ეკონომიკური კეთილდღეობა და მშვიდობის შენარჩუნება არის ის ორი ძირითადი მაგისტრალი, რასაც მმართველი ძალის დეოკუპაციის პოლიტიკა ემყარება, – ამის შესახებ მედიასთან „ხალხის ძალის“ წევრმა, დეპუტატმა ეკა სეფაშვილმა განაცხადა.

მისი თქმით, ბიძინა ივანიშვილის პროგნოზი, რომ შესაძლოა საქართველომ 2030 წლისთვის ტერიტორიული მთლიანობა აღიდგინოს, სრულიად მოსალოდნელია, რომ გამართლდეს.

„შეგახსენებთ, 2015 წელს ბიძინა ივანიშვილმა, როცა ეკონომიკური ჯგუფის მიმართულებებს განსაზღვრავდა, თქვა, რომ 2030 წელს საქართველო მაღალშემოსავლიანი ქვეყანა გახდებოდა. სხვათა შორის, ეს საერთაშორისო სავალუტო ფონდისა და მსოფლიო ბანკის პროგნოზებით დამტკიცდა. ვუყურებთ საქართველოს შთამბეჭდავ, ეკონომიკურ ზრდას და, ამავდროულად, ჩვენი ოკუპირებული ტერიტორიების დაბრუნებისათვის მშვიდობიანი პოლიტიკა გვაქვს გამოცხადებული. ყველაფერს ამას თუ დავაჯამებთ, შეგვიძლია ვივარაუდოთ, რომ საქართველო ეკონომიკურად იმდენად მიმზიდველი გახდება პოლიტიკური სტაბილურობის, უსაფრთხოების, მშვიდობის დაცვის სფეროში, ასევე, კეთილდღეობის გაზრდისა და შენარჩუნების თვალსაზრისით, რომ ოკუპირებულ ტერიტორიაზე მცხოვრები მოსახლეობისთვისაც ძალიან მიმზიდველი იქნება ჩვენს სივრცეში დაბრუნება.

ასევე, რუსეთს, ამასთან დაკავშირებით, ალბათ, მოუწევს გარკვეულ კომპრომისზე წასვლა. ეკონომიკური კეთილდღეობა და მშვიდობის შენარჩუნება არის ის ორი ძირითადი მაგისტრალი, რასაც ჩვენი დეოკუპაციის პოლიტიკა ემყარება“, – განაცხადა სეფაშვილმა.

საქართველოს პრემიერ-მინისტრი ირაკლი ღარიბაშვილი ევროპის რეკონსტრუქციისა და განვითარების ბანკის(EBRD) პრეზიდენტ ოდილ რენო ბასოს შეხვდა, – ამის შესახებ ინფორმაციას მთავრობის ადმინისტრაცია ავრცელებს.

მათივე ინფორმაციით, შეხვედრაზე, რომელიც დავოსში მსოფლიო ეკონომიკური ფორუმის ფარგლებში გაიმართა, საქართველოსა და EBRD-ს შორის წარმატებული თანამშრომლობის ძირითადი მიმართულებები და ის პროექტები მიმოიხილეს, რომლებიც ევროპის რეკონსტრუქციისა და განვითარების ბანკის მხარდაჭერით ხორციელდება როგორც საჯარო, ისე კერძო სექტორში.

მთავრობის მეთაურმა ევროპის რეკონსტრუქციისა და განვითარების ბანკის პრეზიდენტს მხარდაჭერისთვის მადლობა გადაუხადა და აღნიშნა, რომ სტრატეგიული მიმართულებების დაფინანსების კუთხით EBRD-ის მხარდაჭერა მნიშვნელოვანი რეფორმების განხორციელების საშუალებას იძლევა.

ყურადღება გამახვილდა საქართველოსთვის ევროკავშირის წევრობის კანდიდატი ქვეყნის სტატუსის მინიჭების ისტორიულ გადაწყვეტილებაზე. პრემიერ-
მინისტრმა ევროინტეგრაციის გზაზე საქართველოს მიერ მიღწეულ პროგრესსა და სამომავლო გეგმებზე ისაუბრა.

ირაკლი ღარიბაშვილმა EBRD-ის პრეზიდენტს საქართველოს ეკონომიკაში მიმდინარე პოზიტიური ტენდენციები გააცნო და აღნიშნა, რომ რეგიონსა და მსოფლიოში არსებული რთული ვითარების მიუხედავად, საქართველო ინარჩუნებს სტაბილურად მზარდ ეკონომიკურ მაჩვენებლებს და მთავრობის ეფექტურმა პოლიტიკამ ბოლო 2 წლის განმავლობაში ქვეყანას ორნიშნა ეკონომიკური ზრდა მოუტანა.

