აშშ-ის ელჩს რა არ აქვს წაკითხული, რაც გამოქვეყნებულია თავის სახელმწიფოში მოქმედი კანონით? დოკუმენტმა ფარდა ახადა იმ ლობისტურ საქმიანობას, ეს როგორ არ აქვს წაკითხული, – ასე გამოეხმაურა საპარლამენტო უმრავლესობის წევრი ირაკლი ზარქუა საქართველოში აშშ-ის ელჩის, კელი დეგნანის განცხადებას.

კერძოდ, დეგნანმა აღნიშნა, რომ არ უნახავს აშშ-ის იუსტიციის დეპარტამენტის დოკუმენტები, რომლებშიც მიხეილ სააკაშვილის ლობისტების საქმიანობაზეა საუბარი.

„რა არ აქვს წაკითხული, რაც გამოქვეყნებულია თავის სახელმწიფოში მოქმედი კანონით? დოკუმენტებმა ფარდა ახადეს იმ ლობისტურ საქმიანობას. ეს როგორ არ აქვს წაკითხული, რომელიც პირდაპირ, ერთი-ერთში ეხება პატიმარ სააკაშვილს, მის დაფინანსებულ კამპანიას და, ამ კამპანიის შედეგად, შემდეგ უკვე ევროპარლამენტარებისა თუ სენატორების განცხადებებს, რაც ეხება ჩემს ქვეყანას, სადაც მთელი ამ პერიოდის განმავლობაში შავი პიარი ხორციელდებოდა. ამაზე რეაგირება ისე, რომ იცი რა, წაკითხული არ მაქვს და არ ვიცი, რაზეა საუბარი, ძალიან სამწუხაროა.

იცით, რომ ახალი ელჩი დაინიშნება და ეს ბოლო დღეებია ქალბატონი დეგნანი საქართველოში, ვწუხვარ, მაგრამ უნდა ითქვას, რომ მან საქართველო-აშშ-ის ურთიერთობები წინ ვერ წასწია, რბილად რომ ვთქვათ, რადგან წლებია, საქართველო დამსახურებულად ითხოვს, მათ შორის გამარტივებულ მიმოსვლას აშშ-თან, რადგან ის ჩვენი მთავარი პარტნიორია, თავისუფალ ვაჭრობას, როგორც ეს ევროკავშირთან გვაქვს, სამწუხაროდ, არ არის, ასევე პირდაპირ რეისებს. მგონია, შეეძლო, მნიშვნელოვანი წვლილი შეეტანა ამ მიმართულებით. მისი განცხადებებით კი, მრჩება შთაბეჭდილება, პირიქით, ხელი შეუწყო პოლარიზაციას და ეს ძალიან სამწუხაროა. დარწმუნებული ვარ, ახალ ელჩთან ახალი შემართებით შევძლებთ საერთო, საქართველოს ინტერესებზე მორგებული პოლიტიკის წარმართვას და კიდევ უფრო მეტად დავუახლოვდებით ახალი ელჩის პირობებში აშშ-სა და ევროატლანტიკურ სივრცეს“, – განაცხადა ირაკლი ზარქუამ

ჩვენ, „სტრატეგია აღმაშენებელმა“ და „ნაციონალურმა მოძრაობამ“ დავაფუძნეთ „გამარჯვების პლატფორმა“, შესაბამისად, ჩვენთვის მთავარია გამარჯვება. მესმის, ახლა ვიღაცებს უნდათ, თანამდებობების თემაზე ჩაგვციკლონ, მაგრამ ჩვენ გვაინტერესებს ხალხი, მათთან საუბარი, მსჯელობა და მთელი ერის, ქართული ეროვნული ენერგიის კონსოლიდაცია, რათა საქართველო იყოს ძლიერი, რეგიონის ლიდერი, ევროკავშირის წევრი, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ ჟურნალისტებს განუცხადა.

ვაშაძის თქმით, მათი სტრატეგია არის მხოლოდ გამარჯვება.

„გაერთიანების პირველი ეტაპი იქნება სექტემბერ-ოქტომბერში. ნახავთ ახალ ადამიანებს. ჩვენ მძლავრი დაგეგმვის ფაზაში ვართ. ხომ იცით, არ მიყვარს ზედაპირული მუშაობა, მიყვარს სისტემური მუშაობა, ასეთ მძლავრ დაგეგმვის ფაზაში ვართ. მეორე ეტაპი უკვე გაზაფხულზე იქნება. ჩვენი სტრატეგია არის გამარჯვება, გამარჯვება და კიდევ ერთხელ გამარჯვება. ჩვენ გავალთ პირველ ადგილზე. ეს იქნება ჩვენი მთავარი ამოცანა – ქართველ ხალხთან ერთად დიდი გამარჯვების მოპოვება“, – განაცხადა ვაშაძემ.

