უკრაინის ხელისუფლების პოზიცია საქართველოსთან მიმართებით ცხადია, თვითონ ღიად საუბრობდნენ თავის დროზე, რა სურთ საქართველოსგან და ამისთვის მადლობა ეკუთვნის უკრაინის ხელისუფლებას, რადგან არიან ძალები, რომლებსაც იგივე სურთ საქართველოსგან, მაგრამ ამაზე ღიად არ საუბრობენ, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ „იმედის“ ეთერში განაცხადა.

„მადლობა უკრაინის ხელისუფლებას, რომელიც გულახდილია. პირდაპირ საუბრობდა უკრაინის ხელისუფლება იმასთან დაკავშირებით, რა უნდათ საქართველოსგან. მაგალითად, უშიშროების საბჭოს მდივანი დანილოვი, ასევე ზელენსკის მთავარი მრჩეველი პოდოლიაკი პირდაპირ მოგვიწოდებდნენ მეორე ფრონტისკენ. რა თქმა უნდა, ყველა მათი ნაბიჯი უკავშირდება ამ ინტერესს, არ მალავენ. გახსოვთ, ელჩის გაწვევა საქართველოდან. ბელარუსიდან არ ჰყავდათ ელჩი გაწვეული, მაშინ როდესაც მთავარი შეტევა განხორციელდა ბელარუსიდან კიევზე. ელჩი გაიწვიეს საქართველოდან და არ გაუწვევიათ ბელარუსიდან, ვინმეს დღემდე მოუსმენია ამის რაიმე დასაბუთება? მაშინ იყო მძიმე ემოციური ფონი და გათვლა იყო იმაზე, რომ ამ ფონზე ზელენსკის ეს გადაწყვეტილება საზოგადოებაში გამოიწვევდა მღელვარებას, არეულობას, ხელისუფლების შეცვლას. „ნაციონალური მოძრაობა“ რომ ყოფილიყო ხელისუფლებაში, ისინი პირდაპირ გახსნიდნენ მეორე ფრონტს“, – განაცხადა კობახიძემ.

რა არის ჩემთვის უკრაინა? ეს ჩემი ცხოვრებისა და ბრძოლის მნიშვნელოვანი ნაწილია, ჩემთვის საქართველოს გადარჩენა უკრაინის გარეშე ყოველთვის წარმოუდგენელი იყო, – ამის შესახებ საქართველოს ყოფილი პრეზიდენტი მიხეილ სააკაშვილი წერს ავტობიოგრაფიულ წერილში – „მე და უკრაინა“, რომელიც „უკრაინსკაია პრავდამ“ გამოაქვეყნა.

„უკრაინა ჩემი ცხოვრებისა და ბრძოლის მნიშვნელოვანი ნაწილია. ჩემი შეგნებული ცხოვრების უმეტესი ნაწილი უკრაინაში გავატარე. ახლა უკრაინულად უფრო კარგად ვლაპარაკობ, ვიდრე რუსულად. უკრაინა ჩემი სახლია კიევში, პატარა მიწის ნაკვეთი – მირგოროდში. უკრაინა ჩემი განსაკუთრებული სიყვარულია – ქალაქი ოდესა. უკრაინაში ჩემი მეგობრების უმეტესი ნაწილია, ამ ბოლო დროს უკრაინა ჩემი პატარა ქალიშვილი ჟასმინია, რომლის ნახვისა და ხელში აყვანის საშუალება ჯერ არ მქონია.

ჩემთვის საქართველოს გადარჩენა და წარმატება ყოველთვის წარმოუდგენელი იყო უკრაინის გარეშე, ახლა კი საუბარია ევროპის კონტინენტის გადარჩენაზე და ჩემს გადარჩენაზე, პუტინის ოლიგარქიული ციხიდან გადარჩენაზე“, – წერია სააკაშვილის წერილში.

