საქართველოს პარლამენტის თავმჯდომარის მოადგილე ირაკლი ჩიქოვანი, ჩინეთში მიმდინარე შეხვედრებს აფასებს.

ირაკლი ჩიქოვანის თქმით, შეხვედრები გრძელდება შანხაიში, რომელიც არის ჩინეთის ერთ-ერთი უმნიშვნელოვანესი ეკონომიკური ჰაბი.

„ვიზიტი გრძელდება, გვაქვს შეხვედრები შანხაიში. შანხაი არის, განსაკუთრებული სტატუსის მატარებელი მუნიციპალიტეტი, რომელშიც 30 მილიონზე მეტი ადამიანი ცხოვრობს და რომელიც არის ჩინეთის ერთ-ერთი უმნიშვნელოვანესი ეკონომიკური ჰაბი. აქ ხაზია გასასმელი რომ, აქ შექმნილია ახალი სხვადასხვა მექანიზმი, რომელიც ხელს უწყობს ბიზნესის განვითარებას, რომელიც ხელს უწყობს ლოჯისტიკის განვითარებას და საერთაშორისო ვაჭრობას. ჩვენთვის მნიშვნელოვანია, გვქონდეს შესაბამისი კომუნიკაცია ჩინეთში, როგორც პოლიტიკურ, ასევე ბიზნეს წრეებთან. ვიზიტის ფარგლებში უკვე გვქონდა შეხვედრები ადგილობრივი მუნიციპალური ხელისუფლების წარმომადგენლებთან და ასევე გვექნება შეხვედრები სხვადასხვა ბიზნეს ჰაბებში“, – განაცხადა ირაკლი ჩიქოვანმა.

„ნაციონალურ მოძრაობას“ კანდელაკიზაციის სახადი აქვს. ერთი ჩემი გზააბნეული კოლეგა იყო, რომელიც ბრიუსელში უშნოდ დაეხეტებოდა ხოლმე და თავის ქვეყანას აშავებდა, როცა პარლამენტის წევრი იყო. მაშინ მათი ანტიკამპანიისგან არაფერი გამოვიდა და ქვეყანამ უვიზო მიმოსვლა მიიღო. „ნაცმოძრაობამ“ ეს სახადი ვერ მოიხადა და იგივე საქმით არის დაკავებული, – ამის შესახებ საპარლამენტო უმრავლესობის წევრმა, გია ცაგარეიშვილმა განაცხადა.

ცაგარეიშვილის თქმით, ეს ადამიანები ზნეს არ შეიცვლიან. გია ცაგარეიშვილის განმარტებით, ოპოზიციის აღნიშნული წარმომადგენლები ცდილობენ, ევროპისკენ მძლავრი სვლა შეაფერხონ.

„კუზიანს სამარე გამოასწორებსო. ეს ადამიანები ზნესა და ჩვევას არ შეიცვლიან. ახლა, როცა ფაქტობრივად ევროკავშირის კარზე ვართ მისული, იგივეს აკეთებენ. რა თქმა უნდა, კეზერაშვილი დიდ თანხებს გაიღებს, რათა ქვეყანა შემდეგ ეტაპზე ვერ გადავიდეს. ეს დამატებითი მტკიცებულებებია, ვისთან გვაქვს შეხება, ვინ არიან ეს ადამიანები, რა უნდათ თავისი ქვეყნისთვის და საით მიექაჩებიან ქვეყანას. ოპოზიცია ამ ქვეყნის ხვალინდელ დღეს ვიწროპარტიული ჭუჭრუტანიდან უყურებს, თუმცა ისინი არცერთ როლში არ იქნებიან მოაზრებული. სამწუხაროდ, ჩვენთან ციხე ყოველთვის შიგნიდან ტყდება და ეს ადამიანები ცდილობენ, ქვეყანა შიგნიდან გატეხონ, ქვეყანას უღალატონ, იფარისევლონ, სამადაშვილებმა და უსახურმა კანდელაკებმა ყველაფერი გააკეთონ, რათა ევროპისკენ მძლავრი სვლა შეაფერხონ“, – აღნიშნა გია ცაგარეიშვილმა.

შანხაი ჩინეთის ერთ-ერთი უმნიშვნელოვანესი ქალაქია, განსაკუთრებით ეკონომიკური თვალსაზრისით. აქედან გამომდინარე, არსებობს თანამშრომლობის გაღრმავების დიდი პერსპექტივა. იმედი გვაქვს, ამ პერსპექტივას მაქსიმალურად გამოვიყენებთ, – ამის შესახებ პარტია „ქართული ოცნების“ თავმჯდომარე ირაკლი კობახიძემ ჩინეთში განაცხადა.

მისი თქმით, შანხაის მუნიციპალური საბჭოს ხელმძღვანელობასთან გამართულ შეხვედრაზე ეკონომიკური თანამშრომლობის საკითხები განიხილეს.

„ჩინეთში ვიზიტს განვაგრძობთ ქალაქ შანხაიში. შევხვდით შანხაის მუნიციპალური საბჭოს ხელმძღვანელობას. გვქონდა საუბარი თანამშრომლობის პერსპექტივებზე. განსაკუთრებით შევეხეთ ეკონომიკური თანამშრომლობის საკითხებს. შანხაი ჩინეთის ერთ-ერთი უმნიშვნელოვანესი ქალაქია, განსაკუთრებით ეკონომიკური თვალსაზრისით. აქედან გამომდინარე, არსებობს თანამშრომლობის გაღრმავების ძალიან დიდი პერსპექტივა და იმედი გვაქვს, ამ პერსპექტივას მაქსიმალურად გამოვიყენებთ“, – განაცხადა ირაკლი კობახიძემ.

„ერთიანი ნაციონალური მოძრაობის“ ლევან ხაბეიშვილის განცხადებით, ევროპის წამების საწინააღმდეგო კომიტეტის დასკვნაში მკაფიოდ არის ნათქვამი, რომ საქართველოს მესამე პრეზიდენტის, მიხეილ სააკაშვილის მიმართ, მჩაგვრელი და დამამცირებელი მოპყრობა ხორციელდება.

ხაბეიშვილმა ბრიფინგზე ბიძინა ივანიშვილს მოუწოდა, მიხეილ გაათავისუფლოს სააკაშვილი.

„იმ ყველაფრის ფონზე,როცა „რუსული ოცნება“ და ბიძინა ივანიშვილი ფიქრობს, როგორ გახადოს ქვეყანა რუსეთის გუბერნია და ჩვენ ქართველ ხალხთან ერთად ვცდილობთ ევროპის ნაწილი გავხდეთ, ევროპის წამების საწინააღმდეგო კომიტეტმა კიდევ ერთი დასკვნა დაწერა პრეზიდენტ სააკაშვილზე, სადაც მთავარი შინაარსი იკითხება. რუსული პარტია რუსულად კითხულობს ამ დოკუმენტს. სალავიოვ-სიმონიანის არ იყოს, შავით თეთრზე რომ ამტკიცებდნენ, იმავეს ამტკიცებენ ეს ადამიანები. პენიტენციური დაწესებულება კი არა, სუს-ის დანამატი რომ არის, მათ განცხადებაც გაავრცელეს. დასკვნაში შავით თეთრზე ამბობენ, რომ მჩაგვრელი და დამამცირებელი მოპყრობაა პრეზიდენტ სააკაშვილის წინააღმდეგ. ამაზე მეტს ევროპის წამების საწინააღმდეგო კომიტეტი უბრალოდ, ვერ დაწერს. დოკუმენტში პირდაპირ არის ნათქვამი, რომ მის წინააღმდეგ განხორციელებული ღონისძიებები გათანაბრებულია დაჩაგვრასთან, დამცირებასთან. მეტიც, ისინი ამბობენ, რომ „ვივამედის“ ექიმები კი არ იღებენ გადაწყვეტილებასო და ექიმებთან კი არ გვაქვს შეკითხვაო, პენიტენციური გადაწყვეტილება, ანუ სუს-ი, ბიძინა ივანიშვილი, „რუსული პარტია“ იღებს კონკრეტულ გადაწყვეტილებას და არა ექიმებიო. ეს მიხეილ სააკაშვილის წინააღმდეგ განხორციელებული დანაშაულებრივი ქმედებების თაობაზე დამატებითი პრობლემაა. ეს დასკვნა კიდევ ერთი ნათელი დადასტურებაა. გარდა იმისა, რომ „კლანის“ მოსამართლეები დაასანქცირეს და თქვეს, რომ კორუმპირებულები არიან და ამ ხალხმა გაასამართლა, გარდა იმისა, რომ აშშ-მ ფარცხალაძეზე, ვინც ბრალი „შეკერა“ პრეზიდენტ სააკაშვილზე, თქვა, რომ ეს „რუსეთის აგენტია“. ახლა ევროპის წამების საწინააღმდეგო კომიტეტი ამბობს, რომ მჩაგვრელი და დამამცირებელია პრეზიდენტ სააკაშვილის მიმართ განხორციელებული მოპყრობა. მივმართავ რუს ოლიგარქს, შეშინებულ და სოროდან გამომძვრალ ბიძინა ივანიშვილს, რომელიც ამბობს, რომ ხალხის მხარდაჭერა აქვს, თუ არ გეშინია, თუ მუხლები არ გიკანკალებს, მაშინ გაათავისუფლე პრეზიდენტი სააკაშვილი, რომელზეც მთლიანად ცივილიზებული სამყარო შეთანხმებულია, რომ პოლიტიკური პატიმარია და მისცეს შესაძლებლობა, რომ ელაპარაკოს ხალხს. შენ ხომ ყველანაირი შესაძლებლობა გაქვს – სახელმწიფო უწყებები, მილიარდები, ფარცხალაძე, რუსეთის აგენტურა, ხომ ყველაფერი შენს ხელშია ივანიშვილო, თუ არ გეშინია გამოუშვი პრეზიდენტი სააკაშვილი და მიეცი შესაძლებლობა, ესაუბროს ხალხს. მოგიწევს ამის გაკეთება ადრე თუ გვიან და მოგიწევს ამის გაკეთება ხალხის გადაწყვეტილებით, თუ შენ ამას არ გააკეთებ, ქართველი ხალხი 2024 წელს აუცილებლად დააღწევს თავს რუსულ პარტიას და ჩვენ აუცილებლად გავხდებით ევროპული ოჯახის წევრები“, – განაცხადა ლევან ხაბეიშვილმა.