გიორგი ვაშაძის თქმით, „გამარჯვების პლატფორმა“ იქნება საერთო ეროვნული, სახალხო დიდი გამარჯვების პროცესი და იქნება პლატფორმა, სადაც ყველას შეუძლია, შემოვიდეს“.

„ჩვენი ამოცანაა, რაც შეიძლება მეტი ინდივიდი შემოვიდეს. რაც შეეხება სხვა პარტიებს, ჩვენ მათ ვუსურვებთ ასევე კონსოლიდაციას და გულწრფელად, ღიად გეტყვით, ახლა ასე სწრაფად ეს ნაბიჯი გადავდგით იმისთვის, რომ ბიძგი მივცეთ ყველას კონსოლიდაციისკენ. ამიტომ ყველასთვის გზა დაგვილოცია, საერთო დიდ გამარჯვებაში ყველა ერთად ვიქნებით“, – განაცხადა გიორგი ვაშაძემ.

კითხვაზე, ითანამშრომლებენ თუ არა ნიკა მელიასთან, ვაშაძემ აღნიშნა, რომ „ნიკა მელიას საკითხი არის „ნაციონალური მოძრაობის“ შიდა საკითხი“.

„მე ჩემს პოზიციას გეტყვით. ვფიქრობ, ნიკა მელიას ნამდვილად შეუძლია, თავისი წვლილი შეიტანოს რუსული საოკუპაციო რეჟიმისგან საქართველოს განთავისუფლებაში. დანარჩენი მასზეა დამოკიდებული, რა ნაბიჯებს გადადგამს“, – განაცხადა ვაშაძემ.

ამასთან, ექნება თუ არა კომუნიკაცია მიხეილ სააკაშვილთან და შეთანხმებს თუ არა მასთან გადაწყვეტილებებს, ვაშაძემ აღნიშნა, რომ სააკაშვილთან მას აქამდეც ჰქონდა კომუნიკაცია.

„ვაპირებ, გავაგრძელო კომუნიკაცია, რადგან „ნაციონალური მოძრაობა“ არის მიშას პარტია და მიხეილ სააკაშვილი დღეს არის სიმბოლო დასავლური ცივილიზაციის ბრძოლის რუსულ ტერორისტულ რეჟიმთან და მას აუცილებლად გავათავისუფლებთ“, – განაცხადა ვაშაძემ.

უკრაინაში, მოლდოვაში, საქართველოსა და ასევე, დასავლეთ ბალკანეთში დღეს ევროპის ისტორიის ახალი თავი იწერება. ამის შესახებ ევროკომისიის პრეზიდენტმა,  ურსულა ფონ დერ ლაიენმა ნიუ იორკში, მსოფლიო მშვიდობისა და თავისუფლების ჯილდოს მიღებისას განაცხადა.

„ჩვენი კავშირის ისტორია არის ახალგაზრდა და ძველი დემოკრატიების ისტორია, რომლებიც ერთად ძლიერდებიან. ეს არის გერმანიის და იტალიის ისტორია, რომლებიც ხელახლა დაიბადნენ ომის შემდეგ. ეს არის დიქტატურიდან დემოკრატიამდე ესპანეთის, პორტუგალიის და საბერძნეთის გზის ისტორია. ეს არის დემოკრატიული აღორძინების ისტორია „რკინის ფარდის“ დაცემის შემდეგ. დღეს ამ ისტორიის ახალი თავი იწერება უკრაინაში, მოლოდავაში, საქართველოში და ასევე, დასავლეთ ბალკანეთში. ეს არის ევროპის დაპირება, ერთიანი კონტინენტი, სადაც ყველა თანასწორია კანონის წინაშე, თავისუფლებითა და დემოკრატიით ყველასთვის“, – განაცხადა ურსულა ფონ დერ ლაიენმა.

ევროკომისიის პრეზიდენტმა ასევე აღნიშნა, რომ ევროპა უკრაინის გვერდით იდგება, რამდენ ხანსაც საჭირო იქნება. მისი თქმით, უკრაინა არა მხოლოდ თავისი, არამედ ყველა ქვეყნის თავისუფლებისთვის იბრძვის.

ურსულა ფონ დერ ლაიენმა უკრაინის ევროკავშირისკენ მისწრაფებებზეც ისაუბრა.

