“მთავარი რამ აკლია ამ ოპოზიციურ „ერთობას“ თუ „გაერთიანებას“, სინამდვილეში, აკლიათ საზოგადოების მხარდაჭერა”, – ამის შესახებ მმართველი გუნდის წევრმა, მიხეილ სარჯველაძემ განაცხადა.

მისივე თქმით, ყველას ახსოვს, ვაშაძე როგორ ლანძღავდა სააკაშვილს და სააკაშვილი ვაშაძეს, მიუხედავად ამისა, დღეს აღმოჩნდა, რომ ეს ერთი და იგივე პოლიტიკური კონგლომერატია.

„ამავე დროს ხდება გამომზეურება საოცარი უპრინციპობისა, რომელსაც იქ გაერთიანებული პოლიტიკოსები იჩენენ. გვახსოვს, მაგალითად ვაშაძე როგორ ლანძღავდა სააკაშვილს და სააკაშვილი ვაშაძეს. მიუხედავად ამისა, დღეს აღმოჩნდა, რომ ეს ერთი და იგივე პოლიტიკური კონგლომერატია, რასაც ვამბობდით კიდეც. მიუხედავად იმისა, რომ ამას უარყოფდნენ აღმოჩნდა, რომ ეს ლანძღვა ყოფილა ფარსი და სინამდვილეში ისინი არიან ერთნი“, – განაცხადა სარჯველაძემ.

გადაწყვეტილება მიღებულია, ისევ და ისევ ქვეყნის და ხალხის ინტერესებიდან გამომდინარე. ეს არის ჩვენს პარტნიორებთან ხელისუფლების თანამშრომლობის მაგალითი, – ამის შესახებ დედაქალაქის მერმა, კახა კალაძემ განაცხადა.

თბილისის მერის თქმით, საქართველოს ხელისუფლება ყოველთვის მზად არის თავის პარტნიორებთან თანამშრომლობისთვის და თუ საჭიროა, ხარვეზების გამოსწორებისთვის, თუმცა ის არასოდეს მიიღებს ქვეყნის ინტერესების დამაზიანებელ გადაწყვეტილებას.

„რაც შეეხება სანქციებთან მიერთებას, ჩვენ ვერ გადავდგამთ ისეთ ნაბიჯს, რომელიც შეიძლება პრობლემური იყოს ჩვენი ქვეყნისთვის და დამაზიანებელი იყოს, თუმცა, თანამშრომლობას რაც შეეხება, ყოველთვის მზად ვართ პარტნიორებთან თანამშრომლობისთვის. თუ არის რაიმე ხარვეზი, ასევე, მზად ვართ, ეს ყველაფერი გამოვასწოროთ, მაგრამ ხაზი მინდა გავუსვა, რომ არ გადავდგამთ ნაბიჯს, რომელიც შეიძლება, დამაზიანებელი იყოს ჩვენი ქვეყნისთვის და ხალხისთვის. ავიღოთ პოლონეთის მაგალითი – ქვეყანას, რომელიც უერთდება სანქციებს, ხორბლის გამოტანასთან დაკავშირებით, ხედავთ, რა პოზიცია აქვს. პოლონეთი გამოდის და ამბობს, რომ ისინი გაატარებენ თავიანთი ქვეყნის ინტერესებს და ხორბლის შეტანაზე გადაწყვეტილებას სოფლის მეურნეობის და იქ მცხოვრები ადამიანების ინტერესებიდან გამომდინარე მიიღებენ. ასევე იმოქმედებს საქართველოს ხელისუფლება. სანქციების პაკეტი შედგება ბევრი მნიშვნელოვანი კომპონენტისგან. ჩვენ თავიდანვე გვქონდა პოზიცია, რომ აღნიშნულ პაკეტს ვერ შევუერთდებოდით ქვეყნის ინტერესებიდან გამომდინარე, თუმცა ჩვენს პარტნიორებთან ვთანამშრომლობთ და ესეც თანამშრომლობის მაგალითია“, – განაცხადა კახა კალაძემ.

მისივე თქმით, პოლიტიკური გადაწყვეტილებები არა ემოციებით, არამედ ანალიზის შედეგად და აუცილებლად ქვეყნის ინტერესების გათვალისწინებით უნდა იყოს მიღებული.

