თემურ მღებრიშვილი აცხადებს, რომ გავრცელებული ინფორმაცია, თითქოს მანქანაში აღმოაჩინეს ცხედრები, არ შეესაბამება სიმართლეს.
ამ დროისთვის აღმოაჩინეს ორი მანქანა, მიმდინარეობს ამ მანქანების ამოღება მდინარის კალაპოტიდან, შიგნით არ აღმოჩნდნენ ადამიანები, ერთ ერთი მათგანის მფლობელები ცოცხლები არიან.
ყველას მოვუწოდებ, რომ თავი დაანებონ სტიქიით მანიპულირებას, ეს, უბრალოდ, არასწორია და მართლა გამაოგნებელია, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ შოვში, სტიქიის ზონაში ყოფნისას განაცხადა.
როგორც ირაკლი კობახიძემ აღნიშნა, ძალიან მძიმე ვითარებაა, ადგილზე ჩანს მასშტაბი ამ სტიქიის.
„მაშველები მაქსიმუმს აკეთებენ. წარმოიდგინეთ, 3-4 მეტრი სიმაღლის მიწით არის დაფარული ძალიან დიდი ტერიტორია და, შესაბამისად, რთულია მუშაობა, ყველა შესაბამისი რესურსი არის ჩართული, როგორც ცოცხალი ძალა, პოლიციელიები, მაშველები, ჯარისკაცები, ასევე შესაბამის ტექნიკა, გამწმენდი ტექნიკა, ვერტმფრენებიც მუშაობენ, ყველა რესურსია ჩართული იმისთვის, რომ მაქსიმუმი გაკეთდეს. უზარმაზარი ტერიტორია მიწით არის დაფარული, სტიქიის მასშტაბი იყო დიდი და აქედან გამომდინარე, დადგა მძიმე შედეგი“, – განაცხადა კობახიძემ.
კითხვაზე, ვრცელდება ინფორმაცია, რომ სტიქიის პროგნოზირება შესაძლებელი იყო, კობახიძემ აღნიშნა, რომ უამრავი სპეკულაციური განცხადება კეთდება.
„არსებობს თემები, რასთან დაკავშირებითაც არ შეიძლება, სცადო პოლიტიკური ქულების დაწერა ან, ზოგადად, სპეკულირება, უბრალოდ, წარმოუდგენელია ეს ყველაფერი. დღეს ნიკა გვარამიამ გაავრცელა ინფორმაცია იმის შესახებ, თითქოს კოტეჯებზე ნებართვები გასცა ჩვენმა ხელისუფლებამ, მაშინ როდესაც 70-იანი წლებიდან დგას ეს კოტეჯები იქ, ასეთ ტყუილს რომ კადრულობ იმისთვის, რომ პოლიტიკური ქულები დაიწერო, სირცხვილია. მეორე ტყუილი, რომელსაც არ შემიძლია, არ გამოვეხმაურო, გელა მთვილიშვილი, არ ვიცი, რომელი მედიასაშუალებაა, ავრცელებს ფოტოს, სადაც არის ერთ-ერთი ადამიანი, რომელსაც ჰყავს შვილი დაკარგული და იქვე მიწერილი აქვს, რომ ეს კაცი არის უყურადღებოდ და არავინ მას არ ელაპარაკებოდა იმ დროს, როდესაც ხელისუფლების წარმომადგენლები თათბირობდნენ. ზუსტად ამ ფოტოს გადაღებამდე ორი წუთით ადრე ამ კაცს ელაპარაკებოდა შალვა პაპუაშვილი 15 წუთის განმავლობაში, დაინახა, მაინც გააკეთა, ეს ნიშნავს, რომ, უბრალოდ, კაცი არ არის. სტიქიაა, ადამიანები დაიღუპნენ და ამ დროს ცდილობ, რომ შენს პარტიას პოლიტიკური ქულები დაუწერო, უბრალოდ, სირცხვილია ეს ყველაფერი. ამაზე არ მინდა საერთოდ საუბარი, დეტალებში შესვლა, მაგრამ კიდევ ერთხელ ყველას მოვუწოდებ, რომ თავი დაანებონ სტიქიით მანიპულირებას, ეს, უბრალოდ, არასწორია და მართლა გამაოგნებელია. არსებობს შესაბამისი სტრუქტურები, უწყებები, არსებობს შესაბამისი ინფორმაცია, ყველაფერი დაიდება ხელისგულზე და ამის შემდეგ შეგიძლიათ, იმსჯელოთ, რა არის სიმართლე“, – განაცხადა კობახიძემ
„სტიქიის ეპიცენტრთან, მობილიზებულია სამედიცინო დახმარების ეკიპაჟები. ასევე, გახსნილია პუნქტი, საჭიროების შემთხვევაში, სხვადასხვა სამედიცინო ჩარევისთვის. გარდა ამისა, მიმდებარე სოფელში, დაკარგულთა ოჯახებთან არიან მობილიზებული ეკიპაჟები, რომლებიც ადგილზე უწევენ მათ ფსიქოლოგიურ თუ სხვა საჭირო სამედიცინო დახმარებას“, – ამის შესახებ საქართველოს ჯანდაცვის მინისტრმა, ზურაბ აზარაშვილმა შოვში, სტიქიის ზონაში ყოფნისას ჟურნალისტებს განუცხადა.
