იმ ხალხის ნაწილი, რომელსაც „ნაცები“ არ მოსწონდა და ახლა „ნაცების“ ოპოზიციაში მიდის, ჩვენთან უნდა მოვიდეს, რადგან ჩვენც ვეძებთ ხალხს, – ამის შესახებ პარტია „გირჩის“ ლიდერმა იაგო ხვიჩიამ განაცხადსა.

ხვიჩიას თქმით, ნაწილი სხვადასხვა პარტიაში უნდა გადანაწილდეს.

„მეეჭვება, ნიკა მელია „ნაციონალური მოძრაობისთვის“ კონკურენტი იყოს, თუმცა ხმებს დააკარგვინებს ოპოზიციურ „ნაცმოძრაობასაც“ და ოპოზიციასაც. ამიტომ, მნიშვნელოვანია, რამენაირად „ნაცური“ ხმები ერთად მოგროვდეს „ნაცების“ ყულაბაში და ის ხალხი, რომელსაც „ნაცები“ არ მოსწონდათ და ამ მიზნით მიდიან ახლა „ნაცების“ ოპოზიციაში, ჩემი აზრით, ნაწილი ჩვენთან უნდა მოვიდეს, რადგან ჩვენც ვეძებთ ხალხს. ნაწილი სხვადასხვა პარტიაში უნდა გადანაწილდეს და ნაწილი უკან დაბრუნდეს „ნაცებში“, – განაცხადა იაგო ხვიჩიამ.

კითხვაზე, რა რესურსი ექნება ნიკა მელიას პარტიას, ხვიჩიამ აღნიშნა:

„არ მჯერა არცერთი პარტიის წარმატების, რომელსაც ჯერ არ უთქვამს, რა უნდა. შესაბამისად, მათზე პროგნოზირება –  წარმატებული იქნება თუ არა, შეუძლებელია“, – განაცხადა იაგო ხვიჩიამ.

სიურპრიზები თუ არ მოგვიწყო საქართველოს „ყველაზე დიდმა მეგობარმა“ ორბანმა, რომელიც სააკაშვილისა და ღარიბაშვილის საუკეთესო მეგობარია, ჩვენ კანდიდატის სტატუსი უკვე გვაქვს. სიურპრიზით შეიძლება, სტატუსის მინიჭება გადავადდეს, მაგრამ დროის დაკარგვის საშუალება არ გვაქვს, – ამის შესახებ პარტია „საქართველოსთვის“ წევრმა, ბექა ლილუაშვილმა განაცხადა.

ლილუაშვილის თქმით, არავის უნდა დაავიწყდეს, ქართველ ხალხს ქვეყნისთვის სტატუსის მინიჭების პროცესში რამდენად დიდი წვლილი აქვს.

„მათ დასაკარგი დრო არ აქვთ, რომ ხელისუფლების მიზანმიმართული თუ უნებლიე წაბორძიკების გამო ქვეყანამ ევროკავშირთან დაახლოების პერსპექტივა დაკარგოს. ხელისუფლებამ სამუშაო ჯგუფები უნდა შექმნას და სამუშაო ფორმატში საქმის კეთების ეტაპზე გადავიდეს“, – განაცხადა ბექა ლილუაშვილმა.

იმედი მაქვს, საქართველო კანდიდატის სტატუსს მიიღებს, თუმცა ორბანი უკრაინისთვის მოლაპარაკებების გახსნას თუ დაბლოკავს, მცირე შანსი არსებობს, რომ ევროკავშირის გაფართოება შეჩერდეს, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

დეკანოიძე იმედოვნებს, რომ საკითხზე კონსენსუსს მიაღწევენ.

„იმედია, ევროკავშირის ლიდერები იმ შანტაჟს არ დაექვემდებარებიან, რომელიც უნგრეთის ხელმძღვანელის მიერ არის წამოყენებული. ასეთი ულტიმატუმები იყო შარშანაც, როცა უკრაინამ და მოლდოვამ სტატუსი მიიღეს. ძალიან სამწუხაროა, მაგრამ ეს პოზიცია რუსეთის პოზიციას უახლოვდება. დიდი იმედი მაქვს, საქართველო კანდიდატის სტატუსს მიიღებს, თუმცა ორბანი უკრაინისთვის მოლაპარაკებების გახსნას თუ დაბლოკავს, მცირე შანსი არსებობს, რომ ევროკავშირის გაფართოება შეჩერდეს. ეს თუ მოხდება, შესაძლებელია, გაფართოების ტალღა იმ წერტილამდე გადაიდოს, როცა საბოლოო კონსენსუსი იქნება მიღწეული. მაინც ვფიქრობ, რომ კონსენსუსი შეიძლება იყოს მიღწეული, პოზიტიური მოლოდინი მაქვს. დიდი იმედი მაქვს, საქართველო სტატუსს მიიღებს, რადგან ეს არის საქართველოს მოქალაქეების ნების აღსრულება“, – განაცხადა ხატია დეკანოიძემ.

