ინფორმაციის თანახმად, გასული წლის განმავლობაში საქართველოში უცხო ქვეყნის მოქალაქეების მიერ ნაყიდი უძრავი ქონების ნახევარი რუსეთის მოქალაქეებზე მოდიოდა, – ამის შესახებ პარტია „ლელოს“ ერთ-ერთმა ლიდერმა, საბა ბუაძემ პარტიის ოფისში გამართულ ბრიფინგზე განაცხადა.

ბუაძის თქმით, მან საჯარო რეესტრიდან გამოითხოვა ინფორმაცია, რომლის თანახმადაც მთელი 2023 წლის განმავლობაში 5000-ზე მეტი გაყიდული ბინიდან 2400-მდე უძრავი ქონების ობიექტი სწორედ რუსეთის მოქალაქეებზე მოდის.

„ჩვენ დღეს ვასაჯაროებთ საჯარო რეესტრიდან მიღებულ საგანგაშო ინფორმაციას, რომელიც ადასტურებს საქართველოში რუსების შემოსევის კიდევ ერთ განზომილებას. ამ ინფორმაციის თანახმად, გასული წლის განმავლობაში საქართველოში უცხო ქვეყნის მოქალაქეების მიერ ნაყიდი უძრავი ქონების ნახევარი მოდიოდა რუსეთის მოქალაქეებზე. მთელი 2023 წლის განმავლობაში, ისევე, როგორც უკრაინაში ომის დაწყების შემდგომ – 2022 წლის 1-ელი მარტიდან 2023 წლის 1-ელ იანვრამდე, ჩვენ ვნახეთ საგანგაშო მონაცემები, სადაც 5000-ზე მეტი გაყიდული ბინიდან 2400-მდე უძრავი ქონების ობიექტი სწორედ რუსეთის მოქალაქეებზე მოდის, რაც ადასტურებს უმწვავეს მოცემულობას, რასაც ჰქვია ჩვენი ქვეყნის დატაცება რუსეთის მიერ. ეს არის ის გარემო, რომელიც რუსეთის სამსახურში მყოფმა „ქართულმა ოცნებამ” შექმნა აქ რუსეთის მოქალაქეებისათვის და ამავდროულად, ეს არის სრულიად ხელოვნური მოცემულობა, რომელიც თბილისში კვებავს აღვირახსნილ და ველურ სამშენებლო სექტორს. სადაც მხოლოდ თბილისში 5000 გაყიდული ბინიდან თითქმის ნახევარი მოდის რუსეთის მოქალაქეებზე, ეს ნიშნავს იმას, რომ ჩვენი მთავრობა ხელს უწყობს რუსეთის მოქალაქეებს, რომ აქ ფეხი მოიკიდონ იმისთვის, რომ საქართველო და თბილისი მათი გართობის, დასვენებისა და თავშესაფრის ერთ-ერთი მნიშვნელოვანი პლაცდარმი გახდეს“, – განაცხადა საბა ბუაძემ.

ბუაძის თქმით, „საქართველოს დაცვის აქტის“ მიხედვით, „ლელო“ მოითხოვს, რომ 9 მიმართულებით დაწესდეს კონკრეტული შეზღუდვები რუსეთის მოქალაქეებისათვის.

„მოთხოვნა ჩვენ შეტანილი გვაქვს „საქართველოს დაცვის აქტში“, რომელიც ინიცირებულია საქართველოს პარლამენტში. „საქართველოს დაცვის აქტის“ მიხედვით, „ლელო“ მოითხოვს, რომ 9 მიმართულებით დაწესდეს კონკრეტული შეზღუდვები რუსეთის მოქალაქეებისათვის, ეს არის: სავიზო რეგულაციები, უძრავი ქონების რუსებზე მიყიდვის შეზღუდვა, რუსული კომპანიების სახელმწიფო შესყიდვების მონაწილეობის შეზღუდვა, რუსულ სანომრე ნიშნიანი ავტომობილების გადაადგილების შეზღუდვა, რუსული სადეზინფორმაციო საშუალებების საქართველოში შეზღუდვა და მათი ძირგამომთხრელი ფონდების საქმიანობის შეზღუდვა. ეს ყველაფერი გაერთიანებულია „საქართველოს დაცვის აქტში“ და დღეს ჩვენ მიერ გასაჯაროებული ინფორმაცია კიდევ ერთხელ ადასტურებს თუ რატომ არის აუცილებელი რომ გადაიდგას ქმედითი ნაბიჯები იმისათვის რომ რუსეთიდან მომდინარე მზარდი საფრთხეები იქნას შეკავებული“, – განაცხადა ბუაძემ.