მისი თქმით, სამძებრო-სამაშველო ღონისძიებებში ჩართულია რამდენიმე ათეული მძიმე ტექნიკა, კოორდინირებულად მუშაობს სხვადასხვა სახელმწიფო უწყება.
როგორც ჯანდაცვის მინისტრი აცხადებს, უშუალოდ ადგილზე ძალიან დიდი მთის მასაა წამოსული, რაც ხელს უშლის სამუშაო პროცესს.
„ვიმყოფებოდი უშუალოდ სტიქიის ეპიცენტრში, სადაც მასშტაბური სამძებრო სამუშაოები მიდის. როგორც ხედავთ, ჩართულია რამდენიმე ათეული მძიმე ტექნიკა, კოორდინირებულად მუშაობს სხვადასხვა სახელმწიფო უწყება, სამაშველო სამსახური, პოლიცია, ასევე ჯარის ქვედანაყოფები, საგანგებო სიტუაციების სამსახური. ყველა მცდელობაა, რათა ადამიანები, თუ არის რაიმე შანსი, რომ კიდევ ცოცხლად ვნახოთ, ვიპოვოთ.
სამწუხაროდ, ერთი გარდაცვლილი დაემატა. აქვე, მინდა, აღვნიშნო, რომ უშუალოდ ადგილზე ძალიან დიდი მთის მასაა წამოსული, ათასობით კუბური მეტრი მიწაა, რაც ხელს უშლის სამუშაო პროცესს. დაახლოებით 4-5 მეტრის სიმაღლის არის. არის ყველანაირი კოორდინაცია, სხვადასხვა ლოკაციაზეა გაშლილი სამძებრო სამუშაოების ფრონტი როგორც მდინარეში, ასევე მდინარის მიმდებარე ტერიტორიაზე. ასევე, უშუალოდ ეპიცენტრის ადგილზეც ხდება სამძებრო სამუშაოები. მნიშვნელოვანია ისიც, რომ როდესაც ერთ ადგილას რამდენიმე ცხედარი იქნა აღმოჩენილი, იქ განსაკუთრებული სიფრთხილით მუშაობენ, რადგან შემდეგი შემთხვევა თუ იქნება, არ დაზიანდეს.
მსუბუქი მანქანა რომ არის აღმოჩენილი წყალში, ამის დადასტურება შემიძლია, მაგრამ ცხედრები არის თუ არა, ამას ვერ გეტყვით. ახლა მიმდინარეობს მანქანის წყლიდან ამოყვანის სამუშაოს დაგეგმვა და შემდეგ უფრო მეტი დეტალი გვეცოდინება.
ჯანდაცვის სამინისტროს რაც შეეხება, ჩვენთან დაკავშირებულ ყველანაირ სამედიცინო პროცესს, აცრა იქნება ეს, უშუალოდ ადამიანების დახმარება თუ სხვა რამ, ყველანაირ დახმარებას ადგილზე ვუწევთ.
სტიქიის ეპიცენტრთან, მობილიზებულია სამედიცინო დახმარების ეკიპაჟები. ასევე, გახსნილია პუნქტი, საჭიროების შემთხვევაში, სხვადასხვა სამედიცინო ჩარევისთვის.
გარდა ამისა, მიმდებარე სოფელში, დაკარგულთა ოჯახებთან არიან მობილიზებული ეკიპაჟები, რომლებიც ადგილზე უწევენ მათ ფსიქოლოგიურ თუ სხვა საჭირო სამედიცინო დახმარებას“, – განაცხადა აზარაშვილმა.