„გადაწყვეტილებები ემოციებით არ უნდა მივიღოთ. ამას სჭირდება ანალიზი, სწორი დასკვნების გაკეთება. თუ გადავხედავთ წარსულს, ვნახავთ, რამდენი შეცდომა გვაქვს დაშვებული არასწორი ნაბიჯებით, გადაწყვეტილებებით, რომელმაც ქვეყანა ათეული წლებით უკან დახია. შეიძლება იყოს შემოტევა, ზეწოლა, აგერ ოპოზიცია თანხებს ხარჯავს იმაში, რომ ჩვენი ქვეყანა მოხვდეს სანქციების ქვეშ. ჩვენ იმიტომ ვართ ხელისუფლებაში, რომ მოსახლეობის უმრავლესობის მხარდაჭერა გვაქვს და ვალდებული ვართ, უდიდესი პასუხისმგებლობა გვაქვს, დავიცვათ და გავატაროთ ჩვენი ქვეყნის მოსახლეობის ინტერესები, როგორც ამ კონკრეტულ შემთხვევაში, ამას აკეთებს პოლონეთი“, – განაცხადა კახა კალაძემ.

ოპოზიცია ხიბლშია ჩავარდნილი, იციან, რომ ისინი მთავრობის რეალურ კაბინეტს ვერ დააკომპლექტებენ და ამიტომ ჩრდილოვანი კაბინეტის დაკომპლექტებით თამაშობენ, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.

მისი თქმით, ოპოზიციის გარკვეული ნაწილი დისკრედიტირებულია.

„ცდილობენ, რომ საზოგადოების თვალში საკუთარი სტატუსი და ფასი რაღაცნაირად ასწიონ, თუმცა ამას ჩრდილოვანი კაბინეტი ვერ უშველის, რადგან ეს ადამიანები სრულიად დისკრედიტირებული არიან, მათ შორის იმის გამო, რომ როგორც აღმოჩნდა, ისინი ლობისტებს ქირაობენ, რათა საქართველო დაასანქცირონ და ქვეყნის იმიჯი დააზიანონ“, – განაცხადა სამხარაძემ.

„სტრატეგია აღმაშენებლის“ ლიდერის გიორგი ვაშაძის განცხადებით, „გამარჯვების პლატფორმას“ ეყოლება როგორც პრემიერ-მინისტრობის კანდიდატი, ისე ჩრდილოვანი კაბინეტი.

თბილისის მერის, კახა კალაძის განცხადებით, „ერთიანი ნაციონალური მოძრაობის“, „ლელოსა“ და გიორგი გახარიას პარტიის გაერთიანებით არაფერი შეიცვლება.

როგორც მან მედიასთან შესაბამისი კითხვის საპასუხოდ განმარტა, ოპოზიციის წარმომადგენლები, რეალურად, ყოველთვის ერთი ფრთის ქვეშ იყვნენ გაერთიანებულები.

„გადახედეთ ამ ადამიანების წარსულს, რა გაუკეთებიათ ცხოვრებაში, რა შეუქმნიათ. დღევანდელობასაც გადავხედოთ, რით არიან დაკავებულები. ამ გაერთიანებით არაფერი იცვლება. ეს ადამიანები ყოველთვის ერთი ფრთის ქვეშ იყვნენ, შეიძლება მოგვევლინონ სხვადასხვა პარტიის სახით, შეიძლება რაღაც პლატფორმაზე გაერთიანდნენ, მაგრამ ეს არ ცვლის შედეგს“, – განაცხადა კახა კალაძემ.

თბილისის მერი დარწმუნებულია, რომ წინა წლების მსგავსად, 2024 წლის არჩევნებშიც მოსახლეობის უმრავლესობა სწორ გადაწყვეტილებას მიიღებს.

