ილია დარჩიაშვილი საქართველოს ევროინტეგრაციასთან დაკავშირებით ევროკავშირის წევრი ქვეყნების საგარეო საქმეთა მინისტრების განცხადებებს გამოეხმაურა. როგორც საქართველოს საგარეო საქმეთა მინისტრმა აღნიშნა, დადებითი შეფასებები საქართველოს ხელისუფლების გაწეული სამუშაოს შედეგია.

„ის, რომ დღეს კითხვები არ არსებობს საქართველოს მხრიდან კონკრეტულ და შედეგზე ორიენტირებულ ნაბიჯებთან მიმართებაში, ის, რომ საქართველო განუხრელად ახორციელებს ევროკავშირისა და ევროკომისიის რეფორმებსა და რეკომენდაციებს, არის იმ ძალისხმევის შედეგი, რომელიც ჩვენმა ხელისუფლებამ გაწია, რათა საქართველოს ჰქონოდა კონკრეტული შედეგები. ამ შედეგებზე დაყრდნობით, ის გამოხმაურებები, რომლებსაც ვიღებთ ჩვენი პარტნიორებისგან, მეტყველებს იმაზე, რომ თანმიმდევრულად ვატარებთ ჩვენი ქვეყნის რეფორმირებას, რომ საბოლოო წევრობა ძალიან მალე იყოს ხელშესახები“, – განაცხადა დარჩიაშვილმა.

ბრიუსელში აღმოსავლეთ პარტნიორობის მინისტერიალი იწყება, რომელსაც საქართველოს საგარეო საქმეთა მინისტრი ილია დარჩიაშვილი დაესწრება.

NDI-ს ერთი კვლევაც არ მახსოვს, რომელიც ციფრებში ემთხვევა შედეგებს – ყოველთვის წარმოდგენილია გადაუწყვეტელთა არმია, რომელიც რეიტინგის არმქონე პარტიებს პერსპექტივას უტოვებს, – ამის შესახებ პარლამენტის პირველმა ვიცე- სპიკერმა გია ვოლსკიმ განაცხადა, რითაც NDI-ის კვლევას გამოეხმაურა.

მისივე თქმით, კვლევაში ჩანს, რომ „ქართული ოცნების“ რეიტინგი გაცილებით მეტია, ვიდრე ოპოზიციის, თუმცა რიცხვი 19 (რომელიც კვლევის თანახმად, „ქართული ოცნების“ რეიტინგს ასახავს), ვოლსკის შეფასებით „სასაცილოა რეალურ მაჩვენებელთან შედარებით“.

„ვინც NDI-ს კვლევებს, საველე სამუშაოებს ატარებს, ის ორგანიზაცია, გარკვეულწილად, დაკავშირებული იყო ადრე „ნაცმოძრაობასთან“ , ახლა კოლექტიურ „ნაცმოძრაობასთან“. მე არ მახსოვს ერთი კვლევა მაინც ისეთი, რომ ციფრებში ემთხვეოდეს ერთმანეთს შედეგი და კვლევა. მიუხედავად ამისა, თავად მათაც არ აქვთ შესაძლებლობა ის ფაქტი უარყონ, რომ „ქართული ოცნების“ მხარდამჭერთა რაოდენობა ერთად აღებული ყველა ოპოზიციური პარტიის, ძირითადად კოლექტიური „ნაცმოძრაობის“ რეიტინგს მნიშვნელოვნად აჭარბებს, თუმცა, ციფრები შეცვლილია და ისეა წარმოდგენილი, თითქოს კიდევ არსებობს პერსპექტივა. გადაუწყვეტელთა რაოდენობაა იმდენი მითითებული, რომ არარეალისტური ლაპარაკის საშუალებას ქმნის. არის „გორბის“ კვლევები და იქაც ნაჩვენებია, რომ „ქართულ ოცნებას“ გაცილებით დიდი რეიტინგი აქვს. აქაც იგივეა ნაჩვენები, თუმცა, 19 პროცენტი სასაცილოა იმასთან შედარებით, რასაც ჰქვია რეალური მაჩვენებელი და გადაუწყვეტელთა არმია არის წარმოდგენილი ყოველთვის, რომელიც პერსპექტივას უტოვებს რეიტინგის არმქონე პარტიებს,“ – განაცხადა ვოლსკიმ.

ვოლსკი გამოეხმაურა კვლევის იმ ნაწილსაც, რომლის თანახმად, სალომე ზურაბიშვილის საქმიანობას უმრავლესობა საშუალოდ ან კარგად აფასებს.

