“რუსულმა ოცნებამ” გადასარევად იცის, რა ევალება დღეს საქართველოს ხელისუფლებას იმისთვის, რომ საქართველო იყოს წარმატებული, მიიღოს კანდიდატის სტატუსი. არაერთხელ დაუმარცვლეს ევროკომისიაში, ევროპარლამენტში, – ასე გამოეხმაურა „ნაციონალური მოძრაობის“ წევრი თინათინ ბოკუჩავა „ქართული ოცნების“ თავმჯდომარის, ირაკლი კობახიძის განცხადებას, რომლის მიხედვითაც, ევროკავშირის რეკომენდაციების კონკრეტული პუნქტების შესასრულებლად საჭიროა მეტი კონკრეტიკა.

მისი თქმით, მმართველი პარტია მიზანმიმართულად ანგრევს ქვეყნის ევროპულ მომავალს.

„რუსულმა ოცნებამ” გადასარევად იცის, რა ევალება დღეს საქართველოს ხელისუფლებას იმისთვის, რომ საქართველო იყოს წარმატებული, მიიღოს კანდიდატის სტატუსი და გააგრძელოს სვლა ევროინტეგრაციის გზაზე. ეს მათთვის კარგად ცნობილია, არაერთხელ დაუმარცვლეს ევროკომისიაში, ისევე როგორც ევროპარლამენტში, მაგრამ ისინი სწორედ მიზანმიმართულად ანგრევენ ჩვენი ქვეყნის ევროპულ მომავალს და ამიტომ არ ასრულებენ იმ მნიშვნელოვან რეკომენდაციებს, რომელიც ეხება მართლმსაჯულების სისტემას, დეოლიგარქიზაციას, მედიის თავისუფლებას, დეპოლარიზაციას და სამოქალაქო სექტორის პროცესებში ჩართულობას.

კონფერენციაზე, ჯერჯერობით, მხოლოდ მართლმსაჯულების პანელი გაიმართა და აქ „ოცნებამ“ პრაქტიკულად დაადასტურა კლანის არსებობა მართლმსაჯულების სისტემაში და სწორედ აღნიშნული “კლანის” არსებობა გამოაცხადა სასამართლოს დამოუკიდებლობის გარანტად. სწორედ ასეთი მიდგომა ანგრევს ჩვენი ქვეყნის ევროპულ მომავალს“, – განაცხადა ბოკუჩავამ.

„ქართული ოცნების“ თავმჯდომარის, ირაკლი კობახიძის განცხადებით, ევროკავშირის დეტალური ანგარიშიდან ჩანს, რომ ივნისის ბოლომდე რომელი რეკომენდაციების შესრულებაც შესაძლებელი იყო, ყველაფერი შესრულებულია.

„ნაცმოძრაობას“ მარგველაშვილთან გათვლა აქვს, ყოფილი პრეზიდენტია და ტიტული აქვს. ხაბეიშვილის გაპატიოსნებას ყველანაირად შეეცდებიან, – ამის შესახებ „ქართული ოცნების“ წევრმა, ბექა ოდიშარიამ განაცხადა.

მისი თქმით, იმ სახელების მიღმა, ვინც „ნაციონალურ მოძრაობაში“ შეიძლება გაერთიანდნენ, რეიტინგი არ დგას.

„სამწუხარო და სევდიანი ამბავი იქნება, თუ გიორგი მარგველაშვილი ხაბეიშვილის პარტიის წევრი გახდება, ერთხელ ის ტკივილი გადავიტანეთ, როცა სააკაშვილმა საქართველოს მოქალაქეობა დატოვა და ერთ-ერთი პროვინციის გუბერნატორად წავიდა სამუშაოდ. თუ ახლა მეორე ყოფილი პრეზიდენტი თავის ტიტულს მორალურად შეელევა და ხაბეიშვილის პარტიაში გადავა, ეს გაუგებარი და სევდიანი იქნება. „ნაცმოძრაობას“ მარგველაშვილთან გათვლა აქვს, ყოფილი პრეზიდენტია და ტიტული აქვს. ხაბეიშვილის გაპატიოსნებას ყველანაირად შეეცდებიან, ამ ცდის ნაწილია მათთან ვაშაძის შესვლა. ალბათ იქნება მარგველაშვილი და სხვა, თუმცა ამ სახელების მიღმა პროცენტიანი რეიტინგი არ დგას და რა უნდა მიიღონ, გარდა იმისა, როგორც შვიდი თუ რვა არჩევნების შედეგად დამარცხდნენ“, – განაცხადა ოდიშარიამ.

მნიშვნელოვანია ყველა ძალის გამოყენება და სხვადასხვა პოლიტიკური ცენტრის შექმნა იმისთვის, რომ არცერთი ოპოზიციურად განწყობილი ხმა არ დაიკარგოს და იმისთვის, რომ „ქართული ოცნების“ ხელისუფლების შეცვლა მოხდეს არჩევნების მეშვეობით, – ამის შესახებ ოპოზიციონერმა დეპუტატი თეონა აქუბარდიამ განაცხადა.

