მიხეილ სააკაშვილს ქართულ პოლიტიკაში მონაწილეობის მიღების სამართლებრივი შესაძლებლობა არ გააჩნია და არაფორმალურ მმართველობას ნაჩვევი „ნაციონალური მოძრაობა“ რას გააკეთებს, მათი გადასაწყვეტია და საერთოდ არაა საინტერესო, გულწრფელად რომ გითხრათ, – ამის შესახებ საქართველოს იუსტიციის მინისტრმა, რატი ბრეგაძემ ქვეყნის მესამე პრეზიდენტის, მიხეილ სააკაშვილის ქართულ პოლიტიკაში შესაძლო დაბრუნებასთან დაკავშირებით განაცხადა.

მისივე თქმით, მიხეილ სააკაშვილი ქართულ პოლიტიკაში მონაწილეობას ვერ მიიღებს, რადგან მას საქართველოს მოქალაქეობა არ აქვს.

„თუ პირს უნდა, რომ მონაწილეობა მიიღოს ქართულ პოლიტიკაში, მას აუცილებლად უნდა ჰქონდეს საქართველოს მოქალაქეობა, წინააღმდეგ შემთხვევაში, ის ვერ მიიღებს ქართულ პოლიტიკაში მონაწილეობას. მიხეილ სააკაშვილს არ აქვს საქართველოს მოქალაქეობა, ამიტომ, თუ მას უნდა, რომ იყოს ქართულ პოლიტიკაში, უნდა მიიღოს საქართველო მოქალაქეობა. ამ საკითხებზე, რა თქმა უნდა, საბოლოო გადაწყვეტილებას საქართველოს კონსტიტუციის თანახმად, საქართველოს პრეზიდენტი იღებს. შესაბამისად, მე ამ საკითხზე გამიჭირდება სამართლებრივი კომენტარის გაკეთება. რაც შეეხება ჩემს პიროვნულ დამოკიდებულებას ამ საკითხთან დაკავშირებით, აუცილებლად გეტყვით, რომ როდესაც ადამიანი არის სახელმწიფოს მეთაური, მთავარსარდალი და საკუთარი ქვეყნის მოქალაქეობას დატოვებს, სხვა სახელმწიფოს მოქალაქეობას მიიღებს და სხვა სახელმწიფოს სამსახურში ჩადგება, მე ვფიქრობ, რომ უმჯობესი იქნება, რომ ის იყოს მხოლოდ იმ სახელმწიფოს მოქალაქე, რომლის სამსახურშიც ჩადგა,“ – განაცხადა ბრეგაძემ.

ამასთან, მინისტრმა კიდევ ერთხელ აღნიშნა, რომ, როდესაც ექიმები რეკომენდაციას გასცემენ, მიხეილ სააკაშვილს პენიტენციურ დაწესებულებაში გადაიყვანენ.

„ეს ადამიანი არის პატიმარი და შესაბამისად, როდესაც შესაბამის ფიზიკურ მდგომარეობაში იქნება, პენიტენციურ დაწესებულებაში იქნება [გადაყვანილი]. აქ არაფერი გასაკვირი არ არის,“ – განაცხადა მინისტრმა.

ჩვენ გაგვწირა ყველამ, ვინც მიხეილ სააკაშვილს მფარველობდა, ვინც მას ხელს ართმევდა, თანამდებობაზე ნიშნავდა და ვინც დამნაშავესთან ერთად კონფერენციებზე იდგა – რომ არა ჩვენი უსაფრთხოების სამსახურის დროული და პროფესიული რეაგირება, რომელმაც სააკაშვილი დროულად დააკავა, არავინ იცის საქართველოს სხვადასხვა ქალაქის ქუჩებში დღეს რა მდგომარეობა იქნებოდა, ვისი ტყვია გაისროდა და ვისი ტანკი იდგებოდა, – ეს განცხადება პარლამენტში, პარლამენტის თავმჯდომარემ შალვა პაპუაშვილმა გააკეთა.

პაპუაშვილმა რამდენჯერმე აღნიშნა, რომ საქართველო არეულობისათვის გასწირა ყველამ, ვინც მიხეილ სააკაშვილს ხელს ართმევდა და ერთადერთი, ვინც ქვეყანა გადაარჩინა, სახელმწიფო უსაფრთხოების სამსახურია.

“მიხეილ სააკაშვილი წლები ქართულ პოლიტიკას არ ეშვებოდა. მათ შორის საზღვარგარეთიდან ის პირდაპირ იყო ჩართული რადიკალიზმის გაღვივებაში. სამწუხაროდ, სასჯელმისჯილი ადამიანი თავისუფლად გადაადგილდებოდა ევროკავშირის ტერიტორიაზე, უკრაინაში ერთ-ერთი მაღალჩინოსანი იყო, დადიოდა ბრიუსელში სხვადასხვა კორიდორებში. მიუღებელია, როცა ხელს სისხლის სამართლის დამნაშავეს ართმევენ და სხვადასხვა ღონისძიებაზე პატიჟებენ. ამ დაუდევრობამ მიგვიყვანა იქამდე, რომ მიხეილ სააკაშვილი იმ აზრამდე მივიდა, რომ საქართველოში ჩუმად შემოპარულიყო და სიტუაცია აეყირავებინა.

