15 წელი, 2008 წლის აგვისტოში აფხაზეთისა და ცხინვალის რეგიონების ოკუპაცია მოხდა, – განაცხადა სამეზობლო პოლიტიკისა და გაფართოების საკითხებში ევროკომისარმა, ოლივერ ვარჰეიმ.

„მას შემდეგ საქართველო ოკუპირებულ რეგიონებში რუსეთის მძიმე სამხედრო ყოფნის საფრთხის ქვეშ ცხოვრობს. ჩვენ მხარს ვუჭერთ საქართველოს დამოუკიდებლობასა და ტერიტორიულ მთლიანობას და მოვუწოდებთ რუსეთს, შეასრულოს თავისი საერთაშორისო ვალდებულებები“, – აღნიშნა ევროკომისარმა.

15 წლის წინ რუსეთის ფედერაცია საქართველოში შეიჭრა. ეს არ იყო მხოლოდ რეგიონალური კონფლიქტი – როგორც ზოგიერთს სურდა მისი აღწერა – არამედ მოვლენა, რომელმაც გავლენა მოახდინა გლობალურ უსაფრთხოებაზე, – ამის შესახებ ევროპარლამენტარი ანა ფოტიგა “ტვიტერზე” წერს.

მისი თქმით, ეს იყო პოსტკომუნისტური რუსეთის სამხედრო აგრესიის პირველი პირდაპირი აქტი დამოუკიდებელი სახელმწიფოს წინააღმდეგ.

“ეს იყო საქართველოს დამოუკიდებლობის, რეგიონის ერთიანობისა და წესებზე დამყარებული საერთაშორისო წესრიგის სანდოობის ტესტი”, – წერს ევროპარლამენტარი.

მისი თქმით, საქართველომ ეს გამოცდა ჩააბარა მამაცი ჯარისკაცების, ხელისუფლებისა და ხალხის დამსახურებით.

“საქართველომ ეს გამოცდა მამაცი ჯარისკაცებითა და კომპეტენტური ხელისუფლებით ჩააბარა, ასევე თავისი ხალხით, რომელიც მზად იყვნენ დაეცვათ საკუთარი ქვეყანა. ჩემმა რეგიონმა, ცენტრალურმა და აღმოსავლეთმა ევროპამ, პოლონეთის, უკრაინის, ლიეტუვის, ლატვიისა და ესტონეთის ლიდერების თბილისში ერთობლივი ჩასვლით, გამოავლინა სოლიდარობა და აჩვენა მთელ მსოფლიოს, რომ ჩვენ არ გვეშინია რუსეთის და რომ ჩვენ მზად ვართ საკუთარი სიცოცხლეც კი რისკის ქვეშ დავაყენოთ იმისთვის, რომ ამ შემოჭრასა და რუსული იმპერიალიზმის აღდგენას დავუპირისპირდეთ. მესამე ფაქტორი, რომელმაც რუსული ტანკების თბილისში შემოსვლა შეაჩერა, შეერთებული შტატების გადამწყვეტი ქმედება, მათ შორის არაპირდაპირი სამხედრო ხასიათის ქმედებაა”, – აღნიშნულია ევროპარლამენტარის განცხადებაში.

მისი თქმით, უკრაინის გამარჯვება არის ერთადერთი გზა იმის უზრუნველსაყოფად, რომ ევროპა მთლიანი და თავისუფალი იყოს.

“დარწმუნებული ვარ, რომ ევროპის ჩვენს ნაწილში ნაცრისფერი ზონები არ შეიძლება არსებობდეს. უკრაინის გამარჯვება არის ერთადერთი გზა იმის უზრუნველსაყოფად, რომ ევროპა იყოს მთლიანი, თავისუფალი და მშვიდობიანი და საქართველო, მის საერთაშორისოდ აღიარებულ საზღვრებში, ამ ხედვის განუყოფელი ნაწილია”, – წერს ევროპარლამენტარი.

ჩვენ თუ დამოუკიდებლობა, სახელმწიფო ნამდვილად გვინდა, უნდა მოვიდეთ გონს, დავინახოთ, სად არის ჩვენი საერთო საფრთხე, ერთად ვებრძოლოთ საერთო მტერს და არა ერთმანეთს, – ამის შესახებ საქართველოს პრეზიდენტმა, სალომე ზურაბიშვილმა მუხათგვერდის ძმათა სასაფლაოსთან ჟურნალისტებს განუცხადა, სადაც ცოტა ხნის წინ 2008 წლის აგვისტოს ომში დაღუპულების ხსოვნას პატივი მიაგო.

„ახლა მოვდივარ სვეტიცხოვლიდან, სადაც პანაშვიდი გადაიხადეს რაჭაში გარდაცვლილი ადამიანებისთვის. რომლებიც ჯერ შეიძლება, კიდევ ცოცხალია და შეიძლება, დაუბრუნდნენ თავიანთ ოჯახებს, მათთვის ილოცეს. ამავდროულად, ილოცეს 2008 წლის ომში საქართველოსთვის დაღუპულთათვის.

ამ ორ ტრაგედიაში, რომელიც ორივე აგვისტოში მოხდა, შეიძლება, ბოლომდე თანხვედრა არ არის. ჩვენ გვებრძვის მტერი, ხან ომით და ხან რბილი ძალით, რომელიც ამ ბოლო დროს ძალიან ჩანს და რომელსაც სჭირდება ჩვენი ერთიანობა, ასევე განრისხებული ბუნებაც გვებრძვის, რომლის წინაშეც გვჭირდება გაერთიანება.

ისეთი განცხადებები ისმის, თუ სოციალურ ქსელში დაწერილი, თუ წამოძახილი, რაც დღეს ჩემთვის მიუღებელია. მე დარწმუნებული ვარ, ეს ყველაფერი მიუღებელია ქართველისთვის და საქართველოსთვის. ჩვენ თუ გვინდა დამოუკიდებლობა, რისთვისაც იბრძოდნენ ის ადამიანები, რომლებიც აქ განისვენებენ, ჩვენ თუ ეს დამოუკიდებლობა ნამდვილად გვინდა, თუ სახელმწიფო გვინდა, უნდა მოვიდეთ გონს, დავინახოთ, სად არის ჩვენი საერთო საფრთხე და ერთად ვებრძოლოთ საერთო მტერს და არა ერთმანეთს“, – განაცხადა სალომე ზურაბიშვილმა.

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი 2008 წლის რუსეთ-საქართველოს ომის მე-15 წლისთავთან დაკავშირებით განცხადებას ავრცელებს.

როგორც განცხადებაშია აღნიშნული, უსაფრთხოების კუთხით რეგიონში შექმნილი უმძიმესი მდგომარეობისა და არსებული გამოწვევების ფონზე, საქართველოს მთავრობის უმთავრეს მიზანს წარმოადგენს კონფლიქტის მშვიდობიანი გზით მოგვარება, რასაც ალტერნატივა არ გააჩნია.

„15 წელი სრულდება მას შემდეგ, რაც რუსეთის ფედერაციამ ფართომასშტაბიანი სამხედრო აგრესია განახორციელა საქართველოს წინააღმდეგ და ძალის გამოყენებით, დაარღვია სუვერენული სახელმწიფოს საერთაშორისოდ აღიარებული საზღვრები და ტერიტორიული მთლიანობა, რასაც მოყვა საქართველოს განუყოფელი ტერიტორიების – აფხაზეთისა და ცხინვალის რეგიონების უკანონო ოკუპაცია.

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი პატივს მიაგებს 2008 წლის რუსეთ-საქართველოს ომში, საქართველოს დამოუკიდებლობისა და ტერიტორიული მთლიანობისთვის ბრძოლაში დაღუპული გმირების, მებრძოლებისა და სამოქალაქო პირების ხსოვნას და თანაგრძნობას უცხადებს მათ ოჯახებს, ახლობლებსა და სრულიად საქართველოს.

საერთაშორისო სამართლის ძირითადი პრინციპებისა და 2008 წლის 12 აგვისტოს ცეცხლის შეწყვეტის შეთანხმების უხეში დარღვევით, რუსეთი დღემდე განაგრძობს საქართველოს რეგიონების ოკუპაციას, აფხაზეთისა და ცხინვალის რეგიონებში თავისი უკანონო კონტროლის გაძლიერებას, საერთო სოციალური და ეკონომიკური სივრცის შექმნის პროცესის გაფართოებას და ადგილზე მცხოვრები მოსახლეობის ფუნდამენტური უფლებების უხეშ, სისტემატურ დარღვევას, რაც მათ შორის გამოიხატება ეთნიკური დისკრიმინაციით, გამყოფი ხაზების გასწვრივ მავთულხლართებისა და სხვა ხელოვნური ბარიერების აღმართვის პროცესით, თავისუფალ გადაადგილებაზე დაწესებული მკაცრი შეზღუდვებით, უკანონო დაკავებებით, მშობლიურ ენაზე განათლების მიღების აკრძალვით, საკუთრებაზე, სამედიცინო დახმარებასა და საარსებო წყაროებზე წვდომის შეზღუდვით. ამასთან, შემაშფოთებელია ოკუპირებული რეგიონებისა და ადგილობრივი მოსახლეობის შემდგომი ხელოვნური იზოლაციისკენ მიმართული ქმედებები, რაც სხვა მიზნებთან ერთად, ხალხთაშორისი მზარდი კავშირებისა და შერიგების პროცესის ხელშეშლას ემსახურება.

კვლავ დაუსჯელნი რჩებიან საქართველოს მოქალაქეების – დავით ბაშარულის, გიგა ოთხოზორიას, არჩილ ტატუნაშვილისა და ირაკლი კვარაცხელიას სიცოცხლის ხელყოფაში მონაწილე და პასუხისმგებელი პირები. ეთნიკური წმენდის რამდენიმე ტალღის შედეგად, ასობით ათასი ლტოლვილი და იძულებით გადაადგილებული პირი დღემდე მოკლებულია საკუთარ სახლში უსაფრთხოდ და ღირსეულად დაბრუნების უფლებას.

საქართველოს მთავრობის ძალისხმევის მიუხედავად, ევროკავშირის სადამკვირვებლო მისიას საოკუპაციო ძალის მიერ კვლავ არ ეძლევა საკუთარი მანდატის სრულყოფილი შესრულებისა და ოკუპირებულ რეგიონებში მონიტორინგის განხორციელების შესაძლებლობა.

საერთაშორისო სასამართლოების არაერთი გადაწყვეტილების შესაბამისად, აფხაზეთისა და ცხინვალის რეგიონებში არსებულ ვითარებასა და განხორციელებულ უკანონო ქმედებებზე სრული პასუხისმგებლობა ეკისრება რუსეთის ფედერაციას.

საქართველოს მთავრობა, მის ხელთ არსებული ყველა ბერკეტის გამოყენებითა და საერთაშორისო პარტნიორებთან კოორდინირებული, ინტენსიური თანამშრომლობით, განაგრძობს ძალისხმევას ოკუპაციის მძიმე შედეგებთან გამკლავების მიზნით, საქართველოს მოქალაქეების სიცოცხლის ხელყოფაში მონაწილე პირების პასუხისგებაში მიცემის, დევნილთა უსაფრთხო და ღირსეული დაბრუნებისთვის შესაბამისი პირობების შექმნის, უკანონო პატიმრობაში მყოფი პირების გათავისუფლებისა და ოკუპირებულ რეგიონებში მცხოვრები მოსახლეობის სხვა ფუნდამენტური უფლებების დაცვის ჩათვლით.

უსაფრთხოების კუთხით რეგიონში შექმნილი უმძიმესი მდგომარეობისა და არსებული გამოწვევების ფონზე, საქართველოს მთავრობის უმთავრეს მიზანს წარმოადგენს კონფლიქტის მშვიდობიანი გზით მოგვარება, რასაც ალტერნატივა არ გააჩნია. საქართველოს ხელისუფლება მოწოდებულია, აფხაზეთისა და ცხინვალის რეგიონების მაცხოვრებლებს შეუქმნას სტაბილურ, მშვიდობიან და განვითარებულ საქართველოში ცხოვრებისთვის ხელსაყრელი პირობები. სწორედ ამიტომ, ოკუპირებულ რეგიონებზე შეზღუდული წვდომის პირობებშიც კი, საქართველოს მთავრობა მტკიცედ და განუხრელად აგრძელებს სამშვიდობო პოლიტიკის გატარებას, რაც, დეოკუპაციასთან ერთად, მიმართულია ხელოვნურად გაყოფილი საზოგადოების წევრებს შორის დეპოლიტიზირებული დიალოგის გაფართოებისა და ნდობის მშენებლობისკენ, ასევე, კონფლიქტით დაზარალებულ მოსახლეობაზე ზრუნვისა და მათთვის უკეთესი მომავლის პერსპექტივების შეთავაზებისკენ, მათ შორის, საქართველოს ევროინტეგრაციის პროცესის კონტექსტში. შერიგებისა და ჩართულობის პოლიტიკის მიზნების მისაღწევად, საქართველოს მთავრობა ხელმძღვანელობს მხოლოდ დეპოლიტიზებული, სტატუს-ნეიტრალური და ჰუმანიტარული მიდგომით, რომლის მთავარი ღირებულება არის ადამიანი, მისი ღირსება და კეთილდღეობა.

