ხელისუფლება თავისი ბუნებითა და ორიენტირით როცა რუსულ ორბიტაზეა, გაურკვეველი და გაუმჭვირვალე ურთიერთობები ისეთ აქტორთან, როგორიცაა ჩინეთი, ორმაგად სახიფათო ხდება, – ამის შესახებ პარტია „ლელოს“ წევრმა, ანა ნაცვლიშვილმა განაცხადა.

ნაცვლიშვილის თქმით, ჩინეთთან დაკავშირებით ხელისუფლება საუბრობს არა მხოლოდ ეკონომიკურ, არამედ, მათ შორის, პოლიტიკურ თანამშრომლობაზე, რომელიც გაუგებარია, რას შეიძლება გულისხმობდეს.

„მაშინ, როცა საქართველომ წლის ბოლოს კანდიდატის სტატუსი მიიღო და რაც შეიძლება სწრაფი ნაბიჯი ევროკავშირში გაწევრიანებაზე მოლაპარაკების დაწყება უნდა იყოს, პირველი საპარლამენტო ვიზიტი სრულდება არა ბრიუსელში ან ევროპის რომელიმე დედაქალაქში, და დღის წესრიგი არის არა ცხრა მიმართულებით რეფორმის გატარება, არამედ პირველი ვიზიტი ჩინეთში ხორციელდება. ჩინეთთან დაკავშირებით ხელისუფლება მხოლოდ ეკონომიკურ თანამშრომლობაზე არ საუბრობს. ისინი, მათ შორის, საუბრობენ პოლიტიკურ თანამშრომლობაზე, რომელიც გაუგებარია, რას შეიძლება გულისხმობდეს, მაშინ როდესაც საქართველო დეკლარირებულად არის დემოკრატიული რესპუბლიკა, ხოლო ჩინეთის სახელმწიფოს სხვა კურსი აქვს არჩეული. ჩვენ მთავარ პრობლემას ვხედავთ იმაში, რომ საქართველოს ხელისუფლება ევროპულ და ევროატლანტიკურ გზაზე მყარად და მკაფიოდ არ დგას. მთავარი პრობლემაა ის, რომ საქართველოს ხელისუფლების რეალური განწყობა არ არის, ქვეყანა ევროპული და ევროატლანტიკური ოჯახის სრულფასოვანი წევრი იყოს. როცა ხელისუფლება თავისი ბუნებითა და ორიენტირით რუსულ ორბიტაზეა, გაურკვეველი და გაუმჭვირვალე ურთიერთობები ისეთ აქტორთან, როგორიცაა ჩინეთი, ორმაგად სახიფათო ხდება. ამ მხრივ პრობლემა საქართველოს ხელისუფლებაშია, სხვა მხრივ, გონიერმა, რაციონალურმა და პატრიოტმა ხელისუფლებამ ჩინეთთან ურთიერთობებიც შეიძლება ქვეყნის სასიკეთოდ და სასარგებლოდ გამოიყენოს“, – განაცხადა ანა ნაცვლიშვილმა.

მთავარი კითხვა არის ის, „ნაცმოძრაობა“, რომელიც არჩევნებზე წითელი ხუთიანით გამოდის, არის თუ არა საერთოდ ოპოზიციური პარტია. ეჭვი მაქვს, რომ „ნაცმოძრაობა“ „ქართულ ოცნებას“ ხელში აქვს ჩაგდებული, – ამის შესახებ „გირჩის“ წევრმა, იაგო ხვიჩიამ განაცხადა.