ფრაქცია „ქართული ოცნების“ თავმჯდომარის მამუკა მდინარაძის განცხადებით, ოპოზიციამ მაშინ ამოიღო ხმა, როდესაც წერეთლის გამზირთან დაკავშირებით პრობლემა გადაიჭრა და მიხვდნენ, რომ საშვილიშვილო საქმე კეთდება, ხოლო ჩუმად იყვნენ, როცა იცოდნენ, რომ სამუშაოები საჭიროებისამებრ ვერ მიმდინარეობდა.

ამის შესახებ მამუკა მდინარაძემ სოციალურ ქსელში დაწერა.

„კახა კალაძის წინააღმდეგ ხელმოცარული ოპოზიციის მიერ წამოწყებული, მდაბიო და ამავდროულად, მავნებლური, ადვილად გაშიფვრადი და უშედეგო პიარის ერთ-ერთი მიმართულების მოკლე „ანამნეზი“:

ჩუმად იყვნენ მაშინ, როდესაც იცოდნენ, რომ წერეთელზე სამუშაოები მთლად ისე ვერ მიდიოდა, როგორც საჭირო იყო და მერიასაც პრობლემები ჰქონდა კონტრაქტორთან (მაქსიმუმ ღლიცინებდნენ).

აყვირდნენ მაშინ, როდესაც პრობლემა მკაცრად გადაიჭრა, გამოსწორდა და მიხვდნენ, რომ პირობაც სრულდება – როგორც იტყვიან, საშვილიშვილო საქმე კეთდება.

პირველ შემთხვევაში თებერვალში აპირებდნენ, ამბავი აეტეხათ…“, – დაწერა მამუკა მდინარაძემ.

ევროპის საბჭოს მინისტრთა მოადგილეების კომიტეტის 1478-ე სხდომის ფარგლებში, საქართველოსთვის ევროპის საბჭოს 2024-2027 წლების სამოქმედო გეგმა დამტკიცდა. შეხვედრა, რომელშიც მონაწილეობას იღებდნენ საქართველოს აღმასრულებელი, საკანონმდებლო და სასამართლო ხელისუფლების, ევროპის საბჭოსა და საქართველოში აკრედიტებული დიპლომატიური კორპუსის წარმომადგენლები, საგარეო საქმეთა მინისტრის პირველმა მოადგილემ, ლაშა დარსალიამ და ევროპის საბჭოს გენერალური მდივნის მოადგილემ, ბიორნ ბერგემ გახსნეს, – ამის შესახებ ინფორმაციას საგარეო საქმეთა სამინისტრო ავრცელებს.

მათივე ინფორმაციით, აღნიშნული დოკუმენტი მომზადდა საქართველოს აღმასრულებელი, საკანონმდებლო და სასამართლო ხელისუფლების, სამოქალაქო საზოგადოების და ევროპის საბჭოს წარმომადგენლების მჭიდრო თანამშრომლობის შედეგად.

სამოქმედო გეგმა მიზნად ისახავს ქვეყანაში ევროპის საბჭოს ფასეულობების: ადამიანის უფლებების, კანონის უზენაესობის და დემოკრატიის განმტკიცებას, ხელს უწყობს საქართველოში დემოკრატიული რეფორმების განხორციელებას, კანონმდებლობისა და სახელმწიფო ინსტიტუტების ევროპულ სტანდარტებთან შემდგომ დაახლოებას. სამოქმედო გეგმა, ასევე, ითვალისწინებს საქართველოს ოკუპირებულ ტერიტორიებზე ნდობის აღდგენის პროექტების განხორციელებას.

აღსანიშნავია, რომ ეს საქართველოსთვის ევროპის საბჭოს მეოთხე სამოქმედო გეგმაა. 2020-2023 წლის სამოქმედო გეგმის შესრულება ორგანიზაციის მიერ დადებითად შეფასდა.