პირდაპირ ეთერში გვაყურებინა მილიარდერმა, ძალით მევახშე ბანკირმა, როგორ გამოაგდო მოქალაქე სახლიდან ზამთარში, ყინვასა და სიცივეში, – ამის შესახებ „ერთიანი ნაციონალური მოძრაობის“ თავმჯდომარე, ლევან ხაბეიშვილმა დღევანდელ ბრიფინგზე განაცხადა.

ის თბილისში, კეკელიძის ქუჩაზე, აღსრულების ეროვნული ბიუროს მხრიდან ოჯახის გამოსახლებას გამოეხმაურა და მომხდარში ხელისუფლება დაადანაშაულა.

„მილიარდერი ოლიგარქის პირობებში, დეკლარაციებში ავიწყდებათ სახლები, იმდენ სახლს, იმდენ ვილას იშენებენ, ტყეებს იერთებენ, 300 ათასი ლარის მაჯის საათი უკეთია პრემიერ-მინისტრს, ასი ათასობით ლარის ღირებულების ტილოები აქვთ სახლებში გამოფენილი, ასიათასობით ლარს ავტომობილში იხდიან. ამასობაში, პირდაპირ ეთერში გვაყურებინა მილიარდერმა, ძალით მევახშე ბანკირმა როგორ გამოაგდო მოქალაქე სახლიდან ზამთარში, ყინვასა და სიცივეში. ეს არის უმარტივესი – აქეთ ბიძინა ივანიშვილის სიმდიდრე, აქეთ ბიძინა ივანიშვილის გამდიდრება და აქეთ ქართველი ხალხის დოვლათი და ეკონომიკა, აქეთ საბანკო ოლიგარქია და პროცენტები, რომელიც კისერზე აწევს მოქალაქეს და ასევე, ევროკავშირის სესხები“, – განაცხადა ხაბეიშვილმა.

მისი თქმით, არჩევანი არის მარტივი – ევროკავშირის წევრობა უსწრაფესად, რაც გულისხმობს იმას, რომ საქართველოში არასდროს აღარ იქნება და 30 და 35%-იანი სესხები.

ლევან ხაბეიშვილის შეფასებით, ეს საბანკო ოლიგარქია თავიდან ბოლომდე ბიძინა ივანიშვილმა შექმნა.

„ბიძინა ივანიშვილის საბანკო ოლიგარქიის პირობებში, 18-ჯერ გაიზარდა ბანკების წმინდა მოგება და თქვენ თავს დაუსვით შეკითხვა, რა გაიზარდა 18-ჯერ? გარდა იმისა, რომ ფასები იმატებს, გარდა იმისა, რომ გაჭირვება გაიზარდა, გარდა იმისა, რომ ემიგრაციაში გარბის ხალხი. ამის პარალელურად, ერთადერთი, რაც ამ ქვეყანაში ყვავის, არის ბიძინა ივანიშვილის ხელმძღვანელობით საბანკო ოლიგარქია. შესაბამისად, დასვენების დღეებშიც კი გამოიმუშავებენ ისინი დაახლოებით 9 მლნ ლარს ყოველდღიურად, შაბათ-კვირასაც კი“,-განაცხადა ხაბეიშვილმა.

ცნობისთვის, თბილისში, კეკელიძის ქუჩაზე, აღსრულების ეროვნული ბიუროს თანამშრომლებმა, საცხოვრებელი სახლიდან ოჯახი ხმაურისა და პროტესტის ფონზე გამოასახლეს.

„ლელო“ და „ნაცმოძრაობა“ ერთ სივრცეში უნდა იყოს განხილული, როდესაც კოლექტიურ „ნაცმოძრაობას“ ვახსენებთ, იქ იგულისხმება „ლელოც“, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის თქმით, როგორც ჩანს, „ლელომ“ დახმარება „ნაციონალურ მოძრაობას“ სთხოვა, რაზეც თანხმობა იყო.

„როზნერის თემა ადასტურებს იმას, რომ პიარტექნოლოგიები, პიარკომპანია და ექსპერტები, რომლებიც „ნაცმოძრაობას“ ჰყავდა მოზიდული, იგივე რესურსია, რაც „ნაცმოძრაობის“ მხრიდან „ლელოს“ აქვს მიცემილი. როგორც ჩანს, დახმარება მათ სთხოვეს და მათაც არ დააყოვნეს. საუბარია, „ნაცმოძრაობის“ ერთ-ერთ ფრთაზე, რაც არ უნდა ილაპარაკოს „ლელოს“ ლიდერშიფმა, რომ ისინი სხვა პლატფორმაზე დგანან და სხვა იდეოლოგიით არიან აღჭურვილები. „ლელო“ როზნერამდე გზას „ნაცმოძრაობის“ გარეშე გაიგნებდა თუ არა? – ფაქტია, რომ „ნაცმოძრაობის“ რესურსი „ლელოს“ ემსახურება. ეს მოსალოდნელიც იყო, რადგან მათი რესურსი გადანაწილებულია იმ ორბიტაზე, სადაც მოძრაობს „ლელოც“, – განაცხადა ვოლსკიმ.

ყველა პოლიტიკურ პარტიას აქვს იმის უფლება, რომ დაიქირაოს პიარ კონსულტანტი. ეს ძალიან ჩვეულებრივი პრაქტიკაა, მათ შორის, იცით, რომ ლობისტების მთელი არმია ჰყავდათ დაქირავებული „ქართულ ოცნებას“, რომელსაც უხდიდა ძალიან ბევრ ფულს, – ამის შესახებ „ევროოპტიმისტების“ დეპუტატმა ხატია დეკანოიძემ ჟურნალისტებთან განაცხადა, რითაც მმართველი პარტიის წარმომადგენელთა განცხადებებს გამოეხმაურა პიარ კონსულტანტ როზნერთან დაკავშირებით, რომ 2012 წელს „ნაციონალური მოძრაობის“ პიარ კონსულტანტი იყო, წელს კი „ლელოს“ უწევს მომსახურებას.

დეკანოიძის თქმით, როზნერზე ნებისმიერი პროპაგანდის მცდელობა, რომ ერთ ქვაბში მოიხარშოს ყველა, ფუჭი მცდელობაა.

„ყველა პოლიტიკურ პარტიას აქვს იმისი უფლება, რომ დაიქირაოს პიარ კონსულტანტი. ეს ძალიან ჩვეულებრივი პრაქტიკაა, მათ შორის, იცით, რომ ლობისტების მთელი არმია ჰყავდათ დაქირავებული „ქართულ ოცნებას”, რომელსაც უხდიდა ძალიან ბევრ ფულს. ამიტომ, როზნერზე ერთი შემიძლია გითხრათ, ნებისმიერი პროპაგანდის მცდელობა, ერთ ქვაბში მოიხარშოს ყველა, ფუჭი მცდელობაა, რადგან ადამიანებს ეს უკვე ნანახი აქვთ და შესაბამისად, ვფიქრობ, რომ „ქართული ოცნების“ ეს პროპაგანდა შედეგს ვერ გამოიღებს 2024 წლის საპარლამენტო არჩევნებში.

კიდევ ერთხელ ვიმეორებ, რომ ნებისმიერ პარტიას შეუძლია ჰყავდეს პიარ კონსულტანტი, მათ შორის „ქართულ ოცნებასაც“ ჰყავს მოშე, რომელიც გამოირჩევა თავისი ძალიან სერიოზული ანტიდასავლური პოლიტიკით“, – განაცხადა დეკანოიძემ.