საქართველოს პრეზიდენტი სალომე ზურაბიშვილი 2024 წლის საპარლამენტო არჩევნებში მონაწილეობას არ გამორიცხავს.

შესაბამის საკითხზე მას კითხვა „რადიო თავისუფლების“ პრაღის ოფისის ჟურნალისტმა დაუსვა, რაზეც სალომე ზურაბიშვილმა აღნიშნა, რომ „თუ საქართველოს ევროპული მომავალი კითხვის ნიშნის ქვეშ დადგება, ის ყველაფერს განიხილავს“.

კერძოდ, სალომე ზურაბიშვილმა განაცხადა, რომ იგი თავის საპრეზიდენტო ვადას ბოლომდე მიიყვანს, რათა ქვეყანაში პოლიტიკური კონსენსუსი დააბრუნოს, თუმცა შეკითხვას, იმ შემთხვევაში თუ საქართველოს ევროპული მომავალი კითხვის ნიშნის ქვეშ დადგებოდა, მიიღებდა თუ არა საარჩევნო რბოლაში რაიმე ფორმით მონაწილეობას, მან უპასუხა რომ ასეთ შემთხვევაში იგი ყველაფერს განიხილავს.

„თუ საქართველოს ევროპული მომავალი კითხვის ნიშნის ქვეშ დადგება, მე ყველაფერს განვიხილავ“, – აღნიშნა საქართველოს პრეზიდენტმა.

„ქართული ოცნების“ თავმჯდომარის, ირაკლი კობახიძის განცხადებით, 2018 წლის საპარლამენტო არჩევნებზე პარტიის სტრატეგიული მრჩევლების, მოშე კლუგჰაფტის და მირი მიქაელის ინიციატივა იყო, სალომე ზურაბიშვილის ბანერების „ქართული ოცნების“ ბანერებით ჩანაცვლება.

მისივე თქმით, საპრეზიდენტო არჩევნების წინა პერიოდში ქვეყანაში გავრცელებული „სისხლიანი ბანერების“ იდეა მოშე კლუგჰაფტს არ ეკუთვნის და შესაბამისად, არც „ქართულ ოცნებას“.

როგორც მან აღნიშნა, „ქართული ოცნებისთვის“ საკმარისი არ არის 55%-ის მიღება შემდეგ საპარლამენტო არჩევნებში, სწორედ ამიტომ მათი პრინციპული ამოცანაა, რომ კიდევ უფრო გააუმჯობესოს შედეგი და „საბოლოოდ კოლექტიური „ნაციონალური მოძრაობა“ დაასრულონ“.

„ჩვენ გავაფორმეთ კონტრაქტი მოშე კლუგჰაფტსა და მირი მიქაელთან, ეს არის ორი წამყვანი სტრატეგიული კონსულტანტი, რომელიც დაგვეხმარება პიარ კამპანიების დაგეგმვაში შემდეგი ერთი წლის განმავლობაში. ისინი ასევე, ჩვენ გვეხმარებოდნენ 2018 წლის საპრეზიდენტო არჩევნების მეორე ტურში. თქვენ იცით, რომ ძალიან წარმატებული იყო მათი მხარდაჭერა მეორე ტურში. სალომე ზურაბიშვილმა, რომელსაც პირველ ტურში ჰქონდა მხოლოდ 38%-ი, საბოლოო ჯამში 60% აიღო. მაშინ მათ საინტერესო რჩევები ჰქონდათ, რაც დაგვეხმარა ჩვენ შესაბამისი შედეგის მიღწევაში. ერთ-ერთი მათი რჩევა იყო, რომ ჩაგვენაცვლებინა სალომე ზურაბიშვილის ბანერები ჩვენი ბანერებით, რაც გავითვალისწინეთ და რაც ძალიან სასარგებლო აღმოჩნდა. შესაბამისად, დაგვეხმარა შედეგის გაუმჯობესებაში.

ჯერ სისხლიანი ბანერები, როგორი იყო, ეს ცალკე თემაა, მაგრამ ეს ბანერები ძალიან კარგად ასახავდა „ნაცმოძრაობის“ სახეს, თუმცა მათი იდეა პრინციპში არ იყო, თუ გაინტერესებთ, სხვა კონსულტანტების მხრიდან გაჩნდა ეს იდეა, რაც ასევე, ძალიან წარმატებული იყო, ხალხს სჭირდება მუდმივად „ნაცმოძრაობის“ სახის შეხსენება. საზოგადოებას მუდმივად უნდა ახსოვდეს ის, თუ რა დანაშაულები აქვს ჩადენილი „ნაცმოძრაობას“ თავის დროზე. იმისათვის, რომ შეცდომა არ დაუშვას მომავალში.