მაქსიმალური ინტენსივობით მიმდინარეობს სამუშაოები, მაშველები, ჯარი და, რა თქმა უნდა, ტექნიკა. ძალიან რთული ვითარებაა და მძიმე პირობები არის სამუშაოდ, – ამის შესახებ რეგიონული განვითარებისა და ინფრასტრუქტურის მინისტრმა, ირაკლი ქარსელაძემ შოვში, სტიქიის ზონაში ყოფნისას განაცხადა.
როგორც ირაკლი ქარსელაძემ აღნიშნა, სტიქიის ადგილზე არის ლამი, რომელიც მნიშვნელოვნად ართულებს სამუშაოებს.
„მიუხედავად ყველაფრისა, არსებობს კონკრეტული გეგმა, რომლის მიხედვითაც ხდება მუშაობა იმდაგვარად, რომ მაქსიმალური ძალისხმევა არის ახლა სწორედ კოტეჯებისა და სასადილოსკენ. კიდევ ერთი ცხედარი იქნა აღმოჩენილი. მეტი დეტალი დასადგენია. რაც შეეხება სამუშაოებს, რეალურად გუშინ მოვახერხეთ ჩვენ ხუთი ერთეული ტექნიკის გადასვლა. დღეს დაახლოებით 15 ერთეული მუშაობს უშუალოდ არეალში. გარდა ამისა, მთლიანობაში 30 ერთეული არის. ამას იმიტომ ვამბობ, რომ რეალურად ბევრი ტექნიკის ჩართულობით ვახერხებთ იმას, რომ გარკვეულწილად მობილობა იზრდება.
წუხელ მთელი ღამის განმავლობაში მიმდინარეობდა ხიდის აწყობა და საგზაო დეპარტამენტმა დღეს აუცილებლად უნდა დავდოთ ხიდი. ხედავთ, რომ მდინარეზე გადასასვლელი გზაც ეწყობა პარალელურ რეჟიმში, ვიდრე ხიდი მოეწყობა. ასევე ალტერნატიული გზა, რომლითაც ჩვენ რეალურად მეორე ფრონტი გვინდა, გავხსნათ და იქედანაც გვინდა, შევიდეთ უკვე მაშველებთან და ჯართან ერთად, ასევე, მესამე ფრონტი იქნება მას მერე, რაც უკვე ხიდი დამონტაჟდება. ფაქტობრივად, ვცდილობთ, რომ მთელი პერიმეტრი მოვიცვათ შეძლებისდაგვარად, წინა მხარეზეა საუბარი. გარდა ამისა, კიდევ დავამატოთ ორი შესაძლო ფრონტი, ასევე მიმდინარეობს შიდა ტროტუარზე უშუალოდ არსებული ძველი გზის გაწმენდა, რომელიც შედარებით უფრო გვემორჩილება“, – განაცხადა ირაკლი ქარსელაძემ.
შოვში, სტიქიის ზონაში დაღუპულთა რიცხვი 13-მდე გაიზარდა. ინფორმაციას ამის შესახებ ადასტურებენ საქართველოს შინაგან საქმეთა სამინისტროში.
ამ დროისთვის არსებული ოფიციალური მონაცემებით, სტიქიის შედეგად 13 ადამიანია დაღუპული. ერთი მათგანი მაშველებმა დღეს იპოვეს.
შოვში მეწყერი 3 აგვისტოს ჩამოწვა. ამ დროისთვის არსებული მონაცემებით, სტიქიის ზონაში 23 ადამიანს ეძებენ.
სტიქიის ზონიდან უსაფრთხო ადგილას სულ 210 ადამიანია გაყვანილი. ამასთან, საგანგებო სიტუაციების მართვის სამსახურის მობილური შტაბი მოეწყო ონის მუნიციპალიტეტის სოფელ გლოლაში.
საქართველოში 7 აგვისტო გლოვის დღედ გამოცხადდა.
ერთადერთი, რა მინდა, ვთქვა, რომ ვრცელდებოდა ცრუ ინფორმაცია, მათ შორის, ვითომ ჩემს განცხადებასთან დაკავშირებით, რომ უკრაინიდან იყო შეთავაზება და ჩვენ უარი ვთქვით ამასთან დაკავშირებით. როდესაც ასეთ ვითარებაში ვიღაცა ასე ახერხებს სპეკულირებას, უბრალოდ, არ ვიცი, გამაოგნებელია და არ ვიცი, ამას რა შეფასება უნდა მიეცეს, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.
