პრემიერ-მინისტრ ირაკლი ღარიბაშვილის ხელმძღვანელობით, მთავრობის ადმინისტრაციაში 2023 წლის რთველის მოსამზადებელი შეხვედრა გაიმართა, – ამის შესახებ ინფორმაციას მთავრობის ადმინისტრაცია ავრცელებს.

მათივე ცნობით, გამართულ შეხვედრაზე რთველის ორგანიზებულად ჩასატარებლად კონკრეტული ნაბიჯები დაიგეგმა.

„როგორც პრემიერ-მინისტრმა აღნიშნა, აუცილებელია, რომ მევენახეებმა მოსავლის რეალიზაცია კარგ ფასად შეძლონ და კიდევ უფრო გაძლიერდეს მევენახეობა-მეღვინეობის დარგის ბოლო წლების სტაბილური განვითარების დინამიკა.

შეხვედრაზე მიღებული გადაწყვეტილებით, რთველის სუბსიდირება 2023 წელსაც გაგრძელდება, სახელმწიფო ყურძენს 20 თეთრით დაასუბსიდირებს და 1 კგ თეთრი ყურძნის ფასი მინიმუმ 90 თეთრი იქნება.

როგორც გარემოს დაცვისა და სოფლის მეურნეობის მინისტრმა ოთარ შამუგიამ აღნიშნა, მნიშვნელოვანია, რომ იზრდება ღვინის ექსპორტი, შარშან 30%-მდე ზრდის მაჩვენებელი დაფიქსირდა და წელსაც, 6 თვეში ძალიან მაღალი ზრდა გვაქვს ამ მიმართულებით. გასულ წელს მსოფლიოს 66 ქვეყანაში ექსპორტირებულია დამოუკიდებელი საქართველოს ისტორიაში რეკორდული რაოდენობის – 103 მილიონი ლიტრი, 252 მლნ დოლარის ღირებულების ღვინო. მინისტრის თქმით, ღვინის ექსპორტთან ერთად იზრდება მოთხოვნა ხარისხიან ყურძენზეც.

შეხვედრაზე ასევე აღინიშნა, რომ კლიმატური პირობების გამო, მოსალოდნელია, რომ წელს ყურძნის მოსავლის ნაწილი არასათანადო ხარისხის იყოს. მთავრობის გადაწყვეტილებით, სახელმწიფო კომპანიები დაზიანებულ ყურძენსაც მიიღებენ და ჩაუბარებელი ყურძენი არ დარჩება.

მთავრობის ადმინისტრაციაში გამართულ შეხვედრას ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი, გარემოს დაცვისა და სოფლის მეურნეობის მინისტრი ოთარ შამუგია, პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი, თელავის, ახმეტის, ყვარლისა და ლაგოდეხის მაჟორიტარი დეპუტატი, პარლამენტის საპროცედურო საკითხთა და წესების კომიტეტის თავმჯდომარე ირაკლი ქადაგიშვილი, გარემოს დაცვისა და სოფლის მეურნეობის მინისტრის მოადგილე იური ნოზაძე, ღვინის ეროვნული სააგენტოს ხელმძღვანელი ლევან მუხუზლა, მთავრობის ადმინისტრაციის რეგიონებთან ურთიერთობის დეპარტამენტის უფროსი ლერი ბარნაბიშვილი და კახეთის სახელმწიფო რწმუნებული გიორგი ალადაშვილი ესწრებოდნენ“, – აღნიშნულია გავრცელებულ ინფორმაციაში.

„ქართული ოცნების“ ქალთა ორგანიზაციამ ქუთაისში, იმერეთის მასშტაბით დაანონსებული შეხვედრა გამართა.

„ქართული ოცნების“ ინფორმაციით, ქალთა ორგანიზაციის ხელმძღვანელი, ნინო წილოსანი, იმერეთის საბჭოს ხელმძღვანელ მარეხი ნიჟარაძესთან ერთად, ორგანიზაციის საბჭოს წევრებს, საინიციატივო ჯგუფის წარმომადგენლებსა და პარტია „ქართული ოცნების“ მხარდამჭერ ქალებს შეხვდა.