ყურადღება ასევე გამახვილდა მსხვილ ინფრასტრუქტურულ პროექტებზე, რომლებზეც მთავრობის ეკონომიკური გუნდი აქტიურად მუშაობს.

შეხვედრაზე ირაკლი ღარიბაშვილმა და ოდილ რენო ბასომ განიხილეს თანამშრომლობის ახალი მიმართულებები და მომავალი თანამშრომლობის პერსპექტივები დასახეს.

მთავრობის მეთაურმა აღნიშნა, რომ ევროპის რეკონსტრუქციისა და განვითარების ბანკს საქართველოში დივერსიფიცირებული პორტფელი აქვს, რომელიც შეადგენს დაახლოებით 5 მილიარდ ევროს 289 პროექტში. ირაკლი ღარიბაშვილმა ოდილ რენო ბასოს ნაყოფიერი თანამშრომლობისთვის მადლობა გადაუხადა.

პოლიტიკური ორგანიზაცია უკვე ვართ. რაც შეეხება პოლიტიკურ პარტიას, ამასთან დაკავშირებით „ხალხის ძალაში“ კონსულტაციები მიმდინარეობს. ამ საკითხს განვიხილავთ, – ამის შესახებ მედიასთან „ხალხის ძალის“ ერთ-ერთმა ლიდერმა, დეპუტატმა გურამ მაჭარაშვილმა განაცხადა.

მისი თქმით, მოძრაობა ამა თუ იმ ფორმით არჩევნებში მონაწილეობას მიიღებს.

„მთავარია ის, რომ ახალი პოლიტიკა ჩამოვაყალიბეთ, რომლის ფორმირება აუცილებელი იყო და ამ პოლიტიკით, რასაც პროცესებში ხალხის აქტიური ჩართულობა ჰქვია, ამა თუ იმ ფორმით, არჩევნებში მონაწილეობას მივიღებთ.

„ხალხის ძალა“ რა მოცემულობითაც ვარსებობთ, ამ ფორმატმა უკვე შეძლო ის, რომ ქართულმა საზოგადოებამ დაინახა – ხალხი პოლიტიკაში ჩართულია და საგარეო პოლიტიკა მათი გადაწყვეტილებით იქმნება. ეს არის ყველაზე მთავარი, რაც „ხალხის ძალამ“ გააკეთა – ახალი პოლიტიკის ფორმირებით ხალხი აქტიურ პოლიტიკურ პროცესებში ჩავრთეთ.

აუცილებლად უნდა ითქვას ისიც, რომ ის ორგანიზაცია ვართ, რომელიც არა სამომავლო პოლიტიკური წარმატებისთვის, არამედ საკუთარი ქვეყნის გადარჩენისთვის შეიქმნა. „ქართული ოცნების“ რიგები იმიტომ კი არ დავტოვეთ, რომ აუცილებლად პარტია შეგვექმნა, არამედ იმიტომ, რომ რასაც „ოცნება“ ვერ ახერხებდა, რადგან ხელისუფლებაშია და მმართველი პარტიაა, ეს ჩვენ გაგვეკეთებინა. შემდეგ კი ბუნებრივად დადგა დღის წესრიგში ის საკითხი, რომ „ხალხის ძალა“, რომელიც პოლიტიკური ჯგუფია პარლამენტში, იქნება თუ არა როგორც პოლიტიკური პარტია.

რაც შეეხება იმას, გადავლახავთ თუ არა საარჩევნო ბარიერს, დარწმუნებულები ვართ იმაში, რომ საქართველოს საზოგადოების უმრავლესობა იმ პოლიტიკას ემხრობა, რაც „ხალხის ძალამ“ შექმნა. რომ არა „ხალხის ძალის“ მიერ გატარებული პოლიტიკა, ქვეყანაში ის სამწუხარო მოვლენები იქნებოდა, რასაც სხვაგან ვხედავთ.

კონსულტაციები გვაქვს და გვექნება ხალხთან, რომელსაც აქვს ძალა“, – განაცხადა გურამ მაჭარაშვილმა.

საქართველოს საგარეო საქმეთა მინისტრმა, ილია დარჩიაშვილმა დავოსის მსოფლიო ეკონომიკური ფორუმის ფარგლებში ირანის ისლამური რესპუბლიკის საგარეო საქმეთა მინისტრთან, ჰოსეინ ამირ-აბდოლაჰიანთან გაცნობითი ხასიათის შეხვედრა გამართა. ამის შესახებ ინფორმაცას საქართველოს საგარეო საქმეთა სამინისტრო ავრცელებს.

