ნიდერლანდების სამეფოში სამუშაო ვიზიტის ფარგლებში, ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე, სამსახურის წარმომადგენლებთან, ქართული დელეგაციის წევრებთან და ნიდერლანდების სამეფოში საქართველოს საგანგებო და სრულუფლებიან ელჩთან, დავით სოლომონიასთან ერთად, ნიდერლანდების სამეფოს ვეტერანთა ინსტიტუტში, დაესწრო ვიზიტის შემაჯამებელ სიმპოზიუმს: “ვეტერანებზე ზრუნვის კონცეფციები და მათი განხორციელების გზები”.

ჰოლანდიელმა მასპინძლებმა _ნიდერლანდების ვეტერანთა ინსტიტუტის დირექტორმა, ბრიგადის გენერალმა, პოლ ჰოფსლოტმა, ნიდერლანდების საზღვაო ძალების რეზერვის კომანდერმა, სამხედრო ვეტერანმა, სესილია ჯოანა ვან პესკიმ, ინსტიტუტის მკვლევარმა, ჰიელტ ალჰრამ და პროფესორმა, ფსიქიატრმა, სამხედრო მენტალური ჯანმრთელობის სტრატეგიულმა მრჩეველმა, თადარიგის პოლკოვნიკმა, ერიკ ვერმეტენმა პატივისცემა გამოხატეს კობა კობალაძის, საქართველოს ვეტერანებისა და ქართული დელეგაციის მიმართ და ხაზი გაუსვეს საქართველოს ვეტერანთა განსაკუთრებულ ღვაწლს ქვეყნის თავისუფლებისა და ტერიტორიული მთლიანობისათვის ბრძოლაში.

სესილია ჯოანა ვან პესკიმ, თავის მოხსენებაში გაიხსენა ნიდერლანდების ვეტერანთა ინსტიტუტის დირექტორის და ხელმძღვანელი პირების შარშანდელი ვიზიტი საქართველოში_ ვეტერანების საქმეთა სახელმწიფო სამსახურში; აღნიშნა, რომ ქართულ და ჰოლანდიურ უწყებებს შორის დამყარებული მეგობრული და პარტნიორული ურთიერთობა მნიშვნელოვანი ნაბიჯია საქართველოს ვეტერანების წინაშე არსებული გამოწვევების დაძლევის გზაზე; თავდაცვისა და უსაფრთხოების სამოქალაქო საბჭოს თანადამფუძნებელმა და გამგეობის წევრმა, შორენა ლორთქიფანიძემ ისაუბრა ორგანიზაციის გეგმებსა და ამოცანებზე, საქართველოს წინაშე თავდაცვისა და უსაფრთხოების კუთხით არსებულ გეოპოლიტიკურ გამოწვევებსა და ამ გამოწვევების დაძლევაში, საზოგადოების კონსოლიდაციის, ვეტერანთა პოტენციალის გამოყენების მნიშვნელობაზე;

გენერალმა პოლ ჰოფსლოტმა, ვეტერანების საქმეთა სახელმწიფო სამსახურსა და ნიდერლანდების ვეტერანთა ინსტიტუტს შორის თანამშრომლობის გაღრმავების მზაობა გამოთქვა: ” ნიდერლანდების ვეტერანთა ინსტიტუტის კარი ყოველთვის ღიაა ვეტერანების საქმეთა სახელმწიფო სამსახურისა და საქართველოს ვეტერანებისთვის. კიდევ ერთხელ გიდასტურებთ ჩვენს თანადგომას საქართველოს ვეტერანების წინაშე არსებული სოციალური და ჯანდაცვის კუთხით არსებული გამოწვევების დასაძლევად. ამ მიზნით, ჩვენი პარტნიორული და მეგობრული ურთიერთობა აუცილებლად გაღრმავდება; გაგრძელდება საპასუხო, ორმხრივი ვიზიტები თემატური ჯგუფების მონაწილეობით, რათა კონკრეტულ საკითხებზე მუშაობა უფრო პროდუქტიული იყოს”,_აღნიშნა თავის გამოსვლაში პოლ ჰოფსლოტმა.

კობა კობალაძემ, ჰოლანდიელ მასპინძლებს, გულთბილი მიღებისა და საინტერესო შეხვედრებისთვის მადლობა გადაუხადა; აღნიშნა, რომ ქართული დელეგაციის ვიზიტი მნიშვნელოვანია გამოცდილების გაზიარებისა და საერთაშორისო პარტნიორობის განმტკიცების გზაზე; კიდევ ერთხელ, ხაზი გაუსვა საქართველოს ვეტერანთა წინაშე არსებული გამოწვევების დაძლევაში დასავლელი მეგობრების თანადგომის მნიშვნელობას. სიმპოზიუმის დასასრულ, ქართულ და ჰოლანდიურ მხარეებს შორის გაფორმდა ურთიერთთანამშრომლობის მემორანდუმი, რომელსაც, ხელი პოლ ჰოფსლოტმა და კობა კობალაძემ მოაწერეს.