მათივე ცნობით, ქალთა ორგანიზაცია გამუდმებით ფართოვდება და სულ უფრო მეტ ძალასა და რესურსს იკრებს.

ინფორმაციაშია აღნიშნულია, რომ შეხვედრაზე განხილულ იქნა მიმდინარე პროექტები და ამავე დროს პრობლემური საკითხები, რომელთა განხორციელებაც დადებითი შედეგის მომტანი იქნება იმერეთის მოსახლეობისთვის.

თბილისის მერი კახა კალაძე მიიჩნევს, რომ „ერთიანი ნაციონალური მოძრაობისა“ და „სტრატეგია აღმაშენებლის“ ლიდერების გაერთიანება ქართულ პოლიტიკურ სივრცეში არაფერს შეცვლის.

როგორც კალაძემ ჟურნალისტებს განუცხადა, ოპოზიციას დღეს ფუნდამენტური პრობლემები აქვს, თუმცა მათ ამის დანახვა არ უნდათ.

„ვფიქრობ ამით არაფერი შეიცვლება. ზოგადად, დღეს ოპოზიციას აქვს ფუნდამენტური პრობლემები. არ ვიცი, ეს ადამიანები ვერ ხედავენ თუ არ უნდათ დაინახონ, რაშია მათი ძირითადი პრობლემები, ან ამის ანალიზს არ აკეთებენ, თუმცა არ მინდა, ამ სიღრმეებში შევიდე. ორი „ლუზერის“ გაერთიანებით ცხადია, ვერაფერი და არაფერი შეიცვლება. მათი გადასაწყვეტია, ვინ ვისთან გაერთიანდება და რა ფორმულით წარდგება არჩევნებზე. ჩემთვის, როგორც ამ ქვეყანაში მცხოვრები ადამიანისთვის, ყველაზე მთავარი და მნიშვნელოვანია ჩემი ქვეყნის მოქალაქეების ხვალინდელი დღე, იმ რეფორმების გაგრძელება, რომელიც წამოწყებული აქვს „ქართულ ოცნებას“, იმ პროექტების დასრულება, რომელიც მთელი ქვეყნის მასშტაბით ყველა რეგიონში, სოფელსა თუ ქალაქში მიმდინარეობს“, – განაცხადა კახა კალაძემ.

მისივე თქმით, ერთადერთი ძალა, რომელიც დღეს ქვეყნის ინტერესებით მოქმედებს, „ქართული ოცნებაა“.

„ყველაზე მნიშვნელოვანია, რომ ქვეყანაში დღეს ერთადერთი ძალა არის „ქართული ოცნება“, რომელსაც რეალურად აქვს იმის შესაძლებლობა, რომ შეინარჩუნოს მშვიდობა, მიუხედავად ზეწოლისა, მიუხედავად მოწოდებებისა – სანქციების მიერთება იქნება ეს თუ მეორე ფრონტის გახსნა. ერთადერთი ძალა, რომელიც მოქმედებს და იცავს ქვეყნის და ხალხის ინტერესებს, ეს არის „ქართული ოცნება-დემოკრატიული საქართველო“. სამწუხაროდ, ჯერ კიდევ არსებობს საფრთხეები იმ რთულ ვითარებაში, იმ რთულ გარემოში, რომელშიც გვიწევს ცხოვრება, იგივე მეორე ფრონტთან და სანქციებთან დაკავშირებით, ამიტომ ჩვენი ქვეყნის მოსახლეობა ძალიან კარგად ხედავს არსებულ გამოწვევებს, რეალობას. საქართველოს მოსახლეობამ ძალიან კარგად იცის მშვიდობის ფასი და ყოველთვის მიიღებს ისეთ გადაწყვეტილებას, რომელიც მნიშვნელოვანია ამ ქვეყნის ხვალინდელი დღისთვის“, – განაცხადა კახა კალაძემ.