რაც შეეხება 2018 წელს, ეს არ იყო კონკრეტულად მოშე კლუგჰაფტის იდეა და შესაბამისად, ჩვენი არ იყო ბანერები. სხვა პიარკონსულტანტების იყო, რომლებმაც შესაბამის ადამიანებს ურჩია ასეთი ბილბორდების გაკვრა, ეს არ იყო მოშე კლუგჰაფტი და ეს არ იყო შესაბამისად, ჩვენი კამპანია.

ჩვენი პიარული გუნდის გაძლიერება ნიშნავს იმას, რომ ჩვენთვის საკმარისი არ არის, თუნდაც 55%-ის მიღება შემდეგ საპარლამენტო არჩევნებში. ჩვენი პრინციპული ამოცანაა, რომ კიდევ უფრო გავაუმჯობესოთ ჩვენი შედეგი და საბოლოოდ დავასრულოთ კოლექტიური „ნაცმოძრაობა“. აქედან გამომდინარე, კიდევ უფრო მეტად გვჭირდება იმ თუნდაც ძალიან მაღალი ციფრების გაუმჯობესება, რომელიც დღეს არის დაფიქსირებული. ჩვენ ვერ დავჯერდებით 55%-ს, უფრო მაღალი შედეგი გვჭირდება იმისათვის, რომ საბოლოოდ დავასრულოთ… რაც შეეხება ჩვენს კამპანიას, ჩვენი კამპანია იქნება თვისებრივად პოზიტიური, ჩვენ არსებითად ავაგებთ ამ კამპანიას იმაზე, თუ რა უნდა გაკეთდეს შემდეგი 4 წლის განმავლობაში ჩვენი ქვეყნის განვითარებისთვის. თუ საზოგადოებისთვის იმის შეხსენება დაგვჭირდება, ვინ არიან კოლექტიური „ნაცმოძრაობის“ წევრები, რა თქმა უნდა, ამასაც გავაკეთებთ“, – განაცხადა კობახიძემ.

როგორც პარტიის თავმჯდომარემ აღნიშნა, „სისხლიანი ბანერები“„ნაციონალური მოძრაობის“ სახეს „იდეალურად აჩვენებს“.

„ძალიან გტკივათ, მე მგონი, ეს სისხლიანი ბანერები, იმიტომ, რომ „ნაცმოძრაობის“ სახეს აჩვენებს იდეალურად. მიუხედავად იმისა, რომ იდეა მე არ მეკუთვნოდა, ეს ბანერები „ნაცმოძრაობის“ სახეს აჩვენებს იდეალურად, აი, ერთი-ერთში აჩვენებს „ნაცმოძრაობის“ სახეს. ამიტომ, სტკივა „ნაცმოძრაობას“ ეს ბანერები ძალიან. ეს ბანერები არაფერს აზიანებს, აზიანებს „ნაცმოძრაობის“ პროცენტებს. „ნაცმოძრაობამ“ თავის ტელევიზიებით მიხედოს საკუთარ რადიკალურ კამპანიებს“, – აღნიშნა კობახიძემ.

2024 წლის არჩევნების შემდეგ გვეყოლება ახალი ხელისუფლება, რომელიც იქნება კოალიციური, პროდასავლური, რომელიც ხალხის ნებას დაემორჩილება, გაატარებს ყველა რეფორმას, რომელიც გვჭირდება ევროკავშირში დაჩქარებული გაწევრიანებისთვის, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.

ვაშაძის თქმით, ახალი ხელისუფლება ასევე დაიწყებს სწრაფ ეკონომიკურ განვითარებას, სამუშაო ადგილების შექმნას.

„ჩვენ, გამარჯვების კოალიცია ვიქნებით ერთ-ერთი მთავარი ღერძი ამ ახალი კოალიციური გაერთიანების, რომელიც ხალხთან ერთად სწორად წაიყვანს ქვეყანას“, – განაცხადა გიორგი ვაშაძემ.