„გადახედეთ ეს ადამიანები რა განცხადებებს აკეთებენ. ერთს ჰგონია, რომ ქვეყანას ჰყავს ბატონები და მათ უნდა ვემონებოდეთ. ადამიანებმა, რომლებიც ფიქრობენ, რომ მათ ჰყავთ ბატონი და არიან მონები, შეუძლებელია რაიმე სასიკეთო გაუკეთონ თავიანთ ქვეყანას. ხალხი ყველაფერს ხედავს, ნუ ჰგონიათ, რომ თავიანთი ტელევიზიების საშუალებით ვინმეს მოატყუებენ. საბედნიეროდ, დღეს ინფორმაციის ხელმისაწვდომობა არსებობს. ხალხი კარგად ხედავს, ვინ რას წარმოადგენს და ვის რა პოლიტიკური წარსული აქვს. როგორც წინა წლებში, ასევე, 2024 წელს მოსახლეობის უმრავლესობა სწორ გადაწყვეტილებას მიიღებს“, – აღნიშნა კახა კალაძემ.

საქართველოს პრემიერ-მინისტრის, ირაკლი ღარიბაშვილის შემოსავალი მის ქონებრივ დეკლარაციაში სრულადაა ასახული და ყველასთვის ხელმისაწვდომი, – ამის შესახებ თბილისის მერმა, კახა კალაძემ პრემიერის შემოსავლებთან დაკავშირებით დასმული შეკითხვის საპასუხოდ განაცხადა.

როგორც მან აღნიშნა, წარსულს ჩაბარდა ის დრო, როდესაც მაღალჩინოსნები ქვეყნის ბიუჯეტიდან აფინანსებდნენ, თუნდაც, საკუთარი შვილების სწავლას.

„პრემიერის შემოსავალს რაც შეეხება, ყველაფერი მითითებული აქვს დეკლარაციაში. ერთ რამეს გეტყვით – დღეს საქართველოში, ვერ ცერთი მაღალჩინოსანი, თუნდაც პრემიერ-მინისტრი იყოს, ვერ გაბედავს, რომ ბიუჯეტიდან დააფინანსოს საყვარლები, საკუთარი თავის მასაჟი ქალბატონების ჩამოყვანით. ბევრი მაღალჩინოსანი ვიცი, რომელთაც ძალიან ნიჭიერი და წარმატებული შვილები ჰყავთ, მაგრამ ეს ვერ იქნება საბაბი იმისთვის, რომ ბიუჯეტიდან ფული აიღოს ვინმემ და თავისი შვილის სწავლა დააფინანსოს“, – განაცხადა კახა კალაძემ.

„ევროპელი სოციალისტები” პარლამენტში 2008 წლის ომის საგამოძიებო კომისიის შექმნას კვლავ ითხოვენ. ფრიდონ ინჯიამ პარლამენტში გამართულ ბრიფინგზე განაცხადა, რომ “სააკაშვილი აგენტია, რომელიც 2003 წელს საქართველოში ამერიკულ რევოლუციას ჩაუდგა სათავეში”, 2008 წელსაც მათი დავალებით მოქმედებდა და ახლა სააკაშვილის გასათავისუფლებლად მასშტაბური კოორდინაცია მიმდინარეობს.

“საზოგადოება კარგად ხედავს, რა მასშტაბის კოორდინაცია მოქმედებს იმისათვის, რომ ციხიდან განთავისუფლდეს კრიმინალი მიხეილ სააკაშვილი, რომელსაც საკუთარი ქვეყნისა და ხალხის წინაშე უამრავი დანაშაული აქვს ჩადენილი. ამ კოორდინაციაში ჩართულნი არიან ამერიკის ხელისუფლება, ევროპარლამენტი რამდენიმე ასეული დეპუტატით, უკრაინისა და მოლდოვას ხელისუფლებები, ოპოზიცია, არასამთავრობო ორგანიზაციები და არაერთი სხვა სუბიექტი, რომლებიც საბოლოოდ ერთი ხელიდან იმართება.

საინტერესოა, რატომ იცავენ ისინი სააკაშვილს და რატომ ცდილობენ მის გათავისუფლებას. გასაგებია, რომ სააკაშვილი აგენტია, რომელიც 2003 წელს საქართველოში ამერიკულ რევოლუციას ჩაუდგა სათავეში, ამერიკული აგენტურა მოიყვანა ხელისუფლებაში და ამერიკელების ყველა დავალებას პირნათლად ასრულებდა: დაამყარა ავტორიტარული რეჟიმი, გადაავსო ციხეები, აწამებდა პატიმრებს, მუდმივი რეკეტისა და შიშის ქვეშ ჰყავდა ბიზნესი, მიიტაცა ტელევიზიები, გაასხვისა სტრატეგიული ობიექტები, დავით გარეჯი და ა.შ.