„ერთიანი ნაციონალური მოძრაობისა” და „სტრატეგია აღმაშენებლის” ლიდერებმა ერთიანი პოლიტიკური პლატფორმის შექმნის შესახებ განცხადება გააკეთეს.

წარმატებას ვუსურვებ ჩემს კოლეგებს, მაგრამ ეს გაერთიანება მაგონებს „ძალა ერთობაშია 2“-ს, – ამის შესახებ „გირჩის“ ლიდერმა, იაგო ხვიჩიამ განაცხადა, რომლითაც გამოეხმაურა „ნაციონალური მოძრაობის“ და „სტრატეგია აღმაშენებლის“ გადაწყვეტილებას, რომ ამ ორ პარტიას საერთო სტრატეგია ექნება და შეიქმნება „გამარჯვების პლატფორმა“ პროდასავლური პარტიების პლატფორმაზე.

ხვიჩიას თქმით, „ძალა ერთობაშია“-სგან განსხვავებით, გუშინ გამოიყურებოდნენ უფრო მოკრძალებულად, ვიდრე ამბიციურად.

„„ძალა ერთობაშია“ რამდენად წარმატებული იყო, ამაზე შეგვიძლია, ვიკამათოთ. მაგალითად, თაკო ჩარკვიანის პარლამენტში შეყვანა თუ წარმატება იყო, წარმატებული იყო, „ქართული ოცნების“ შეცვლა თუ იყო მიზანი, მაშინ არ იყო წარმატებული. თუმცა, „ძალა ერთობაშია“-სგან განსხვავებით, აქ უფრო ცოტა პარტიაა და უფრო მოკრძალებულად გამოიყურებოდნენ გუშინ, ვიდრე ამბიციურად. კი თქვეს, რომ ჩვენ მომავალში მოვიფიქრებთ გზასო, მაგრამ ჯერ მოფიქრებული არცერთი გზის პრეზენტაცია არ ყოფილა, რამაც ცოტა ელვარება დააკლო გუშინდელ ამ ღირსშესანიშნავ მოვლენას“, – განაცხადა იაგო ხვიჩიამ.

პროდასავლური პარტიების მსხვილი ცენტრის გაკეთება შესაძლებელია. უბრალოდ, „ნაციონალურ მოძრაობასთან“ ერთად ამ ცენტრში ყოფნა ჩვენთვის კატეგორიულად მიუღებელი და წითელი ხაზია, – ამის შესახებ პარტია „გირჩი – მეტი თავისუფლების“ წევრმა, ცოტნე კობერიძემ პირველ არხს განუცხადა.

მისივე თქმით, სწორედ ამიტომ „გირჩი – მეტი თავისუფლება“ „ნაციონალური მოძრაობისა“ და „სტრატეგია აღმაშენებლის“ პლატფორმას არ შეუერთდა.

ამასთან, ცოტნე კობერიძის თქმით, სხვა პარტიებთან გაერთიანების საკითხზე ამ ეტაპზე რაიმე სერიოზული კონსულტაციები არ მიმდინარეობს.

„აქედან გამომდინარე, გიორგი ვაშაძის ამ გადაწყვეტილებას არ განვავრცობთ ჩვენს პარტიაზე და დავემშვიდობეთ გიორგი ვაშაძეს, სამეული მოკვდა, აღარ არსებობს. ამის მიღმა წითელი ხაზები არ გვაქვს, არც, მათ შორის, „ლელოსთან“, არც სხვებთან. სერიოზულად თუ დაიძვრება ეს საკითხი, მზად ვართ. ამ ეტაპზე რაიმე სერიოზული კონსულტაციები არ მიმდინარეობს. ახლა ყველა პარტია მაინც გადასულია საკუთარი რეიტინგისა და რესურსების დათვლაზე“, – განაცხადა ცოტნე კობერიძემ.

