კვერცხის სროლა ყოფილა ბარბაროსობა და ჩვენი ისტორიული, ძირძველი კუთხეების მიწასთან გასწორებას რა ჰქვია მაშინ? – ესაა ღირსების საკითხი და ზურაბ აბაშიძე თავად უნდა გადადგეს,- ასე ეხმაურება  “სტრატეგია აღმაშენებლის” წევრი პაატა მანჯგალაძე,  გავრცელებულ ჩანაწერს,  რომელშიც, სავარაუდოდ, ფიგურირებენ რუსეთთან ურთიერთობის საკითხებში პრემიერ-მინისტრის მრჩეველი ზურაბ აბაშიძე და მარკ ზილბერკვიტი, რომელიც ვლადიმერ პოზნერს თბილისში ვიზიტის დროს ახლდა, რასაც პროტესტი მოჰყვა.

მანჯგალაძის განცხადებით, ამით ხელისუფლების ლუსტრირება კიდევ ერთხელ მოხდა.

„აბაშიძეზე ამბობენ, რომ გამოცდილი დიპლომატია, რას ახმარს მის დიპლომატიას – საქართველოს ინტერესის გატარებას, თუ რუსეთის ინტერესს? კვერცხის სროლას ეძახის ბარბაროსობას და არ გახსენებია ცხინვალი და გასწორებული თამარაშენი.

რუს პროპაგანდისტებს კვერცხის სროლის გამო უხდის ბოდიშს, ბოდიში მოიხადოს 8-9-10 აგვისტოს დაღუპული გმირი ბიჭების მშობლების წინაშე. კვერცხის სროლა ყოფილა ბარბაროსობა და ჩვენი ისტორიული, ძირძველი კუთხეების მიწასთან გასწორებას რა ჰქვია მაშინ? ღარიბაშვილის წარმომადგენელია და მის ინტერესს გამოხატავდა, როცა პრემიერი ისეთი გვყავს, “რასაც გინდა დაუძახებ”, არ მიკვირს აბაშიძის დამოკიდებულება. ეს არის ღირსების საკითხი, თვითონ უნდა გადადგეს. რისთვის იხდიდა ბოდიშს- ელარჯის გაწელვა რომ ბოლომდე არ დააცადეს? ეს არის ლუსტრაცია იმ რუსული საქმის, რასაც “ქართული ოცნება” ემსახურება,”- განაცხადა მანჯგალაძემ.

Youtube-ზე გავრცელდა აუდიოჩანაწერი, რომლის თანახმად, სავარაუდოდ, რუსეთთან ურთიერთობის საკითხებში პრემიერ-მინისტრის მრჩეველი ზურაბ აბაშიძე საუბრობს ჩაიკოვსკის საქველმოქმედო ფონდის პრეზიდენტ მარკ ზილბერკვიტთან, რომელიც ვლადიმერ პოზნერს თბილისში ახლდა.

ჩანაწერის თანახმად, აბაშიძე მათ, ვინც პოზნერის თბილისში ვიზიტი გააპროტესტა, „ნაცისტების ჯგუფს“ უწოდებს. ჩანაწერი, რომლის ავთენტურობაც დადასტურებული არ არის, 2021 წლით არის დათარიღებული.

საქართველოს პრეზიდენტი სალომე ზურაბიშვილი აცხადებს, რომ მიწვევის შემთხვევაში, მზად არის, უკრაინაში ჩავიდეს.

ამის შესახებ სალომე ზურაბიშვილმა უკრაინულ გამოცემა „უკრაინსკაია პრავდასთვის“ მიცემულ ინტერვიუში განაცხადა.

ჟურნალისტმა პრეზიდენტს ჰკითხა, რატომ არ ჩავიდა ის უკრაინაში ვიზიტით ომის დაწყების შემდეგ.

„ყოველთვის მზად ვიყავი ჩამოსვლისთვის და დღესაც მზად ვარ. ასე რომ, თუ ქვენ გადასცემთ შეტყობინებას, შემიძლია, უკვე ხვალ ჩამოვიდე“, – აღნიშნა პრეზიდენტმა.

კითხვაზე – „მისი აზრით, რატომ არ მიიწვია ის ვოლოდიმირ ზელენსკიმ“, სალომე ზურაბიშვილმა აღნიშნა: „ეს არ არის პირადი, და მე ვფიქრობ, რომ ეს არის ის, რაც ჩვენ აღვწერეთ, როგორც სამთავრობო წრეებს შორის მოცემულ ეტაპზე არადამაკმაყოფილებელი ურთიერთობები. ამიტომ, გარკვეული თვალსაზრისით, მე ვგრძნობ ამის შედეგებს, თუმცა მზად ვარ და დარწმუნებული ვარ, რომ ასეთი შესაძლებლობა გვექნება. ვიმედოვნებ, რომ ასეთი შემთხვევა გაჩნდება ყირიმის პლატფორმაზე

გასულ წელს ევროპელმა ლიდერებმა გადაწყვიტეს, მიეცათ საქართველოსთვის ევროპული პერსპექტივა. ისინი ასევე შეთანხმდნენ 12 პრიორიტეტზე, 12 საკითხზე, სადაც საქართველომ უნდა გაზარდოს რეფორმები, ეს არის სამუშაო პროცესი, ძალიან ბევრი რამ უკვე გაკეთდა, – ამის შესახებ საქართველოში ევროკავშირის ელჩმა, პაველ ჰერჩინსკიმ განაცხადა.