„უკრაინელებს ევროკავშირში გაწევრიანება სურთ. ეს კი ნიშნავს ღრმა და სტრუქტურულ რეფორმებს დაწყებული სასამართლოს დამოუკიდებლობით, კორუფციის წინააღმდეგ ბრძოლით, უმცირესობების უფლებების დაცვითა და მედიის თავისუფლებით დამთავრებული. უნდა ვთქვა, რომ შესანიშნავია იმის ხილვა, როგორ სწრაფად და მტკიცედ ახორციელებს უკრაინა ამ რეფორმებს, ომის მიუხედავად“, – აღნიშნა ურსულა ფონ დერ ლაიენმა.

სწორედ „ფარას“ კანონმა, რომელსაც რუსული დაარქვეს, ამხილა, რომ კუბილიუსებს, ფოტიგებს, ქალბატონ რასას საქართველოს წინააღმდეგ ტექსტებს ლობისტური კომპანიები უწერდნენ, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.

მისი თქმით, კიდევ ერთხელ მოხდა ლუსტრაცია.

„მთელი ამ პერიოდის განმავლობაში უმრავლესობა ვამბობდით, რომ იმ ევროპარლამენტარების ის ნარატივი, მიღებული ორი რეზოლუცია ჩვენი ქვეყნის და ლეგიტიმური ხელისუფლების წინააღმდეგ, ეს ყველაფერი იყო დაფინანსებული სააკაშვილის ოჯახის წევრების მხრიდან. ამას ცხადად, არგუმენტებით ვამბობდით და წინა კვირას გამოჩნდა, რომ სწორედ იმ კანონმა, რომელსაც შემდეგ რუსული დაარქვეს, ეს არის „ფარას“ კანონი, ამხილა ისინი. სადაც ჩანაწერია, თურმე ამ ევროპარლამენტარებს, ამ კუბილიუსებს, ფოტიგებს, ქალბატონ რასას, რაისას და ა.შ საქართველოს წინააღმდეგ ტექსტებს უწერდნენ ეს ლობისტური კომპანიები, რომლებიც მილიონობით ფულს იღებდნენ სააკაშვილის ოჯახისგან. კიდევ ერთხელ მოხდა მათი ლუსტრაცია. ამიტომ ვამბობდით, რომ ესენი არა საქართველოს, არამედ კონკრეტული პარტიის მეგობრები იყვნენ, ეს რაღაც ვიწრო წრე ევროპარლამენტარების და არამხოლოდ ევროპარლამენტარების, მთელი სქემაა. სააკაშვილმა რაც ძარცვა ეს ქვეყანა და მერე უკრაინა, ამ ნაძარცვი ფულით ხდება შემდეგ დაფინანსება სწორედ ამ ლობისტური ხასიათის კამპანიის“, – განაცხადა ზარქუამ.

ვაფრთხილებ ვაშაძეს – კიდევ რაიმე მცდელობა გექნება, რომ ჩემი ხაბე დამიჩაგრო და შენ პირადად მოგთხოვ. აბა, სერიოზულად, ამათზე როგორ უნდა ილაპარაკო?!, – ასე გამოეხმაურა რეგიონული პოლიტიკისა და თვითმმართველობის კომიტეტის თავმჯდომარის პირველი მოადგილე ირაკლი ზარქუა „ერთიანი ნაციონალური მოძრაობისა“ და „სტრატეგია აღმაშენებლის“ მიერ ერთიანი პლატფორმის შექმნის იდეას.

„მე ვაფრთხილებ ვაშაძეს – კიდევ რაიმე მცდელობა გექნება, რომ ჩემი ხაბე დამიჩაგრო და შენ პირადად მოგთხოვ. სერიოზულად, ამათზე როგორ უნდა ილაპარაკო?! ჭიჭემ რა ამოწურა იმ „ტროიკასთან“ ურთიერთობა? ის მიაგდო და ახლა – ახალი! არაფერი, ესენი არიან პარტიიდან პარტიაში გადამსვლელები, მომთაბარე ტომებივით. ასე, რომ რა შედეგი უნდა იყოს?! არაფერი! ვიხალისებთ და მოგვეცემა საშუალება და კიდევ ერთხელ დავცინოთ ამ ხელმოცარულებს. გვექნება წაგებისთვის გამზადებული კიდევ ერთი პლატფორმა ჭიჭესა და ჩემი ხაბეს ლიდერობით. ესაა და ეს! გავერთოთ. წინ გვაქვს მთელი საარჩევნო მარათონი“, – განაცხადა ზარქუამ.

„ერთიანი ნაციონალური მოძრაობისა” და „სტრატეგია აღმაშენებლის” ლიდერებმა ერთიანი პოლიტიკური პლატფორმის შექმნის შესახებ განცხადება გააკეთეს.