კითხვაზე, როდის შეიძლება საზოგადოება კონსულტაციებსა და კონკრეტულ გადაწყვეტილებებთან დაკავშირებით ინფორმაციის მიღებას ელოდოს, ცოტნე კობერიძემ აღნიშნა, რომ ეს მხოლოდ „გირჩი – მეტი თავისუფლებაზე“ არ არის დამოკიდებული.

„მზად როცა იქნება, მათ შორის „ლელო“ და სხვა პარტიებიც, მაშინ გვექნება ჩვენც მზაობა. ზოგადად, ჩვენ გაერთიანებებზე საუბარი დავიწყეთ ერთი წლის წინ, როცა ყველა ალმაცერად გვიყურებდა, დასცინოდა ამ იდეას და ახლა ყველა დასწრებაზეა, დაიბრალოს, რომ თვითონაა ამ იდეის ინიციატორი“, – აღნიშნა ცოტნე კობერიძემ.

კიდევ ერთ კითხვაზე, პარტია „ლელოსგან“ ხომ არ ყოფილა კონკრეტული შემოთავაზება გაერთიანებასთან დაკავშირებით, ცოტნე კობერიძემ განაცხადა:

„გარდა საჯარო და ზოგადი თქმისა, რომ სურთ, მესამე ძალა გაკეთდეს, რაიმე სერიოზული კონსულტაცია არ ყოფილა. გიორგი ვაშაძის გადაწყვეტილებამ დააჩქარა ეს ამბავი, ყველა პოლიტიკოსს მედია უსვამს ამ შეკითხვას და შემდეგ ყველა პოლიტიკოსი სცემს პასუხს, რომ გაჩერებული კი არ არის, არამედ ამ თემებზე მიმდინარეობს კონსულტაციები. ეს შაბლონური პასუხია, სინამდვილეში, ჯერ სერიოზული საუბრები არ არის“, – აღნიშნა ცოტნე კობერიძემ.

დოკუმენტებით ირკვევა, რომ თურმე მიღებული რეზოლუციები, საქართველოს და ხელისუფლების წინააღმდეგ გაკეთებული განცხადებები, ფარსი იყო და ამ ყველაფერს ფულის გამო აკეთებდნენ – ცუდია ის, რომ ამაში ჩართულები იყვნენ ჩვენი უცხოელი მეგობარი ქვეყნების წარმომადგენლები, – ამის შესახებ “ქართული ოცნების” გენერალურმა მდივანმა, კახა კალაძემ განაცხადა, რითაც ის აშშ-ის იუსტიციის დეპარტამენტის ვებ-გვერდზე გამოქვეყნებულ ინფორმაციას გამოეხმაურა.

კალაძის თქმით, გავრცელებული დოკუმენტებით დადასტურდა ის, რასაც “ქართული ოცნების” წარმომადგენლები ამ ხნის განმავლობაში საუბრობდნენ.

„კიდევ ერთი სამწუხარო რეალობა, პრაქტიკულად, დადასტურდა ყველაფერი ის, რაზეც ჩვენ ვსაუბრობდით ამდენი ხნის განმავლობაში. მთელი ამ ხნის განმავლობაში აღნიშნული კამპანია, რომელიც ძალიან დიდ ტყუილს და სიბინძურეს შეიცავდა და მთლიანად ფარსი იყო, საქართველოს, ხელისუფლებისა და ქართველი ხალხის წინააღმდეგ მიმართული იყო. ასევე, ზოგადად, ქვეყნის გაშავებისკენ მიმართული იყო. კიდევ ერთხელ დადასტურდა და გამოიკვეთა ის სიბინძურე, რაც აღნიშნულ საქმესთან დაკავშირებით ხდებოდა. ეს ყველაფერი შენიღბულია ვითომ ლობიზმით, რაც ძალიან სამწუხაროა. აღნიშნული დოკუმენტებით ირკვევა, რომ თურმე მიღებული რეზოლუციები, საქართველოს და ხელისუფლების წინააღმდეგ გაკეთებული განცხადებები, ეს ყველაფერი ფარსი იყო და ამ ყველაფერს ფულის გამო აკეთებდნენ. ამას სამწუხარო პოლიტიკა ჰქვია, რაც ძალიან გულდასაწყვეტია. ცუდია ის, რომ ეს ყველაფერი ხდებოდა და ამაში ჩართულები იყვნენ ჩვენი უცხოელი მეგობარი ქვეყნების წარმომადგენლები”, – განაცხადა კალაძემ.

ამასთან, კახა კალაძის თქმით, შესაძლოა პოლონელი ექიმის მიერ მიხეილ სააკაშვილის ბიოლოგიური ნიმუშის კლინიკა „ვივამედიდან” გამოტანა, მონაცემების გაყალბებას და ახალი კამპანიის დაწყებას ემსახურებოდა.

„რა თქმა უნდა, კარგი თანამშრომლობის პრინციპს ეწინააღმდეგება ის ქმედებები, რაც კონკრეტულმა ექიმებმა განახორციელეს და მე არ ვარ იმაში დარწმუნებული და არ მჯერა, რომ ეს რაღაც მათი თვითშემოქმედება იყო. ეს არის ერთი დიდი ხაზი, მთლიანად დაწყებული სააკაშვილის საქართველოში შემოგორებით, ის კამპანია, მთლიანად ერთი დიდი ხაზისგან შედგება, ეს ყველაფერი, რაც იკვეთება ამერიკულ-რუსულ კანონში, ვგულისხმობ FARA-ს, სადაც დეტალურადაა გაწერილი, თუ რა ქმედებებს ეწეოდნენ, რა ე.წ. ლობიზმი მიმდინარეობდა, სინამდვილეში ეს ყველაფერი კორუფციაა, უბრალოდ ლობიზმად აქვთ შენიღბული. თეთრზე როდესაც შავს იძახიან და სიცრუეს ავრცელებენ, ამაზე დიდი უბედურება რა უნდა იყოს და ამას პოლიტიკას არქმევენ. შესაბამისად, იმ ექიმების ქმედებებიც სამარცხვინოა. ვფიქრობდი, რომ გამოვიდოდნენ და ბოდიშს მოიხდიდნენ იმიტომ, რომ თვითონაც იყვნენ ჩართულები. ეჭვი, რაც გვაქვს, კიდევ უფრო ღრმავდება, რომ ეს ყველაფერი გაკეთებული იყო იმისთვის, რომ აღნიშნული მონაცემები გაეყალბებინათ და ამასთან დაკავშირებით ახალი კამპანია დაეწყოთ”, – განაცხადა კალაძემ.

საქართველოს პრემიერ-მინისტრ ირაკლი ღარიბაშვილის ხელმძღვანელობით, მთავრობის ადმინისტრაციაში მთავრობის სხდომა გაიმართა.

მთავრობის ადმინისტრაციის ცნობით, მინისტრთა კაბინეტის წევრებმა დღის წესრიგით გათვალისწინებული 11 საკითხი განიხილეს.

განსახილველ საკითხთა შორის იყო საქართველოს მთავრობის განკარგულება „სახელმწიფო საკუთრებაში არსებული უძრავი ქონების უსასყიდლოდ საკუთრებაში გადაცემის ფორმით პრივატიზების შესახებ“. განკარგულების საფუძველზე 367 დევნილ ოჯახს საკუთრებაში გადაეცემა მათ მიერ ფაქტობრივად დაკავებული 409 ქონება, მათ შორის, საცხოვრებელი ბინები და როგორც სასოფლო, ისე არასასოფლო-სამეურნეო დანიშნულების მიწები.

დევნილებისთვის გადასაცემი ქონება მდებარეობს თბილისში, ქუთაისში, დაბა ჩხოროწყუში, შიდა ქართლში, თელავში, მცხეთაში, ბორჯომში, ქვემო ქართლში, სამეგრელოში, იმერეთში, ბათუმსა და რაჭა-ლეჩხუმში.