საქართველოს საგარეო საქმეთა მინისტრი ილია დარჩიაშვილი მონაწილეობას მიიღებს სუამის საგარეო საქმეთა მინისტრების საბჭოს მე-41 სხდომაში, რომელიც დღეს ბრიუსელში, აღმოსავლეთ პარტნიორობის მინისტერიალის ფარგლებში გაიმართება.

სხდომას სუამის თავმჯდომარე ქვეყნის უკრაინის საგარეო საქმეთა მინისტრი, დმიტრო კულება უხელმძღვანელებს და მასში საქართველოსთან ერთად, მონაწილეობას მიიღებენ მოლდოვას რესპუბლიკის საგარეო საქმეთა და ევროპული ინტეგრაციის მინისტრი, ნიკუ პოპესკუ, აზერბაიჯანის რესპუბლიკის საგარეო საქმეთა მინისტრი და სუამის გენერალურ მდივანი ალთაი ეფენდიევი.

მონაწილეები განიხილავენ უკრაინის თავმჯდომარეობის ფარგლებში სუამის დღის წესრიგით გათვალისწინებულ საკითხებს და პოლიტიკური, საპარლამენტთაშორისო და სექტორული მიმართულებით განხორციელებულ ღონისძიებებს. 2024 წელს სუამის თავმჯდომარეობა გადაეცა აზერბაიჯანს.

მიხვდნენ, რომ „ნაცმოძრაობას“ არ აქვს იმგვარი რეპუტაცია, რომ შთამბეჭდავ შედეგს მიაღწიოს, ცდილობენ, მესამე, ფსევდოშუაშისტური ძალა შექმნან და ამით გარდამტეხი ცვლილებები შეიტანონ, მათი მცდელობა წარუმატებელია, შესაკრებთა გადანაცვლებით ჯამი არ შეიცვლება, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

„ქართველებს სუფრაზე რომ გვიყვარს ხოლმე, დაშლა-არმოშლისო, ასეთ დღეში არიან – იშლებიან და არ იშლიან თავისას, დაახლოებით ასეთი ამბავია. ეს ხუმრობით, რა თქმა უნდა. ორი მიმდინარე საკითხი ემთხვევა ერთმანეთს ამ შემთხვევაში, ერთი მართლაც წარმოუდგენელი ნიჰილიზმია გამეფებული „ნაციონალურ მოძრაობაში“ და ეს ობიექტურად ძალიან კარგია. ჩვენ ცოტა ნელი ტემპით, მაგრამ ვახერხებთ, რომ „ნაციონალური მოძრაობა“ იშლება, რაც ძალიან კარგია. დინამიკურად, თანმიმდევრულად ვითარდება პროცესი წლების განმავლობაში და რაც უფრო მეტი წელი გადის, „ნაცმოძრაობა“ მით უფრო სუსტდება. ეს კარგია“, – აღნიშნა მამუკა მდინარაძემ.

მისივე თქმით, პარალელურად მიმდინარეობს „ნაციონალური მოძრაობის“ წევრების გადანაწილება სხვადასხვა ძალაში.

