სი ძინპინთან შეხვედრის მიზანი აშშ-ჩინეთის სამხედრო კომუნიკაციების აღდგენაა, – ამის შესახებ აშშ-ის პრეზიდენტმა, ჯო ბაიდენმა განაცხადა.

„ჩვეულ კურსს რომ დავუბრუნდეთ, მიმოწერას თუ განვაახლებთ და შევძლებთ ავიღოთ ტელეფონი და კრიზისების დროს ერთმანეთს ვესაუბროთ, შევძლოთ დავრწმუნდეთ, რომ ჩვენს სამხედროებს კვლავ აქვთ ერთმანეთთან კონტაქტი“, – ჯო ბაიდენმა უპასუხა შეკითხვას, თუ რას მოელის ჩინეთის პრეზიდენტთან გასამართი საუბრიდან.

სან-ფრანცისკოში გამგზავრებამდე ჟურნალისტებთან საუბრისას ბაიდენმა განაცხადა, რომ ის ცდილობს, დაძაბული პერიოდის შემდეგ, აშშ-ჩინეთის ურთიერთობები უკეთესობისკენ შეცვალოს.

შეგახსენებთ, ჯო ბიადენი და სი ძინპინი ერთმანეთს სან-ფრანცისკოს აზია-წყნარი ოკეანის ეკონომიკური თანამშრომლობის სამიტის ფარგლებში შეხვდებიან.

უკრაინის პრეზიდენტის, ვოლოდიმირ ზელენსკის განცხადებით, რუსეთის ლიდერი, ვლადიმერ პუტინი არჩევნების შესახებ განცხადების გაკეთებას დეკემბრის დასაწყისში გეგმავს და ამიტომ ცდილობს, ამ დროისთვის ბრძოლის ველზე თუნდ რაიმე შედეგი აჩვენოს.

”ძალიან ინტენსიური თავდასხმები, განსაკუთრებით დონეცკის ოლქში. ჩვენ უნდა გვესმოდეს, რომ პუტინს ახლა აქვს ძალიან ცინიკური და კონკრეტული პოლიტიკური მიზანი და მზად არის, დახოცოს თავისი ხალხი, რამდენიც უნდა, რადგან სურს, რომ დეკემბრის პირველ ნახევარში, როდესაც გეგმავს არჩევნების გამოცხადებას, რაიმე ტაქტიკური შედეგი მაინც აჩვენოს. რუსეთი ავდიივკასთან ჯარისკაცებსა და აღჭურვილობას იმაზე უფრო სწრაფად და მასშტაბურად კარგავს, ვიდრე ბახმუტთან,“- აღნიშნა ზელენსკიმ.

ისრაელი ღაზის სექტორში სახმელეთო ოპერაციას განაგრძობს. თავდაცვის ძალებში განაცხადეს, რომ ალ-შიფას საავადმყოფოში შევიდნენ, რომელიც ანკლავის მთავარი ჰოსპიტალია.

როგორც ჯანდაცვის მსოფლიო ორგანიზაციის წარმომადგენლები აცხადებენ, კომპლექსში 4100 ადამიანი იმყოფება. ისრაელის ძალებმა შტურმით აიღეს ასევე პარლამენტი, სამთავრობო კომპლექსი და პოლიციის შტაბბინა. მათ კონტროლი დაამყარეს ალ-შატის ლტოლვილთა ბანაკზეც.

საჰაერო განგაშის ხმა ისმოდა თელ-ავივშიც. თავდაცვის სისტემამ „ჰამასის“ მიერ ნასროლი რაკეტები გაანეიტრალა. რაკეტების ნამსხვრევები დასახლებულ რაიონებში ჩავარდა, რის შედეგადაც 2 ადამიანი დაშავდა. დაჭრილები საავადმყოფოში გადაიყვანეს. მათ სიცოცხლეს საფრთხე არ ემუქრება.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.

ისრაელი და აშშ არიან დამნაშავეები ღაზაში, ალ შიფას საავადმყოფოზე განხორციელებულ თავდასხმაში, – ამის შესახებ „ჰამასის“ მიერ გავრცელებულ განცხადებაშია ნათქვამი, რომელსაც საერთაშორისო მედია ავრცელებს.

„გაერო-ს დუმილი, მრავალი ქვეყნისა და რეჟიმის ღალატი არ შეაფერხებს პალესტინელი ხალხის მიჯაჭვულობას თავის მიწაზე და ლეგიტიმურ ეროვნულ უფლებებზე“, – ნათქვამია განცხადებაში.

„ჰამასი“ ასევე აცხადებს, რომ შეერთებულმა შტატებმა ისრაელს მისცა მწვანე შუქი მშვიდობიანი მოსახლეობის მოკვლის მხარდაჭერით. ისრაელის განცხადებას, რომ ალ შიფას საავადმყოფოს „ჰამასი“ იყენებს, როგორც სამეთაურო ცენტრსა და საკონტოლო ბაზას, „ჰამასი“ ცრუ ნარატივს უწოდებს.

მგონია, რომ ცოტათი არასასურველი ვითარებაა, – ამის შესახებ საქართველოში აშშ-ის ელჩმა, რობინ დანიგანმა „რადიო თავისუფლებასთან“ ინტერვიუში განაცხადა, რითაც უპასუხა კითხვას, რას ნიშნავდა აშშ-სთვის საქართველო-ჩინეთს შორის სტრატეგიული პარტნიორების დამყარების შესახებ შეთანხმების გაფორმება.

დიპლომატის განმარტებით, ჩინეთი არის ქვეყანა, რომელიც სულ უფრო უახლოვდება რუსეთს, რომელსაც საქართველოს ტერიტორიის ნაწილი ოკუპირებული აქვს.

“გულწრფელი უნდა ვიყო: როცა ვამბობ, რომ პატივს ვცემთ საქართველოს სუვერენიტეტსა და ტერიტორიულ მთლიანობას, ამასვე ვგულისხმობთ – ნამდვილად პატივს ვცემთ საქართველოს სუვერენიტეტს… სტრატეგიულ პარტნიორობას რაც შეეხება, მხოლოდ შევნიშნავ, რომ იმ შეთანხმებაში საქართველო ცალსახად აღიარებს ჩინეთის სუვერენიტეტს, მაგრამ ჩვენ ვერ ვხედავთ მსგავს მიდგომას ჩინეთისგან საქართველოს მიმართ. ამასთან, ეს არის ქვეყანა, რომელიც სულ უფრო უახლოვდება რუსეთს. რუსეთს კი ოკუპირებული აქვს საქართველოს ტერიტორიის ნაწილი. მგონია, რომ ცოტათი არასასურველი ვითარებაა”, – განაცხადა რობინ დანიგანმა.