შეგახსენებთ, ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე და სამსახურის წარმომადგენლები, ნიდერლანდების ვეტერანთა ინსტიტუტის ოფიციალური მიწვევით, ნიდერლანდების სამეფოში, სამუშაო ვიზიტით იმყოფებოდნენ. დელეგაციის შემადგენლობაში, ასევე, იყვნენ საქართველოს პარლამენტის თავდაცვისა და უშიშროების კომიტეტის წევრები_ გია ბენაშვილი და ალექსანდრე ტაბატაძე, სახალხო დამცველი, ლევან იოსელიანი, მარო მაყაშვილის სახელობის სამხედრო მოსამსახურეთა სარეაბილიტაციო ცენტრისა და თავდაცვისა და უსაფრთხოების სამოქალაქო საბჭოს წარმომადგენლები.

კობა კობალაძისა და ქართული დელეგაციის ვიზიტი ნიდერლანდების სამეფოში დასრულდა.

საქართველოს პარლამენტმა უკრაინის ქალაქ ლვოვიდან ჩამოსულ რუსეთის სამხედრო აგრესიის შედეგად დაზარალებულ მოზარდების უმასპინძლა.

ამის შესახებ ინფორმაციას პარლამენტის პრესსამსახური ავრცელებს.

შალვა პაპუაშვილის განცხადებით, ის რაც დღეს უკრაინაში ხდება, საქართველომ გამოცადა, ამიტომ ქართველებს ყველაზე კარგად ესმით, რას გრძნობს უკრაინელი ხალხი.

„მიხარია, რომ გვაქვს პატივი, მიგიღოთ პარლამენტში, ვიყოთ თანაორგანიზატორი თქვენი საქართველოში ყოფნის და ამ რთულ პერიოდში, რასაც უკრაინა გადის, გაჩვენოთ ჩვენი მეგობრობა არა მხოლოდ სიტყვით და საქმით, არამედ ჩვენს ოჯახებში თქვენი მიღებით.

მნიშვნელოვანია, რომ გვქონდეს საშუალება, გადმოგცეთ ჩვენი სიყვარული, მეგობრობა და ამით ყველამ ერთად ოპტიმიზმით გავიხედოთ წინ. ვინაიდან, ის რაც დღეს უკრაინაში ხდება, არის ის, რაც საქართველომ გამოცადა და ალბათ, საქართველო არის დედამიწის ზურგზე ერთადერთი ქვეყანა, რომელსაც ყველაზე კარგად ესმის რას გრძნობს უკრაინელი ხალხი, რას გრძნობთ თქვენ, ბავშვები. ჩვენ გვინდა გაჩვენოთ ჩვენი სოლიდარობა და მეგობრობა, რომ იმ იმედის სინათლეს, რომელიც თქვენში ასე ძლიერია, ჩვენი ენერგიაც შევმატოთ”, – განაცხადა საქართველოს პარლამენტის თავმჯდომარე, შალვა პაპუაშვილმა ღონისძიებაზე, რომელიც პარლამენტში უკრაინელი სტუმრებისთვის გაიმართა.

შალვა პაპუაშვილმა უკრაინელი ბავშვების მხარდაჭერისთვის ვიცე-სპიკერს, უკრაინის პარლამენტთან მეგობრობის ჯგუფის ხელმძღვანელს არჩილ თალაკვაძეს მადლობა გადაუხადა და საქართველოსა და უკრაინის პარლამენტებს შორის არსებულ თბილ და მეგობრულ ურთიერთობაზე გაამახვილა ყურადღება.

„ჩვენ რამდენიმე ასეთი ჯგუფი გვყავდა და ძალიან კარგი თანამშრომლობა გვაქვს ამ მხრივ უკრაინის პარლამენტთან. მეგობრობის ჯგუფებს შორის თბილი ურთიერთობაა, ჩემს კოლეგასთან, რუსლან სტეპანჩუკთან მაქვს ასევე ძალიან თბილი ურთიერთობა და ხშირი კონტაქტი და მიხარია, რომ თქვენც ამ მეგობრობის წრეში ჩვენთან ერთად ხართ. მინდა მადლობა გადავუხადო უპირველეს ყოვლისა პარლამენტის ვიცე-სპიკერს და უკრაინის პარლამენტთან მეგობრობის ჯგუფის ხელმძღვანელს, არჩილ თალაკვაძეს, სწორედ მისი და მისი უკრაინელი კოლეგის და ზოგადად, პარლამენტებს შორის თბილი ურთიერთობის წყალობით არის, რომ ჩვენ აქტიურად ვართ ჩართული უკრაინელი ბავშვების მიღებაში პარლამენტში”, -განაცხადა შალვა პაპუაშვილმა.