„ამავდროულად, ეს პარალელურ პროცესს ემთხვევა თუ ამთხვევენ, მიდის გადანაწილება სხვადასხვა ძალაში. როგორც უკვე ჩანს, კოლექტიურ „ნაცმოძრაობას“ აქვს ასეთი გეგმა, რომ გაიშალონ სხვადასხვა ფლანგზე, მინიმუმ, ორი-სამი ან ოთხი ფლანგიც კი ჩამოაყალიბონ, ეგრეთ წოდებული შუაშისტების გარკვეული კლასტერი „ნაცმოძრაობის“ რეალური აქტივისტებისგან შექმნან, ხაზარაძე იქნება თუ გახარია და ა.შ. ამას არ აქვს მნიშვნელობა, ამ ბანაკში მყოფ ადამიანებზე ვსაუბრობ, ერთი დავალების ქვეშ მოქმედი ადამიანების, პოლიტიკოსების შესახებ ვსაუბრობ, და აქედან შეძლონ რაღაცნაირად მესამე ძალის შექმნა, რომელიც, მათი გათვლებით, შესაძლოა, არჩევნებში მოიაზრებოდეს მათი მხრიდან მეორე ადგილზე გასასვლელ ძალადაც კი. ასეთი მიზნები აქვთ, რადგან მიხვდნენ, რომ „ნაცმოძრაობას“ არ აქვს იმგვარი რეპუტაცია და ვერც შეიქმნის, რომ შთამბეჭდავ შედეგს მიაღწიოს, ისეთს, რომ „ქართულ ოცნებას“ აჯობოს, რეალური კონკურენცია გაუწიოს. ცდილობენ, მესამე, ფსევდოშუაშისტური ძალა შექმნან და ამით გარდამტეხი ცვლილებები შეიტანონ. მათი ეს მცდელობა არის წარუმატებელი, შესაკრებთა გადანაცვლებით არანაირი ჯამი არ შეიცვლება. ის კი არა, ისე ხდება ხოლმე, რომ პოლიტიკურ შესაკრებთა გადანაცვლებით ჯამი ცოტა ნაკლებია ხოლმე პოლიტიკაში, ასეც ხდება“, – განაცხადა მამუკა მდინარაძემ.

სალომე ზურაბიშვილს იმგვარი ლეგიტიმაცია აღარ აქვს, როგორც ზოგადად აქვთ პრეზიდენტებს, საბედნიეროდ, ეს გვშველის გარკვეულ საკითხებში, – ამის შესახებ ჟურნალისტებს ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.

სალომე ზურაბიშვილის ჩეხეთში ვიზიტთან დაკავშირებულ კითხვაზე მდინარაძემ აღნიშნა, რომ სალომე ზურაბიშვილი კონსტიტუციის დარღვევას აგრძელებს.

„რასაც ახლა ის აკეთებს, თავისი სახელი უკვე დაერქვა. ეს არის კონსტიტუციის დარღვევა. საქართველოს ეგრეთ წოდებულმა პრეზიდენტმა, კონსტიტუციის მთავარი გარანტი რომ უნდა ყოფილიყო, უკაცრავად და, თავზე გადაიხია საქართველოს კონსტიტუცია ისე, რომ არც დაფიქრდა და მას შემდეგ, რაც საქართველოს საკონსტიტუციო სასამართლომ დაადგინა, რომ მისი ეს ქმედება არის საქართველოს კონსტიტუციის დარღვევა, აგრძელებს იმავეს, მაგრამ მთავარია, რომ ამის შესახებ ჩვენი მხრიდან მყარად იყო დაფიქსირებული, სახელი დავარქვით და, შესაბამისად, მას იმგვარი ლეგიტიმაცია, როგორც ზოგადად აქვთ პრეზიდენტებს, აღარ აქვს. საბედნიეროდ, ეს გვშველის გარკვეულ საკითხებში“, – აღნიშნა მამუკა მდინარაძემ.

მან იკადრა არაერთი ტყუილის თქმა და დამსახურებულად უწოდეს მას თაღლითი. ის კადრულობს ყველაფერს, რაც ადამიანმა არ უნდა იკადროს, – ასე ეხმაურება ფრაქცია „ქართული ოცნების“ თავმჯდომარე, მამუკა მდინარაძე გიორგი გახარიას განცხადებას.

„ამ ადამიანს აქვს რამდენიმე მახასიათებელი, მათ შორის ღალატი, ადამიანმა რომელმაც უღალატა თავის გუნდს, დამსახურებულად მიიღო მოღალატის სტატუსი. მან იკადრა არაერთი ტყუილის თქმა და ასევე დამსახურებულად უწოდეს მას თაღლითი. ის კადრულობს ყველაფერს, რაც ადამიანმა არ უნდა იკადროს. ადამიანი, რომელიც თავს გვაჩვენებდა და თავის დროზე აბსოლუტურად სწორ იდეებს ახმოვანებდა, უცებ ერთ დღეს ღალატი გადაწყვიტა და ამოტრიალდა ამგვარად, რაც წარმოუდგენელი ამბავია“, – აღნიშნა მდინარაძემ.