სამშვიდობო პროცესში უაღრესად მნიშვნელოვანია საერთაშორისო თანამეგობრობის მხრიდან პრინციპული და კონსოლიდირებული მხარდაჭერის გაგრძელება, ოკუპირებულ რეგიონებში მცხოვრები მოსახლეობის ფუნდამენტური უფლებების დაცვის, ხელოვნური იზოლაციისკენ მიმართული ქმედებების აღკვეთისა და ხალხთაშორისი დიალოგის ხელშეწყობის მიზნით. სახელმწიფო მინისტრის აპარატი ეხმიანება და უაღრესად მნიშვნელოვნად აფასებს საერთაშორისო თანამეგობრობის ურყევ მხარდაჭერას საერთაშორისოდ აღიარებულ საზღვრებში საქართველოს სუვერენიტეტისა და ტერიტორიული მთლიანობის მიმართ და საერთაშორისო პარტნიორების წვლილს კონფლიქტის მშვიდობიანი მოგვარების, მათ შორის შერიგებისა და ნდობის აღდგენის პროცესში”, – ნათქვამია განცხადებაში.

არსებობს ბუნებრივი კატაკლიზმები, რომლის პრევენცია და წინასწარი გაფრთხილება შეუძლებელია – ამაზე მეტი კომენტარი მე არ გამაჩნია, კითხვები დაუსვით მას, ვისაც მეტი ცოდნა და გამოცდილება აქვს , – ეს განცხადება ჟურნალისტებთან პარლამენტის პირველმა ვიცე-სპიკერმა გია ვოლსკიმ, შოვის ტრაგედიასთან დაკავშირებით დასმული კითხვის პასუხად გააკეთა.

როგორც მან აღინიშნა, დღეს გლოვის დღეა და იმ ადამიანების მდგომარეობა არ უნდა დავამძიმოთ, ვინც ოჯახის წევრები და ახლობლები დაკარგა.

ვოლსკის თქმით, “ძალიან ცუდია, როცა ვინმეს გლოვის დღეს პოლიტიკურად ანგაჟირებული განცხადებების კეთების სურვილი რჩება”.

“ყველა ექსპერტად გადაიქცა. ადრეული გაფრთხილების სისტემაზე ყველას სხვადასხვა წარმოდგენა აქვს. ამ თემაზე ექსპერტებმა უნდა ილაპარაკონ. არსებობს სტიქიური უბედურების მოვლენა, ის რაც საქართველოს თავს დაატყდა, რა დროსაც ადრეული გაფრთხილების სისტემა არ არის შესაძლებელი. ის თუ რამდენად ეხება ეს იმ თემას, რამაც გლოვის დღე დაგვიყენა, ამასთან დაკავშირებით ექსპერტებს ესაუბრეთ. არ მგონია, ექსპერტები იყვნენ ადამიანები, ვინც გარკვეული პოლიტიკური მოსაზრებებით გარკვეულ თემებზე დგანან და ფეხს არ იცვლიან.

არაერთხელ აგიხსნეს ყველას, რომ ისეთი კატაკლიზმური მოვლენები არსებობს, რომლის წინასწარი პრევენცია შეუძლებელია – არ მიმაჩნია, რომ მე ამ საკითხზე პოლიტიკური განცხადებები უნდა ვაკეთო და კითხვები დაუსვით მას, ვისაც მეტი გამოცდილება და ცოდნა აქვს.