„შესაბამისად, რაც იქ ხდება „ნაცების“ სახელით, ეს ყველაფერი „ქართული ოცნებიდან“ იმართება. ამას ვინმე თუ აპროტესტებს და ამბობს, რომ ნაღდი „ნაცი“ ვარ და სხვები მოისყიდესო, ჩემთვის ეს ლოგიკური არგუმენტი გასაგები იქნებოდა, რადგან ასეთი ეჭვები მეც მაქვს. თუ ამბობ, რომ „ნაცმოძრაობა“ ოპოზიციურია და ახალ ნეონაცურ გაერთიანებას ქმნი, რომელიც საარჩევნო ბარიერს ან გადალახავს, ან არა, ამას ვერ მივესალმები და „ნაცმოძრაობის“ ყველა ყოფილ ლიდერს მოვუწოდებდი, იმისთვის იბრძოლონ, რომ ეს პარტია ოპოზიციური იყოს და „ქართულ ოცნებას“ ხელში ნუ ჩაუგდებენ“, – განაცხადა იაგო ხვიჩიამ.

„გირჩის“ წევრმა „ლელოსა“ და პარტიაზე „საქართველოსთვისაც“ ისაუბრა.

„„ლელოს“ ერთადერთი სწორი გზაა ის, რომ დანარჩენ ოპოზიციურ პარტიებს ფული გადაუხადოს და პოლიტიკიდან ღირსეულად გავიდეს. რაც შეეხება გახარიას, ჩემი საქმე არ არის, რა კამპანია ექნება, მაგრამ საკრებულოებში თანამშრომლობა ჰქონდათ და მაგ დროს ასეთი პროტესტი არ ყოფილა, რაც არათანმიმდევრულობაზე კითხვებს დამასმევინებს. მგონი, გახარიას პარტია უნიკალურია იმით, რომ მათთვის ნებისმიერ პარტიასთან თანამშრომლობა წითელი ხაზია და „ნაცებთან“ თანამშრომლობას გამორიცხავენ, მაგრამ რეგიონებში მათი თანამშრომლობა ვნახეთ. ხაზარაძემ თქვა, „შუა უნდა შეიკრიბოსო“ და შუა თავისთვის ხომ არ შეიკრიბება, თუ ფულს არ გადაუხდი? როგორც ჩანს, ხაზარაძე ძალიან ხელმოჭერილად ხარჯავს ფულს „ლელოს“ მიღმა და ასეთი სიწუწკით არაფერი გამოვა“, – განაცხადა იაგო ხვიჩიამ.

რადიკალური ოპოზიციის, კოლექტიური „ნაციონალური მოძრაობის“ საქმიანობა მიმართულია პირდაპირ სახელმწიფოს, ეკლესიის და იმ ყველაფრის წინააღმდეგ, რაზეც დგას ჩვენი ქართული იდენტობა – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მისი თქმით, წარმატების ვერავითარი შანსი ვერ ექნებათ ისეთ პოლიტიკურ ძალებს, რომლებიც პირდაპირ უპირისპირდებიან ქართულ სახელმწიფოს, ქართულ ეკლესიას და იდენტობას.

„ეს არ არის ახალი. ჩვენ ვხედავთ მთელი ამ წლების განმავლობაში, რომ ამ ადამიანების, რადიკალური ოპოზიციის, კოლექტიური „ნაციონალური მოძრაობის“ საქმიანობა მიმართულია პირდაპირ სახელმწიფოს, ეკლესიის და იმ ყველაფრის წინააღმდეგ, რაზეც დგას ჩვენი ქართული იდენტობა. ეს არის მათი პოლიტიკის ერთ-ერთი მთავარი ხაზი და მთავარი მიმართულება. რა თქმა უნდა, ჩვენ ამას უნდა დავუპირისპირდეთ. ამას, პირველ რიგში, ქართული საზოგადოება უნდა დაუპირისპირდეს და აუცილებლად დაუპირისპირდება. მორიგი განაჩენი დადგება ამ საპარლამენტო არჩევნების შემდეგ. წარმატების ვერავითარი შანსი ვერ ექნებათ ისეთ პოლიტიკურ ძალებს, რომლებიც პირდაპირ უპირისპირდებიან ქართულ სახელმწიფოს, ქართულ ეკლესიას და ჩვენს იდენტობას“, – განაცხადა ირაკლი კობახიძემ.