როგორც ირაკლი კობახიძემ აღნიშნა, სტიქიის ადგილზე სამაშველო სამუშაოები არ გაჩერებულა.
„მე რა ინფორმაციაც მაქვს, სამუშაოებში ჩართულია როგორც ადამიანური რესურსი, მაშველები, პოლიციელები და მათ შორის სამხედროები, ამ კუთხით დამატებითი რესურსის საჭიროება არ არის. მაქსიმალური მობილიზაციაა, რაც შეეხება ტექნიკას, აქაც როგორც ვიცი, სრულად არის უზრუნველყოფილი სამაშველო სამუშაოები. რაც შეეხება სამაშველო სამუშაოების უზრუნველყოფას, მათ შორის წყალი, საკვები და ა.შ. ყველანაირი კუთხით არის სრულად უზრუნველყოფილი სამაშველო სამუშაოები. საცხოვრისითაც არიან უზრუნველყოფილი დაზარალებული ადამიანები. ყველა თვალსაზრისით, სამაშველო სამუშაოები არის სრულად უზრუნველყოფილი და არ დგას ასეთი დამატებითი რესურსის საჭიროება“, – განაცხადა კობახიძემ.
“თანხების შეგროვების არანაირი საჭიროება არ არის, ყველაფერზე ზრუნავს სახელმწიფო” ასე ეხმაურება პარლამენტის თავმჯდომარე, შალვა პაპუაშვილი სოციალურ ქსელში მოქალაქეების მიერ წამოწყებულ კამპანიას.
მისი განცხდებით, მოქალაქეებს მოხალისეობრივ საქმიანობაში ჩართვა სურთ, თუმცა, ამ დროისთვის სამაშველო პროცესი ადამიანური რესურსით სრულად არის უზრუნველყოფილი.
მობილიზებულია ყველა ინსტიტუტი, სახელმწიფო, ადგილობრივი თვითმმართველობა და ჩვენი მოქალაქეებიც მოწადინებულები არიან, რომ აქ იყვნენ. მნიშვნელოვანია ორი მომენტი: ამ დროისთვის რაიმე მოხალისეობრივი ჩართვის აუცილებლობა არ არის, ხედავთ, რომ აბსოლუტურად სრულად არის ადამიანური ძალით უზრუნველყოფილი პროცესი.
ასევე, მინდოდა ყურადღების გამახვილება გუშინ სოციალურ ქსელებში თანხების შეგროვების, დახმარების შესახებ – ამის არანაირი საჭიროება არ არის, ყველაფერზე ზრუნავს სახელმწიფო. ყველა, ვისი ახლობელიც დაკარგულია და ელოდება პასუხებს ან ისინი, ვინც გამოყვანილია ტერიტორიიდან, არის უზრუნველყოფილი. შესაბამისად, ვთხოვ ყველას, ერთადერთი, რაც დღეს საზოგადოებას სჭირდება, ეს არის თანადგომა და ჩვენი მაშველების გულშემატკივრობა, რომ მათი საქმიანობა იყოს წარმატებული“, – განაცხადა შალვა პაპუაშვილმა.
შოვში, სტიქიის ზონაში კიდევ ერთი ცხედარი იპოვეს. ამის შესახებ ინფორმაციას ადასტურებენ საქართველოს შინაგან საქმეთა სამინისტროში.
ამ დროისთვის, ოფიციალური მონაცემებით, სტიქიის შედეგად 12 ადამიანია დაღუპული.
შოვში მეწყერი 3 აგვისტოს ჩამოწვა. ამ დროისთვის არსებული მონაცემებით, სტიქიის ზონაში 24 ადამიანს ეძებენ.
სტიქიის ზონიდან უსაფრთხო ადგილას სულ 210 ადამიანია გაყვანილი. ამასთან, საგანგებო სიტუაციების მართვის სამსახურის მობილური შტაბი მოეწყო ონის მუნიციპალიტეტის სოფელ გლოლაში
გარემოს ეროვნული სააგენტო განმარტავს, რა პროცესებმა გამოიწვია შოვში სტიქია.