„ქართულმა ოცნებამ“ სიტყვებით თამაში დაიწყო, მსოფლიო მასშტაბით მსგავს სიტყვებს ეძებს და ამბობს, ამ კანონშიც აგენტი და ა.შ. წერიაო, – ამის შესახებ „გირჩის“ წევრმა, ალექსანდრე რაქვიაშვილმა განაცხადა.

რაქვიაშვილს კითხვა დაუსვეს ევროპარლამენტში აგენტების გამჭვირვალობის კანონის წარდგენაზე, რომელიც არასამთავრობო ორგანიზაციების ფინანსურ შემოწმებას ითვალისწინებს. რაქვიაშვილის თქმით, ამ საკითხზე „ქართული ოცნების“ მიერ მოყვანილი მაგალითები მცდარია.

„მგონი, მთავარი პრობლემა არის ის, რომ ქვეყანაში პოლიტიკური დებატები არ გვაქვს, რადგან „ქართულმა ოცნებამ“ სიტყვებით თამაში დაიწყო და ეს უკვე ყელში მაქვს ამოსული. ამერიკის შემთხვევაში პოლიტიკური გავლენის აგენტი ლობისტია, საქართველოში კი ლობისტური საქმიანობა აკრძალულია. მმართველი გუნდი ისეთ ტერმინს იყენებს, რომელიც ლობისტურ საქმიანობას ეხება და „ენჯეო“ სექტორზე გაავრცელეს, რომელიც არაფერ შუაში არ იყო. ცინიკური ტყუილია ის განცხადებები, რასაც ვისმენთ. „ქართული ოცნება“ მსოფლიო მასშტაბით მსგავს სიტყვებს ეძებს და ამბობს, ამ კანონშიც ეს წერიაო – აგენტი და ა.შ. იდიოტური კანონები შეიძლება, ყველა ქვეყანამ მიიღოს, მაგრამ მათ მიერ მოყვანილი მაგალითები მცდარია. მათ მიერ მომზადებული კანონის ანალოგი რუსეთსა და სერბეთში იყო, რომლებიც რუსეთის გავლენის ქვეშ არიან“, – განაცხადა ალექსანდრე რაქვიაშვილმა.

წელიწად-ნახევრის განმავლობაში ოპოზიციის მხრიდან, სამწუხაროდ, მხოლოდ დესტრუქცია და ხელის შეშლაა, – ამის შესახებ ჟურნალისტებს საქართველოს პარლამენტის თავმჯდომარე შალვა პაპუაშვილმა განუცხადა.

კითხვაზე, ვისი მისამართით იყო ევროკავშირის მინისტრთა საბჭოს მხრიდან მოწოდება კონსტრუქციული თანამშრომლობისკენ, შალვა პაპუაშვილმა განაცხადა, რომ უპირველეს ყოვლისა, ამ მოწოდების ადრესატი ოპოზიცია იყო.

„წელიწად-ნახევარია, კანდიდატის სტატუსთან დაკავშირებით უარყოფითი გადაწყვეტილების შემდეგ, რასაც ვხედავთ, ეს არის დესტრუქციული ოპოზიცია, რომელიც, გახსოვთ, რომ ყველა შედეგში, რასაც ჩვენ მივაღწიეთ, არც ერთ ამ შედეგში არ მონაწილეობდა. მისი დიდი ნაწილი არ მონაწილეობდა და არათუ არ მონაწილეობდა, პირიქით, ხელს უშლიდა ყველანაირად, იყო პარალელური პროცესების დაწყების მცდელობა, იყო მცდელობა, რომ ბრიუსელში, სხვადასხვა კაბინეტში დაერწმუნებინათ ჩვენი მეგობრები, რომ არ მოეცათ საქართველოსთვის კანდიდატის სტატუსი. ოპოზიცია ყველანაირად ხელს უშლიდა ამას. რა თქმა უნდა, კონსტრუქციულობის მოწოდება, უპირველეს ყოვლისა, მათ მიემართებათ, ვინაიდან პარლამენტში წელიწად-ნახევრის განმავლობაში მათი მხრიდან, სამწუხაროდ, მხოლოდ დესტრუქცია და ხელის შეშლაა“, – განაცხადა შალვა პაპუაშვილმა.