NDI-ს კვლევები ყოველთვის პოლიტიკურ მიზანზე იყო ორიენტირებული. ახლა მთელი ძალისხმევა მიდის იქით, რომ ახალ მოკავშირეთა ჯგუფი იქმნება, რომელიც თვალსაჩინოდ თუ ფარდის მიღმა ჩამოაყალიბებს „ქართული ოცნების“ საწინააღმდეგო კოალიციას. აქ შედის „ლელოც“, გახარიაც, პრეზიდენტი სალომე ზურაბიშვილი, შეიძლება ნინო ლომჯარია და უნდათ ეს იდეა NDI-ს კვლევებითაც მოგვყიდონ საზოგადოებას,“ – განაცხადა ვოლსკიმ.

ევროკავშირის წევრ ქვეყნებს შორის პოლიტიკური განწყობა პოზიტიურია. საქართველოსთან დაკავშირებით კონსენსუსს საფრთხე არ უნდა დაემუქროს, – ამის შესახებ ევროპასთან ინტეგრაციის კომიტეტის თავმჯდომარე მაკა ბოჭორიშვილმა განაცხადა.

ბოჭორიშვილის თქმით, ევროკომისიის რეკომენდაცია ძირითადი საფუძველია ევროპული საბჭოს პოზიტიური გადაწყვეტილებისთვის.

„ვიცით, რომ საკითხი არის გაფართოების პაკეტი და ამ საკითხზე საჭიროა 27 წევრი ქვეყნის თანხმობა, კონსენსუსის მიღწევა. ევროკომისიის რეკომენდაცია ძირითადი და მნიშვნელოვანი საფუძველია პოზიტიური გადაწყვეტილებისთვის. ასევე ვიცით, რომ საქართველოსთან მიმართებით ევროკავშირის წევრ ქვეყნებს შორის პოლიტიკური განწყობა პოზიტიურია  და, წესით, საქართველოსთან დაკავშირებულ გადაწყვეტილებას, კონსენსუს საფრთხე არ უნდა დაემუქროს, თუმცა საკითხი არის კომპლექსური – არის სხვადასხვა ქვეყანა, არის გაფართოების პაკეტი. იმედი გვაქვს, წევრი ქვეყნები ამ საკითხზე კონსენსუსს მიააღწევენ.

ზოგადად, ნებისმიერ საკითხს, რომელსაც ევროკავშირის საბჭო განიხილავს, სჭირდება ევროკავშირის წევრი ქვეყნების პოზიციების დაფიქსირება და შემდგომ კონსენსუსის მიღწევა. ეს არ არის უნიკალური საკითხი, რომელიც გამოირჩევა თავისი სირთულეებით. მოველი, რომ როგორც სხვა შემთხვევებში, ამ შემთხვევაშიც ევროკავშირის წევრი ქვეყნები კონსენსუსს მიაღწევენ“, – განაცხადა მაკა ბოჭორიშვილმა.

„ნაციონალურ მოძრაობაში“ ლევან ხაბეიშვილის მიყვანა და პარტიიდან ნიკა მელიას ასე დამამცირებლად გაგდება ერთი დიდი სცენარის ნაწილია. რა თქმა უნდა, იქ როლებია განაწილებული, – ამის სესახებ საპარლამენტო უმრავლესობის წევრმა, ალუდა ღუდუშაურმა განაცხადა.

ღუდუშაურის თქმით, მელიასა და მის მოკავშირეებს დამაკნინებელი როლი ერგოთ.

„ერთ-ერთი ასეთი დამაკნინებელი როლი აქვს სალომე ზურაბიშვილსაც, რომელიც საქართველოს ისტორიაში დარჩება ქვეყნისთვის უპატივცემულო და უმადური პრეზიდენტი. მელიას საკითხის გააქტიურება ხელოვნურად ხდება. „ლელოც“ გააქტიურდება და გახარიასაც გააქტიურებენ. ფაქტია, რომ „ნაციონალურ მოძრაობასთან“ გახარია და მისი გუნდი მშვენივრად თანამშრომლობენ. მელიას გააქტიურების სცენარის ავტორთა მიზანია, მელიასაც და „ლელოსაც“ ბარიერი გადაალახინონ. სინამდვილეში, არც იდეოლოგიური, არც მსოფლმხედველობითი, არც მორალური სხვაობა მათ შორის არაა, ერთ ფესვზე დამყნობილი პოლიტიკური ძალები არიან, რომელთა მოტივი, მიზანია, ხელში ჩაიგდონ ამ ქვეყნის მართვის სადავეები, რაც უნიჭო მცდელობაა. „ნაცმოძრაობამ“ ქართველ ხალხთან პირწმინდად წააგო“, – განაცხადა ალუდა ღუდუშაურმა.