როგორც სააგენტოს მიერ გავრცელებულ ინფორმაციაშია ნათქვამი, სტიქიის დროს 5 პროცესის თანხვედრა მოხდა. კერძოდ, მათი განმარტებით, მყინვარების – ბუბა და თბილისას ინტენსიურმა დნობამ და თანმდევმა ნალექმა დინამიკაში მოიყვანა ხეობაში არსებული მყარი ნატანი, განვითარდა აქტიური გვერდითი ეროზიული პროცესები და ასევე, ადგილი ჰქონდა ნაპირების გარეცხვას, ე.წ სანაპირო მეწყრული პროცესების ჩასახვა-გააქტიურებას, რაც შემდგომ გადაიზარდა ღვარცოფში.
„გარემოს ეროვნულ სააგენტოს სპეციალისტები, ონის მუნიციპალიტეტში განვითარებულ სტიქიურ გეოლოგიურ და ჰიდროლოგიურ პროცესების ადგილზე შეისწავლის მიზნით, სტიქიის ადგილზე რჩებიან – გეოლოგებისა და ჰიდროლოგების მიერ რამდენჯერმე განხორციელდა ტერიტორიის დათვალიერება, ჩატარდა ინსტრუმენტული მონიტორინგი.
მდ. ბუბასწყლის ხეობაში (მდინარე ჭანჭახის მარჯვენა შენაკადი), მყინვარების ბუბა და თბილისას ინტენსიურმა დნობამ და თანმდევმა ნალექმა დინამიკაში მოიყვანა ხეობაში არსებული მყარი ნატანი, განვითარდა აქტიური გვერდითი ეროზიული პროცესები. ასევე, ადგილი ჰქონდა ნაპირების გარეცხვას. ე.წ სანაპირო მეწყრული პროცესების ჩასახვა-გააქტიურებას, რაც შემდგომ გადაიზარდა ღვარცოფში.
აღსანიშნავია, რომ მდ. ბუბისწყალი არ ხასიათდებოდა ღვარცოფული მოვლენებით; მასშტაბურ ღვარცოფის გავლას ამ ტერიტორიაზე ადგილი არ ჰქონია. თუმცა, სტიქიის დროს მოხდა 5 პროცესის თანხვედრა, რამაც გამოიწვია აღნიშნული შედეგი.
რაც შეეხება გარემოს ეროვნული სააგენტოს მიერ მომზადებულ დასკვნებს, გეოლოგიის დეპარტამენტის მიერ ყოველწლიურად მზადდება საინფორმაციო გეოლოგიურ ბიულეტენი, სადაც აღწერილია ქვეყნის მასშტაბით გეოლოგიური საფრთხეების შესახებ არსებული მდგომარეობა საანგარიშო წელს და პროგნოზი შემდგომი წლისათვის. 2022 წლის ბიულეტენში საუბარია მდ. დღვიორაზე, რომელიც არის მდ. ჭანჭახის მარცხენა შენაკადი, სადაც ხშირია ღვარცოფული ნაკადების გავლა.
ეს ლოკაცია 1,5 კილომეტრით ქვემოთ მდებარეობს სტიქიის ზონიდან მდინარის დინების მიმართულებით. მდ. ბრდღვიორას ხეობა სულ სხვა მორფოლოგიურ და გეოლოგიურ პირობებშია ჩამოყალიბებული.
აღსანიშნავია, რომ გარემოს ეროვნული სააგენტოს გეოლოგების მიერ დამუშავებული ინფორმაციის შედეგად, ცნობილია, რომ მდ. ბუბისწყალზე (ჭანჭახის მარჯვენა შენაკადი) განვითარებულ ღვარცოფს, ასეთი დიდი მასშტაბის პროცესს წარსულში ადგილი არ ჰქონია; შოვში ასეთ მოვლენა არ დაფიქსირებულა. განსხვავებით სოფ. გლოლას მიმდებარე ლოკაციისგან, მდ. ჭანჭახის მარცხენა შენაკად დღვიორასგან, სადაც ღვარცოფული პროცესების აქტიურობა ხშირია. სწორედ აღნიშნულ ლოკაციაზე ღვარცოფის საშიშროების შესახებ არის ინფორმაცია მოცემული გარემოს ეროვნული სააგენტოს მიერ მომზადებულ ყოველწლიურ გეოლოგიურ ბიულეტენში და არა მდ. ბუბისწყალზე (ჭანჭახის მარჯვენა შენაკადი)“,- ნათქვამია ინფორმაციაში.