ვის დეზინფორმაციას უნდა ებრძოლოს “ქართული ოცნება”? – ენა უნდა ამოაჭრა “ქართული ოცნების” ლიდერებს და დეზინფორმაცია დამთავრებულია, – ამის შესახებ “სტრატეგია აღმაშენებლის” თავმჯდომარე გიორგი ვაშაძემ ჟურნალისტებთან განაცხადა, რითაც დეზინფორმაციის წინააღმდეგ ბრძოლის თაობაზე რეკომენდაციას გამოეხმაურა.

მისი თქმით, რეალურად სიტუაცია ძალიან მძიმეა, ასევე მძიმეა ვითარება საბოლოო გადაწყვეტილებასთან დაკავშირებით, „მაგრამ ევროკავშირის სრულუფლებიანი წევრობა და „ქართული ოცნება“ შეუთავსებელია“.

„ქართველი ხალხი არის ადრესატი განცხადების, რომელიც არის ევროკავშირის მინისტერიალის მხრიდანაც, რომ ეს არის განზომილება, რის გამოც კანდიდატის სტატუსს გვაძლევენ და მეორე, არაფერი გაუკეთებია „ქართულ ოცნებას“ ამისთვის. პირდაპირი მოწოდებაა: “ გაკეთეთ რეფორმები”, “წაიყვანეთ ქვეყანა წინ”, „ებრძოლეთ დეზინფორმაციას“. ვის დეზინფორმაციას უნდა ებრძოლოს „ქართული ოცნება”? – ენა უნდა ამოაჭრა “ქართული ოცნების” ლიდერებს და დეზინფორმაცია დამთავრებულია. ამიტომ, რეალურად სიტუაცია შემდეგია, რომ ძალიან მძიმე ვითარებაა საბოლოო გადაწყვეტილებასთან დაკავშირებით. მე მაინც მაქვს იმედი, რომ კონსენსუსი იქნება, მაგრამ ევროკავშირის სრულუფლებიანი წევრობა და „ქართული ოცნება“ შეუთავსებელია. ეს უნდა გავიგოთ ყველამ – ვცვლით ხელისუფლებას, ვატარებთ ყველა რეფორმას, დაჩქარებული წესით ვხდებით ევროკავშირის წევრი.

კიდევ ერთხელ ვიმეორებ დეზინფორმაციაზე, კობახიძე, კალაძე, ღარიბაშვილი – ესენი არიან მთავარი დეზინფორმატორები, რომლებიც ევროკავშირზე ამბობენ, რომ სათაგურიაო, ათას სისულელეს ამბობდნენ. კობახიძემ ხომ თქვა, „ომს თუ დავიწყებთ, მოგვცემენ კანდიდატის სტატუსსო?“, – განაცხადა გიორგი ვაშაძემ.

სალომე ზურაბიშვილი ცდილობს, იმ წარმატების თანამოზიარე გახდეს, რომელიც ქვეყანაში საქართველოს ხელისუფლებამ მოიტანა, – ამის შესახებ საქართველოს პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.

როგორც მიხეილ სარჯველაძემ აღნიშნა, მას შემდეგ, რაც კანდიდატის სტატუსზე პოზიტიური შეფასების მიღება მოხერხდა, სალომე ზურაბიშვილს რიტორიკის შეცვლა მოუწია.

„არ მინდა, ნიშნის მოგებად ჩამომერთვას, მაგრამ მგონია, რომ საკუთარ დაშვებულ შეცდომას პრეზიდენტიც მიხვდა, როცა ცდილობდა, ქვეყანაში არსებული მდგომარეობა ისე წარმოეჩინა, თითქოს საქართველოში პროგრესი არ არის, თითქოს ქვეყანა კანდიდატის სტატუსს არ იმსახურებს და ა.შ. მას შემდეგ, რაც კანდიდატის სტატუსზე პოზიტიური შეფასების მიღება მოხერხდა, რა თქმა უნდა, მას რიტორიკის შეცვლა მოუწია. ის ახლა ცდილობს, თამაშგარე მდგომარეობაში არ აღმოჩნდეს. შესაბამისად, ცდილობს, იმ წარმატების თანამოზიარე გახდეს, რომელიც ქვეყანაში საქართველოს ხელისუფლებამ მოიტანა. კარგი იქნებოდა, რომ ზურაბიშვილის მხრიდან ამ მცდარ რიტორიკას სწორი შეფასება ცოტა უფრო ადრე მოჰყოლოდა, ვიდრე ეს 8 ნოემბრის შემდეგ გააკეთა“, – განაცხადა მიხეილ სარჯველაძემ.