საქართველოს საგარეო საქმეთა სამინისტრო დანიის ელჩთან დღეს გამართული შეხვედრის შესახებ ინფორმაციას ავრცელებს.

როგორც საგარეო უწყების მიერ გავრცელებულ ინფორმაციაშია ნათქვამი, შეხვედრაზე ხაზი გაესვა, რომ დანიის ელჩის პუბლიკაცია ცალკეული ძალების მხრიდან პოლიტიკური ინტერპრეტაციებისთვის იქნა გამოყენებული, ხოლო დანიურმა მხარემ აღნიშნულის გამო წუხილი გამოთქვა.

„საქართველოს საგარეო საქმეთა სამინისტროში შეხევედრა გაიმართა საქართველოში დანიის სამეფოს საგანგებო და სრულუფლებიან ელჩთან, ანნე ტოფტ სორენსენთან. ელჩი სამინისტროში გამოძახებულ იქნა და განმარტებები ეთხოვა მის მიერ 2024 წლის 10 იანვარს დანიურ გამოცემაში Jyllandsposten გამოქვეყნებულ პუბლიკაციასთან და მასში მოცემულ არასწორ ფაქტებსა და პოლიტიკურ შეფასებთან დაკავშირებით.

როგორც შეხვედრაზე ქართულმა მხარემ აღნიშნა, სამწუხაროა, რომ პუბლიკაციაში ადგილი ჰქონდა მნიშვნელოვან ფაქტობრივ უზუსტობებსა და არაობიექტურ შეფასებებს, რაც ხელს არ უწყობს ქვეყნის მიმართ საერთაშორისო საზოგადოების, მათ შორის დანიური მკითხველის პოზიტიურ დამოკიდებულების ჩამოყალიბებას.

შეხვედრაზე ასევე ხაზი გაესვა, რომ აღნიშნული პუბლიკაცია ცალკეული ძალების მხრიდან პოლიტიკური ინტერპრეტაციებისთვის იქნა გამოყენებული, რაც, ბუნებრივია, ხელს უშლის ქვეყნის მიმართ ევროკავშირის მიერ განსაზღვრული მთავარი ამოცანის – დეპოლარიზაციის ეფექტიან განხორციელებას.

შეხვედრაზე დანიურმა მხარემ წუხილი გამოთქვა აღნიშნულის გამო და განაცხადა, რომ სტატია გამიზნული იყო დანიის მხრიდან საქართველოს ევროკავშირში ინტეგრაციის პროცესის მხარდაჭერისთვის და სამწუხაროა, რომ ოპონენტების მხრიდან იგი უარყოფით კონტექსტში იქნა გამოყენებული“, – ნათქვამია საქართველოს საგარეო საქმეთა სამინისტროს მიერ გავრცელებულ ინფორმაციაში.

საქართველოში დანიის ელჩი საგარეო საქმეთა სამინისტროში დღეს იმყოფებოდა. ენ ტოფტ სორენსენმა უწყება უკომენტაროდ დატოვა. ელჩის დაბარების მიზეზი მის მიერ დანიურ გამოცემაში გამოქვეყნებული საავტორო სტატია გახდა. ამასთან, დღეს განცხადება გაავრცელა საქართველოში დანიის საელჩომ, რომელშიც ნათქვამია: „ვხედავთ დანიური სტატიიდან ამოღებულ ამონარიდს, რომელიც კონტექსტის გარეშე გამოიყენება ქართულ დებატებში. საელჩოს არ აქვს სურვილი, წვლილი შეიტანოს აღნიშნულში და თავს იკავებს დამატებითი კომენტარისგან“.

ცოტა აკლიათ ამათ, მართლა გეუბნებით, მუდმივად დასავლელ პარტნიორებს იბარებენ ყურის ასაწევად, – ასე ეხმაურება „ნაციონალური მოძრაობის“ თავმჯდომარე, ლევან ხაბეიშვილი საგარეო საქმეთა სამინისტროს მიერ ბიძინა ივანიშვილთან დაკავშირებული განცხადების გამო საქართველოში დანიის ელჩის უწყებაში დაბარების ფაქტს.

ლევან ხაბეიშვილის განცხადებით, კახა კალაძისა და ხელისუფლების სხვა წარმომადგენლების „ისტერიკა და გამოხტომები“ მათ სახეს კარგად აჩვენებს.

„გვახსოვს, პრეზიდენტ სააკაშვილს რომ ჯილდო გადასცეს, მაშინაც დაიბარეს კონკრეტული ელჩი. ოლიგარქია ივანიშვილი და თუ ვინმეს ეჭვი ეპარება, გადახედეთ მთავრობას: მისი პირადი თანაშემწე – პრემიერ-მინისტრია; თავდაცვის მინისტრი – „ქართუ ბანკის“ თანამშრომელი; შსს მინისტრი – მისი პირადი დაცვის წევრი, ჯანდაცვის მინისტრი – „ქართუ“-ს თანამშრომელი. ფულის საშოვნელ დაზგად აქცია სამთავრობო მაგიდა. იქ რომ სხედან, ეს ადამიანები, მთავრობას კი არ წარმოადგენენ, ბიძინა ივანიშვილის ინტერესებს წარმოადგენენ. ამ ფონზე კალაძის ისტერიკა და კონკრეტული ადამიანების გამოხტომები და თავდასხმა ჩვენს პარტნიორებზე, კარგად აჩენს მათ სახეს. ამ ხალხს მიმართულებები აქვთ არეული და შეცვლილი, ქართველი ხალხი აუცილებლად გაუსწორებს“, – განაცხადა ლევან ხაბეიშვილმა.

