საქართველოს მოქალაქეების უმრავლესობა მხარს არ უჭერს რუსეთის წინააღმდეგ შეკვეთილ პროვოკაციებს, რომლებსაც რადიკალური ქართული ოპოზიცია დასავლელი სპონსორების მოთხოვნით აწყობს, – ამის შესახებ რუსეთის საგარეო საქმეთა სამინისტროს სპიკერმა, მარია ზახაროვამ განაცხადა.

ბათუმში რუსი ტურისტებით საკრუიზო გემის ჩასვლასთან დაკავშირებით საქართველოში რამდენიმე დღის წინ გამართულ საპროტესტო აქციაზე საუბრისას, ზახაროვამ აღნიშნა, რომ მსგავსი ქმედებები არის მორიგი შეკვეთილი ქმედება, რომელიც ქვეყანაში მრავლად ტარდება სხვადასხვა თემებზე და რუსეთისა და ასევე, გარკვეული შიდა მოვლენების კონტექსტში.

მისი თქმით, ადამიანები, რომლებიც ასეთ ქმედებებს სჩადიან, არა საქართველოს მოსახლეობას, არამედ მის დამკვეთებს წარმოადგენენ.

„ქვეყანის შიგნით ამ აქციას არანაირი მხარდაჭერა არ ჰქონია. ჩვენ ვიღებთ უამრავ მოწოდებას საქართველოს მოქალაქეებისგან, რომლებიც ამბობენ, რომ მათთვის მიუღებელია ეს უაზრო პროვოკაცია, რომ მათ, როგორც ქვეყანასთან არანაირი კავშირი არ აქვთ და ემიჯნებიან მისგან“, – განაცხადა ზახაროვამ.

ის ასევე ამბობს, რომ აშშ-ის ელჩი თბილისში კელი დეგნანი „პირდაპირ ასწავლის საქართველოს მოქალაქეებს როგორ იცხოვრონ“.საქართველოში ლაინერის ჩამოსვლას პროტესტი მოჰყვა.

შეგახსენებთ, რომ რუსული საკრუიზო ლაინერი Astoria Grande ბათუმში 27 და 31 ივლისს, ერთ კვირაში ორჯერ ჩავიდა.

საქართველოში ლაინერის ჩამოსვლას პროტესტი მოჰყვა. ბათუმის პორტში სტუდენტები, ოპოზიციონერები და სამოქალაქო აქტივისტები შეიკრიბნენ. პოლიციამ „წვრილმანი ხულიგნობისა“ და „პოლიციის კანონიერი მოთხოვნებისადმი დაუმორჩილებლობისთვის“ აქციის 23 მონაწილე დააკავა.

უკრაინის ეროვნული უსაფრთხოების და თავდაცვის საბჭოს მდივნის, ოლექსი დანილოვის განცხადებით, ქვეყნის სამხედრო-სამრეწველო კომპლექსის მიერ წარმოებული იარაღის გამოყენებისთვის რუსეთის ტერიტორიაზე დარტყმების განხორციელებისთვის უკრაინას არანაირი აკრძალვა არ აქვს.

მისივე თქმით, უკრაინას ნაკისრი აქვს ვალდებულება რუსეთის ტერიტორიაზე დარტყმებისთვის პარტნიორების მიერ მიწოდებული იარაღის არგამოყენებაზე.

„პარტნიორებთან გვაქვს შეთანხმებები, რომ რუსეთის ტერიტორიაზე დარტყმებისთვის მათ იარაღს არ ვიყენებთ, იმისთვის, რომ რუსეთმა არ დაადანაშაულოს ისინი ომის მონაწილეობაში, მაგრამ ჩვენი სამხედრო-სამრეწველო კომპლექსის წარმოებულ იარაღს ეს არ ეხება “, – განაცხადა დანილოვმა.

კიევში საჰაერო განგაში იყო გამოცხადებული. დედაქალაქის სამხედრო ადმინისტრაციის ხელმძღვანელის, სერგეი პოპკოს ინფორმაციით, ქალაქზე თავდასხმა ირანული დრონებით განხორციელდა.

საჰაერო თავდაცვის სისტემებმა 15-მდე უპილოტო საფრენი აპარატის ნეიტრალიზება შეძლო.

სერგეი პოპკოს განცხადებით, კიევის, სუმის, პოლტავას, ჩერნიგოვისა და ჩერკასის ოლქებში უპილოტო საფრენი აპარატების გამოყენების საფრთხე არსებობს.

“ყურადღება! უპილოტო საფრენი აპარატი საფრთხეს უქმნის დედაქალაქს! გადადით თავშესაგრებში!” – განაცხადა კიევის საქალაქო ადმინისტრაციის ხელმძღვანელმა სერგეი პოპკომ.

მოგვიანებით ცნობილი გახდა, რომ დედაქალაქის მისადგომებთან საჰაერო თავდაცვა ამუშავდა.

“საჰაერო განგაში გრძელდება! ოლქში, კიევის მისადგომებთან საჰაერო თავდაცვა მუშაობს. იყავით თავშესაფრებში საჰაერო განგაშის დასრულებამდე!” – განაცხადა სერგეი პოპკომ.

