2023 წლის 11-12 დეკემბერს, საგარეო საქმეთა მინისტრი, ილია დარჩიაშვილი სამუშაო ვიზიტით ბრიუსელს ეწვევა.
მინისტრი მონაწილეობას მიიღებს აღმოსავლეთ პარტნიორობის მინისტერიალში, სადაც  განხილული იქნება  აღმოსავლეთ პარტნიორობის ფარგლებში არსებული თანამშრომლობა, აქცენტი გაკეთდება 2022-2023 წლებში მიღწეულ შედეგებზე  და  სამომავლო პერსპექტივებზე.

ბრიუსელში ვიზიტის ფარგლებში, საგარეო საქმეთა მინისტრი, ასევე, გამართავს შეხვედრებს ევროპელ კოლეგებთან და ევროკომისიის წარმომადგენლებთან.

ბესო გაზდელიანი აცხადებს, რომ „ნაციონალური მოძრაობა“ თბილისის რაიონული ორგანიზაციების წევრების უმრავლესობამ დატოვა. ამის შესახებ მათ სპეციალურ ბრიფინგზე განაცხადეს.

როგორც გაზდელიანმა აღნიშნა, ხაბეიშვილმა და მისმა გუნდმა არაფორმალური მმართველობით „ნაციონალურ მოძრაობას“ ყველა ღირებულება დაუკარგა. მან ბრიფინგზე მიხეილ სააკაშვილსაც მიმართა და თქვა, რომ ყოფილი პრეზიდენტის თანამებრძოლებად დარჩებიან.

„აქ ვდგავართ „ნაციონალური მოძრაობის“ თბილისის რაიონული ორგანიზაციების წარმომადგენლები, მათი უმრავლესობა. ეს ის ადამიანები არიან, რომლებიც წლების განმავლობაში უანგაროდ და ერთგულად ემსახურებოდა პარტიას და იმ ღირებულებებს, იდეალებს, რის გამოც ჩვენ თავის დროზე პარტიაში მოვედით. აქ არიან ადამიანები, ვისი მხრებითაც მოვიდა პარტია აქამდე.

მოგმართავთ ახალ მენეჯმენტს – რა არის თქვენთვის ეს პარტია, შეიძლება ეს არის მექანიზმი პარლამენტში მოხვედრის, ამბიციების დაკმაყოფილების, მაგრამ ჩვენთვის ეს არის პოლიტიკური ოჯახი, სადაც მოვედით ღირებულებებით და იდეალებით დამუხტულები. მაგრამ სამწუხაროდ დღეს ჩვენს თავს მანდ ვეღარ ვხედავთ. გვიწევს ძალიან მძიმე გადაწყვეტილების მიღება – ვტოვებთ „ერთიან ნაციონალურ მოძრაობას“, ვდგამთ ნაბიჯს წინ, მომავალში იმისთვის, რომ ვიბრძოლოთ ჩვენი ქვეყნის უკეთესი მომავლისთვის. ბატონო მიშა, მინდა, გისურვოთ ჯანმრთელობა და მალე თავისუფლება, ჩვენ ვრჩებით ვარდების რევოლუციის იდეების ერთგულნი და მიხეილ სააკაშვილის პოლიტიკური თანამებრძოლები“,- განაცხადა გაზდელიანმა.

ამასთან, დავით ლაგვილავას განცხადებით, „პარტიის მენეჯმენტში განვითარებულმა მოვლენებმა ცხადყო, რომ დღეს, სამწუხაროდ, აღარაფერი დარჩა „ნაციონალური მოძრაობისგან“. მისივე თქმით, ისინი ნიკა მელიას ახალ პარტიას შეუერთდებიან.

„ის, რაც დღეს ხდება პარტიაში – კლანურობა, კარჩაკეტილობა, არაფორმალური მმართველობა, განსხვავებული აზრის მქონე, კრიტიკულად მოაზროვნე ადამიანების დევნა პარტიიდან, ამის გამო მივიღეთ გადაწყვეტილება, დავტოვოთ „ერთიანი ნაციონალური მოძრაობა“, რადგან მიგვაჩნია, რომ დღეს „ნაციონალური მოძრაობა“ აღარ არის ეფექტური იარაღი დღევანდელი რუსული რეჟიმის დასამარცხებლად.

აუცილებლად ვაპირებთ შესვლას ახალ პარტიაში, რომელიც დაფუძნდება უახლოეს მომავალში ნიკა მელიას ხელმძღვანელობით და სწორედ ამ პარტიიდან ვაპირებთ ღირსებით სიმართლით შეუპოვრობით ბრძოლის გაგრძელებას“,- აღნიშნა დავით ლაგვილავამ.

პარტიის „საქართველოსთვის“ თავმჯდომარე გიორგი გახარია ადამიანის უფლებების დაცვის საერთაშორისო დღეს გამოეხმაურა:

„დღეს ადამიანის უფლებების დაცვის დღეა. გუშინ კი კორუფციასთან ბრძოლის საერთაშორისო დღე იყო.

საქართველოში ადამიანის უფლებების დაცვის მთავარი მტერი დღეს კორუფცია და არაფორმალური მმართველობაა და როგორც შედეგი – გვაქვს უთანასწორობა სოციალური და საზოგადოებრივი ცხოვრების ყველა სფეროში, ელიტური ჯგუფების გამდიდრება ხალხის გაღარიბების ხარჯზე, კანონი კანონობს მხოლოდ ვიღაცისთვის, ვიღაცას კი დაუსჯელობის სრული უფლება აქვს.

ჩვენი მოქალაქეების უფლებების რეალურ და ქმედით დაცვას მაშინ შევძლებთ, როცა სახელმწიფო ერთი პარტიის ან ერთი კაცის ინტერესებზე კი არ იზრუნებს, არამედ მათზე, ვისაც ეს ყველაზე მეტად სჭირდება – რიგით მოქალაქეებზე.

მხოლოდ არაკორუმპირებული, სამართლიანი და პროგრესული საქართველო იქნება თითოეული ადამიანის უფლების ნამდვილი დამცველი და ქვეყანაში თანასწორი და სამართლიანი გარემოს გარანტი.

მანამდე კი კორუფციისგან მოქალაქის დაცვა ისევე, როგორც ადამიანის უფლებების დაცვა, მხოლოდ ილუზიაა“ .

მოლოდინი რა თქმა უნდა პოზიტიურია. ამას ყველა ლიდერის განცხადება ცხადყოფს, – ამის შესახებ დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ კანდიდატის სტატუსთან დაკავშირებით განაცხადა.

„რაც შეეხება ოპოზიციას, რომელიც ახლა ორბანს მიადგა, გარკვეული დისკუსია რომელიც ახლა არის უკრაინის გაწევრებასთან დაკავშირებით, სრულიად გამიჯნულია საქართველოს ევროპული პერსპექტივისგან და კანდიდატის სტატუსის მინიჭებისგან. შესაბამისად ოპოზიცია სასაცილო და სავალალო მდგომარეობაშია. არ იცის ამ ჩვენს პერსპექტივას როგორ უმტროს“, – განაცხადა ბექა ოდიშარიამ.