თუმცა, მთავარი მიზეზი, რატომაც ისინი სააკაშვილს იცავენ და მის გათავისუფლებას ცდილობენ, მაინც მის მიერ შესრულებული მთავარი დავალებაა. ამერიკელებისთვის ყველაზე ფასეული იყო 2008 წლის რუსეთ-საქართველოს ომის პროვოცირება, რომელმაც რუსეთის ეკონომიკასა და საერთაშორისო იმიჯს პირველი სერიოზული დარტყმა მიაყენა და რუსეთსა და ევროპას შორის სერიოზული ბარიერი შექმნა.

მართალია, სააკაშვილმა ეს ამერიკელების დავალება უნიჭოდ და სერიოზული ხარვეზებით შეასრულა, მაგრამ ამერიკელებმა პროგრამა მინიმუმს მაინც მიაღწიეს, რასაც ისინი სააკაშვილს, ბუნებრივია, სათანადოდ უფასებენ. ამ დროს თვალს ხუჭავენ იმ მილიარდებზე, რომელიც სააკაშვილმა ამ ომით მიითვისა. საბოლოოდ, 2008 წლის ომს არაპროვოცირებული ვერ დაერქვა და მეტიც, სააკაშვილს ევროსაბჭოს რეზოლუციის ხელმოწერით, იმის აღიარება მოუწია, რომ ომი თავად დაიწყო და სახალხოდ, ტელევიზიითაც დიდი სიამაყით ამცნო საქართველოს მოსახლეობას თავისი „საამაყო“ დანაშაული. თუმცა, ყველაფერი ამის მიუხედავად, სააკაშვილი მაშინ ზუსტად ისევე გამოაცხადეს მსოფლიო გმირად, როგორც ზელენსკი ჰყავთ დღეს გამოცხადებული. ისიც უნდა ითქვას, რომ არაჟნების სპეცოპერაცია წარმატებით რომ განხორციელებულიყო, დღეს ამერიკელებს ერთდროულად ორი მსოფლიო გმირი ეყოლებოდა, რომლებიც რუსეთს ორი ფრონტით დაუპირისპირდებოდნენ.

ჩვენს მიერ არაერთხელ გაჟღერდა მოთხოვნა, 2008 წლის ომის გამოძიების შესახებ. თუმცა, ვფიქრობთ, მასშტაბური კოორდინაცია, რომელიც სააკაშვილის გასათავისუფლებლად წარმოებს, ყველაფერს სრულად მოჰფენს ნათელს. სააკაშვილს საკუთარი პატრონები 2008 წლის ომს უმადლიან და მას სწორედ ამ მთავარი დამსახურების გამო იცავენ. ვხედავთ, რომ ამერიკელების შიშით, „ქართული ოცნება“ ბოლომდე მაინც ვერ ახერხებს სახელმწიფოს ინტერესების სრულად დაცვას და საგამოძიებო კომისიის შექმნისგან ისევ თავს იკავებს. როდემდე? თუმცა, სააკაშვილის გარშემო განვითარებული პროცესების გათვალისწინებით, ომთან დაკავშირებით გამოსაძიებელიც კი აღარაფერია, რადგან ყველაფერი ისედაც დღესავით ნათელია”, – განაცხადა ინჯიამ.

ინჯია მარია ზახაროვას განცხადებასაც გამოეხმაურა და ბათუმში აქციაზე სოჭიდან რუსი ტურისტებით შემოსული გემის გასაპროტესტებლად მისულებს “დაქირავებულები” უწოდა.

„მართლაც უხერხულია 150 კაცის გამოსვლა გაასაღო და მთელი ხალხის, მოსახლეობის სახელით ილაპარაკოს 150- მა დაქირავებულმა,”- განაცხადა ინჯიამ.