ცნობისთვის, საბა ბუაძის მიერ გამოთხოვილი ინფორმაციის თანახმად, უძრავ ნივთებზე უფლებათა რეესტრის მონაცემებით, 2022 წლის პირველი მარტიდან 31 დეკემბრის ჩათვლით პერიოდისთვის თბილისის სარეგისტრაციო ზონაში 5 148 უცხო ქვეყნის მოქალაქის საკუთრების უფლება დარეგისტრირდა 6 330 უძრავ ნივთზე. მათ შორის, 2 002 რუსეთის ფედერაციის მოქალაქის საკუთრების უფლება დარეგისტრირდა 2 394 უძრავ ნივთზე.

2023 წლის იანვრიდან მიმდინარე პერიოდისთვის თბილისის სარეგისტრაციო ზონაში 5 192 უცხო ქვეყნის მოქალაქის საკუთრების უფლება დარეგისტრირდა 6 138 უძრავ ნივთზე. მათ შორის, 2 014 რუსეთის ფედერაციის მოქალაქის საკუთრების უფლება დარეგისტრირდა 2 378 უძრავ ნივთზე.

ხუთპროცენტიანი საარჩევნო ბარიერის პირობებში აუცილებელია, ისეთი პოლიტიკური პლატფორმები შეიქმნას, რომელიც ბარიერს გადალახავს. ყველა ხმა, რომელიც ბარიერს მიღმა მოხვდება, ეს დამატებითი ხმაა „ქართული ოცნების“ ხელისუფლებაში დასარჩენად. ამიტომ, ამ საკითხს მარტივად შევხედოთ, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

როგორც მანჯგალაძემ აღნიშნა, ოპოზიციურ პარტიებს თანამშრომლობა მოუწევთ. მისივე თქმით, „ლელო“ თუ არ ითანამშრომლებს, ნუ ითანამშრომლებს.“

„ჩვენი კოალიციის მიზანია, ხალხთან ყოფნა. სიმართლე გითხრათ, პარტიებს არ ველოდებით, თუ სურვილი იქნება, განვიხილავთ, მაგრამ ხალხს ველოდებით, ვისთანაც მეტი საერთო გვაქვს. „ლელო“ თუ არ ითანამშრომლებს, ნუ ითანამშრომლებს. ოდესმე, რაიმე შევეხვეწეთ? – რეალობის გათვალისწინება ყველას მოგვიწევს. ოპოზიციას ერთმანეთთან თანამშრომლობა მოგვიწევს. ითანამშრომლებენ თუ არა, ეს საარჩევნო ტაქტიკის ნაწილია – ასე უნდა თქვან და ასე უნდა ილაპარაკონ. არჩევნების შემდეგ რეალობა როცა დადგება – კოალიცია ოპოზიციასთან ერთად უნდა შექმნა ან ბიძინა ივანიშვილი უნდა დატოვო ხელისუფლებაში, ასეთ დროს რას გააკეთებენ, სად წავლენ? ყველა ერთსა და იმავე შეცდომას უშვებს. კამპანიას აწარმოებენ, რომ „ნაცი“ არ ვარო. გავიგეთ, კაცო, ვინ ხართ და ახლა გვითხრან, ხალხისთვის რას გააკეთებენ? – ზოგს ჰგონია, ვინ სად დაჯდება, ეს არის მნიშვნელოვანი. ადამიანებისთვის მნიშვნელოვანია, რომ დავსხდებით, ვინ რას გავაკეთებთ. ალბათ, დისტანციის მიზეზია – საკუთარი ნიშა გამოკვეთონ“, – განაცხადა პაატა მანჯგალაძემ.

საქართველოს პრემიერ-მინისტრი ირაკლი ღარიბაშვილი დელეგაციასთან ერთად შვეიცარიაში გაემგზავრა, სადაც მონაწილეობას მიიღებს დავოსის ყოველწლიურ მსოფლიო ეკონომიკურ ფორუმში. ინფორმაციას მთავრობის ადმინისტრაცია ავრცელებს.

დაგეგმილია პრემიერ-მინისტრის სიტყვით გამოსვლა პანელურ დისკუსიებზე.

ვიზიტის ფარგლებში მთავრობის მეთაური ორმხრივ შეხვედრებს გამართავს.

საქართველოს დელეგაციის შემადგენლობაში, რომელსაც პრემიერ-მინისტრი ხელმძღვანელობს, ვიცე-პრემიერი, ეკონომიკისა და მდგრადი განვითარების მინისტრი – ლევან დავითაშვილი, საგარეო საქმეთა მინისტრი – ილია დარჩიაშვილი და მთავრობის ადმინისტრაციის უფროსი – რევაზ ჯაველიძე არიან.