ვიდრე სირაქლემას პოზაში ვიქნებით, რუსეთი ასე გააგრძელებს – ადამიანის უფლებები რუსეთისთვის არაფერს ნიშნავს, ამიტომ მნიშვნელოვანია დამნაშავე არ დარჩეს დაუსჯელი, – ამის შესახებ ჟურნალისტებთან „სტრატეგია აღმაშენებლის“ დეპუტატმა პაატა მანჯგალაძემ გალში, სეპარატისტული რეჟიმის ე.წ. მილიციელის მიერ ცემის შედეგად საქართველოს მოქალაქის გარდაცვალებასთან დაკავშირებით განაცხადა.

როგორც მან აღნიშნა, მნიშვნელოვანია მსგავს ფაქტებს მოჰყვეს სამართლებრივი შედეგები და რუსეთმა პოლიტიკური ფასი გადაიხადოს.

„ძალიან მძიმე ფაქტია და სამწუხარო ტრაგედიაა, რომ ჩვენი მოქალაქეები დაუცველები არიან საოკუპაციო ხაზთან, საოკუპაციო ზონაში, რატომ? – არასდროს მოუწია პოლიტიკური და სამართლებრივი ფასის გადახდა, ყოველთვის დაუსჯელი დარჩა მტერი ნაცვლად იმისა, საქართველოს პარლამენტში ყოფილიყო რეზოლუცია მიღებული, როცა გინტური მოგვიკლეს ტაძარში ლოცვის გამო (ევროპარლამენტში განიხილეს და მხარი დაუჭირეს რეზოლუციას, მაგრამ საქართველოს პარლამენტმა დაბლოკა, სამწუხაროდ). ვიდრე ასე სირაქლემას პოზაში ვიქნებით, რუსეთი გააგრძელებს ამას. ადამიანის უფლებები რუსეთისთვის არაფერს ნიშნავს, მათ მხოლოდ ერთი არგუმენტის ესმით და ეს არის ის, რომ დამნაშავე არ დარჩეს დაუსჯელი,“ – განაცხადა მანჯგალაძემ.

გავრცელებული ინფორმაციით, ოკუპირებულ გალის რაიონში საქართველოს მოქალაქეს, თემურ კარბაიას, საოკუპაციო რეჟიმის ე.წ. მილიციის თანამშრომლებმა სიტყვიერი შეურაცხყოფა მიაყენეს და სცემეს. თემურ კარბაია საავადმყოფოში გადაყვანისთანავე გარდაიცვალა.

„ნაციონალურ მოძრაობას“ ქუთაისშიც ტოვებენ. პარტიის მანდატზე უარი საკრებულოს 12 დეპუტატიდან 7-მა დეპუტატმა განაცხადა.

როგორც მათ დღევანდელ ბრიფინგზე განმარტეს, „ნაციონალური მოძრაობის“ მოქმედმა თავმჯდომარემ პარტიაში არსებული კრიზისი კიდევ უფრო გაამწვავა და მათ ასეთ პირობებში პარტიაში დარჩენა აღარ სურთ. ისინი, სავარაუდოდ, ბრძოლას „ნაციონალური მოძრაობის“ ყოფილ თავმჯდომარე, ნიკა მელიასთან ერთად გააგრძელებენ.

ქუთაისში პარტია დატოვეს რაიონული ორგანიზაციის წევრებმაც.

„ერთიანი ნაციონალური მოძრაობა“ შეგნებულად დააყენეს კონფორმისტულ, სისტემურ, ფსევდოოპოზიციურ წარმონაქმნად გადაქცევის გზაზე. ამ მოცემულობიდან გამომდინარე, გვინდა განვაცხადოთ, რომ დღეიდან ოფიციალურად ვტოვებთ პარტიის რიგებს. სამშობლო და სახელმწიფო ყოველთვის უფრო გაცილებით მაღლა იდგება, ვიდრე ნებისმიერი პიროვნება ან პარტია. აქვე აღვნიშნავთ, რომ ბრძოლა პრორუსულ, არაფორმალურად მართულ არადემოკრატიულ ხელისუფლებასთან კვლავ გაგრძელდება, თუმცა, სხვა პლატფორმიდან“,-განაცხადეს „ნაციონალური მოძრაობის“ ყოფილმა წევრებმა.

ფინეთის საგარეო საქმეთა მინისტრის, ელინა ვალტონენის განცხადებით, ევროკავშირის გაფართოება დამსახურებაზე დაფუძნებული პროცესია.

აღნიშნულის შესახებ ელინა ვალტონენმა განაცხადა ბრიუსელში, სადაც ევროკავშირის საგარეო საქმეთა მინისტრთა საბჭოს სხდომა იმართება.

როგორც ელინა ვალტენონმა აღნიშნა, პოზიტიურად არიან განწყობილი საქართველოში რეფორმების გატარებაში პროგრესის გამო.

„ფინეთი ევროკავშირის გაფართოების მხარდამჭერია. ეს პროცესი დამსახურებაზეა დაფუძნებული. ჩვენ გვქონდა ძალიან კარგი დისკუსია საქართველოსთან და პოზიტიურად ვართ განწყობილი ბევრი რეფორმის გატარებაში პროგრესის ნიშნების მიმართ. დარწმუნებული ვარ, ჩვენ ვიპოვით კარგ პასუხს საქართველოსთვის“, – განაცხადა ელინა ვალტონენმა.