მოვუწოდებთ მოქალაქეებს, რომლებიც გამოთქვამენ სურვილს, სტიქიის ზონაში დრონების გამოყენებასთან დაკავშირებით, თვითნებურად არ მიიღონ გადაწყვეტილება, რადგან საფრთხის შემცველია სტიქიის ზონაში მომუშავე ვერტმფრენებისთვის, – ამის შესახებ საქართველოს შინაგან საქმეთა სამინისტროს საგანგებო სიტუაციების მართვის სამსახურის განცხადებაშია აღნიშნული.
„ონის მუნიციპალიტეტში, სტიქიის ზონაში, მესამე დღეა, უწყვეტ რეჟიმში მიმდინარეობს სამძებრო-სამაშველო ღონისძიება.
სამძებრო-სამაშველო ღონისძიებებში ჩართულია საგანგებო სიტუაციების მართვის სამსახურის მეხანძრე- მაშველები, პოლიციის დანაყოფები, დრონები, სპეცტექნიკა და სასაზღვრო პოლიციის ვერტმფრენი. ასევე სამუშაოებში ჩართულია საგანგებო სიტუაციების მართვის სამსახურის კინოლოგთა ჯგუფი.
აქვე მოვუწოდებთ მოქალაქეებს, რომლებიც გამოთქვამენ სურვილს, სტიქიის ზონაში დრონების გამოყენებასთან დაკავშირებით, თვითნებურად არ მიიღონ გადაწყვეტილება, რადგან საფრთხის შემცველია სტიქიის ზონაში მომუშავე ვერტმფრენებისთვის“, – აღნიშნულია შინაგან საქმეთა სამინისტროს საგანგებო სიტუაციების მართვის სამსახურის განცხადებაში.
“თიბისის” გუნდი მწუხარებას გამოთქვამს რაჭაში დატრიალებული ტრაგედიის გამო და დაღუპულთა ოჯახებს სამძიმარს უცხადებს.
რაჭაში სტიქიური უბედურების შედეგად დაზარალებულების დასახმარებლად და შოვის აღსადგენად, თიბისიში გაიხსნა საქველმოქმედო ანგარიში, რომელშიც პირველ შენატანს 500 000 ლარის ოდენობით თიბისი განახორციელებს.
ფონდში დონაციის განხორციელება შესაძლებელია შემდეგ საბანკო ანგარიშებზე:
ლარის, აშშ დოლარის და ევროს ანგარიშის ნომერი:
GE89TB7318736080100017
მიმღები: ააიპ თიბისელები;
Beneficiary: NNLE TIBISELEBI.
(R)
ევროპარლამენტარები მოუწოდებენ ევროკავშირს, მისცეს თავშესაფარი რუსეთის იმ მოქალაქეებს, რომლებიც არმიაში სამსახურზე უარს ამბობენ.
17 ევროპარლამენტარის წერილს „დოიჩე ველეს“ რუსულენოვანი ბიურო ავრცელებს.
წერილში ევროდეპუტატები მოუწოდებენ ევროკავშირს, რუსეთის მოქალაქეებისთვის სავიზო პოლიტიკა შეიმუშაოს, რომელიც უზრუნველყოფს თავშესაფრის მიცემას იმ რუსებისთვის, რომლებიც უკრაინაში საომრად წასვლაზე უარს ამბობენ.
„იმ ფაქტის გათვალისწინებით, რომ რუსეთის შეიარაღებულ ძალები არღვევენ ადამიანის უფლებებს და საერთაშორისო ჰუმანიტარულ სამართალს უკრაინაში, რუსეთის მოქალაქეებს აქვთ მორალური გამართლება, რატომ არ სურთ იმ არიაში სამსახური, რომელიც ომშია ჩართული“, – ნათქვამია ევროდეპუტატების წერილში.
ევროპარლამენტარები ვარაუდობენ, რომ, რუსეთში სამხედრო სამსახურის ვალდებულების შესახებ კანონის გამკაცრებისა და პოტენციური მობილიზაციის ახალი ტალღების ფონზე, ევროკავშირის ქვეყნებში თავშესაფრის მიღების მოთხოვნით რუსეთის მოქალაქეთა განაცხადების რაოდენობა გაიზრდება.
წერილის ავტორები მიიჩნევენ, რომ ევროკავშირი და მისი წევრი სახელმწიფოები ვალდებულები არიან, უზრუნველყონ თავშესაფრით რუსეთის მოქალაქეები, რომლებიც არმიაში სამსახურზე უარს ამბობენ.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge