ირლანდიას აქვს კარგი პრაქტიკა, შეურაცხმყოფელი სიტყვების ჩამონათვალი, რომელიც არ უნდა გამოიყენონ პარლამენტის მუშაობისას. ჩვენთან ყველაზე მეტად გვესმის რუსების ძახილი – ირლანდიური გამოცდილება უნდა შევისწავლოთ, – ამის შესახებ ჟურნალისტებთან საპარლამენტო უმრავლესობის წევრმა მარიამ ლაშხმა განაცხადა.

მისი თქმით, დაუწერელ ეთიკის ნორმებს ოპოზიცია არ იცავს, ამიტომ “კარგი იქნება, თუ ეს გაიწერება და პოლიტიკოსები შეურაცხმყოფელ გადაძახილებს არ გააკეთებენ არგუმენტების გარეშე”.

კითხვაზე, ვინ უნდა შეაფასოს, რამდენად წონადია არგუმენტი, ლაშხი ამბობს, რომ ამ ეტაპზე ირლანდიის მაგალითი კარგი პრაქტიკის მაგალითად მოჰყავს, რომელიც ჯერ უნდა შეისწავლონ.

“ირლანდიის პარლამენტს აქვს ძალიან კარგი პრაქტიკა, ეთიკის კოდექსი, რომელსაც არამხოლოდ დეპუტატები, პარლამენტის თანამშრომლებიც აწერენ ხელს, რაც გულისხმობს შეურაცხმყოფელი სიტყვების ჩამონათვალს, რომელიც არ უნდა იხმარონ პარლამენტის მუშაობის დროს. ეს ამცირებს პოლარიზებას და შინაარსობრივ განხილვას უწყობს ხელს. ჩვენს შემთხვევაში რომ წარმოვიდგინოთ ერთმანეთის მიმართ გადაძახილები, ყველაზე მეტად გვესმის “რუსების” ძახილი, “რუსული კანონი”. პოლიტიკოსებს აქვთ პოლიტიკური ვალდებულება, ნებისმიერ სიტყვას ჰქონდეს არგუმენტირებული დასაბუთება. როცა არის შეურაცხმყოფელი გადაძახილები დაუსაბუთებლად, კარგი იქნება თუ ამის ნაცვლად არგუმენტირებული მსჯელობა იქნება. ეს არ არის რეგულირებადი საქართველოში და ზღვარი არის სიტყვის თავისუფლებას, შეურაცხყოფას და ელემენტარულ ეთიკას შორის. დაუწერელი კანონია ის, რომ პოლიტიკოსის ვალდებულებაა, ნებისმიერ გადაძახილს ჰქონდეს არგუმენტები, თუმცა პრაქტიკაში ამის განხორციელება არ ხდება. ეს იყო გაზიარებული პრაქტიკა ირლანდიის პარლამენტის მხრიდან. ჯერ ეს ინიციატივა არ არის და უნდა შევისწავლოთ მათი გამოცდილება. ამან იმუშავა ირლანდიის პარლამენტში და კარგი იქნება ჩვენც გვქონდეს არა დაუწერელი ეთიკის ნორმები, რომელსაც არ ასრულებს ოპოზიცია, არამედ გვქონდეს დაწერილი. გამოხატვის თავისუფლებასა და უსაფუძვლო შეურაცხყოფებს შორის არსებობს ზღვარი, კარგი იქნება თუ ეს დარეგულირდებოდა,” – განაცხადა ლაშხმა.

უახლოეს რამდენიმე კვირაში „ნაციონალური მოძრაობის“ მხრიდან იქნება კონკრეტული სიახლეები ამ მიმართულებით, საჯაროდ ეცოდინება საზოგადოებას, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა ოპოზიციასთან ერთობაზე საუბარისას განაცხადა.

ხაბეიშვილის თქმით, „ნაციონალური მოძრაობა“ მზად არის, ითანამშრომლოს პროდასავლურ პარტიებთან.