უკრაინელ მოზარდებს სიტყვით მიმართა ვიცე-სპიკერმა, უკრაინის პარლამენტთან მეგობრობის ჯგუფის ხელმძღვანელმა არჩილ თალაკვაძემ.

„ჩვენ ყველას გვჯერა, რომ უკრაინაში მშვიდობა და მშვიდობიანი დღეები მალე დაბრუნდება. ვიდრე თქვენს ქვეყანაში არის ომი, თავისუფლებისთვის, ომი ტერიტორიული მთლიანობის დასაცავად, თქვენ ხედავთ, რომ საქართველო აკეთებს ყველაფერს, რაც შეუძლია უკრაინელი ხალხისთვის და უკრაინის მხარდასაჭერად. ჩვენი ქვეყნის – საქართველოს კარი ყოველთვის ღიაა და სწორედ ამიტომ, ჩვენ ძალიან მადლიერები ვართ, რომ მთავრობასთან ერთად შევძელით გვემასპინძლა უკრაინელი მეგობრებისთვის, ახალგაზრდებისთვის, ბავშვებისთვის არაერთხელ და ახლაც მოხარული ვართ, რომ თქვენ ჩამობრძანდით საქართველოში. იმედი გვაქვს, რომ აქ მშვიდობიანი და ბედნიერი დღეები გაატარეთ და ყოველთვის დაგამახსოვრდებათ თუ როგორ დაგხვდათ საქართველო და თუ როგორ გაგიხსნათ გული ჩვენმა ქვეყანამ.

საქართველოს პარლამენტს აქვს თავისუფლებისთვის ბრძოლის, შრომის და პატრიოტიზმის ხანგრძლივი ისტორია და ჩვენთვის სიმბოლურია, რომ დღეს უკრაინის ახალ თაობას ვმასპინძლობთ აქ, საქართველოს პარლამენტში, ეს არის იმის დადასტურება, რომ საქართველოს ხელისუფლება და ქართველი ხალხი ზრუნავს თქვენზე, საქართველოს თქვენ უყვარხართ, ყველაფერი კარგად იქნება. კიდევ ერთხელ კეთილი იყოს თქვენი მობრძანება და ჩამოსვლა საქართველოში”, – განაცხადა არჩილ თალაკვაძემ.

მან საქართველოს კულტურის, სპორტის და ახალგაზრდობის სამინისტროს, მინისტრს და მინისტრის მოადგილეს, ახალგაზრდობის სააგენტოს, ასევე საქართველოს საგარეო საქმეთა სამინისტროს, უკრაინის საელჩოს საქართველოში და საქართველოს ელჩს უკრაინაში პროექტის დაფინანსების, ორგანიზებისა და მხარდაჭერისთვის მადლობა გადაუხადა.

საქართველოს კულტურის, სპორტისა და ახალგაზრდობის მინისტრის მოადგილე ირაკლი გივიაშვილმა მოზარდებს საინტერესო, შემოქმედებითად მრავალფეროვანი დღეები უსურვა.

პარლამენტის თავმჯდომარემ, ვიცე-სპიკერმა და პარლამენტის წევრებმა უკრაინელ სტუმრებს სიგელები და სამახსოვრო საჩუქრები გადასცეს. მათთვის პარლამენტის სასახლეში ექსკურსია გაიმართა.

სამუსიკო სკოლის 46 მოსწავლე და მათი თანმხლები პირები საქართველოში 22 ივნისიდან 1-ელი ივლისის ჩათვლით დარჩებიან და სხვადასხვა კულტურულ-შემეცნებით თუ გასართობ ღონისძიებაში მიიღებენ მონაწილეობას.

კომპანია „პროსერვისი“ 2023 წლის Golden Brand-ის გამარჯვებულია. კომპანიამ ჯილდო ჰოსტინგ პროვაიდერის ნომინაციაში მოიპოვა. პროსერვისი ბაზარზე 1999 წლიდან ოპერირებს, და დღეს ქვეყანაში არსებული ჰოსტინგის ბაზრის 31 % ფარავს. ყოველ წლიურად მომხმარებლების რიცხვი იზრდება, რაც კიდევ უფრო მეტ პასუხისმგებლობას უჩენს კომპანიის მფლობელებს და თანამშრომლებს.

„პროსერვისი“ 24/7 ზე გამართული, მაღალი ტექნოლოგიებით აღჭურვილი TR3 სტანდარტის დატა ცენტრის საშუალებით საუკეთესო სტანდარტებს და მოქნილ მომსახურებას სთავაზობს თავის მომხმარებლებს. მრავალფეროვანი შეთავაზება, უწყვეტი ტექნიკური დახმარება და პროფესიონალთა გუნდი მუდმივ რეჟიმში წყვეტს ყველა გამოწვევას, რაც წარმოიქმნება კომპანიებში, რომლებიც სარგებლობენ ჰოსტინგის მომსახურებით.