მათივე ცნობით, შეხვედრაზე ხაზი გაესვა საქართველოსა და ირანს შორის წლების მანძილზე ჩამოყალიბებულ კეთილმეზობლურ ურთიერთობებს.

„მინისტრებმა მიმოიხილეს ორმხრივ ურთიერთობებთან დაკავშირებული საკითხები, მათ შორის ქვეყნებს შორის სავაჭრო-ეკონომიკური კავშირებს, ხალხთაშორისი კონტაქტების გააქტიურებისა და კულტურის, განათლებისა და ტურიზმის სფეროში თანამშრომლობის პოზიტიურ პოტენციალი.

საუბარი ასევე შეეხო რეგიონში არსებულ ვითარებას და გამოწვევებს. ყურადღება გამახვილდა რეგიონის მდგრადი და სტაბილური განვითარების აუცილებლობაზე“, – ნათქვამია ინფორმაციაში.

დავოსის ეკონომიკურ ფორუმზე წელს ჩინეთის დელეგაცია უმაღლეს დონეზეა წარმოდგენილი, პრემიერ-მინისტრის ხელმძღვანელობით. ეს ხაზს უსვამს, რომ მსოფლიოს სჭირდება მეტი თანამშრომლობა გლობალური გამოწვევების დასაძლევად და მათ დაძლევაზე საუბარი ჩინეთის მონაწილეობის გარეშე შეუძლებელია, – განაცხადა ვიცე-პრემიერმა ლევან დავითაშვილმა მიმდინარე ფორუმის მთავარი ტენდენციების შესახებ საუბრისას.

როგორც ეკონომიკისა და მდგრადი განვითარების მინისტრი აღნიშნავს, დავოსის მსოფლიო ეკონომიკური ფორუმი წამყვანი პლატფორმაა, სადაც წლის დასაწყისში ბიზნესის და პოლიტიკური ლიდერები ხვდებიან ერთმანეთს და სადაც, ფაქტობრივად, ხდება მსოფლიოში არსებული სიტუაციის სტატუსის შეფასება. ამასთან, საერთაშორისო დღის წესრიგის განსაზღვრაში ფორუმი ძალიან მნიშვნელოვან როლს ასრულებს.

„ეს არ არის გადაწყვეტილების პლატფორმა, მაგრამ ეს არის ძალიან მნიშვნელოვანი პლატფორმა, სადაც ტენდენციები იკვეთება. ერთ-ერთი ასეთი ტენდენცია ისიცაა, რომ დღეს მსოფლიოს მეორე და ერთ-ერთი წამყვანი ეკონომიკის, ჩინეთის ლიდერი მონაწილეობს ფორუმში. პანდემიის შემდეგ ეს არის პირველი დავოსი, სადაც ჩინეთის ძალიან დიდი წარმომადგენლობაა, ასეთი ბოლო წლების განმავლობაში, 2020 წლის შემდეგ არ ყოფილა“, – აღნიშნავს ეკონომიკის მინისტრი.

ამასთან, როგორც ლევან დავითაშვილი აღნიშნავს, გამოწვევებთან ერთად მსოფლიოში უამრავი შესაძლებლობებია, ისინი ქვეყნებმა შეიძლება მხოლოდ თანამშრომლობით გამოიყენონ და საქართველო სწორედ ამ ტენდენციის ნაწილია. მისი თქმით, საქართველოს ხელისუფლების მიერ სწორად იქნა შეფასებული ვითარება, როდესაც ძალიან პერსპექტიულ ეკონომიკურ თანამშრომლობაზე დაიწყო ჩინეთთან საუბარი. ვიცე-პრემიერი ხაზს უსვამს, რომ ჩინეთი საქართველოს სტრატეგიული პარტნიორია და ქვეყნებს შორის დიალოგი მიმდინარეობს ძალიან მნიშვნელოვანი, სტრატეგიული პროექტების განხორციელებაზე – სადაც ჩინურ ბიზნესს შეიძლება მნიშვნელოვანი როლი ჰქონდეს და ეს ძალიან პერსპექტიული იყოს საქართველოს ეკონომიკისთვის.

„ამას ხედავ დასავლური სამყაროც – დღეს წამყვანი ბიზნეს და პოლიტიკური ლიდერები საუბრობენ იმაზე, რომ ჩინეთთან თანამშრომლობას ძალიან დიდი შესაძლებლობები აქვს. გამოწვევების დაძლევა მხოლოდ თანამშრომლობით შეიძლება – ასე რომ, ეს არის დავოსის დღევანდელი მთავარი თემა“, – აღნიშნავს ლევან დავითაშვილი.