საქართველოს სჭირდება ძალიან მტკიცე გზავნილები დასავლეთისგან, რომ საქართველოს გვერდით დგას დასავლური სამყარო, განსაკუთრებით იმ პირობებში, როდესაც საქართველოს მსგავსი ქვეყანა, მსგავსი გამოწვევებით, შეიძლება ითქვას, რომ ევროპაში არ არსებობს, – ამის შესახებ საქართველოს პარლამენტის ევროპასთან ინტეგრაციის კომიტეტის თავმჯდომარემ, მაკა ბოჭორიშვილმა განაცხადა.

როგორც მაკა ბოჭორიშვილმა აღნიშნა, საქართველოს პარტნიორებმა კარგად უნდა გაიგონ, რა გამოწვევების წინაშე დგას საქართველო და რა ხდება საქართველოში ოკუპაციის პირობებში.

„როდესაც ქვეყნა არის ოკუპირებული და აქვს ასეთი უსაფრთხოების გამოწვევები, რომელსაც ყოველდღიურად განვიცდით ჩვენ, ჩვენი მოქალაქეების უსაფრთხოების ხარჯზე, ამ ფონზე, როდესაც ჩვენ გვსურს, ვიყოთ დასავლური ორგანიზაციების, ნატო-ს, ევროკავშირის ნაწილი, ჩვენ გვჭირდება ცალსახა გზავნილები ევროკავშირისგან. ჩვენ გვჭირდება პირდაპირი მოქმედებები და არა გაურკვევლობა, რომელსაც ერთი წლის განმავლობაში ჰქონდა ადგილი, თუნდაც კანდიდატის სტატუსთან დაკავშირებით.

იმედი მაქვს, უახლოეს მომავალში ეს საკითხი გარკვეულწილად გადაწყდება პოზიტიურად და საქართველო უკვე კანდიდატის სტატუსით გააგრძელებს ევროკავშირისკენ სვლას. ამავდროულად, ჩვენ გვჭირდება ჩვენი პარტნიორების მხრიდან იყოს უფრო კარგად გაგებული, თუ რა გამოწვევების წინაშე დგას საქართველო და რა ხდება საქართველოში ოკუპაციის პირობებში“, – განაცხადა ბოჭორიშვილმა.

(საოკუპაციო) ხაზის გადმოწევა მოგონილი თემაა, რომელიც „ნაცმოძრაობამ“ შემოგვაპარა – დღეს ამ ადამიანის მკვლელობა არის დანაშაულის შედეგი, რომელიც ჩაიდინა თქვენმა ბელადმა (სააკაშვილმა), – ამის შესახებ პარლამენტის პირველმა ვიცე – სპიკერმა გია ვოლსკიმ საოკუპაციო ძალების წარმომადგენლების მიერ საქართველოს მოქალაქის მკვლელობის კომენტირებისას განაცხადა.

ვოლსკი აცხადებს, რომ წინა ხელისუფლებამ რუსეთს ოკუპაციის საშუალება მისცა და „საოკუპაციო ხაზი გაუვლო”, როცა 2007 წელს ადმინისტრაციული საზღვრები დაადგინა.

რაც შეეხება ადგილობრივთა უსაფრთხოების მიზნით, საოკუპაციო ხაზის მიმდებარედ ბლოკ- პოსტების განთავსების საკითხს, ვოლსკი აცხადებს, რომ ასეთ შემთხვევაში ქართველმა პოლიციელმა “შეიძლება, თავი ვერ შეიკავოს,” თუ ოკუპანტი ძალას გამოიყენებს საქართველოს მოქალაქის წინააღმდეგ.

„მძიმე ფაქტი მოხდა, ვუსამძიმრებ ოჯახს და მთელ საქართველოს. მოქალაქე მოგვიკლეს. ოკუპაცია იყო დაშვებული და თვითონ საოკუპაციო ხაზები გავლებული სააკაშვილის ხელისუფლების მიერ. ეს ეკლესია აღმოჩნდა საოკუპაციო ხაზს იქით და სულ ახლახან ახალი პროვოკაცია ვიხილეთ მლეთის მისადგომებთან, ლომისის წმინდა გიორგის ეკლესიასთან მიმართებით.

ის რესურსი გაგვაჩნია, რომ რუსეთზე იყოს საკმაოდ გაძლიერებული შეტევა, რომელიც ისედაც საკმარისია მთელი საერთაშორისო თანამეგობრობის მხრიდან. რაც შეეხება ბლოკ პოსტებს, სადაც იდგება ქართველი პოლიციელი, რასაკვირველია შეიძლება თავი ვერ შეიკავოს, როცა უკანონოდ მყოფი რუსი ოკუპანტი შეიძლება გამოჩნდეს და გაეკიდოს, ან ძალა იხმაროს ქართველის მიმართ. ამან შეიძლება ისეთი პროცესი გამოიწვიოს, რომელსაც ელოდება ზოგიერთი პოლიტიკური ძალა შიგნითაც და გარეთაც.