არსებობს მორალის სტანდარტი, ფორმა, რომელიც ჩვენს საზოგადოებას უნდა ახასიათებდეს, ისევე როგორც ევროპული ქვეყნების საზოგადოებებს, სადაც ძალიან დიდი მასშტაბის ბუნებრივი კატაკლიზმები მოხდა, ადამიანები დაიღუპნენ, ინფრასტრუქტურა დაინგრა, მაგრამ არსად არ მახსოვს, რომ ხელისუფლებაზე ასე ორგანიზებულად, ორკესტრირებულად ოპოზიციურ-პარტიული შეტევა ყოფილიყოს – მეგონა, რომ არსებობს გარკვეული ვითარება, როცა ერი უნდა გაერთიანდეს”, – განუცხადა ჟურნალისტებს გია ვოლსკიმ.

7 აგვისტო არის ის თარიღი, რომელიც დაფიქსირდა „ნაცმოძრაობის“ მიერ მხარდაჭერილ რეზოლუციაში ომის დაწყების თარიღად და მასთან იყო დაკავშირებული ქართველი სამხედროების მიერ ომის დაწყება და ომის დანაშაული. ანუ, დაადანაშაულეს 7 აგვისტოს ომის დაწყებაში ქართველი სამხედროები და 7 აგვისტოს ომის დანაშაულის ჩადენაში. შემდეგ ეს გავაბათილეთ და მოვიგეთ როგორც სტრასბურგში, ისე ჰააგაში ორივე სასამართლო – „ნაცების“ მიერ გადამალული მტკიცებულებების მიუხედავად, – ამის შესახებ „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

„დღეს ცოტა ჭირს ასეთ თემებზე საუბარი, მაგრამ რადგან არ იშლიან, მე მათ ვურჩევდი, რომ 7 აგვისტოს თემაში, ომის კონტექსტში, ჯერ ერთი, მათ ადგილზე არ აღმოვჩნდებოდი, მაგრამ თუ აღმოვჩნდებოდი, არ შევიდოდი ამაში. როცა საუბრობენ რუსულ ნარატივზე, ერთ-ერთმა ტელევიზიამ ეს სტიქია და გლობალური დათბობა რუსულ ნარატივთან დააკავშირა – 7 აგვისტო არის ის თარიღი, რომელიც დაფიქსირდა „ნაცმოძრაობის“ მიერ მხარდაჭერილ რეზოლუციაში ომის დაწყების თარიღად და მასთან იყო დაკავშირებული ქართველი სამხედროების მიერ ომის დაწყება და ომის დანაშაული. ანუ, დაადანაშაულეს 7 აგვისტოს ომის დაწყებაში ქართველი სამხედროები და 7 აგვისტოს ომის დანაშაულის ჩადენაში. შემდეგ ეს გავაბათილეთ და მოვიგეთ როგორც სტრასბურგში, ისე ჰააგაში ორივე სასამართლო – „ნაცების“ მიერ გადამალული მტკიცებულებების მიუხედავად. მათ ფილმიც გადაიღეს 08.08.08, 8 აგვისტოს გადიოდნენ საფლავებზე 2014 წლამდე, შემდეგ შეცვალეს ნარატივი და 7 აგვისტოს დაიწყეს საფლავებზე გასვლა. ანუ 2014 წლამდე ისინი რუსულ ნარატივზე ისხდნენ, რადგან მოიხსენიებდნენ დაღუპულ გმირებს 8 აგვისტოს? ეს ხომ ცალსახა სპეკულაციაა და მართლად რუსულ საქმეს აკეთებს. რუსეთი ამტკიცებდა ორივე სასამართლოში, რომ ის მოცემულობა იყო სწორი, რაც რეზოლუციაში ეწერა. ამ ნარატივით „გვაწვებოდნენ“ ქართულ მხარეს, რომ 7 აგვისტოს დაიწყო ომი და ქართველმა სამხედროებმა დაიწყეს ეს ომი და ომის დანაშაული ჩაიდინეს. ჩვენ ეს გავაბათილეთ და სასამართლო პროცესი მოვიგეთ. პრეზიდენტის ბრძანებულებაში იყო და შემდეგ პარლამენტმაც დაუდასტურა ეს მაშინდელ პრეზიდენტს, რომ 8 აგვისტოს შემოიჭრა საქართველოში რუსული ჯარი. 2014 წლის შემდეგ შეცვალეს ეს ნარატივი და უნდათ, ამით მანიპულირება მოახდინონ“, – აცხადებს მდინარაძე.