გუშინ დილით მქონდა შეხვედრა უკრაინის საგარეო საქმეთა მინისტრის მოადგილე, ევგენი პერებიინისთან, რომელმაც ამ შეხვედრისას მაუწყა უკრაინის პოზიცია მიხეილ სააკაშვილის საკითხთან დაკავშირებით და შესაბამისად, მთხოვა ქვეყნის დატოვება, საქართველოში კონსულტაციების გამართვის მიზნით, შეხვედრიდან 48 საათის განმავლობაში, – ამის შესახებ უკრაინაში საქართველოს ელჩმა, გიორგი ზაქარაშვილმა „ქრონიკაში“ სატელეფონო ჩართვისას განაცხადა.

მისი თქმით, აღნიშნულ საკითხთან დაკავშირებით უკრაინის მხარეს განემარტა საქართველოს პოზიცია და ხაზი გაესვა, რომ ის მოთხოვნა და შეშფოთება, რომელიც დაფიქსირებულია უკრაინის ხელისუფლების მიერ, არ შეესაბამება სიმართლეს.

„მე ცხადია დავეთანხმე, ვინაიდან ეს იყო უკრაინის პრეზიდენტის მოთხოვნა და თხოვნა, თუმცა უკრაინის მხარეს განემარტა ამ საკითხთან დაკავშირებით საქართველოს პოზიცია და ხაზი გაესვა, რომ ის მოთხოვნა და შეშფოთება, რომელიც დაფიქსირებულია უკრაინის ხელისუფლების მიერ, არ შეესაბამება სიმართლეს, რაც დადასტურებულია სტრასბურგის სასამართლოს გადაწყვეტილებით და სხვა მრავალი ფაქტით, რომელიც გავრცელდა არაერთხელ საქართველოს ხელისუფლების მიერ. აღინიშნა, რომ ეს მოვლენა ხელს უშლის ორმხრივი ურთიერთობების განვითარებას და შესაბამისად, ქმნის გარკვეულ პრობლემებს კომუნიკაციისთვის, მათ შორის. აღინიშნა ასევე, რომ რუსეთის ინტერვენციის პირველივე დღიდან საქართველო მაქსიმალურ ჰუმანიტარულ და პოლიტიკურ მხარდაჭერას უცხადებს უკრაინას, მათ შორის ყველა საერთაშორისო მოედანზე. საქართველო გააგრძელებს უკრაინელი ხალხისა და მეგობარი ქვეყნის დახმარებას“, – განაცხადა ელჩმა.

უკრაინის პრეზიდენტმა, ვოლოდიმირ ზელენსკიმ საქართველოს ხელისუფლებას მოუწოდა, მიხეილ სააკაშვილი უკრაინას გადასცეს. მან ასევე დაავალა უკრაინის საგარეო საქმეთა სამინისტროს, დაიბაროს უკრაინაში საქართველოს ელჩი, რათა „გამოვხატოთ ჩვენი მკაცრი პროტესტი და ვთხოვოთ მას 48 საათის განმავლობაში დატოვოს უკრაინა, რათა კონსულტაციები გამართოს თბილისში“

“მაკფოლის ინტერვიუ იყო წაშველება პოლიტიკურად განადგურებული ოპოზიციისთვის იმიტომ, რომ ახლა ოპოზიციას პულსი აღარ ესინჯება”-  ასე ეხმაურება „ხალხის ძალის” ერთ-ერთი ლიდერი, გურამ მაჭარაშვილი უკრაინის პრეზიდენტის მიერ შექმნილი რუსეთის სანქციების ჯგუფის კოორდინატორის, მაიკლ მაკფოლის მიერ „რადიო თავისუფლებისთვის“ მიცემული ინტერვიუს.

როგორც მაჭარაშვილი აღნიშნავს,  მაიკლ მაკფოლის განცხადება არის წახალისება ოპოზიციისთვის, რომელსაც პულსიც აღარ ესინჯება.