საერთოდ, (საოკუპაციო) ხაზის გადმოწევა მოგონილი თემაა, რომელიც “ნაცმოძრაობამ” შემოგვაპარა და ზოგიერთ საერთაშორისო განცხადებებშიც გავიგეთ. არის ტერიტორია შემოხაზული ბელად სააკაშვილის მიერ, სადაც დანიშნულია ადმინისტრაცია, ვისაც უნდა ემართა ეს ტერიტორია. მოხდა ომი და დაიპყრეს ზუსტად ის ტერიტორია, რომელიც შემოუხაზა ბელადმა სააკაშვილმა 2007 წლის 10 მაისის ბრძანებულებით. დღეს ამ ხაზს მიყვებიან და აკეთებენ საოკუპაციო ხაზს. საოკუპაციო ხაზი არის დანაშაული თვითონ რასაკვირველია, მაგრამ ამ დანაშაულებამდე ქვეყანა მივიდა მაშინ, როცა უარი თქვეს საერთაშორისო ლიდერობით წაყვანილ პროცესზე, რომელიც აუცილებლად გამოიწვევდა პოლიტიკურ გადაწყვეტას ამ პრობლემის. 2006 წლის ივლისიდან 2008 წლის ივლისამდე სააკაშვილის მიერ ადგილი ჰქონდა მუდმივად იმ ფორმატების დაშლას, რომელიც მოსალაპარაკებლად ჰქონდათ შექმნილი ევროკავშირს, აშშ- ს.

ყველამ იცის, რომ საფრთხეს ქმნის საოკუპაციო ჯარი და საოკუპაციო პატრული, რომელიც იქ დადის. ასეთი მდგომარეობა იქმნება, როცა საფიქრალი გვაქვს, ქართველი პოლიციელი რომ იქ ყოფილიყო, აუცილებლად გამოექომაგებოდა ქართველს თუ არ გამოექომაგებოდა. ეს თემაა საფიქრალი,”- განაცხადა ვოლსკიმ.

მისივე თქმით, “მოხდა სამწუხარო შემთხვევა, გადასული ადამიანი მოკლეს, მაგრამ სპეციალურად წაყვანილი, წამებით მოკლულები, ათობით სამოქალაქო პირი ჩააბარეს და მოაკვლევინეს ოკუპანტს (წინა ხელისუფლებამ) და ამ თემაზე არასდროს არავის ხმა არ ამოუღია”.

“დღეს ამ ადამიანის მკვლელობა არის დანაშაულის შედეგი, რომელიც ჩაიდინა თქვენმა ბელადმა. სწორედ ეგ არის დანაშაული, რომ რუსეთს მიეცი საშუალება ოკუპაციის, რუსეთს გაუვლე საოკუპაციო ხაზი, ადამიანები დატოვე იმ ზონაში, სადაც იცოდი, რომ დახოცავდნენ და დაახოცინე, აი ეს არის დანაშაული. ერთმანეთს არ ვადარებ, ერთი ტანის ორი ხელია,”- განაცხადა ვოლსკი

ყველა ადამიანი თავისუფალია თავის არჩევანში და შეუძლია, გააკეთოს ის, რაც სურს. შეუძლია, ხალხს მოუწოდოს, შეუერთდეს ნებისმიერ მოწოდებას, რაც კანონის ჩარჩოში იქნება. თუ იქნება ევროინტეგრაციისთვის მოწოდება, კი ბატონო, შეუერთდნენ და ხელი მოაწერონ. უბრალოდ, ვერ ვხვდები, რა საჭიროა ამის გაკეთება, როცა საზოგადოების დიდი ნაწილი ისედაც უჭერს მხარს ევროპულ ინტეგრაციას, ევროპულ კურსს, – ამის შესახებ პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ განაცხადა.

სამხარაძე გამოეხმაურა საქართველოს პრეზიდენტ სალომე ზურაბიშვილის განცხადებას, რომლის მიხედვითაც, ხვალ, 20:00 საათზე ყველა შეიკრიბება და იტყვის, რომ საქართველოს მომავალი არ არის რუსეთში და არის ევროპულ ოჯახში.

„მოსახლეობის 80 პროცენტზე მეტი პროევროპულია. ასეთი რაოდენობა ევროკავშირის ქვეყნებშიც კი არ არის, ვინც ევროპული პოლიტიკისა და პროევროპულობის მომხრეა. ეს ყველაფერი ზედმეტად მეჩვენება, რადგან პარტნიორებმა იციან, რომ ჩვენი საზოგადოება პროევროპულია. თუ პრეზიდენტს ამის სურვილი აქვს, ამაში ცუდი არაფერია, უბრალოდ, რამდენად საჭიროა და შეიძლება სარგებლის მომტანი იყოს. თუ ამას რაიმე სხვა პოლიტიკური სარჩული აქვს, ეს ცალკე თემაა“, – აღნიშნა ნიკოლოზ სამხარაძემ.

სააკაშვილის რეჟიმი და „ნაციონალური მოძრაობა“ უნდა გასამართლდეს მათ მიერ ჩადენილი დანაშაულებისთვის, – ამის შესახებ „ხალხის ძალის“ ერთ-ერთმა ლიდერმა, დეპუტატმა სოზარ სუბარმა განაცხადა.

მისი თქმით, ქართველ ხალხს უნდა ახსოვდეს ის სისასტიკე, რასაც სააკაშვილის რეჟიმი წარმოადგენს.

„ქართველ ხალხს უნდა ახსოვდეს ის სისასტიკე, რასაც სააკაშვილის რეჟიმი წარმოადგენს და მარტო მახსოვრობა არ არის საკმარისი. სააკაშვილის რეჟიმი და „ნაციონალური მოძრაობა“ უნდა გასამართლდეს მათ მიერ ჩადენილი დანაშაულებისთვის, მათ მიერ ადამიანის უფლებების დარღვევისთვის, მათ მიერ ქუჩაში ჩადენილი მკვლელობებისთვის, ციხეებსა თუ პოლიციის განყოფილებებში მათ მიერ ასობით და ათასობით ნაწამები ადამიანისთვის, კოდორის ხეობასა თუ ცხინვალის რეგიონში მათ მიერ მიტოვებული ადამიანებისთვის“, – განაცხადა სოზარ სუბარმა.