როგორც ჰერჩინსკი აცხადებს, ევროკავშირში იმედს გამოთქვამენ, რომ საქართველოს დიდი პროგრესი ექნება 12 რეკომენდაციის შესრულების გზაზე.

„მსურს, მივულოცო მთავრობას ბევრი რეფორმა, ბევრი გადაწყვეტილება, რომელიც უკვე მიღებულია, მაგრამ სხვა გადაწყვეტილებები ჯერ კიდევ მოსალოდნელია. ჩვენ გულწრფელად ვიმედოვნებთ, რომ ვნახავთ პროგრესს. ვიმედოვნებთ, რომ მაქსიმალურად დიდი პროგრესი იქნება მიღწეული 12 პრიორიტეტზე. ამავე დროს ჩვენ გვჭირდება, პოზიტიური და კონსტრუქციული ამბები მოდიოდეს საქართველოდან. ჩვენ გვჭირდება ევროკავშირის ინსტიტუტებში საქართველოს აღქმის გაუმჯობესება, ასევე 27 წევრ ქვეყანაში. ეს ჩვენი საერთო ამოცანაა და, ჩვენი მხრივ, ვეცდებით, ვიმუშაოთ საქართველოს ხელისუფლებასთან, დავეხმაროთ მთავრობას პოზიტიური ატმოსფეროს შესაქმნელად 12 პრიორიტეტის შესრულების საფუძველზე, ასევე საქართველოს საერთო აღქმის საფუძველზე“, – განაცხადა ელჩმა.

ჩვენ კეთილსინდისიერად ვახორციელებთ ამ ევრორეკომენდაციებს. ჩვენ წილ პასუხისმგებლობას ვიღებთ, ჩვენს შრომას გავწევთ და ამას მოსახლეობა დაინახავს, – ამის შესახებ პარლამენტის თავმჯდომარემ შალვა პაპუაშვილმა განაცხადა.

როგორც შალვა პაპუაშვილმა აღნიშნა, არის გარკვეული სქემები უცხოეთიდან ქართული რადიკალური პოლიტიკური ძალების დაფინანსების.

მისი თქმით, დროა ყველაფერს თავისი სახელი დაერქვას და ყველა დონორი ორგანიზაცია, ვინც ქართულ პოლიტიკაში დესტრუქციის შემოტანით არის დაკავებულია, ამ განზრახვაზე ხელი აიღოს.

„გადაწყვეტილება კანდიდატის სტატუსზე უარყოფითი იქნება თუ დადებითი, ამას მოსახლეობისთვის მნიშვნელობა იმ მხრივ არ იქნება, რომ მთავარია, დავინახოთ, რომ საქართველო, ხელისუფლება იყოს პატიოსანი თავის მიდგომებში. თუ გადაწყვეტილება უარყოფითი იქნება, როგორც შარშან იყო უსამართლო, ესეც იქნება არამხოლოდ უსამართლო გადაწყვეტილება, არამედ უკვე ეცოდინება ევროკავშირს, რომ ამით აძლევს იარაღს საქართველოში რადიკალიზმს. ვხედავთ, რომ ჯგუფებს ამზადებენ, ხდება პროვოკაციების ტესტირება. „მოლოტოვის კოქტეილებიც“ ამის შემადგენელი ნაწილია, ასევე, ის სემინარებიც, სადაც იარაღს ატრიალებენ და რევოლუციაზე საუბრობენ, ამის შემადგენელია. ეს არის, ასე ვთქვათ, გარკვეული გაშლილი ფრონტი, სადაც ხდება ძალადობის კულტივირება, აგრესიის დაგროვება, ჩვენება იმისთვის, რომ საქმე საქმეზე რომ მიდგება, აღარ იყოს გაუცხოება იარაღის მიმართ და როგორც „მოლოტოვის კოქტეილს“ დაავლო ვიღაცამ ხელი და ესროლა ადამიანს და წვავდა, ასე დაავლოს ამ იარაღს ხელი, როცა მიაჩეჩებენ, და მოკლას ადამიანი. ამისკენ მიჰყავთ ყველაფერი. ამას სჭირდება დროული რეაგირება, რადგან მერე უკვე გვიანი იქნება. მერე. როდესაც ეს „მოლოტოვის კოქტეილით“ დაზიანებული ადამიანი მხოლოდ დაზიანებით კი არ გამოვა, უარესი შედეგი დაგდება, გვიანი იქნება ჩვენი საზოგადოებისთვის. დროა, დღესვე დავარქვათ ყველაფერს თავისი სახელი. უცხოურ ფულს საქართველოს პოლიტიკაში არაფერი ესაქმება და ჩვენ ვხედავთ, რომ არის გარკვეული სქემები უცხოეთიდან ქართული რადიკალური პოლიტიკური ძალების დაფინანსებისა და ამას ახლავე უნდა შეეშვას ყველა დონორი ორგანიზაცია, ვინც კი ამ პროცესშია ჩართული“, – განაცხადა შალვა პაპუაშვილმა გადაცემა „იმედი LIVE“-ში.