„მოვუწოდებ პარტიებს, პროდასავლურს, ვისაც არ სურს „ნაციონალურ მოძრაობასთან“ თანამშრომლობა, მესმის მათი, მივესალმები მათი მხრიდან ძლიერი კოალიციის ჩამოყალიბებას. შესაბამისად, როცა ჩვენ მიერ დახმარებაზეა საუბარი, არ დაგვავიწყდეს, „ნაციონალურ მოძრაობას“ აქვს ყველაზე მყარი ინფრასტრუქტურა და იმ ერთობებს, რომელსაც გააკეთებს დარჩენილი ოპოზიცია, ხმების დაცვის მიმართულებით, მაგალითად, მიუხედავად მათი დამოკიდებულებებისა და კომენტარებისა, ჩვენ ნებისმიერ დროს მზად ვართ, ვითანამშრომლოთ ყველასთან, ვინც წინააღმდეგია რუსული პარტიის საქართველოში. „ნაციონალურ მოძრაობაში“ იქნება ძალიან ბევრი სიახლე, მათ შორის გამსხვილებასთან დაკავშირებით, ერთობასთან, ახალ ადამიანებთან დაკავშირებით. დაველოდოთ მოვლენების განვითარებას, უახლოეს კვირებში გეცოდინებათ“, – განაცხადა ხაბეიშვილმა.

გარე ძალები კარნახობენ პრეზიდენტს, მიიღოს ისეთი გადაწყვეტილებები, რომლებიც არ შედის სახელმწიფოს ინტერესებში, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

ირაკლი კობახიძემ კომენტარი გააკეთა „საარჩევნო კოდექსში“ ცვლილებებზე პრეზიდენტ სალომე ზურაბიშვილის ვეტოსთან დაკავშირებით.

კობახიძის თქმით, ეროვნული ინტერესების შესაბამისად უნდა იმოქმედონ და ცესკო-ში ხელოვნურად ინსტიტუციური კრიზისის შექმნის საშუალება არავის უნდა მისცენ.

„არ ვიცი, კონკრეტული ადამიანების ინტერესებში რატომ არის, რომ ხელოვნურდ შეიქმნას ინსტიტუციური კრიზისი ცესკო-ში. ამაზე საზოგადოებამ უნდა იმსჯელოს. ეს მიზანი ჩაიდო თავის დროზე 19 აპრილის შეთანხმებაში, პირველ ვერსიაში კიდევ უფრო მძაფრად. ამ მიზანს ემსახურება პრეზიდენტის ვეტოც. ვინც უკარნახა პრეზიდენტს, რომ ასეთი ვეტო დაედო კანონზე, მას უნდა ჰკითხოთ, რა ინტერესი ამოძრავებს მას. ჩვენ ვფიქრობთ, რომ ეს არის, რასაც ჩვენ ვეძახით „გლობალურ ომის პარტიას“. ეს გარე ძალები კარნახობენ პრეზიდენტს, რომ მიიღოს ისეთი გადაწყვეტილებები, რომლებიც არ შედის სახელმწიფოს ინტერესებში. ჩვენ უნდა ვიმოქმედოთ ეროვნული ინტერესების შესაბამისად და არავის მივცეთ ცესკო-ში ხელოვნურად ინსტიტუციური კრიზისის შექმნის საშუალება“, – განაცხადა ირაკლი კობახიძემ.

საქართველოს პრეზიდენტმა, სალომე ზურაბიშვილმა „საარჩევნო კოდექსში“ მიღებულ ცვლილებებს ვეტო დაადო. პრეზიდენტი პარლამენტს სთავაზობს, ცესკო-ს თავმჯდომარისა და წევრების არჩევა მოხდეს არანაკლებ 90 ხმით.

„ქართული ოცნების“ ლიდერების განცხადებები პირდაპირ წამახალისებელია ძალადობრივი აქტების – ეს ქმნის ძალიან დიდ საფრთხეს, რომ შეიძლება ეს ყველაფერი გადაიზარდოს სამოქალაქო დაპირისპირებაში, – ამის შესახებ პარტია „ლელოს“ ერთ-ერთმა ლიდერმა, ბადრი ჯაფარიძემ ჟურნალისტებთან საუბრისას განაცხადა, რითაც გუშინ „ფორმულას“ ერთ-ერთ დამფუძნებელზე, მიშა მშვილდაძეზე და „ერთიანი ნაციონალური მოძრაობის“ სამეურნეო განყოფილების თანამშრომლის მიმართ განხორციელებულ ფიზიკურ თავდასხმასთან დაკავშირებით დასმულ კითხვას უპასუხა.

ჯაფარიძის თქმით, ყოველი ასეთი ქმედება საზოგადოების მხრიდან „ქართული ოცნებისთვის“ უკუშედეგს გამოიწვევს და აღნიშნავს, რომ ძალადობა ვერასოდეს გახდება ხელისუფლების შენარჩუნების საფუძველი ამ ქვეყანაში.

„ქართული ოცნების“ ლიდერების განცხადებები პირდაპირ წამახალისებელია ძალადობრივი აქტების. თვითონაც შეურაცხმყოფელ, აღვირახსნილ ტერმინოლოგიას იყენებენ ოპონენტების გასალანძღად, მათ დასამცირებლად. ეს ქმნის ძალიან დიდ საფრთხეს, რომ შეიძლება ეს ყველაფერი გადაიზარდოს სამოქალაქო დაპირისპირებაში, ამიტომ ჩვენ ყველანი წინ უნდა აღვუდგეთ „ქართული ოცნების“ ქვეყნის წინააღმდეგ მიმართულ მცდელობებს, რომ დათესოს ძალადობრივი ქმედებები, შეუწყნარებლობა განსხვავებული აზრის მიმართ. ამას ჩვენ უნდა დავუპირისპიროთ საზოგადოების ერთიანობა, საზოგადოების მობილიზაცია და ყველა, თითოეული ფაქტი უნდა ვამხილოთ, მაქსიმალურად გამოვიტანოთ სააშკარაოზე. ინფორმირებული უნდა იყოს ჩვენი საზოგადოება, ჩვენი მეგობრები. სამწუხაროდ, როგორც ჩანს, იმ დარჩენილ პერიოდში არჩევნებამდე, სანამ „ქართული ოცნება“ არის ხელისუფლებაში, მათ მხრიდან იქნება ეს მცდელობები საზოგადოების დაშინების, განსხვავებული აზრის გამო ადამიანების დევნის, მაგრამ ყველა ასეთი ქმედება „ქართული ონების“ მიერ და მის მიერ წახალისებული ძალადობრივი ჯგუფების მიერ, აუცილებლად გამოიწვევს პირიქით რეაქციას – სრულ წინააღმდეგობას საზოგადოების მხრიდან და მოიტანს უკუშედეგს „ქართული ოცნებისთვის“. ეს არის ცალსახა, იმიტომ, რომ ძალადობა ვერასოდეს ვერ გახდება ხელისუფლების შენარჩუნების საფუძველი ამ ქვეყანაში,“ – განაცხადა ბადრი ჯაფარიძემ.

არ ვიცი, პარტნიორების ხელში რა მტკიცებულებები არსებობს და რისთვის არიან ჩამოსული, დასასანქცირებლად თუ იმის სათქმელად, რომ ასე გაგრძელება არ შეიძლება, თორემ დაგასანქცირებთო, – ამის შესახებ „გირჩის“ ლიდერმა, იაგო ხვიჩიამ ო’სალივანის, ჯეიმს ო’ბრაიენისა და კუმარ აიერის საქართველოში ვიზიტზე საუბრისას განაცხადა.

მისივე თქმით, უნდა დაელოდონ, რას იტყვიან პრესკონფერენციაზე.

„ქართული ოცნება“ ყველაფერს აკეთებს იმისთვის, რომ დაასანქცირონ, ფაქტობრივად ჩვენს პარტნიორებს იწვევს. რისკი არსებობს, მაგრამ არ ვიცი, ეს პროცესი როგორ დასრულდება. არ ვიცი, პარტნიორების ხელში რა მტკიცებულებები არსებობს და რისთვის არიან ჩამოსული, დასასანქცირებლად თუ იმის სათქმელად, რომ ასე გაგრძელება არ შეიძლება, თორემ დაგასანქცირებთო. დიდი დრო არ დაგვრჩენია, დაველოდოთ პრესკონფერენციას“, – განაცხადა იაგო ხვიჩიამ.