„ამერიკულმა და ევროპულმა ტექნიკურმა ჯგუფმა საქართველოში შემოწმებისას თქვეს, რომ საერთაშორისო სანქციებიდან თავის არიდებას საქართველოში ადგილი არ აქვს. მაკფოლი ამბობს, რომ არ სჯერა – ნუ, ვისაც გვჯერა, გაგვატარეთ. მაკფოლის ინტერვიუ იყო წაშველება პოლიტიკურად განადგურებული ოპოზიციისთვის იმიტომ, რომ ახლა ოპოზიციას პულსი აღარ ესინჯება. როგორც ჩანს, ადგილობრივმა „ომის პარტიამ” „გლობალურ ომის” პარტიას მიმართა, რომ პრაქტიკულად რაღაცით დახმარებოდა”, – განაცხადა გურამ მაჭარაშვილმა.

პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, მნიშვნელოვანია, რომ ვინც დანაშაულს ჩაიდენს, ამაზე პასუხი აგოს.

ოხანაშვილის თქმით, პოლიტიკოსებმა უნდა დააკონკრეტონ, რას გულისხმობენ, როცა საუბრობენ, რომ მიხეილ სააკაშვილის პატიმრობა ქვეყნისთვის დაბრკოლება არ უნდა გახდეს.

„სასამართლოს გადაწყვეტილებებით, დადასტურებულად ვიცით, რომ მიხეილ სააკაშვილმა დანაშაული ჩაიდინა, შემდეგ საქართველოში უკანონოდ შემოვიდა და თუ რამე იქნებოდა დაბრკოლება, ეს კანონის არაღსრულებაა. არავინ უარყოფს, რომ კონკრეტული დანაშაულის ჩამდენმა პირმა პასუხი უნდა აგოს. როგორ წარმოგიდგენიათ, კანონის უზენაესობას რა ფასი აქვს და ვინ დაიცავს კანონს, როცა ხედავენ, რომ ადამიანი დანაშაულს სჩადის და შემდეგ ხდება აპელირება, რომ იცი, დანაშაული კი ჩაიდინა, მაგრამ კანონი არ უნდა აღსრულდეს. მაშინ, რა ფასი აქვს სამართლებივ სახელმწიფოსა და კანონის უზენაესობას?“, – აღნიშნა ანრი ოხანაშვილმა.

ნიკა გვარამია არის ადამიანი, რომელმაც საქართველოში ყველაზე მაღალ დონეზე დანერგა ზიზღი, სიძულვილის ენა და შეურაცხყოფა პირდაპირი ეთერიდან, – ამის შესახებ „ხალხის ძალის“ ერთ-ერთმა ლიდერმა, სოზარ სუბარმა ჟურნალისტებს განუცხადა.

სოზარ სუბარის თქმით, სალომე ზურაბიშვილი მისი გათავისუფლების გამო მორალურ პასუხისმგებლობას უნდა გრძნობდეს.

„უბრალოდ, ადამიანს, რომელმაც ის შეიწყალა, საქართველოს პრეზიდენტს მორალური პასუხისმგებლობა უნდა ჰქონდეს იმასთან დაკავშირებით, რომ მან შეიწყალა ადამიანი, რომელიც საქართველოში პოლარიზაციის ერთ-ერთი დიდი და მთავარი წყაროა“, – განაცხადა სოზარ სუბარმა.

ამასთან, როგორც სოზარ სუბარმა აღნიშნა, გვარამია სტრასბურგში სარჩელს თუ შეიტანს იმის თაობაზე, დაირღვა თუ არა სამართლიანი სასამართლოს უფლება მასთან დაკავშირებით, ისევე გამტყუნდება, როგორც „რუსთავი 2“-ის საქმეზე გამტყუნდა.

„სააკაშვილის საქმეს რომ სტრასბურგში წააგებდნენ, ეს ძალიან კარგად იცოდნენ, ამიტომაც არ უნდოდათ წასვლა. უბრალოდ, მართლა ვაიძულეთ ყოველდღიური მოწოდებებით. ბუნებრივია, სტრასბურგმა თქვა სიმართლე, რომ არანაირი წამება და მკურნალობასთან დაკავშირებული პრობლემები არ არსებობდა. იყო თუ არა სამართლიანი სასამართლოს უფლება დარღვეული გვარამიასთან დაკავშირებით – დარწმუნებული ვარ, როგორც „რუსთავი 2“-ის საქმეზე გამტყუნდა გვარამია და მთელი მაშინდელი ოპოზიცია, ისე გამტყუნდება თავის საქმესთან დაკავშირებით. გაბედოს და წავიდეს სტრასბურგში თავის საქმესთან დაკავშირებით“, – განაცხადა სოზარ სუბარმა.