„გაერთიანებებში ჩემი აზრით არაფერი გასაკვირი არ არის, ვიღაც ხედავს თავს „ნაციონალურ მოძრაობასთან“, მე პირადად მათ პარტიულ სიაში თავს ვერ ვხედავ და ასევე მე ვფიქრობ, რომ შემოდგომაზე კიდევ უფრო აქტიურად წავა პროცესები, ვინ ვისთან შეიძლება დაჯგუფდეს“, – განმარტა თეონა აქუბარდიამ.

ევროკავშირი მტკიცედ დგას უკრაინის გვერდით, ჩვენ ყველანაირად ვუჭერთ მხარს უკრაინას და ასევე ვცდილობთ, მოვახდინოთ ზეწოლა და რუსეთის იზოლაცია, ველით, რომ ყველა ჩვენმა პარტნიორმა, განსაკუთრებით მათ, ვისაც სურს ევროკავშირის ნაწილი გახდეს, იგივე მიდგომა დაიცვან, – ამის შესახებ საქართველოში ევროკავშირის ელჩმა, პაველ ჰერჩინსკიმ განაცხადა, როდესაც მან უპასუხა შეკითხვას, საქართველოში რუსულ-ქართული უნივერსიტეტის შესაძლო გახსნასთან დაკავშირებით.

„ევროკავშირმა გადაწყვიტა, შეეზღუდა კონტაქტები რუსეთთან. ჩვენ გვინდა რუსეთის იზოლაცია, ჩვენ გვინდა ზეწოლა მოვახდინოთ რუსეთზე, გვინდა რუსეთმა გადაიხადოს ფასი უკრაინაში აღმაშფოთებელი საქციელისთვის. ჩვენ ყველანი ვხედავთ, რა დანაშაულები და რა სისასტიკე ხდება ყოველდღე. ვერ დავუშვებთ, ეს გაგრძელდეს. სწორედ ამიტომ, ჩვენ, ევროკავშირი, მტკიცედ ვდგავართ უკრაინის გვერდით, ჩვენ ყველანაირად ვუჭერთ მხარს უკრაინას და ასევე ვცდილობთ მოვახდინოთ ზეწოლა და რუსეთის იზოლაცია. ჩვენი აზრით, ეს არის ერთადერთი გზა იმისთვის, რომ ეს საშინელი ომი რაც შეიძლება სწრაფად დასრულდება. ველით, რომ ყველა ჩვენმა პარტნიორმა, განსაკუთრებით კი იმ პარტნიორებმა, რომლებსაც სურთ, ევროკავშირის ნაწილი გახდეს, იგივე მიდგომა დაიცვან“, – აღნიშნა ელჩმა.

საქართველოს პრემიერ-მინისტრი ირაკლი ღარიბაშვილი გაერთიანებული სამეფოს საგარეო, თანამეგობრობისა და განვითარების საქმეთა სახელმწიფო მდივნის მუდმივ მოადგილეს სერ ფილიპ ბარტონს შეხვდა.

მთავრობის ადმინისტრაციაში გამართულ შეხვედრაზე განიხილეს საქართველოსა და გაერთიანებულ სამეფოს შორის არსებული სტრატეგიული პარტნიორობა და პოლიტიკური ურთიერთობების განვითარების პოზიტიური დინამიკა.

როგორც პრემიერ-მინისტრმა აღნიშნა, საქართველო აფასებს გაერთიანებული სამეფოს მტკიცე მხარდაჭერას საქართველოს სუვერენიტეტის, ტერიტორიული მთლიანობისა და არაღიარების პოლიტიკის მიმართ. ირაკლი ღარიბაშვილმა ხაზი გაუსვა სახელმწიფო ინსტიტუტების გაძლიერების და ქვეყნის დემოკრატიული განვითარების მიმართულებით გაერთიანებული სამეფოს მნიშვნელოვან წვლილს.

შეხვედრაზე განიხილეს საქართველოსა და გაერთიანებულ სამეფოს შორის არსებული „უორდროპის სტრატეგიული დიალოგი”, რომელიც ქვეყნებს შორის სტრატეგიული პარტნიორობის თანამშრომლობის მთელ სპექტრს მოიცავს და თანამშრომლობის შეთანხმებას განამტკიცებს.

საუბარი შეეხო უკრაინაში მიმდინარე საომარ მოქმედებებსა და ომის გავლენას რეგიონში არსებულ უსაფრთხოების გარემოზე.

შეხვედრას ესწრებოდნენ დიდი ბრიტანეთის და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩი საქართველოში მარკ კლეიტონი, საქართველოს საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი რევაზ ჯაველიძე.

ინფორმაციას მთავრობის ადმინისტრაცია ავრცელებს.