ყველამ იმ ადამიანმა, ქართველმა თუ უცხოელმა, ვინც მიხეილ სააკაშვილს ხელს ართმევდა მაშინ, როცა ის დამნაშავედ იყო ცნობილი, ქართველი ხალხი არეულობისათვის გასწირა“, – განაცხადა შალვა პაპუაშვილმა.

მიმაჩნია, რომ სააკაშვილი არასდროს არ წასულა ქართული პოლიტიკიდან, მიუხედავად მისი სამარცხვინო განცხადებებისა და სამარცხვინო გამოსვლებისა, შეგახსენებთ, იგი ერთ-ერთ სასამართლო პროცესზე წარსდგა, როგორც უკრაინის მოქალაქე და მოითხოვა უკრაინული ენის თარჯიმანი, რათა ესაუბრა უკრაინულ ენაზე, – ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებთან საუბრისას განაცხადა.

პრემიერის თქმით, ამაზე მეტი დეგრადაცია და დაცემა ქართველი პოლიტიკოსის, მითუმეტეს ქვეყნის ყოფილი პრეზიდენტის, მგონი მსოფლიოს ისტორიას არ უნახავს.

„სააკაშვილმა რაც ჩაიდინა ბოლო პერიოდში და მას შემდეგ, რაც ციხეში შევიდა, მთელი ეს შოუ, მასკარადი, თეატრი, ცირკი, რაც დაგვიდგა, ამის შემდეგ რაც ის აღვირახსნილი, ქვეყნის იმიჯის დამაზიანებელი კამპანია აწარმოა მან, მისმა ოჯახმა და მისმა ლობისტებმა, ამისთვის ყოველ დღე უნდა მოუხადონ ბოდიში ჩვენს სახელწმიფოს და ჩვენს საზოგადოებას. ხომ ვნახეთ ყველამ, რომ ეს ადამიანი არც არავის არ მოუწამლავს, არც კვდებოდა, არაფერი არ ხდებოდა. ეს იყო ჩვეულებრივი, მარტივი სპექტაკლი. ჩვენ ამას ვუხსნიდით საზოგადოებას, არა მხოლოდ ქვეყნის შიგნით, არამედ ქვეყნის გარეთაც, რომ ეს იყო თამაში და სპეკულაციები. ამდენი ხნის შემდეგ და მას შემდეგ, რაც მან საბოლოოდ მიიღო უარი სტრასბურგის სასამართლოდან, რომ შეწყვიტოს ეს თამაში, სპეკულაცია და სიმულაციები, ამის შემდეგ გადაწყვიტა, რომ არის კარგად. მგონი საზოგადოების არცერთ წევრს დღეს უკვე ქვეყანაში და ქვეყნის გარეთ კითხვები აღარ რჩება. სააკაშვილის თემაზე მე საუბარი არ მინდოდა, მაგრამ ვინაიდან მკითხეთ, ერთი პასუხი მინდა ვთქვა. ვფიქრობ, მისმა ლობისტებმა და არა მხოლოდ ლობისტებმა, არამედ, მათ შორის, ევროპელმა პოლიტიკოსებმა, ამერიკის ზოგიერთმა წარმომადგენელმა, რომლებიც ჩართულნი იყვნენ, ყოფილი წარმომადგენლები და ლობისტები და ბევრი ადამიანის გამონათქვამი ვნახეთ ჩვენ, რომლებიც იცავდნენ მის ამ სპექტაკლს, მე ვფიქრობ, რომ ბოდიში უნდა მოუხადონ ჩვენს საზოგადოებას და სახელმწიფოს იმ ზიანისთვის, რომელიც მათ მიაყენეს მთელს მსოფლიოში. ის აღვირახსნილი კამპანია, რაც მიმდინარეობდა სხვადასხვა მედიასაშუალებებით, რომ ჩვენ მოვწამლეთ, ვაწამებთ, მოვკალით, გადარჩა, ამ ყველაფერზე, ამ დიდ ბინძურ კამპანიაზე ძალიან სამართლიანი, მკაფიო პასუხი გასცა სტრასბურგის სასამართლომ, რითაც დაასრულა ეს მასკარადი”, – განაცხადა ირაკლი ღარიბაშვილმა.

ბატონი გვარამიას საკითხი არ არის მთავრობის საკითხი, მისი საკითხი არის გადაცემული სასამართლოში, გამოძიების საკითხი იყო – ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებთან საუბრისას განაცხადა.

როგორც პრემიერ-მინისტრმა აღნიშნა, ნებისმიერ საკითხზე ორ ადამიანს შორის შემდგარი ნებისმიერი საუბარი, გარეთ არ გამოდის, თუ ეს არ არის გავრცელებული პრესრელიზში ან განცხადებაში.

„მე არაერთი საუბარი მქონია ჩვენს ევროპელ ლიდერებთან და ბევრ ადამიანთან. თქვენ კითხვას რომ მისვამთ, იყო თუ არა საუბარი, მე მგონი არაეთკურია. ორ ადამიანს შორის შემდგარი ნებისმიერი საუბარი, ნებისმიერ საკითხზე, გარეთ არ გამოდის, თუ ეს არ არის გავრცელებული პრესრელიზში ან განცხადებაში. აქედან გამომდინარე, მე შემდეგი პასუხი მაქვს ბატონ გვარამიასთან დაკავშირებით. ბატონი გვარამიას საკითხი არ არის მთავრობის საკითხი. მისი საკითხი არის გადაცემული სასამართლოში, გამოძიების საკითხი იყო”,- განაცხადა ირაკლი ღარიბაშვილმა.