მოწოდება, არ მოერიდოთ ესკალაციას, არის არასწორი მოწოდება – ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა, უკრაინის პრეზიდენტის მიერ შექმნილი რუსეთის სანქციების ჯგუფის კოორდინატორის, მაიკლ მაკფოლის მიერ „რადიო თავისუფლებისთვის“ მიცემული ინტერვიუს კომენტირებისას.

მისი თქმით, საუბარი იმაზე, რომ კონკრეტული ქვეყნები ესკალაციას არ უნდა მოერიდონ, კითხვის ნიშნებს აჩენს.

„წავიკითხე მაკფოლის ინტერვიუ, სადაც საუბარი ჰქონდა იმასთან დაკავშირებით, რომ ესკალაციას არ უნდა მოერიდონ კონკრეტული ქვეყნები და საუბარი ჰქონდა ქართველ ჟურნალისტთან ამ თემაზე, რაც კითხვის ნიშნებს აჩენს. მე არ მინდა, ამ თემაში ღრმად შევიდე. ზოგადად, ასეთი მოწოდებები არ არის სწორი. მოწოდება, არ მოერიდოთ ესკალაციას, არის არასწორი მოწოდება, მე ასე მგონია“ , – განაცხადა ირაკლი კობახიძემ.

გარდა ამისა, ირაკლი კობახიძემ ისაუბრა რუსეთთან საქართველოს სავაჭრო ურთიერთობებზე და განაცხადა, რომ, რასაც ქვეყანა რუსეთთან ერთი წლის განმავლობაში ვაჭრობს, იმავეს ვაჭრობს დასავლეთი ერთ დღეში.

კობახიძის თქმით, საქართველოს ერთი წლის მაჩვენებელი და დასავლეთის ვაჭრობის ერთი დღის მაჩვენებელი ერთი და იგივეა და ამ ფონზე „ყველაფერი ნათელია“.

როგორც ირაკლი კობახიძემ აღნიშნა, რადიკალური ოპოზიცია მოქმედებს იმ ძალების დაკვეთით, რომლებსაც არ სურთ სიკეთე ჩვენი ქვეყნისთვის და მოსახლეობისთვის.

„ყველა ქვეყანა, პირველ რიგში, საკუთარი ინტერესების დაცვას უფრთხილდება. ეს არის ის, რაც ამოძრავებს ნებისმიერ ქვეყანას. ჩვენც, რა თქმა უნდა, პირველ რიგში, ჩვენი ქვეყნის ინტერესები უნდა დავიცვათ. არცერთ შემთხვევაში არ უნდა მივიღოთ ისეთი გადაწყვეტილებები, რომლებიც დააზარალებს საკუთარ ქვეყანას და მოსახლეობას. გახსოვთ ოპოზიციის მოწოდებები სანქციებთან მიერთების შესახებ, რაც გამოიწვევდა მინიმუმ, მარტო პირველივე წელს, 2,5 მილიარდი დოლარით ჩვენი ქვეყნის ეკონომიკის შემცირებას. ამას ითხოვდა ოპოზიცია. თავადაც შეგიძლიათ განსაჯოთ, საითკენ არის ორიენტირებული რადიკალური ოპოზიცია და ვისი დაკვეთით მოქმედებენ ეს პოლიტიკური ძალები. იმ ძალების დაკვეთით, რომლებსაც არ სურთ სიკეთე ჩვენი ქვეყნისთვის და მოსახლეობისთვის. ჩვენ არ გადავდგამთ ისეთ ნაბიჯებს, რომლებიც მძიმე ზიანს მიაყენებს ჩვენს ქვეყანას და მოსახლეობას, მათ შორის ეკონომიკური თვალსაზრისით“, – განაცხადა ირაკლი კობახიძემ.