საბოლოო ჯამში, მივაღწიეთ კონსენსუსს საზოგადოებრივი მაუწყებლის კანონთან დაკავშირებით, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ დღეს, საპარლამენტო უმრავლესობის სხდომის შემდეგ განაცხადა.

ამასთან, მამუკა მდინარაძემ მადლობა გადაუხადა საზოგადოებრივი მაუწყებლის სამეურვეო საბჭოს ხელმძღვანელს, ვასილ მაღლაფერიძესა და გენერალურ დირექტორს, თინათინ ბერძენიშვილს კონსულტაციებში ინტენსიური მონაწილეობისთვის.

„კონსულტაციების შედეგად ჩვენ მივედით კონკრეტულ გადაწყვეტამდე – მომდევნო ორი წლის განმავლობაში საზოგადოებრივი მაუწყებლის ბიუჯეტი იქნება იგივე, რაც იყო მიმდინარე წელს. ეს მათ საშუალებას მისცემს, დაასრულონ ძალიან კარგი პროექტი – ახალი შენობა, მთლიანი ინფრასტრუქტურა, მოახდინონ მისი სრული აღჭურვა. ორი წლის შემდეგ, 2026 წლის პირველ იანვარს ამოქმედდება წესი, რომლის მიხედვითაც, საზოგადოებრივი მაუწყებლის დაფინანსება დამოკიდებული იქნება საქართველოში დასაქმებული ადამიანების რაოდენობაზე. უფრო ზუსტად რომ ვთქვათ, ამ ადამიანების რაოდენობის ნამრავლი 64-ზე. დღევანდელი მოცემულობით თუ ავიღებთ წინა წლის დასაქმებულთა რაოდენობას, ეს მთლიანად ფარავს მიმდინარე საოპერაციო ხარჯებს. რა თქმა უნდა, პროგნოზია, რომ გაიზრდება დასაქმებულთა რაოდენობა. ბუნებრივია, დრამატული ზრდა ვერ იქნება, მოსახლეობის რაოდენობას ვერ გადააჭარბებს, უტრირებულად და ნახევრად ხუმრობით რომ ვთქვათ, მაგრამ იქნება ზრდა, მათ შორის, წლევანდელი მონაცემების მიხედვითაც, თანხა დღევანდელ საოპერაციო ხარჯებზე მეტი იქნება. ხელფასების ზრდა და ინფლაციის შესაბამისი, ადეკვატური ზრდა ყველა მიმართულებით მაუწყებელს შიგნით შეიძლება ჰქონდეს და შესაბამისი ხარჯები დაფაროს. დარწმუნებული ვართ, რომ კიდევ იქნება დასაქმებული ადამიანების ზრდა ქვეყანაში, რაც ავტომატურად გამოიწვევს საზოგადოებრივი მაუწყებლის დაფინანსების ზრდას, თუმცა,  ბუნებრივია, ეს არ იქნება ისეთი დინამიკა, როგორიც იყო აქამდე, გაორმაგება და გასამმაგება, როგორც შეიძლებოდა მომხდარიყო, არ იქნება. ასევე, კანონში დაზღვევის სახით იწერება ისიც, რომ შემცირების შემთხვევაში (ასეთი პროგნოზი არ გვაქვს, მაგრამ თეორიული რისკებიც უნდა დავაზღვიოთ), თუ დასაქმებულთა რაოდენობა შემცირდება, ამ შემთხვევაში საზოგადოებრივი მაუწყებლის ბიუჯეტი ამას ავტომატურად არ მიჰყვება და არ შემცირდება“, – განაცხადა მამუკა მდინარაძემ.