ქართული ეკლესიის დისკრედიტაციაა, როცა გელათის რეაბილიტაცია პრაქტიკულად ჩავარდნილია, ის, რაც ხდება ჯვრის მონასტერში, კულტურული მემკვიდრეობის სხვა ძეგლებთან მიმართებით და ის, რაც ხდება ეპისკოპოსების და მღვდელმსახურების მოსმენებთან დაკავშირებით, – ამის შესახებ “ნაციონალური მოძრაობის” დეპუტატმა ლევან ბეჟაშვილმა განაცხადა, რითაც შალვა პაპუაშვილის განცხადებას გამოეხმაურა, რომელიც ოპოზიციას ეკლესიასთან ბრძოლაში ადანაშაულებს.

მისი თქმით, „ქართული ოცნება” და შალვა პაპუაშვილი მუდმივად მანიპულირებენ ეკლესიის და რელიგიის თემით.

“საზოგადოებამ კარგად იცის, რა დამოკიდებულება აქვს “ქართულ ოცნებას” ეკლესიის მიმართ. მათი მმართველობის პერიოდში ეპისკოპოსებს და სხვა მღვდელმსახურებს რომ უსმენენ, მათი ცხოვრების ფარული კადრები და ჩანაწერები რომ არსებობს და გამოქვეყნებულია სწორედ მათი ხელისუფლების დროს, ის რა დღეშიც არის გელათი, ჯვრის მონასტერი, როგორ ექცევიან კულტურული მემკვიდრეობის პროექტებს, ამის ნათელი დადასტურებაა. ამიტომ შალვა პაპუაშვილის ეს განცხადებაც ეკლესიის თემით მორიგი მანიპულაციაა და ამომრჩევლის მოსატყუებლად,”- განაცხადა ბეჟაშვილმა.

სტალინისა და მატრონას შესახებ ისტორია ხელისუფლების მიერ არის მოფიქრებული. იმის გამო, რომ ამას სათანადო რეაქცია არ მოჰყვა, ახლა თემა ისევ შემოაბრუნეს და თავად გახდნენ მატრონას ჭირისუფლები, – ამის შესახებ „გირჩის“ წევრმა, იაგო ხვიჩიამ განაცხადა.

ხვიჩიას თქმით, „ეკლესიის წინააღმდეგ მთავარი მებრძოლი ხელისუფლებაა, რომელიც სასულიერო პირებზე ჯერ კრებსებს აგროვებს, შემდეგ მათ აშანტაჟებს“.

„რაღაცნაირად მთელ ქვეყანას ანერვიულებენ და საკუთარ მოქალაქეებს რეპრესიებით ემუქრებიან იმის გამო, რომ მატრონასა და სტალინის სიწმინდე არ შელახონ. როგორ შეიძლება, აქ, ხელისუფლების პრობლემის გარდა, მორწმუნეთა პრობლემა დაინახო? მგონია, რომ ეს ამბავი არავის ემახსოვრებოდა, ეს კამპანია ხელისუფლებას რომ არ დაეგეგმა. ეკლესიის წინააღმდეგ მთავარი მებრძოლი ხელისუფლებაა, რომელიც სასულიერო პირებზე ჯერ კრებსებს აგროვებს, შემდეგ მათ აშანტაჟებს, ამას აქვეყნებს და ასეთი შანტაჟით ჯიბეში სამღვდელოების ნაწილი უზის. ამაზე დიდი რეპრესია რა უნდა იყოს? ვიღაცამ მატრონას ხატს რომ საღებავი შეასხა, ეს ბევრად ნაკლები ბრძოლაა და არ გამოვრიცხავ, რომ ესეც ხელისუფლებასთან ყოფილიყო შეთანხმებული“, – განაცხადა ხვიჩიამ.