ინფორმაცია დაღუპულთა და დაშავებულთა შესახებ არ გავრცელებულა.

რუსულმა ძალებმა, გასული 24 საათის განმავლობაში, ბახმუტის მიმართულებით, წარუმატებელად სცადეს დაკარგული პოზიციის აღდგენა კურდიუმოვკას დასავლეთით, ანდრეევკას სამხრეთით და დონეცკის ოლქის კლეშჩიევკას დასავლეთით, – ამის შესახებ უკრაინის შეიარაღებული ძალების გენერალური შტაბი იუწყება.

გენშტაბის ცნობით, ფრონტზე, ბოლო ერთი დღის განმავლობაში, 44 შეტაკება მოხდა.

მარინკას მიმართულებით თავდაცვის ძალები აგრძელებენ რუსული ჯარების შეტევის შეკავებას ქალაქ მარინკას მიდამოში.

ასევე, გენშტაბის ცნობით, შახტიორსკის მიმართულებით, რუსებმა წარუმატებლად სცადეს სტარომაიორსკის დასავლეთით და უროჟაინოეს ჩრდილოეთით დაკარგული პოზიციის აღდგენა.

ამასთან, ზაპოროჟიეს მიმართულებით რუსული ძალების ძალისხმევა მიმართულია უკრაინელების შემდგომი წინსვლის აღკვეთაზე.

მელიტოპოლისა და ბერდიანსკის მიმართულებით უკრაინის თავდაცვის ძალები შეტევითი ოპერაციის ჩატარებას და მიღწეულ ხაზებზე კონსოლიდაციას განაგრძობენ.

გენშტაბის ანგარიშში აღნიშნულია, რომ ოკუპანტები ახორციელებენ საჰაერო დარტყმებს და უკრაინის დასახლებებს სხვადასხვა ტიპის იარაღიდან ბომბავენ.

რომის პაპ ფრანცისკეს ეჭვი ეპარება, რომ დასავლეთის ქვეყნები სწორი მიმართულებით მოძრაობენ მსოფლიოში მშვიდობის უზრუნველსაყოფად. ინფორმაციას „ვატიკან ნიუსი“ ავრცელებს.

„ევროპისადმი ღრმა სიყვარულით და დიალოგის სულისკვეთებით, რომელიც განასხვავებს ამ კონტინენტს, შეგვიძლია, ვკითხოთ მას: „სად მიდიხართ, თუ არ უჩვენებთ მსოფლიოს მშვიდობის გზას, კრეატიულ გზებს უკრაინაში ომის და ამდენი სისხლისღვრის გამომწვევი კონფლიქტების დასასრულებლად?“ – აღნიშნა პაპმა.

პონტიფიკოსმა დაგმო იარაღის წარმოებაში ინვესტიციების ზრდა და აღნიშნა, რომ იარაღი არ არის სამომავლო ინვესტიცია, მას შეუძლია ადამიანური კაპიტალის ამოწურვა, ისეთის, როგორებიცაა განათლება, ჯანდაცვა და სახელმწიფოებრივი კეთილდღეობა.

„აუცილებელია განვითარდეს სამშვიდობო დიპლომატია, რომელიც მიმართულია კონფლიქტების მოგვარებისა და დაძაბულობის შესამცირებლად“, – განაცხადა პაპმა.

ევროპის ქვეყნები კვლავ ძლიერ სიცხეს ებრძვიან. ხანძრის ათობით კერის ჩაქრობა ჯერ კიდევ ვერ ხერხდება ესპანეთის, იტალიისა და საფრანგეთის რეგიონებში.

ივლისის შუა რიცხვების მონაცემებით, გაუსაძლისი სიცხეების გამო საფრანგეთში 80-მდე ადამიანი დაიღუპა. ინფორმაციას მედია, საზოგადოებრივი ჯანდაცვის სააგენტოს მონაცემებზე დაყრდნობით ავრცელებს.

სტატისტიკური კვლევების დასრულების შემდეგ მოსალოდნელია, რომ ამ სეზონზე სიცხის გამო დაღუპულთა რიცხვი კიდევ გაიზრდება.

არც ვლადიმერ პუტინი და არც ვოლოდიმირ ზელენსკი არ არიან მზად მშვიდობისთვის, – ამის შესახებ ბრაზილიის პრეზიდენტმა, ლუის ინასიო ლულა და სილვამ განაცხადა.

ინფორმაციას „ალჯაზირა“ ავრცელებს.

ბრაზილიის პრეზიდენტის განცხადებით, ვიდრე მისი ქვეყანა უკრაინაში მშვიდობის დასამყარებლად მუშაობს, არც უკრაინის ლიდერი და არც ვლადიმერ პუტინი არ არიან მზად სასაუბროდ.

მისივე თქმით, სამშვიდობო შეთანხმება შესაძლებელი იქნება მხოლოდ მაშინ, როდესაც რუსეთისა და უკრაინის ლიდერები მზად იქნებიან მოლაპარაკებებისთვის.