ლევან ხაბეიშვილის განცხადებით, ბიძინა ივანიშვილის სანქციებს ვერ ასცდება.

„ბიძინა ივანიშვილი დაასანქცირა ხალხმა პირველად, როცა 7-8 მარტს, რუსული კანონი „დააღეჭინა“. პირდაპირი მნიშვნელობით აიღო ბიძინა ივანიშვილმა მისი კანონი, დაღეჭა და გადაყლაპა. ეს გააკეთა ქართველმა ხალხმა. ამის შემდეგ კანდიდატის სტატუსის მიიღო საქართველომ და ეს იყო კიდევ ერთი სანქცია ბიძინა ივანიშვილისთვის. მე დარწმუნებული ვარ, რომ ჩვენი პარტნიორები ყველაფერს უყურებენ და ბიძინა ივანიშვილი სანქციებს ვერ ასცდება. დღეს იქება თუ ხვალ, აუცილებლად იქნება“, – განაცხადა ლევან ხაბეიშვილმა.

რაკი საქართველო ევროკავშირის წევრობის გზაზე დგას, ბუნებრივია, ჩვენ ახლა კიდევ უფრო მეტად გვაკვირდებიან გამადიდებელი შუშით – საერთაშორისო დამკვირვებლების ყოფნა არის საკვანძო, რომ შევბოჭოთ “ქართული ოცნების” თავგასულობა არჩევნებზე , – ამის შესახებ “ერთიანი ნაციონალური მოძრაობის” საერთაშორისო მდივანმა, ზურაბ ჭიაბერაშვილმა ჟურნალისტებთან საუბრისას განაცხადა.

მისივე თქმით, მნიშვნელოვანია, რომ ეუთოს საპარლამენტო ასამბლეაში შვედეთის დელეგაციამ პოზიციასთან შეხვედრა გამართა.

“წლის განმავლობაში რეგულარულად იქნება დასავლეთიდან ასეთი ვიზიტები, იმიტომ, რომ რაკი ქვეყანა და ქართველი ხალხი ევროკავშირის წევრობის გზაზე დგას, ბუნებრივია, ჩვენ ახლა კიდევ უფრო მეტად გვაკვირდებიან გამადიდებელი შუშით. რა თქმა უნდა, საერთაშორისო დამკვირვებლების ყოფნა არის საკვანძო, რომ შევბოჭოთ ქვეყნის შიგნიდანაც და ქვეყნის გარედანაც “ქართული ოცნების” თავგასულობა არჩევნებზე, წინასაარჩევნო პერიოდშიც და არჩევნების დღესაც,” – განაცხადა ჭიაბერაშვილმა.

მისივე თქმით, ოპოზიციის სურვილია, რომ გრძელვადიანმა სადამკვირვებლო მისიამ ქვეყანაში მუშაობა გაზაფხულიდან დაიწყოს.

“ჩვენ გვინდა, რომ გრძელვადიანი დამკვირვებლები, რაც შეიძლება ადრე ჩამოვიდნენ. უკვე გაზაფხულის დასაწყისიდანვე, რათა ყველა პრობლემას აღირიცხონ. ის თუ რა ხდება იანვარში, თებერვალში და მარტში, ასევე, ახდენს გავლენას იმაზე, თუ რა მოხდება არჩევნების დღეს ოქტომბერში,” – აღნიშნა ჭიაბერაშვილმა.

“ერთიანი ნაციონალური მოძრაობის” ლიდერები ეუთოს საპარლამენტო ასამბლეაში შვედეთის დელეგაციასთან შეხვედრას მართავენ.

პარტიის თავმჯდომარის, ლევან ხაბეიშვილის განცხადებით, საუბრის მთავარი თემა 2024 წლის საპარლამენტო არჩევნებში გრძელვადიან სადამკვირვებლო მისიას ეხება.

მისივე თქმით, შეხვედრისას საუბარი შეეხო საქართველოს მესამე პრეზიდენტის, მიხეილ სააკაშვილის თავისუფლების მნიშვნელობასაც.

“მნიშვნელოვანია ჩვენი ქვეყნისთვის სადამკვირვებლო მისია 2024 წელს. ჩვენ ჩვენს პარტნიორებს, ყველას აბსოლუტურად, მივწერეთ კონკრეტული წერილები იმის შესახებ, რომ გვჭირდება დახმარება არჩევნების დაკვირვების მიმართულებით, მათ შორის, გრძელვადიანი. ეს არ უნდა იყოს მოკლევადიანი, იმიტომ რომ არჩევნები არჩევნების დღეს არ ყალბდება. “რუსულ პარტიას” უკვე დაწყებული აქვს არჩევნების გაყალბების მიმართულებით მუშაობა, ამიტომ ცხადია, ჩვენი პარტნიორების ჩართულობა მნიშვნელოვანია. უნდა ესმოდეს საქართველოს მოსახლეობას, რომ “ნაციონალური მოძრაობა”, “გამარჯვების კოალიცია” ყველაფერს გააკეთებს იმისთვის, რომ თითოეული ადამიანის ხმა იყოს დაცული. უნდა ესმოდეს “რუსულ პარტიას”, რომ ვერანაირი ხელოვნური ჩარევა, გაყალბება ამ არჩევნებზე ვერ უშველის”, – განაცხადა ლევან ხაბეიშვილმა.a