კომპანიას დღეის მდგომარეობით 15000 კორპორატიული მომხმარებელი ჰყავს და 17000 ზე მეტ დარეგისტირებულ დომენს უწევს ჰოსტინგ მომსახურებას.

„პირველ რიგში მადლობას ვუხდით ჩვენს მომხმარებლებს, რომელთა გამოკითხვის საფუძველზეც ჩვენი კომპანია დასახელდა No 1 ბრენდად. მიღებული ჯილდო დამატებითი მოტივაციაა ჩვენი გუნდისათვის მეტი ძალისხმევა მივმართოთ მომსახურების გაუმჯობესების და ახალი სერვისების შეთავაზების კუთხით“- ამბობს რევაზ ნატროშვილი, კომპანია „პროსერვისის“ დამფუძნებელი.

ნომინაციის შესახებ: Golden Brand -ის დაჯილდოვების ცერემონია 2006 წლიდან ტარდება. ის დღეისათვის ყველაზე პრესტიჟულ და გავლენიან ბიზნეს დაჯილდოვებად არის აღიარებული.

კომპანია “პროსერვისის” შესახებ: კომპანია “პროსერვისი” წარმოადგენს განვითარებაზე ორიენტირებულ მუდმივად მზარდი ტიპის კომპანიას. Pro-Service 1999 წლიდან მოღვაწეობს და ქართული ბაზრის ლიდერია ინტერნეტ პროექტების დაგეგმვისა და განხორციელების სფეროში. კომპანია არ ღალატობს მის ძირითად პრინციპებს: პროფესიონალიზმს , პასუხისმგებლობას და საქმის ერთგულებას .

კონსტანცადან ფოთის მიმართულებით 27 ივნისს E60 Shipping Line-ის მიერ პირველი რეისის განხორციელება დაიწყო. ინფორმაციას ამის შესახებ კომპანია E60 Shipping Line ავრცელებს.

კომპანიის ცნობით, ბორანი ფოთის ნავსადგურში უკვე დღეს, 20:00 საათზე შემოვა, რაც იქნება პირველი წარმატებით შესრულებული საბორნე მიმოსვლა რუმინეთსა და საქართველოს შორის.

ფოთიდან კონსტანცაში კი აღნიშნული ბორანი 30 ივნისს გაემგზავრება და რეგულარულად იმოძრავებს.

„ეს ძალიან მნიშვნელოვანი სიახლეა გადამზიდავებისთვის და, ზოგადად, სატრანსპორტო სექტორისთვის და არის საქართველოს ევროპასთან დასაახლოებლად გადადგმული უმნიშვნელოვანესი ნაბიჯი. კონსტანცას ნავსადგურში საბაჟო პროცედურების გავლას და ბორნის დატვირთვას მხოლოდ ექვსი საათი დასჭირდა. გზა რუმინეთიდან საქართველომდე კი მხოლოდ 42 საათს დაიკავებს, რა დროის მანძილზეც მძღოლებს ექნებათ შესაძლებლობა, განთავსდნენ კომფორტულ კაიუტებში და ისარგებლონ ბორტზე არსებული რესტორნით, ბარით, გასართობი სივრცით და Duty Free მაღაზიით. 190-მეტრიანი ბორანი სახელწოდებით Vilnius-ი, რომელიც ქართულმა კომპანია E60 Shipping Line-მა დაფრახტა, ევროპის ერთ-ერთი ყველაზე გრძელი საგზაო მარშრუტის – E60-ის შავ ზღვაზე გამავალ მონაკვეთს ემსახურება, რითიც ეს მარშრუტი ბოლომდე იკვრება, რაც არ მომხდარა მისი არსებობის დღიდან. ფოთი – კონსტანცას საბორნე ხაზი უმოკლესი გზაა კავკასიისა და შუა აზიის ქვეყნების ევროპასთან დასაკავშირებლად, მას ალტერნატივა არ აქვს და დიდი მნიშვნელობის მქონეა ჩვენი ქვეყნისა და რეგიონისთვის. მის გამართულად მუშაობას გადამწყვეტი მნიშვნელობა აქვს ტრანსკასპიური შუა კორიდორის არსებობისა და განვითარებისთვის. E60 Shipping Line არის ქართული წარმომავლობის საერთაშორისო ჰოლდინგის წევრი კომპანია. ჰოლდინგი წლების განმავლობაში ოპერირებს მსოფლიოს მასშტაბით ისეთ ინდუსტრიებში, როგორებიცაა საერთაშორისო ამანათები და გადაზიდვები“, – ნათქვამია კომპანია E60 Shipping Line-ის მიერ გავრცელებულ ინფორმაციაში.