევნებს მოიგებ და ვერც რევოლუციას მოაწყობ. აქედან გამომდინარე, მცდელობა იქნება, თუმცა განწირულია ფიასკოსთვის, წარუმატებლობისთვის.

რაც შეეხება მოლაპარაკებების გახსნის თემის გამოყენებას ამ მიზნებისთვის, თეორიულად ყველაფერი შეიძლება, დანარჩენი ვნახოთ. როგორც წინა შემთხვევაში, ვერცერთხელ მოახერხეს ვერც რევოლუციის მოწყობა, ვერც არსებითად ვითარების არევა ქვეყანაში, ასე გააგრძელებენ მომავალშიც. არავითარი რესურსი არ აქვთ, ქვეყანაში მოაწყონ არეულობა და რევოლუცია“, – განაცხადა ირაკლი კობახიძემ.

ევრორეკომენდაციების შესაბამისად, ჩამოვაყალიბეთ ძლიერი ანტიკორუფციული ბიურო, რომელიც არის ძალიან აქტიური, თანამშრომლობაზე, კონსულტაციებზე, მონიტორინგზე ორიენტირებული. ის აქტიურად შეუდგა საქმიანობას, რასაც ანგარიშიც ადასტურებს, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

არჩილ თალაკვაძის თქმით, საქართველოს ხელშესახები გაუმჯობესება აქვს ყველა საერთაშორისო ანტიკორუფციულ რეიტინგში.

„საქართველოს ხელშესახები გაუმჯობესება აქვს ყველა საერთაშორისო ანტიკორუფციულ რეიტინგში, ასევე შიდა კვლევებშიც ჩანს, რომ საზოგადოება ხედავს ამ ძალისხმევას. კორუფციასთან ბრძოლა არის მუდმივი პროცესი, არავის შეუძლია, თქვას, რომ ეს ბრძოლა დასრულდა. ამას სჭირდება მუდმივი ძალისხმევა. რა თქმა უნდა, ანტიკორუფციული მიმართულებით აღმასრულებელ ხელისუფლებას, ანტიკორუფციულ ბიუროს ყველა სამსახურს პარლამენტის მხრიდან ძლიერი საკანონმდებლო მხარდაჭერა აქვს. მინდა, ჩვენს კოლეგებს წარმატებები ვუსურვო. ეს არა მხოლოდ ჩვენი მოქალაქეების აღქმებს, არა მხოლოდ საერთაშორისო რეიტინგებს, არამედ ჩვენი ქვეყნის მიმართ ნდობას, საინვესტიციო გარემოს და ეკონომიკურ ზრდასაც უკავშირდება. სწორედ ამიტომ, ძალიან მნიშვნელოვანია ამ მიმართულებით შემდგომი პროგრესი“, – განაცხადა არჩილ თალაკვაძემ.

ამასთან მედიის წარმომადგენელმა თალაკვაძეს მიმართა, „ვენეციის კომისიას ბევრი კითხვა აქვს. ამბობენ, რომ საკმარისი არ არის, რა ფორმითაც არსებობს ანტიკორუფციული ბიურო, უნდა აირჩეს მრავალპარტიულად. კითხვის ნიშნები აქვთ იმაზე, რომ პრემიერი ნიშნავს მის ხელმძღვანელს და ბერკეტი აქვს, გაათავისუფლოს მისი ხელმძღავანელი“, ანტიკორუფციულ ბიუროს არ აქვს საგამოძიებო ფუნქცია, მზად ხართ თუ არა, ამ მიმართულებით გაატაროთ რეფორმები, რაზეც თალაკვაძემ აღნიშნა:

„უტრირებულია ასეთი ინტერპრეტაცია, რომ მრავალი კითხვა არის. არ არის მრავალი კითხვა, არის ერთი რეკომენდაცია, რომელიც ხელმძღვანელის დანიშვნას უკავშირდება. ამ კუთხით საქართველოს აქვს იგივე პრაქტიკა, რაც აპრობირებულია ევროკავშირის მასშტაბით. არის სხვადასხვა მოდელი, მაგრამ დღევანდელ ანგარიშშიც გამოჩნდა, რისი გაკეთება შეუძლია და რას აკეთებს ანტიკორუფციული ბიურო. ეს არის ამ სამსახურის საქმიანი პასუხი კრიტიკაზე თუ რეკომენდაციებზე. რა თქმა უნდა, ოპოზიციას საერთოდ არ აინტერესებს, რომელია უკეთესი მოდელი, მათ აქვთ ერთადერთი ინტერესი, როგორმე ხელისუფლებაზე მიიღონ ბერკეტები დაუმსახურებლად, დაბლოკონ პროცესი და ამით ხელი შეუშალონ ხელისუფლებას საქმიანობაში. ეს გამოჩნდა არჩევნების დროსაც, ეს გამოჩნდა საარჩევნო ადმინისტრაციის დაკომპლექტებაში, ევრორეკომენდაციების შესრულებაში, როცა კანდიდატის სტატუსს ბლოკავდნენ. ახლაც იგივე მიდგომა აქვთ საქმესთან. არჩევნებს როდესაც აგებენ, უნდათ, რომ საარჩევნო ყუთის გვერდის გავლით როგორმე მოიპოვონ გავლენები ხელისუფლებაზე. სინამდვილეში, ოპოზიცია თანამშრომლობაზე რომ ყოფილიყო ორიენტირებული, რა თქმა უნდა, არც ეს რეკომენდაცია იქნებოდა. მათ უნდა იცოდნენ, რომ შერჩევის პროცესი იყო გამჭვირვალე, საქმიანობა არის გამჭვირვალე და დღევანდელმა ანგარიშმა ეს დაადასტურა. ჩვენ უკვე შევქმენით ეს სამსახური, მექანიზმი არსებობს, ის მუშაობს, ასე რომ, უახლოეს მომავალში მისი გადახედვა არ იგეგმება“, – განაცხადა არჩილ თალაკვაძემ.

„ქართული ოცნება“ 30 დეკემბერს პარტიის ყრილობას გამართავს. შესაბამისი გადაწყვეტილების შესახებ პარტიის პოლიტსაბჭოს სხდომის შემდეგ „ქართული ოცნების“ თავმჯდომარე ირაკლი კობახიძემ განაცხადა.

„პოლიტსაბჭოს გადაწყვეტილებით, 30 დეკემბერს გაიმართება პარტიის ყრილობა 350-მდე დელეგატის მონაწილეობით. ყრილობაზე სამუშაო რეჟიმში განხილული იქნება საერთო პოლიტიკური და 2024 წლის საპარლამენტო არჩევნებისთვის მომზადებასთან დაკავშირებული საკითხები“, – განაცხადა კობახიძემ.